Escuela de Galaad sat yatichäwit graduasirinaka, clase 124

Misioneronakax tʼiju tʼijunakamp sasiwa

ESCUELA Bíblica de Galaad de la Watchtower sat yatichäwit graduasxapxi ukhaxa, Estados Unidos markankir Betelan irnaqtʼir jilat kullakanakax taqiniw invitatäpxi. 2008 marzo phaxsit 8 urunak saraqataruxa, 30 yaqha markanakatwa invitadonakax yatiqirinakan graduacionaparux sarapxäna. Taqpachanix 6.411 jaqinakaw uka suma urun graduasirinakamp chikapxäna.

Uka wakichäwi sarayirixa Stephen Lett sat jilatänwa, jupasti Uraqpachan Jilïr Irpirinakat maynïriwa, “Tʼiju tʼijunakjam Jehová Diosar yupaychirinakamp chika sarantapxma” sat arstʼäwimpiw qalltarakïna. Apocalipsis 9:1-4 qillqatanxa, qullan ajayumpi ajllit jiskʼa tamax Diosar yupaychäwipan ikitsa sartapkaspa ukhamaruw uñtayasi, 1919 maranwa walja tʼiju tʼijunakjam mäki sartasipxi. “Yaqha ovejanakjamaxa”, tʼiju tʼijunakjam irnaqtʼir jilat kullakanakampiw chikachasipxtax sasaw yatiqirinakarux amtayasïna (Juan 10:16).

Estados Unidos markan Betel utan pʼiqtʼirinakat (Comité de Sucursal) maynïrix Lon Schilling sat jilataw “Jaqichasitanakax purapat yanaptʼasipxañapawa” sat arstʼäwi arstʼäna. 28 matrimonionakar yanaptʼañatakiw nayra maranakan jakasir Aquila ukat Priscila chacha warmit arstʼäna (Rom. 16:3, 4). Kawkirutï misionerjam sarapkäta ukan sum irnaqtʼañatakix chacha warmix mayachtʼataw irnaqtʼapxañama sasaw qhanañchtʼäna. Biblianxa janipuniw Aquila sapatak parlkiti jan ukasti Priscila warmipamppachatwa parli, taqi kunsa panini luririt uñtʼatäpxapunïnwa ukwa Pablos tamankirinakasa amuyapxäna. Misioneronakax ukhamarakiw panpachani yatiyir sarapxañapa, Diosat mayisipxañapa, Bibliatsa yatiqapxañapa, ukat jan waltʼäwinakarus panipaw saykatapxañapa, mä arunxa purapat yanaptʼasipxañapawa (Gén. 2:18).

Ukxarusti “Jehová Diosan munasiñapat yatiqasipxañäni” sat arstʼäwimpiw Guy Pierce sat jilatax arstʼaniraki, jupasti Uraqpachan Jilïr Irpirit maynirakiwa. Munasiri suma jaqïki ukax janiw jan walinakak uñiskiti jan ukasti kunatï askïki uk lurañatakiw chʼamachasi. Ukampis Jehová Diosjam munasirix janiw utjkiti (Zac. 9:16, 17). Diosan wali munasirïtap laykurakiw yaqhanakarus kunatï askïki uk lurañ muntanxa. Tukuyañatakisti Pierce jilatax yatiqirinakaruw akham sasaw chamachtʼäna: “Jumanakax wali munasir jaqïpxatam uñachtʼayxapxtaxa. Diosan munasiñap uñachtʼayañxa janipun armasipxamti, kawkirutï Jehová Diosax khithapkätam ukanxa jaqinakarux yanaptʼasipkakiñamawa” sasa.

Ukxar arstʼiristi Michael Burnett jilatänwa, jupasti misionerotwa irnaqtʼaskäna, jichhakiw Escuela de Galaad ukan yatichirjama uttʼayataxa. Arstʼäwipan pʼiqiñchäwipasti akänwa, “Para patanakamaruw mä señal apapxäta”. Mä milagron Egiptot qhispayasipkäna ukaxa israelitanakatakix ‘para patanakaparux mä señaljamäñapänwa’; mä arunxa kunjam qhispiyatäpxansa uk janiw armasipxañapäkänti (Éxo. 13:16). Ukhamarakiw Escuela de Galaad ukan yatiqawayapkta ukanakxa ‘para patanakamar mä  señaläkaspas’ ukhamawa, ukxa janipuni armasipxamti sasaw yatiqirinakarux iwxtʼäna. Misioneronakjamax altʼat chuymanïña, kuntï lurirjamäpki ukanak luraña, ukat kuna jan waltʼäwinsa jupanak purasa jan ukax yaqhanakampisa Bibliarjam askichapxañapax wali askipuniw sasaw Burnett jilatax qhanañchäna (Mat. 5:23, 24).

Wali yatxattʼat Escuela de Galaad ukan yatichiri, Mark Noumair jilataxa, “¿Kawkïrinisa qʼuchumaxa?” sat arstʼäwi qhanañcharakïna. Biblia qillqaskäna uka tiemponakanxa guerranakan atipjasinxa kusisiñat qʼuchtʼañatakiw qʼuchunak qillqtʼapxirïna. Mä qʼuchunakapanxa Rubén, Dan ukat Aser tribunakan jakäwip jan aptʼasiñ laykux jan guerrar sarañ munapxatapaw qhansti; ukampis Zabulón tribux jakäwip aptʼasirjamäsinsa guerrar sarapxatapatxa wal jachʼañchasïna (Jue. 5:16-18). Mä arunxa, khitinakatix uñjkistu ukanakax qʼuchupkaspas ukham suma luräwinakasat parlapxi. Kunapachatï Jehová Diosatak taqi chuyma irnaqtʼañataki chʼamachastan ukat Diosan taqi  mayitanakapar istʼktan ukhaxa janiw Diosarukix kusisiyktanti jan ukasti jilat kullakanakasax yatiqasipxarakispawa, jupanakarakiwa uka “qʼuchu” jan ukax suma luräwinakasat yatiqasisax ukham lurañ munapxarakispa.

Escuela de Galaad satäkis clase 124 yatichäwin yatiqirinakaxa, taqinix mä 3.000 horanakwa yatiyawayapxi. Sam Roberson sat jilataw “Qullan ajayumpi irpayasipxañäni” sat arstʼäwi arstʼaraki, jupasti Departamento de Escuelas Teocráticas satäkis uka taypin irnaqtʼaskaraki, arstʼäwipansti yatiyir sarapxatapat experiencianakapa arstʼapxañapa ukat uñachtʼayapxañapwa mayïna. Ukxarusti, Estados Unidos markan Betel utan pʼiqtʼirinakat (Comité de Sucursal) mayniri, Patrick LaFranca sat jilataw Escuela de Galaad ukat mistusin yaqha markanakan irnaqtʼasipki uka jilat kullakanakaruw entrevistaraki. Yatiqirinakax uka iwxtʼanakapxa wal yuspärapxäna.

Qhip qhipa arstʼäwin pʼiqiñchapasti akänwa, “Amtapxapunma, kunatix uñjaski ukanakasti tukusirikiwa”, uka arstʼäwisti Jilïr Irpirinakat mayniriwa Anthony Morris sat jilataw arstʼäna. Llakinakaxa tukusirikiwa ukanakampix janiw atipayasiñasäkiti, jan ukax jutïr urunakan kuna bendicionanakas utjani ukanakat lupʼiñasawa sasaw Bibliax chʼamañchistu (2 Cor. 4:16-18). Pisinkañasa, ina chʼusat tʼaqhisiñasa, llakinakasa, usuntañasa ukat jiwañasa aka Uraqpachan phuqantatawa, ukham llakinakan jikxatasirasknawa. Ukampis uka jan waltʼäwinakax tukusirikïtap amtapxapuniñäni ukhaxa suytʼäwisax janiw chhaqtkaniti, Diosar luqtäwisansa suma saytʼatakïskañäniwa

Diplomanak churxasaxa, Lett sat jilataw plataformankaskir graduasirinakarux qhip qhipa arunak arstʼaraki. Diosatxa janipun jithiqtapxamti sasaw iwxtʼäna, ukat sarakïnwa: “Jehová Diosan yanaptʼapampix janiw khitis Jupat jithiqtaykistaniti” sasa. Tʼiju tʼijunakjam jan qarjtasa, taqi chuyma, Diosat jan jithiqtasa ukat istʼasapuni, Jehová Diosatak irnaqtʼasipkakim sasaw machaq misioneronakarux iwxtʼäna.

[30 janan recuadropa]

YATIQIRINAKATA

Qhawqha markanakatsa jutapxi: 7

Qhawqha markanakarus sarapxani: 16

Qhawqhanis yatiqirinakaxa: 56

Qhawqha maranakanïpxisa: 33,8

Qhawqha maranakas bautisatäxapxi: 18,2

Qhawqha maranakas precursorjam irnaqtʼxapxi: 13,8

[31 janan fotopa]

Escuela Bíblica de Galaad de la Watchtower sat yatichäwit graduasirinaka, clase 124

Nayräxat qhiparuwa jakhuñ qalltasiski, sutinakapasti chʼiqat kupi tuqiruwa uñstaraki.

1) Nicholson, T.; Main, H.; Senge, Y.; Snape, L.; Vanegas, C.; Pou, L. 2) Santana, S.; Oh, K.; Lemaitre, C.; Williams, N.; Alexander, L. 3) Woods, B.; Stainton, L.; Huntley, E.; Álvarez, G.; Cruz, J.; Bennett, J. 4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. 5) Lemaitre, W.; Harris, A.; Wells, C.; Rodgers, S.; Durrant, M.; Senge, J. 6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. 7) Zuroski, M.; Rodgers, G.; Diemmi, D.; Nicholson, L.; Álvarez, C.; Snape, J. 8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. 9) Cruz, P.; Degandt, B.; Williams, D.; Wells, S.; Alexander, D.; May, M.

[32 janan fotopa]

Escuela de Galaad sat yatichäwixa Centro Educativo de la Watchtower ukanwa jikxatasi