Yatiyañataki taman yatxatañataki machaq qillqata

LIYTʼASKTA aka Yatiyañataki sat revistaxa taman yatxatañataki nayrir qillqäwiwa. Jichhasti kunjamas aka revistaxa uka tuqit mä jukʼa qhanañchañ munapxirisma.

Yatiyañataki sat revistax taman yatxatañatak luratawa ukatsti Jehová Diosan Qhanañchirinakapataki ukat khitinakatï Bibliat yatiqasin nayrar sarantasipki jupanakampitakiwa. Yatiyañataki sat revistaxa sapa phaxsiw lurasini ukat pusi jan ukax phisqa yatxatañatak yatichäwinakanïniwa. Ukat wakichäwipaxa nayrir janankaniwa. Janiw jaqinakar churaski uka revistjamäkaniti, kunattix tamamp chika yatxatañatakikiwa, ukat Yatiyañataki sat revistax janiw uñnaqapanxa dibujonakanïkaniti, ukat aka revistampix janiw yatiyaskaniti.

Yatxatañataki uka yatichäwinakax kuna amtampis qillqata ukaxa payïr janan qillqatawa. Akax wali wakïskirïniwa khitinakatï tantachäwin Yatiyañataki sat revistampi sarayapkäni ukanakatakixa ukhamarus sum wakichtʼasipxañapatak yanaptʼani, ukhamat tamamp chika sum yatxatasiñapataki. Ukat uka pachpa jananxa yaqha yatichäwinakan pʼiqiñchäwinakapampiw qillqataraki.

Aka yatichäwinakax janiw nayrjam jachʼa yatichäwinakäxiti uk amuypachätawa. Ukhamax Yatiyañataki sat revistampi taman yatxatañäni ukhaxa, Bibliat apstʼat jiskʼa tʼaqanakatsa sum uñakipañatakix tiempox utjxaniwa. Ukhamax utan wakichaskasax Bibliat apstʼat taqpach qillqatanak liytʼapxañamatakiw chʼamañchanipxsma. Aka yatichäwinakan yaqhip chiqanakanxa “liytʼasiñapawa” sas qillqxatatawa, ukhamax Yatiyañataki revistatxa taman yatxataskañäni ukhaw liytʼasiñapa ukat sum amuykiptʼasiñaparakiwa. Tiempox utjaskani ukhaxa yaqha jiskʼa tʼaqanakas liytʼasirakispawa. Ukat yaqhip yatichäwinakanxa “uñxattʼarakismawa”sas qillqxattʼatarakiwa. Ukham uñstani ukhaxa, janiw tantachäwin liyiñatakïkiti, kunattix janiw yatichasiski ukar sint yanaptʼkiti. Janiw uka jiskʼa tʼaqanakax yatichaski uka tuqinakat qhan yatichkiti, jan ukasti amuytʼayañatakikiwa. Ukhamax wakichaskasaxa taqi uka qillqatanak liytʼañaw wakisispa, ukhamatwa tantachäwinakan arstʼasax uka jiskʼa tʼaqanakat arstʼarakismaxa.

Mä maranxa kunjamsa irnaqtʼasiwayi ukax janiw Yatiyañataki sat revistan mistxaniti. 2008 maratxa Diosan Apnaqäwipat Yatiyañataki sat qillqat taypi jananakapanwa yatiyasxani, ukat Anuario libronxa mistuskakiniwa. Ukhamaxa, kunjamtï sawayktanxa tamamp yatxatañataki revistanxa yaqha yatichäwinakaw utjarakini. Uka yatichäwinakax janis tantachäwinakan uñakipaskchinixa, taqiniw ‘Amuyasiri Chiqapa Uywatan’ qillqatanakapatxa yatxatapxañasa, jupanakax manqʼäkaspas ukham manqʼayaskistu (Mat. 24:45-47).

Amtapxañäni, taman yatxatañataki revistampi ukat taqinitak revistampixa janiw pä sutin yaqha yaqha revistanakäkaspas ukhamäkiti, jan ukasti paypach revistanakax mä sutinikiwa: Yatiyañataki. Jehová Diosan Apnaqäwipat yatiyaski. Ukatpï kuna amtamp luratas aka Yatiyañataki sat revistax ukxa pä janan ukat payïr tʼaqanwa paypach revistan kikpa arunakamp qhanañchasi. Ukhamaraki, paypach Yatiyañataki sat revistanakax marpachat sapa mayni mä libron misturakini. Ukat mä chiqax utjarakiniwa akham sata “¿Amtasktati?” ukax tamamp yatxatañataki revistan uñstani, ukampis uka qillqatan yatichäwinakapaxa paypach revistat apsutäniwa.

Akapachan chʼaxwañanakas utjaskpan, qullqit pistʼañanakas utjaskpan, uñisiñat arknaqatäñas utjaskpan Yatiyañataki sat revistax 1879 marat aksaruw Diosan Apnaqäwipat yatiyaski. Kuna amtampitix aka revistax lurätaki uk phuqasiñapatakix Jehová Diosaruw yanaptʼapa ukat bendicionapa wal mayipxta. Ukat jumax aka qillqatat askinak apsuñamatakisa mayipxaraktwa.