Jachʼa qhatunakan yatiyaña

ATENAS markankkäna ukhaxa, apóstol Pablox sapüruw Atenas plazan Jesusxat suma yatiyäwinak yatiyir sarirïna (Hech. 17:17). Uka plazanxa jaqi phuqanwa, ukatwa Pablox ukar yatiyir saräna.

Niya pä waranq mara pasatatsti, ukhamarakiw Jehová Diosan markapax kawkhanti walja jaqinakax utji uka chiqanakar yatiyir sarapxi. Sañäni, jachʼa qhatunakana Diosan Apnaqäwipat yatiyapxaraki. Dirigenteru jan ukax dueñoru permiso mayisaxa, mä mesaru Bibliat apstʼat qillqatanak uñachtʼayañatak uttʼayasipxi.

Amuytʼañataki, Estados Unidos sat markan, Nueva Jersey uksa tuqinxa, mä jachʼa qhatuw utji, uka qhatunsti “Kunjamsa jan waltʼäwinakat familiasar jarkʼaqsna” uka tuqit parltʼañatakiw Bibliat apstʼat qillqatanak uñachtʼayapxäna. ¿Kuna bendicionanaksa katuqapxäna? Mä urunakwa, 153 libronaka suxta kasta arunakat jaqinakar churasïna.

Mä warmix kawkhantï libronakax uttʼayatäkäna ukar jakʼachasisinxa kuntï mä kullakax qhanañchtʼaskanxa uk sum istʼäna. Uka warmix jakäwipana ukhamaraki familia taypin Diosat amtasiñax wali wakisirïtapwa amuyana, ukatxa Aprendamos del Gran Maestro, Familian sum jakasiñatakixa kunas munasi ukat Kunsa wayn tawaqunakax yatiñ munapxi sat libronak apasïna.

Kawkhantï libronakax uttʼayatäkäna uka jakʼanxa mä tiendaw utjäna, ukat niya chika uru pasatatsti mä chachax uka tiendar sarkasinxa, Wayn tawaqunakataki sat libro uñjasax ukan qhiparxäna. Uka chachax librot wal yatxatañ munatap amuyasinsti kullakax akham sasaw jisktʼäna: “¿Kawkïr librotsa yatxatañ munta?” sasa. Ukat uka chachax Kunsa wayn tawaqunakax yatiñ munapxi sat libro uñachtʼayasax akïr  muntxa sasaw säna. Kullakasti uka libro churäna. Uka chachax kimsa yuqanïtwa, paninisti qʼaxu waynanakäpxiwa, ukat wawanakajampi parltʼasiñatakix semanan may kuti tiempo apstʼasipuntwa sasaw säna. Libro uñxattʼasaxa, familiajampi parltʼasiñataki tantachasipxä ukhaw aka librox yanaptʼitaspa sasaw sarakïna. Ukat kullakax Familian sum jakasiñatakixa kunas munasi sat libro uñachtʼayarakïna, jumarusa warmimarusa familiaman suma amtanakar puriñatakiw ukat suma iwxtʼanak jikxatañwa aka librox yanaptʼapxätam sasaw säna. Ukham arstʼatapat walpun uka chachax yuspäräna, uka libronakatxa qullq churäna ukat utamar visittʼir jutapxiristi sataxa iyaw sarakïnwa.

Uka qhatun Dios tuqit yatiyasaxa, ¿kunjamsa jilat kullakanakax jikxatasipxpachäna? Mä kullakax akham säna: “Uka jachʼa qhatun yatiyataxatxa walpun kusistxa. ¡Chiqpachansa mä suma experienciapunïnwa!” sasa. Ukat yaqha kullakax sarakïnwa: “Suma yatiyäwinakax Uraqpachanwa yatiyasini siw Jehová Diosaxa. Jichhürunxa, Paramus sat markana, Nueva Jersey uksa tuqinxa aka suma yatiyäwinakax kunayman arut parlir jaqinakan chuymanakaparuw puriwayi. Ukham yatiyañax wali sumapunïnwa. Khitinakatï ukham yatiyapkäna ukanakax wali kusisitaw jikxatasipxäna. Ukat jaypʼuxän ukhaxa janiw khitis sarxañ munkänti” sasaw sarakïna.

Utat utatpunwa yatiytanxa (Hech. 20:20). Ukampisa, kunayman tuqit suma yatiyäwinak yatiyaraksnawa, ¿Ukham yatiyañ munasmati? Inas jumax plazanakansa, jachʼa qhatunakansa yatiyañ munarakchisma.