Diosar ‘jukʼamp sum uñtʼañatakix’ ‘taqi chuyma’ chʼamachasiñäni

TAQPACH cristianonakaw Jehová Diosamp iyawsatäñ muntanxa. Ukatwa iyawsäwisax chʼullqiptañapa ukat qullan luräwisansa taqi chuyma irnaqtʼañ muntanxa. Ukampisa, Pablox tiempopan jakasir judionakarux kunas jan waltʼaykäna uka tuqit akham iwxtʼistu: “Jupanakanx Diosatak munañ chuymax utjaskiwa, ukampis jupanakan Diosar munañax janiw chiqpach amuytʼañxankiti” sasa (Rom. 10:2). Jehová Diosar atinisitasasa ukat yupaychäwisasa janiw ukhamakiñapäkiti ukwa uka arunakax amuytʼayistu. Jan ukasti, Luririsaru ukat amtanakapsa sum uñtʼañasawa.

Diosar kusisiykir sarnaqatasasa, Jupxat wal yatxatañ munatasasa, mayakïkaspasa ukhamaw sawaw Pablox mä cartapan qillqäna. Jilat kullakanakax Diosan ‘munañapa sum amuytʼapxañapataki’ ‘[Jehová] Tatitunkirinakjama sarnaqapxañapataki, ukhamarak kunatix jupatakix askïki ukanak lurapxañapataki, uka suma luräwinakapax mä suma cosechjama utjañapataki, Diosarus jukʼampi sumrak uñtʼapxañapatakiw’ Pablox Diosar mayïna (Col. 1:9, 10). Ukampisa, ¿kunatsa wali wakiskirixa Diosar ‘sum uñtʼañaxa’? Ukat ¿kunatsa Diosar ‘sum uñtʼañatakix’ chʼamachasiskakiñasaxa?

Iyawsäwisax kunjarus uttʼayata

Diosar sum uñtʼañana ukat amtanakapat yatxatañanwa iyawsäwisax uttʼayata, sasaw Bibliax qhanañchi. Jan ukhamäkaspaxa kamisatï thayan apat jipix qʼal willitattixa ukhamarakiw iyawsäwisax qʼal tukusxarakispa, mä arunxa iyawsäwisanxa aynachtʼsnawa. Ukatwa Diosar yupaychäwisanxa ‘amuyumpi yupaychañasa’, (MT) ukat ‘amtanakasansa machaqat amtasxañasa’ sas iwxtʼistu (Rom. 12:1, 2). Sapüru Bibliat yatxatañaw uk lurañ yanapistaspa.

Ewa sat mä kullakaxa precursor regularjam Polonia markan irnaqtʼaski, jupax siwa: “Janitï sapüru Bibliat yatxatkiristxa, Jehová Diosar uñtʼañajax janiw jiltkaspati. Janiw kunjamtï Diosan mä luqtiripax sarnaqañapäki ukham sarnaqxiristti, ukat Diosar yupaychäwijanxa aynachtʼxiristwa” sasa. ¡Janipuniw ukhamar purtʼasiñ munktanti! Mä chachax Jehová Diosar jukʼamp uñtʼañatakiw chʼamachasïna, ukat ukham lurasaxa, Diosampix iyawsatänwa uka tuqit yatxatapxañäni.

“¡Leyinakamarux taqi chuymaw munasta!”

Salmo 119 qillqtʼirixa taqi chuymaw Jehová Diosan leyinakaparu, amtayäwinakaparu, mayitanakaparu, kamachinakaparu, taripäw arsüwinakaparu wal munasitap uñachtʼayäna. Jupax qillqänwa: “Leyinakamarux munasipunïwa. [...] Amtayäwinakamarux walpun munastxa”. Ukat saskakïnwa: “Leyinakamarux taqi chuymaw munasta! ¡Sapürupuniw ukxat lupʼisktxa!” sasa (Sal. 119:16, 24, 47, 48, 77, 97, NM).

“Munastxa” siski uka aruxa Diosan Arupat lupʼiña ukat ukham lurasax kusisiñ sañ muni. Diosan leyiparux wal munasïna ukatwa yatxatañ munäna ukwa uka arux uñachtʼayistu. Uka munasiñaxa janiw chuymatak mistkiti. Salmonak qillqirixa Jehová Diosan Arupat sum amuytʼañatakix “sapüruw ukxat lupʼi[rïna]”. Diosata ukat amtanakapata jupax sum yatxatañ munäna ukwa ukham luratapax uñachtʼayistu.

Chiqpachansa salmo qillqtʼirix Diosan Arunakaparux walpun munasïna. Jichhax jisktʼasisma: “¿Nayatxa ukham sasirakispati? ¿Bibliat sapür liyiña ukat yatxatañax kusisiyituti? ¿Ukham lurañatakix chʼamachassti ukat kuntï  liyktxa uk sum amuyañatakix Jehová Diosar yanapita sasin mayistti?”. Aka jisktʼanakarutï jïsa sasin sistaxa, chiqasa jumaxa ‘Diosar jukʼamp sum uñtʼasktaxa’.

Ewaxa akham siwa: “Sapürunjam Bibliat sapaki yatxatatajaxa sumäñapatakiw chʼamachasta. Veamos ‘la buena tierra’ sat follet katuqxasaxa ukampipuniw Bibliat yatxatta. Ukhamaraki Perspicacia para comprender las Escrituras sat libronakatsa ukat Bibliat apstʼat yaqha qillqatanakatsa jukʼampi uñakiptʼaraktxa” sasa.

Wojciech ukat Małgorzata sat mä chacha warmit jichhax amuykiptʼarakiñäni, jupanakax familiapanxa walja luräwinakanïpxiwa. ¿Kunjamsa sapüru luräwinakapat tiempo apstʼasis Bibliat yatxatañatakix chʼamachasipxi? “Sapa mayniw tiempo apstʼasisax Bibliat yatxatapxta. Ukatxa, Familiasampi Bibliat yatxatasasa jan ukax parltʼasisasa, kuna aski yatichäwinaksa jikxatapxta kunas chʼamañchkirixa uka tuqit parltʼapxta.” Bibliat ukham sum yatxatañaxa jupanakarux kusisiyiwa ukat ‘Diosar sum uñtʼañatakis’ yanaptʼarakiwa.

Taqi chuym yatxatapxañäni

Diosaxa “Taqinin qhispiyatäñapwa muni, kunatix chiqäki uk uñtʼapxañapataki” ukwa Diosan luqtirinakapax yattanxa (1 Tim. 2:3, 4). Ukatwa Bibliat yatxatasax sum ‘amuytʼañataki’ chʼamachasiñasax wali wakiskirixa (Mat. 15:10, 11). Yatiqapuniw sañasawa, uka amuyumpi yatxatañänixa Bibliat yatiqasax sum amuytʼarakiñäni. Apóstol Pablox Berea markan jakasir cristianonakar suma yatiyäwinak yatiykäna ukhaxa ukham suma chuymanïpxatap uñachtʼayapxäna: “Taqi chuymaw Pablompir Silasampirux ischʼukipxäna. Sapürurakiw Qillqatanaksa yatxatapxäna: Uka arunakax ¿chiqapunïpachati janicha?” sasa (Hech. 17:11).

Berea markankir cristianonakat yatiqasisaxa, ¿Diosan Arupat “taqi chuyma[ti]” yatxatarakta? ¿Bibliat yatxatkasaxa jan kunampis tiempo apaqayasiñatakix chʼamachastati? Janisay nayrax yatxatañ munkchiyätan ukampis Berea markankir cristianonakat yatiqasiñatakix chʼamachasiraksnawa. Chiqasa, yaqhipanakax chuymankipstatäsax janiw walj liytʼxapxiti janirakiw yatxatxapxisa, ukampisa jiwasanakax janiw ukhamäpxañasäkiti. Waynäskañänisa jilïriskañänisa, taqiniw tiempo jan ina chʼusar aptʼañatakix chʼamachasiñasa. Liytʼkasina jan ukax yatxatkasaxa, ¿janit sum amuytʼasax mä qhawqha yatichäwinak yaqhampi parltʼañatakix thaqkasma? ¿Janit uka tuqit chachamampisa warmimampisa jan ukax jilat kullakanakampis parltʼkasma? Ukham lurañaxa chuymamaru amuyumaru amxasiñatakiw yanapätamxa, ukat yaqhanakarus yanaptʼarakïtawa.

Yatxatkasaxa, Diosan Esdras luqtiripjam lurañamawa, jupasti “taqi chuymawa amtasïna [Jehová] Tatitun leyipa yatxataña[taki]” (Esd. 7:10). ¿Kunjamsa uk lurasma? Nayraqataxa, kawkhansa yatiqäta uka chiq waktʼayasïta ukat yanaptʼita yatiñkankañ churïta sasaw Jehová Diosat mayisiñama (Sant. 1:5). Ukat jisktʼasismawa: “¿Bibliat yatiqkasaxa kuna askinaksa yatiqäxa?” sasa. Liytʼkasaxa, kawkirinakas wali wakiskir yatichäwinakax uk thaqhañamawa. Ukatxa, ¿janit ukanak qillqtʼaskasma? Inasa yaqha yatichäwinak amtañatak chimptʼasiñ munarakchisma. Yatiyir sarasasa, kuna amtar purisasa ukat jilat kullakanakasar yanaptʼañatakisa  kunjamsa uka yatichäwix askïspa uk amuyañamawa. Yatiqañ tukuyäta ukhaxa, wasitat mä jukʼa uñakiptʼarakismawa. Ukhamatwa kuntï yatiqkta uk amtasïta.

“Traducción del Nuevo Mundo de las Santas Escrituras (con referencias) sat Bibliat liytʼasaxa, referencias marginales sätakis uk uñakipta ukat Índice de las publicaciones Watch Tower ukat CD-ROM Watchtower Library uka yanaptʼanakampiw yatxatarakta. Ukhamarak uka yatxatatajatxa yatiyir sarañatakis qillqtʼasiraktwa” sasaw Ewax säna.

Yaqhipanakax walja maranakaw Bibliat sum yatxatapxi ukat Diosatsa sum yatiqapxaraki (Pro. 2:1-5). Ukampisa, walja luräwinakanïpxiwa ukat janiw Bibliat yatxatañatak tiemp jikxatañax faciläkiti. Ukhaman uñjassta ukhaxa, ¿luräwinakamata tiempo apstʼasiñatakix kuns lurasma?

¿Kunjamatsa tiempo jikxatsna?

Chiqpachansa kuns lurañ wal muntan ukhaxa, uk lurañatakix kawkits tiempo apstʼastanwa. Kunatï jikxatañjamäki uk amtasaxa, sañäni qalltat tukuykam Biblia liytʼaña amtasaxa, waljaniw kusisiñ jikxatapxi. Chiqasa mä jaqix kuna familiatsa juti, nayra templox kunjam luratänsa jan ukasti jan amuytʼañjam profecianakat yatxatañax chʼamäspawa, taqi ukanakax janis jakäwisatakix askïkaspa ukham amuyaraksna. Ukampisa, kuntï amtkta uk jikxatañatakix akanak lurasma. Sañäni, Biblian kunatï chʼamjamäki uk janïr yatxatkasaxa khitis uk qillqäna kunapachasa ukat yaqhanakampita yatxatañaw wakisispa jan ukasti kunjamatsa jumatakix askïspa uk yatxatarakismawa. “Toda Escritura es inspirada de Dios y provechosa” sat librow uk lurañ yanapiristamxa, uka librox niya 50 arunakar jaqukipatawa.

Ukat Biblia liytʼasaxa jaqinakan sarnaqäwinakapa luräwinakapa uñjksnas ukham amuyasaxa Biblia liytʼañax wali sumäniwa. Aka iwxanakarjam lurasaxa, Bibliat yatiqañaxa jumatakix kusiskañäniwa ukat askirakïniwa. Ukhamatwa, yatxatañatakix tiempo apstʼasiñ munarakïta ukat sapüru Biblia liyiñaxa janirakiw chʼamäkaniti.

Chiqasa, aka iwxtʼanakax sapa mayniruw yanaptʼistu, ukampisa ¿walja luräwinakan familianakax kuns lurapxaspa? Nayraqataxa,  ¿kunatsa familpach Bibliat yatxatañax askïspa uka tuqit parltʼapxañamax janit wakiskaspa? Ukham parltʼasaxa suma amtanakar puriñaw utjaspa, sañäni semanan mä qhawqha urunakaksa Bibliat yatxatañatak alwat sartaña. Inasa familiax kunjamsa tiempo jalanuqtʼasipxaspa uk amtañax wakischispa. Sañäni, yaqhip familianakax manqʼañ tukuyxapxi ukhaw Examinando las Escrituras diariamente sat folleto jan ukax Biblia mä jukʼsa liytʼapxaraki. Manqʼañ tukuyxasa, janïr kuns apthapkasaxa, 10 jan ukax 15 minutonak Qullan Qillqatanaka uñakipapxi jan ukasti semanan Bibliat liyiñataki wakichatäki uk liytʼapxaraki. Inasa uk qalltañax chʼamächispa, ukampisa mä jukʼa tiempotxa familiax yatinuqtaspawa ukat taqinirakiw uk lurasaxa kusisipxaspa.

Wojciech ukat Małgorzata uka chacha warmixa familiapar kunas yanaptʼäna uka tuqit parlasaxa akham sapxiwa: “Nayraxa jan wakiskir luräwinakaruw tiempxa ina chʼusaruki aptʼapxirïtxa. Ukhamasti Internet tuqnama qillqatanak apayañataki ukat yaqha kuchʼirtäwinaksa janiw walja tiempo lurxapti. Ukhamaraki kunürus ukat kuna horas familpach yatxatapxä uk amtapxaraktxa” sasa. Chiqpachansa jupanakax ukham lurapxatapatxa janiw pisayasipkiti, ukat jumasa familiamasa janirakiw Bibliat jukʼampi yatxatañataki tiempo apstʼasipxatamatxa pisayasipkätati.

Sum yatxatañatak chʼamachasiñaxa janiw inamayäkaniti

Diosan Arupat sum yatxatasaxa ‘suma luräwinaka mä suma cosechjam’ jikxatañäni (Col. 1:10). Jukʼat jukʼata nayrar sartaskatamxa taqiniw amuyapxani. Ukhamaraki Diosar yupaychañ tuqitsa suma saytʼatarakïyätawa Biblian chiqa yatichäwinakapsa sum amuyarakïta. Amtanakasasa iwxtʼanakasasa sumarakïniwa, janirakiw khitinakatï Bibliat jan sum yatipki ukanakjamax kuna jan wali amtarus purkañäniti. Ukhamarusa, Jehová Diosaruw jukʼampi jakʼachasiñäni. Kunjam Diosasa uk sum yatisinxa jukʼampwa munasirakiñäni, ukat Jupxat yaqhanakar parlkañäni ukhaw ukax qhan amuyasirakini (1 Tim. 4:15; Sant. 4:8).

Qhawqha maranïskañänisaya jan ukax wali yatxattʼataskañänisaya, Diosan Arupat yatxatasax kusisiñ jikxatañatakix chʼamachasiñasawa, yatxatapunïwa sasax taqi chuymaw sañasa. Jehová Diosax janiw ukham chʼamachtʼasitasatxa armaskaniti (Heb. 6:10). Chiqasa, Jupax walja bendicionanak churistani.

[13 janan recuadropa]

DIOSAR ‘JUKʼAMP SUM UÑTʼASAX’ SUMA ASKINAKWA JIKXATSNAXA

Iyawsäwisax chʼamañchtʼatäniwa ukat sarnaqäwisax Jehová Diosaruw kusisiyarakini. (Col. 1:9, 10)

Yatiñkankañanïñäniwa ukat mä suma amtar puriñatakisa sum amuytʼasirakiñäni. (Sal. 119:99)

Jaqi masisaru Jehová Diosar jakʼachasiñapatak yanaptʼasaxa wal kusisirakiñäni. (Mat. 28:19, 20)

[14 janan fotonakapa]

Inasa sum yatxatañatak mä chiqa jikxatañax chʼamächispa, ukampisa uk lurañax janiw inamayäkaniti

[15 janan fotonakapa]

Yaqhip familianakaxa manqʼañ tukuyasaw Bibliat mä jukʼa liytʼañ yatipxaraki