Chuymankipstatanakarux Jehová Diosax wali munasiñampiw uñji

“Diosax janiw jan chiqäkiti jumanakan luräwimata armasiñatakixa, sutiparu munapxatama uñachtʼayapxatamatsa.” (HEB. 6:10, MT.)

1, 2. 1) Chuymankipstat janqʼu ñikʼutan jilat kullakanakasar uñjasaxa, ¿khititsa amtastanxa? 2) ¿Chuymankipstat jilat kullakanakarux kunjamsa Jehová Diosax uñji?

 CHUYMANKIPSTAT janqʼu ñikʼutan jilat kullakanakasar uñjasaxa, inas amtstan kuntï Daniel profetax qillqkäna ukxa. Daniel profetasti mä visión uñjasax akham sasaw qillqäna: “Nayasti uñchʼukiskakïyätwa, ukxarusti mä trononakaw uchatarakïna, mä Jilïri chuymani jaqiw quntʼasirakïna, isipax khunjam janqʼurakïnwa, ñikʼutanakapasti tʼaxsit tʼawrjamaraki” sasa (Dan. 7:9).

² Jan teñit tʼawraxa janqʼuwa, ukatwa Daniel profetax Diosan ñikʼutapat parlañatakix uka tuqit parlpachäna. Janqʼu ñikʼutanïtapasa, “Jilïr Chuymani” sutinchapasa wiñay Diosätapa ukat wali yatiñanïtapa uñachtʼayistu. Ukatwa Diosarux wali respetompi uñjtanxa. ¿Kunjamsa Jehová Diosax chuymankipstat luqtirinakaparux uñji? Bibliax akham siwa: “Janqʼu ñikʼutanïxañaxa mä suma coronjamawa, chiqa thakin sarnaqatata jikxatataxa” (Pro. 16:31). Jïsa, Diosat jan jithiqtir chuymankipstat jilat kullakanakaxa Diosampix wali sum uñjatäpxiwa. Jumasti, ¿ukhamarakti chuymankipstat jilat kullakanakarux uñjarakta?

¿Kunatsa wali munatäpxi?

3. ¿Kunatsa chuymankipstatanakarux wal munastanxa?

³ Uka chuymankipstat jilat kullakanak taypinsti jikxatasipxarakiw Uraqpachan Uñjiri Jilïr Irpirinaka, tamanak tumptʼirinakäpkäna jan ukax tamanak tumptʼirikïsipki uka jilatanaka, ukhamaraki taqi chuyma irnaqtʼir precursoranaka ukat Diosat jan jithiqtas luqtiri jilat kullakanaka. Jehová Diosat jan jithiqtas walja maranaka taqi chuyma suma yatiyäwinak yatiyir jilat kullakanakarux uñtʼpachätawa, ukax wayn tawaqunakatakix yatiqaskayawa. Yaqhip chuymankipstat jilatanakaxa walja luräwinakwa taman katuqapxi, suma yatiyäwinak yatiyañ laykux arknaqataw uñjasipxaraki. Kunanaktï chuymankipstat jilat kullakanakax Diosan Apnaqäwip layku lurawayapki jan ukax lurasipkaki taqi ukanakatxa walpunwa Jehová Diosampi ukat ‘Amuyasiri Chiqap Uywatampix’ yuspärapxi (Mat. 24:45, MT).

4. ¿Kunatsa chuymankipstatanakarux respetompi uñjañasa ukat Diosatsa jupanakatakix mayirapiñasa?

⁴ Uka jilat kullakanakax munasiñampi respetompi uñjatäpxañapawa. Moisesan katuqat Leyirjamaxa, chuymankipstatanakar suma amuyumpi, respetompi uñjañaxa, Jehová Diosar axsarañ sañ munaraki (Lev. 19:32). Chuymankipstat jilat kullakanakatakix Diosat mayirapipxañasawa ukat Jehová Diosar taqi luräwinakapatsa yuspärañasarakiwa ukanak janipuniw armañasäkiti. Apóstol Pablox wayn tawaqunakatakisa, jilïrinakatakisa Diosat mayirïnwa (1 Tesalonicenses 1:2, 3 liytʼasiñapawa).

5. ¿Kunatsa chuymankipstat jilat kullakanakatxa yatiqassna?

⁵ Taqiniwa tamanxa jilïr jilat kullakanakatxa yatiqassna, kunattix wali yatiñanïpxiwa, walja maranak Diosar luqtapxatapata ukat Bibliat yatxatapxatapat layku. Uka jilat kullakanakaxa paciencia chuymanïñwa yatiqawayapxi ukat kuntï yatipki ukanakat wayn  tawaqunakar yatichasaxa kusisiñ jikxatapxi (Sal. 71:18). Kunjamtï phujut um apsuñataki wal chʼamañchtʼasiñaxa ukhamarakiw wayn tawaqunakax jupanakat yatiqasiñatakix wal chamañchtʼasipxañapa (Pro. 20:5).

6. ¿Chuymankipstat jilat kullakanakasax jupanakar wal munasitas yatipxañapatakix kuns lursna?

⁶ Jehová Diosax jilïr jilat kullakanakarux wal munasi, ¿jiwasax uka kikparaki jupanakar munasirïtas yatipxañapatakix kuns lursna? Akham saraksnawa: jumanakan Diosar taqi chuyma luqtapxatamatxa wal munasipxsma ukat kuntï sapktas ukax wali askiw nänakatakixa sasa. Maysa tuqitxa iwxanakapar istʼasarakiwa arunakasax chiqätap uñachtʼayañäni. Jupanakasti ukhamarakiw wayn tawaqüsipkäna ukhax lurapxäna. Chuymankipstat jilat kullakanakax iwxtʼapkäna ukhaxa jupanakax wali sum katuqasipxirïna ukhamatwa jakäwipansa askinak apsupxaraki. *

Munasiñas uñachtʼayañatakixa kunanaksa lursna

7. ¿Khitinakas chuymankipstatanakar uñjapxañapa?

⁷ Chuymankipstatanakarux familiapaw uñjañapa sasaw Jehová Diosax qhanañchi (1 Timoteo 5:4, 8 liytʼasiñapawa). Familianakapax chuymankipstatanakar sum uñjapxañapa ukhamaraki respetapxañapwa Diosax muni, kunjamtï Jupax lurki ukhama. Ukham sum uñjañataki wal chamañchtʼasiri familianakax Diosan yanaptʼapa, bendicionapsa katuqapxarakispawa. *

8. ¿Tamankirinakax kunatsa chuymankipstat jilat kullakanakat llakisipxañapa?

⁸ Ukampisa, kawkïr chuymankipstat jilat kullakasantï familiapax jan iyawsirïpkchi jan ukax jan uñjañ munapkchi ukhaxa tamankir jilat kullakanakaw uñjapxañapa ukwa Jehová Diosax muni (1 Tim. 5:3, 5, 9, 10). Ukhamatwa, tamanxa jila purjam munasirïpxatapsa ukat khuyapayasirïpxatapsa uñachtʼayasini (1 Ped. 3:8). Maynit maynikama taqi chuyma yanaptʼasiñ tuqit sum qhanañchañatakixa, apóstol Pablox cuerposan mayawjatix tʼaqhischi ukkhaxa “taqpacharakiw tʼaqhisi” sasaw  säna (1 Cor. 12:26). Chuymankipstat jilat kullakanakar yanaptʼañäni ukhaw Pablon aka iwxaparjam lursnaxa: “Yanaptʼasipxam maynit maynikama taqi kuna apañanakanxa, ukhamanwa Criston leyip phuqhapxäta” (Gál. 6:2).

9. ¿Kuna “chʼama tukuñanakansa” chuymankipstat jilat kullakanakax jikxatasipxi?

⁹ ¿Kuna “chʼama tukuñanakansa” chuymankipstat jilat kullakanakax uñjasipxi? Yaqhip chuymankipstat jilat kullakanakax ratukiw qarjtapxi ukat kuna luräwinak uñjasasa wal llakisipxi sañäni: Doctorar saraña, tramitenak luraña, uta qʼumachaña jan ukax phayaña. Chuymankipstatäxasinxa janiw manqʼsa umsa nayrjam munxapxiti, yaqhip chuymaninakax janiw sums manqʼtʼasxapxiti ni umsa umxapxiti. Diosar luqtäwipanxa niya ukhamarakïspawa. Yaqhip jilat kullakanakaxa janiw sum uñjxapxiti uqaräxapxarakiwa ukatwa Bibliat apstʼat qillqatanaksa jan liytʼxapxiti ni tantachäwinakansa sum istʼxapxiti. Mä tantachäwitak wakichtʼasiñas chʼamäspawa. ¿Jupanakar yanaptʼañatakix kuns lursna?

Kunjams yanaptʼsna

10. ¿Chuymaninakar yanaptʼañatakix kunsa irpir chuymaninakax lurapxi?

¹⁰ Walja tamanakaw chuymankipstat jilat kullakanakarux wali suma uñjapxi. Alir sararapipxi, utapsa qʼumachapxi ukat manqʼsa phaytʼarapipxi ukhamawa. Ukat Bibliat yatxatañsa, tantachäwinakar sarañsa, utat ut jan jaytas yatiyir sarapxañapatakisa yanapapxarakiwa. Ukhamarakiw kawkirutï sarañ munapxchi ukarus irpapxi. Ukat utattï jan mistsurjamäpkchixa, taman arstʼäwinakap grabtʼarapipxi jan ukax telefonot istʼapxañapatakis wakichtʼapxaraki. Irpir chuymaninakaxa tamankir jilïr jilat kullakanakatakix kunanakas munasi ukanak waktʼayañatakiw chʼamachtʼasipxi. *

11. Mä chuymankipstat jilatarux kunjamsa mä familiax yanaptʼatayna uka tuqit arstʼma.

¹¹ Ukampisa sapa mayniw chuymankipstat jilat kullakanakasar yanaptʼañ qalltsnaxa ukat utasar katuqtʼañataki khuyaptʼayasirïñasataki chamachtʼasiraksnaxa. Mä experiencia uñjañäni. Mä chuymankipstat jilatan warmipaw jiwxäna, ukat alquileratakix janiw qullqix utjxänti kunattix mä pensionakwa (renta) katuqxäna. Warmipampix mä chacha warmiru ukat pä qʼaxu tawaq phuchhanakapampiruw Bibliat yatichapxirïna. Uka jilatan jan walin uñjasitap laykuw uka familiax utapar jawstʼäna ukat pä jiskʼa ut churäna kunattix jachʼa utanïpxänwa. Uka jilatax familiapäkaspas ukhamaxänwa, ukat 15 maranakaw wali sum qamasiwayapxäna. Tawaqitanakaxa uka jilatan iyawsäwipata ukat wali yatiñanïtapatsa wal yatiqawayapxäna, ukhamarakiw uka chuyman jilatax jupanakampïsax wal kusisïna. Uka jilatasti jiwañkamaw uka familiampix qamawayi, 89 maraniw jiwawayxäna. Chuymankipstat jilatampi utapan qamawayapxatapatxa wal uka familiax Jehová Diosar yuspärapxi, jupanakatakix mä bendicionjamänwa. Uka chuymankipstat jilatar yanaptʼapxatapatxa uka familiax mä suma churäwi katuqawayapxi (Mat. 10:42). *

12. ¿Chuymankipstat jilat kullakanakarux kunjamsa munasiñas uñachtʼaysna?

¹² Inas uka familjam jan yanaptʼkchiñäniti, ukampisa yanaptʼsnawa tantachäwinakar irpasa jan ukax jupanakamp yatiyïr sarasa. Utasar invitʼsna, pasiytʼir sarktan ukarus irparaksnawa. Wali usutächi, utat jan mistsurjamäpkchi ukhasa visittʼapxapuniñäni. Kunjamäpansa, jupanakar respetapxañasawa kunattix jilïr jaqinakäpxiwa. Suma amuyunïsipkchixa, jupanak tuqit kun amtañatakis jisktʼañasapuniwa. Jan sum amuytʼasxapxi ukhasa, jupanakarux respetompit uñjasktan janicha uk amuyapxiwa.

Kunanaktï lurawayapki ukxa janiw Jehová Diosax armaskaniti

13. ¿Chuymankipstat jilat kullakanakasan amuyunakap sum uñjañax kunatsa wali askixa?

¹³ Chuymankipstat jilat kullakanakasax kunjamsa jikxatasipxi uk amuyañasawa. Wayn  tawaqükasax kunanaktï lurapxirïkäna ukanak jan lurirjamäxasax awispax wal llakisipxaspa. Sañäni, mä kullakaxa 50 jila maranakaw Diosar luqtäna ukampis usutaw jikxatasxäna tantachäwinakar sarañas jupatakix wali chʼamäxänwa. Mä kutixa, kunanaktï precursorjam irnaqasax luririkäna ukanak amtasax jachaqtʼasïnwa. Jachtʼasisaw akham säna: “Jichhax janiw kun lurirjamäxti” sasa.

14. ¿Salmo qillqatanakax kunjamsa chuymankipstatanakarux chuymachi?

¹⁴ Jumatix chuymanïxstaxa, ¿ukham jikxatasirïtati? ¿Jehová Diosax armaskiristamsa ukhamt amuyasta? Davitax ukhamarakwa chuymanïxasax jikxataspachäna, kunattix akham sasaw Jehová Diosat mayisïna: “Janikiy chʼama qarit tuqir jiskʼachistati, chʼamaxax tukusiskiwa, janikiy jaytanukustati. [...] Diosaxay, chʼama qarit pachan uñjaskasasa, janqʼu ñikʼutan pachankkasasa, janikiy jaytanuktʼasistati” sasa (Sal. 71:9, 18). Chiqpachansa, Jehová Diosax janiw Davitat armaskänti, janirakiw jumat armaskaniti. Yaqha salmo qillqatansti, Davitax taqi chuymaw Diosar atinisïna (Salmo 68:19 liytʼasiñapawa). Ukhamasti, jumatï Diosat jan jithiqtkätaxa Jupaw jumampïskani, ukat sapürutjamaw yanapaskätamxa.

15. ¿Kunatï askïki ukanak lupʼiñatakix kunanaksa chuymaninakax lurapxaspa?

¹⁵ Kuntï Diosar jachʼañchañataki lurawaykta jan ukax luraskakta ukanakxa janipuniw Jehová Diosax armaskaniti. Jupasti “janiw jan chiqäkiti jumanakan luräwimata armasiñatakixa sutiparu munapxatama uñachtʼayapxatamatsa” (Heb. 6:10). Ukhamasti, jan wali amuyunakampix jan atipayasimti. Jehová Diosatakix janis kuns lurirjamäsma ukham amuyasax jan pantjasimti. Kunanakatï askïki ukanakakwa lupʼiñama, sañäni: bendicionanak katuqawaykta ukanakata, ukat wali suma suytʼäwinïtamatsa lupʼirakismawa. Cristianonakax jutïr urunakatak jan kikpan mä suma ‘suytʼäwinïtanwa’, Jehová Dios pachpaw uka suytʼäw churistu (Jer. 29:11, 12; Hech. 17:31; 1 Tim. 6:19). Kuna suytʼawtï Diosax churktam uka tuqit lupʼiñamawa, wayn tawaqükasmas ukham Diosar luqtañatakix chʼamachasim ukat tamankirinakatakis wali askiw juman tamankañamaxa ukxa janipun armasimti. *

16. ¿Mä chuymankipstat jilataxa kunatsa irpir chuymanjam jan irnaqtʼañ munxäna, ukat kunas jan ukham amuyxañapatakix yanaptʼana?

¹⁶ Juan sat mä irpir chuyman jilatat parltʼañäni, jupasti 80 maraniwa, Diosat jan jithiqtiri Sara warmiparuw jurnälpach uñji warmipasti wali usutawa. * Uka jilatax tantachäwinakar sarañapatakisa yatiyir mistsuñapatakisa walja kullakanakaw mayn maynirak Sara kullakar uñjir sarapxi. Ukampisa Juan jilatax ukham llakinakan jikxatasisax janiw irpir chuymanïxiristti sasaw amuyxarakïna. Ukat jachtʼasisaw akham säna: “¿Kuna askirak nayan irpir chuymanïñaxasti? Janixay kuna askinaksa taman lurxstixa” sasa. Mayni irpir chuymaninakasti sum amuytʼasim sapxänwa, ukat akham sapxarakïnwa: jumax jukʼaks lurxstaxa wali yatxattʼatätamax wal nänakarux yanaptʼapxitu, sasa. Ukham arunakampi wal chʼamachtʼatäsaxa Juan jilatax irpir chuymanjam irnaqtʼaskañak amtäna, ukax tamarux wal kusisiyäna.

Chuymankipstatanakarux Jehová Diosax wal munasi

17. ¿Chuymankipstat jilat kullakanakarux kunjamsa Bibliax chuymachtʼi?

¹⁷ Chuymankipstatanakax jan waltʼäwinakan uñjaskasasa Diosarux luqtasipkakispawa sasaw Qullan Qillqatanakax qhanañchi. Salmo qillqtʼirix akham sänwa: “[Jehová] Tatitun utapan  ayruntatäpxiwa, Diosasan uyupan panqarapxi; chʼama qarita tuqirus achu churasipkakiniwa, suma laphintata, chʼumintataw saytʼapxani” sasa (Sal. 92:13, 14). Apóstol Pablox usutarakïpachänwa kunattix akham sänwa: “Janipuni[w] nanakax mayjtʼasipkti [...] janchinakaxax sapürusa aynacharus sarxchi ukasa” sasa (2 Corintios 4:16-18 liytʼasiñapawa).

18. ¿Chuymankipstatanakarusa jupanakar uñjirinakarusa kunatsa yanaptʼañasa?

¹⁸ Chiqasa, chuymankipstatanakax ‘achu churasipkakispawa’, jichhürunakanxa ukham uñjasiskaraki. Chiqasa, familiapan yanaptʼatäkasasa chuymaninakatakix wali chʼamaw uka jan waltʼäwinakaru ukat usunakaru saykatañaxa. Ukat khitinakatï jupanakar uñjasipki ukanakatakis chʼamarakispawa. Ukhamaxa tamaw chuymankipstatanakarusa uñjirinakaparusa munasiñ uñachtʼayañapa, uk lurañxa mä suma churäwjamaw uñjapxañapa (Gál. 6:10). Janiw aliqakix “janxatasim, manqʼasirakim” sasax sisktanti; jan ukasti kunampiy yanapirjamästan ukampiw yanaptʼtanxa (Sant. 2:15-17).

19. ¿Jutïr urunakat lupʼisax kunarus chuymaninakax atinisipxi?

¹⁹ Janis nayrjam Diosar luqtxapxchixa, walja tiempos pasaskpan Jehová Diosax chuymankipstat luqtirinakaparux munasiskapuniniwa. Jupat jan jithiqtir chuymankipstat luqtirinakaparux wal Diosax munasi, janipuniw jupanakat armaskaniti (Sal. 37:28; Isa. 46:4). Chiqpachansa, Diosax chuymankipstatanakarux uñjaskaniwa ukat irpnaqasiskarakiniwa (Sal. 48:14).

[Qhanañchäwinaka]

¿Kamsasmasa?

• ¿Chuymankipstatanakax kunatsa wali munatäpxi?

• ¿Kunjamsa chuymankipstat jilat kullakanakasarux munasiñ uñachtʼaysna?

• ¿Kunasa chuymankipstatanakarux kunatï askïki ukak lupʼiñatakix yanaptʼani?

[Jisktʼanaka]

[18 janan fotonakapa]

Chuymankipstat jilat kullakanakarux tamax wal munasi