Aka revist liytʼirinakan jisktʼäwinakapa

Hebreonakar carta qillqatapanxa, apóstol Pablox “amparanak uchañxata” parläna ukhaxa, ¿irpir chuymaninak uttʼayañatti parlaskänxa, jan ukax yaqhampitcha? (Heb. 6:2.)

Janiw ukhamapuniw sisksnati, ukampisa amparanak uchañxata parlkäna ukhax inas qullan ajayun milagro lurañ churäwinakapat parlaskchïna.

Chiqasa, Biblianxa ukanakatxa parliwa, kunjamtï Diosar luqtañatakix amparamp uchxatasa uttʼayapkäna uka tuqinakata. Moisesax Josué chacharux ‘amparanakap luqxatäna’ ukhamat jupa lanti pʼiqtʼañapataki (Deu. 34:9). Ukhamarakiwa khitinakatï tama taypin yatxattat jilatanakäpkäna ukanakarux amparanakap luqxatasaw uttʼayapxäna (Hech. 6:6; 1 Tim. 4:14). Uka tuqitwa Pablox Timoteor iwxtʼaskäna kunapachatï jan ratuki khiti chacharus amparanakap luqxatas uttʼayamti siskäna ukhaxa (1 Tim. 5:22).

Ukampisa, Hebreonakar carta qillqatapanxa, Pablox “qallta yatichäwinak” maysar apanukusa “nayrar saranta[pxañapataki] jachʼa jaqir tukuñkama” chʼamachasipxañapatakiw chʼamañchtʼaskäna. Ukat parlarakïnwa “arrepientisiñata, ukhamarak Diosar iyawsañampita, bautismo tuqit yatichäwimpita, iyawsirinakxaru amparanak uchañxata” (Heb. 6:1, 2). ¿Irpir chuymaninakar uttʼayañat parlkasaxa, cristianonakax qallta yatichäwikïkaspasa ukhamti uñjapxañapäna ukat uk jaytasax jachʼa jaqir tukuñkama nayrar sarantasipkakiñapat wakisïna? Janiwa. Khitinakatï taman suma yatxattʼatäpki uka jilatanakaw irpir chuymanjam uttʼayata, ukat uka luräwirux wali aski churäwjam uñjasiñapa (1 Tim. 3:1).

Ukampisa janiw jilatanakar uttʼayañatakikit amparamp luqxatapxirïkänxa. Nayrïr patak maranakanxa, Jehová Diosax Israel markarux jaqunukünwa, janiw markapäxänti, uka lantisti Diosan Israelapaw uttʼayatäxäna, ukax ajllit cristian tamawa (Mat. 21:43; Hech. 15:14; Gál. 6:16, MT). Milagro lurañ churäwinakawa, sañäni, jan uñtʼat arunak parlaña, ukax mä uñachtʼäwinwa Diosan Israelapax katuqatäxatapa (1 Cor. 12:4-11). Amuytʼañataki, Cornelio chachasa utapankirinakasa ‘yaqha arunakat parlxapxäna’ ukhaw qullan ajayu katuqapxatap yatisïna (Hech. 10:44-46).

Awisax milagro lurañ churäwinakaxa amparamp luqxatasaw churasïna. Kunapachatï Felipex Samaria markan suma yatiyäwinak yatiykäna ukhaxa, waljaniw bautisasipxäna. Ukat Jilïr Irpirinakaxa Pedro ukat Juan uka apostolanakarux Samariar khitapxäna. ¿Kuna amtampis khitasïna? Liytʼañani: “Pedrompi Juanampisti amparanakapwa [ukhaki bautisasipkäna] jupanakxar uchapxäna. Ukatwa jupanakax qullan ajayu katuqapxäna”. Chiqpachansa, akax sañ munänwa taqinin uñjkaya luräwinaka, mä arunxa milagro lurañ churäwinak katuqapxatapa. Akax yatisiwa kunattixa Simonaxa nayrax layqänwa, jupax qullan ajayun chʼamap uñjasaxa qullqimpiw alañ munäna, ukatwa akham säna: Nayar uka chʼam churapxarakita, kunapachatï nayax khitxarus amparanakax uchkä ukkhaxa, jupax qullan ajayu katuqañapataki, sasa (Hech. 8:5-20). Uka qhipatsti Éfeso markanxa tunka payan arkirinakawa bautisasipxäna. Yatiyäwix akham siwa: “Kunapachatïx Pablox amparapamp jupanakxar luqxati ukkhaw qullan ajayux jupanakxar jutäna. Ukatsti jupanakax jan uñtʼat arunakwa parlapxäna” sasa (Hech. 19:1-7; uñxattʼarakismawa 2 Timoteo 1:6).

Ukhamaxa, Hebreos 6:2 qillqatarjamax inasa machaq arkirinakar amparamp luqxatasa milagronak lurapxañapata, Pablox parlaskchïna.