Jesusjam Supayar saykatapxañäni

“Supayatakisti saytʼasipxarakim, uka Supayasti jumanakatxa jaltawayxarakiniwa.” (SANT. 4:7.)

1. Jesusax aka Uraqir jutasaxa, ¿kuna jan walirus purtʼasiñapäna, ukat kunanakas utjañapäna?

 JESUCRISTOX janïr aka Uraqir jutkasaw Supayan yantʼatäñapxa yatxäna. Kuntï Jehová Diosax Edén huertan katarir siskatayna ukxa sum jupax yatïna, kunattix kutkatasir Supayaw uka katari tuqnam parlaskäna, ukampis Diosax akham sänwa: “Warmimpi [Jehová Diosan alaxpachankir markapa] jumampisti enemigo tukuyapxäma, ukhamaraki uka warmin wawanakapampi, wawanakamampisa enemigonïpxarakiniwa. Warmin wawapasti [Jesucristoxa] pʼiqit takxatätam, jumasti kayut achjarakïta” sasa (Gén. 3:14, 15; Apo. 12:9). Kunapachatï Jesusar jiwayapkäna ukhaw Jesusax kayut achjat uñjasïna. Ukampis Jesusax janiw wiñayatak jiwatäkanti, jan ukasti Jehová Diosaw alaxpachar sarañapataki jaktayxäna. Ukampis Supayax pʼiqit taqxatatäñapawa, ukhamat jan mayampi sartañapataki (Hechos 2:31, 32; Hebreos 2:14 liytʼasiñapawa).

2. Jesusax Supayan yantʼanakaparuw atipañapäna, ¿kunjamatsa Jehová Diosax uk sum yatïna?

² Jesucristox aka Uraqir jutasaxa Supayan yantʼanakaparuw atipañapäna ukat kuna amtampis jutäna uksa phuqañapapunïnwa, uk Jehová Diosax sum yatïna. ¿Kunatsa? Kunattix Jupaw Jesucristor luratayna, ukhamax qalltatpachwa sum uñtʼäna. Jesucristox “taqi kunatix utjki ukatxa nayrïriwa” ukatwa istʼasirïtapsa ukat Jupat jan jithiqtirïtapsa sum yatirakïna (Pro. 8:22-31, NM; Col. 1:15). Ukatwa Diosax aka Uraqir khitankäna ukhaxa, Yuqapan jiwañapkam aguantañapxa yatïna, chiqpachansa Supayax Jesusar jiwañapkamaw yantʼäna (Juan 3:16).

Jehová Diosax luqtirinakapar jan walinakat jarkʼaqiwa

3. ¿Kunjamsa Supayax Jehová Diosan luqtirinakaparuxa uñji?

³ Jesusax Supayarux ‘akapachan apnaqiripa’  sasaw satayna, ukat kunjamtï nayarux uñisipkitu ukhamarakiw jumanakarux uñisipxätam sasaw Jesusax arkirinakaparux iwxtʼarakïna (Juan 12:31; 15:20). Aka ñanqhapachax Supayan apnaqatawa, ukatwa chiqpach cristianonakarux Jehová Diosar luqtapxatapata ukat Diosan chiqa yatiyäwinakap yatiyapxatapatwa uñisi (Mat. 24:9; 1 Juan 5:19). Jesucristompi chika alaxpachar saririnakatxa jukʼanikiw aka Uraqinkxapxi, ukanakaruw Supayax jan waltʼayañataki jukʼamp uñchʼuki. Ukat Jehová Diosan millón millón aka Uraqin mä paraison jakañataki suytʼäwinïpki uka Qhanachirinakaparux ukham uñchʼukiskaraki. Uka tuqitxa akham sasaw Bibliax saraki: “Jumanakar uñisir Supayasti mä leonar uñtataw warartʼasisa sarnaqaski khitiru manqʼantañatakisa” sasa (1 Ped. 5:8).

4. Diosan markapax Supayan yantʼanakapar atipjiwa, ¿kunjamatsa uk yattanxa?

⁴ Jehová Diosan aka Uraqinkir markapaxa Jupan yanaptʼatawa, ukatwa Supayan yantʼanakapampix jan atipayaskiti. Jichhax uka tuqit amuytʼarakiñäni. Aka qhipa patak maranakanxa, munañapar apnaqiri jan sinttʼasir qhuru apnaqirinakax jan mayanwa jiwasanakar chhaqtayañ munistänxa. Ukampis uka amtanakapxa janipuniw phuqapkiti, kunattix jichhürunakanxa, niya paqallq millonanakäxtänwa, ukat Uraqpachanxa patak waranqa jila tamanakanwa tantachasiraktanxa. Ukampisa, ¿kawkinkapxisa uka munañapar apnaqiri jan sinttʼasir qhuru apnaqirinakaxa? Jupanakax qʼal jiwarxapxi.

5. ¿Kunjamas Isaías 54:17 qillqatax jichhürunakan phuqasiski?

⁵ Israel markaruxa warmipäkaspas ukhamwa Jehová Diosax akham sas parlxayäna: “Ukampis jumar tukjañäkis uka armxa janiw khitis jichhakam lurkiti. Khitinakatix jumar juchañchapkätam ukanakarux amuktʼayätawa. Ukwa nayax churta khitinakatix nayar servipkitu ukanakaruxa: ‘Atipjäwi’ Tatituw ukxa arsu” sasa (Isa. 54:11, 17). Aka “qhipa urunakanxa” Diosan markapax uka arunakan phuqasitap uñjaraki (2 Tim. 3:1-5, 13). Ukat Supayan yantʼanakaparux saykataskakiñäniwa, Jehová Diosaw yanaptʼaskistu ukat Supayan kunayman yantʼanakapampisa janirakiw aynachtʼaykistaniti (Sal. 118:6, 7).

6. Daniel profetan qillqataparjamaxa, ¿kunas kamachani Supayan apnaqäwiparuxa?

⁶ Akat mä jukʼaruxa niyaw aka ñanqhapachax tukusini, ukat Supayan apnaqäwipaxa janirakiw utjxaniti. Daniel profetax Diosampi amuytʼayatäsinxa akham sasaw qillqäna: “Uka reyinakan [jichhürunakan] apnaqañapkamasti, alaxpachankiri Diosax mä yaqha reino [alaxpachan] saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampixa, jan ukasti jupaw taqi yaqha reinonakarux tukjani, wiñayan wiñayapaw uka reinox utjarakini” sasa (Dan. 2:44). Uka arunakax phuqasxani ukhaxa, janiw aka Uraqinkir jaqinakarux Supayasa ni akapachan pantjasiri jaqinakasa apnaqxaniti. Supayan ñanqhapachapaxa jan mayampitakiw chhaqtayatäxarakini, ukatxa aka Uraqpachanwa Diosan Apnaqäwipax apnaqxani (2 Pedro 3:7, 13 liytʼasiñapawa).

7. Supayaruxa atipsnawa, ¿kunjamatsa uk yattanxa?

⁷ Chiqpachansa, Diosan markapax jutïri tʼunthapïwitxa qhispiyasiniwa, ukat Diosan bendicionapsa katuqaskakiniwa (Salmo 125:1, 2 liytʼasiñapawa). Ukampisa, ¿kuns jiwasanakax lurañäni? Kunjamtï Jesusax Supayar atipjkänxa, ukhamarakiw jiwasax atipsna sasaw Bibliax qhanañcharakistu. Apóstol Juanax Jesusat profecianak katuqkäna ukarjamaxa, khitinakatï aka Uraqina jakañataki suytʼäwinïpki uka ‘walja jaqinakaxa’, Supayan jan waltʼaykatas aka ñanqhapachax tʼunjaskani ukhaxa, qhispiyasipxaniwa, sasaw säna. Ukat jupanakax akham sapxaniwa: “¡Qhispiyasiñax Diosasankiwa, khititix tronon quntʼatäki, ukhamarak [Jesucristo] Corderona!” sasa (Apo. 7:9-14).Ukat ajllit cristianonakasa ukat ‘yaqha ovejanaka’ satäkis ukanakasa Supayarux atipapxaniwa sasaw Bibliax saraki (Juan 10:16; Apo. 12:10, 11). Jïsa, Supayaru atipañatakixa wal chʼamachasiñasa ukat “ñanqhatxa qhispiyapxita” sasaw Diosat mayisirakiñasa (Mat. 6:13).

 Jesusax Supayaruw atipatayna, jupatxa yatiqasiraksnawa

8. Wasaranxa, ¿kunjamsa Supayax Jesusar yantʼañ qalltäna, ukat kunjamsa uka yantʼar jaysäna?

⁸ Supayax kunaymanitwa Jesusarux Diosat jithiqtayañ munäna, ukampis Jesusax yatiqaskañwa Supayar saykatäna. Ukat kunapachatï wasarankaskäna ukhaxa, Supayax kunaymanitwa Jehová Dios contra juchachasiñapatakix yantʼäna, ukat pusi tunka uruy aruma jan manqʼat sarnaqäna ukhaw Supayax yantʼanakapampi qalltäna. Supayax akham sänwa: “Jumatix Diosan yuqapästa ukaxa, aka qalanakarux tʼantʼar tukuyam” sasa. Ukampis Jesusax janiw Diosan churat chʼamapxa jupan askipatakiki munkänti, ukatwa jupax akham säna: “Diosan arupanxa qillqatawa: ‘Janiw jaqix tʼantʼa sapampikiti jakkani, jan ukasti taqi kuntix [Jehová] Diosax siski uka arunakampiw jakarakini” sasa (Mat. 4:1-4; Deu. 8:3).

9. ¿Kunatsa Supayan yantʼanakapar saykatañasa?

⁹ Jichhürunakanxa, kunaymanitwa Supayax Jehová Diosan luqtirinakapar jan waltʼayañ munaraki. Amuytʼañataki, wachuq jucha lurañanakampiw yantʼarakistaspa, ukanakax jichhürunakanxa waljarakiw utji. Ukhamax uka qʼañu lurañanakaru jan puriñatakix wal chʼamachasiñasawa. Uka tuqit parlkasaxa Diosan Arupax qhanwa akham saraki: “¿Janit yatipkta jucharar jaqinakan jan [Diosan Apnaqäwipar] mantañapxa? Jan sallqjayasipxamti, wachuqa juchan sarnaqir jaqix janiw Diosan [Apnaqäwipar] mantkaniti, ni idolonakar yupaychirisa, wachuqa juchan sarnaqirisa, chacha pura jan wali sarnaqirinakasa [...] mantapkaniti” sasa (1 Cor. 6:9, 10). Ukax chiqapunïskiwa, khitinakatï ukham jan walinak lurasa sarnaqasipkakini ukat uka jan wali luräwinakap jan apanukupkani ukhaxa, janiw Diosan machaq jutirpachapanxa jakapkaniti.

10. Mateo 4:5, 6 qillqatarjamaxa, ¿kuna yantʼampisa Supayax Jesusar Diosat jithiqtayañ munäna?

¹⁰ Kunampis Supayax Jesusar yantʼaskakïna ukwa Bibliax akham sas qhanañchistu: “Supayasti ukkhaxa qullan Jerusalén markaruw irpäna, purisinsti templo patxaruw irpsurakïna. Sarakïnwa: ‘Jumatix Diosan yuqapästa ukaxa, aka patatpacha jaquqtam, Diosan arupansti siwa: “Diosasti angelanakaparuw khitanini jumaru uñjañataki, amparapampisti katuqarakïtamwa, kayunakamax jan uka qalanakampi usuchjasiñapataki”’” sasa (Mat. 4:5, 6). Jesusax Supayan mayitaparjamatï luraspänxa, wali muspharkaywa Mesiasätapxa uñachtʼayasapäna. Uk luraspäna ukhaxa, jan walit uñjatäspanwa, janis llampʼu chuymanïkaspa ukhama, ukampis Diosax janirakiw askirjam uñjkasapänti. Jesusax Jehová Diosat jan jithiqtatapxa mayampsa uñachtʼayarakïnwa, Diosan Aruparjamax akham sänwa: “Diosan arupanxa qillqatarakiwa: ‘Janiw [Jehová] Tatitu Diosamarux yantʼätati’” sasa (Mat. 4:7; Deu. 6:16).

11. ¿Kunampis Supayax yantʼistaspa, ukat kuna jan waltʼäwinakansa ukham luratasat uñjasna?

 ¹¹ Jichhürunakanxa, Supayax Jehová Diosar yantʼañasatakiw yantʼistu, ¿kunjamatsa? Inas aka ñanqhapachampi sum apasipxañasataki wiytchistaspa. Kunjamtï akapachan isisipki, kʼachachtʼasipki inas ukham lurañ munaraksna jan ukax jan wali kusistʼañanakampi yantʼarakchistaspa. Ukat jiwasatï Diosan arunakap jan istʼasa ukat aka ñanqhapachan lurapki ukarjam sarnaqasa jan walinakar puriñäni ukhaxa, ¿Diosax angelanakap tuqi ukham jan wal amtatasatxa jarkʼaqistaspati? David reyix Betsabempi juchar purtʼasitapat arrepentischïnsa, Jehová Diosax janiw ukham jan wali luratanakapatxa qhispiykänti (2 Sam. 12:9-12). Ukhamaxa, Jehová Diosarux janiw yantʼañasäkiti aka ñanqhapachan luratanakaparjam sarnaqasaxa (Santiago 4:4; 1 Juan 2:15-17 liytʼasiñapawa).

12. Mateo 4:8, 9 qillqatanakanxa, ¿kuna yantʼäwits parli, ukat kunsa Diosan Yuqapax luräna?

¹² Ukat kimsïr yantʼapansti Supayax política tuqit apnaqäwinak churäma sasaw Jesusarux säna. Uraqpachan utjkäna taqi uka markanakwa uñachtʼayäna ukhamaraki kunja sumäkantix ukanaksa, ukatxa juparux akham sänwa: “Taqi akanak nayax churäma, jumatix killtʼasisin nayar yupaychitäta ukaxa” sasa (Mat. 4:8, 9). Uka qillqatarjamaxa, Supayax Jehová Diosarux janiw yupaychayañ munkänti jan ukasti Jupaw yupaychayasiñ munäna, ukat Jesusar pantjayañ munatapasa qhanarakïnwa. Ukham wal yupaychayasiñ munatapatwa qalltanxa uka angelax Diosat jithiqtäna, ukatwa ñanqha, uñisita ukat jupatakiki taqi kunsa muniri ukhamar tuküna (Sant. 1:14, 15). Ukampis Jesusax alaxpachankir Awkipatxa janipuniw jithiqtkänti. Jupax akham sänwa: “Saraqit nayat, supaya, Diosan arupansti qillqatawa: ‘Tatitu [Jehová] Diosamarukiw yupaychäta, jupa saparukirakiw servïta’” sasa, ukham sasaxa mä kutimpiw jan payachasis Supayar saykatäna, kunattix Jesusax janiw kunsa Supayat munkänti. ¡Janipuniw uka ñanqharux yupaychkasapänti! (Mat. 4:10; Deu. 6:13; 10:20.)

“Supayatakisti saytʼasipxarakim, uka Supayasti jumanakatxa jaltawayxarakiniwa”

13, 14. 1) Supayax Jesusar aka Uraqpachankir markanak uñachtʼayasaxa, ¿kunsa churañ munäna? 2) ¿Jichhürunakanxa kunanakampis Supayax mayjtʼayañ munistu?

¹³ Aka Uraqpachankiri markanak uñachtʼayasaxa, taqi uka markanakxar wali munañanïyatawa sasaw Supayax Jesusar säna. Aka Uraqpachankir markanak apnaqirjam amuyasisaxa wal Jesusax kusisini sasaw Supayax sispachäna. Ukampis jichhürunakanxa, Supayax janiw khitirus marka apnaqirjam uttʼayäma siskistuti, jan ukasti kuntï uñjktan, istʼktan, amuyktan ukanakampiw chuym jan waltʼayañ munistu.

¹⁴ Supayaxa aka ñanqhapachan apnaqiripawa, ukhamaxa taqi kunatï radionsa televisionansa periodiconsa utjki ukanakxa Jupaw apnaqi saraksnawa. Ukatpï jaqinakax liyipki, uñjapki ukat istʼapki ukanakaxa qʼañu luräwinakampi nuwasiñanakampi phuqantataxa. Ukat taqi kun alañasataki chʼamachasipki uka wiytirinakaxa, yänakas jiwasanakatakix wali askïkaspa ukham amuyañaswa munapxi ukhamat alañasataki. Ukhamatwa Supayax uka yänak uñachtʼayasax amuyunakasar mayjtʼayañ munaraki. Ukat kunatï cristianonakatakix jan walïki ukanak jan liykañäni, uñchʼukkañäni ukat jan istʼkañäni ukhaxa, “saraqit nayat, supaya” sisksnas ukhamawa. Aka ñanqhapachan jan wali luräwinakapar janiw sistan ukhaxa, Jesusat yatiqasitas uñachtʼaytanxa. Ukat kunapachatï irnaqäwinsa escuelansa ukat uta jakʼankirinakasarusa jan ukax familianakasarusa jan axsartʼasa nayax Jehová Diosan Qhanañchiripätwa ukat Jesusan arkiriparakïtwa sistan ukhaxa, aka ñanqhapachampi jan chikachasitas uñachtʼayaraktanxa (Marcos 8:38 liytʼasiñapawa).

15. ¿Kunatsa yantʼanakar saykatañatakix wakichtʼasiñasa?

¹⁵ Diosat jithiqtañapatak Jesusar kimsa kut yantʼasaxa, Supayax “sarawayxänwa” (Mat. 4:11). Ukampis Supayax Jesusarux janiw ukhamak jaytkänti, uka tuqitxa Bibliax akham saskakiwa:  “Taqi yantʼäwi [wasaran] tukutatsti supayax mä wakisiri urkamaw jupata saraqawayi” sasa (Luc. 4:13, MT). Kunapachatï mä yantʼäwiru saykattan ukhaxa, wal Jehová Diosaru yuspärtanxa, ukampisa, Diosan yanaptʼapxa thaqhaskakiñasawa, kunattix Supayax yantʼaskakistaniwa, janiw suykañän ukhax yantʼkistaniti jan ukasti Supayatakix kunuruy mä wakiskir urüchini ukhaw yantʼistani. Ukatwa wal amuytʼasiñasa wakichtʼasiñasa yantʼanakar saykatañatakixa ukat Jehová Diosarux luqtaskakiñasarakiwa.

16. ¿Kuna yanaptʼsa Jehová Diosax churistaspa, ukat kunatsa ukxa Diosat mayiskakiñasa?

¹⁶ Supayan yantʼanakapar saykataskakiñatakixa, Jehová Diosaruw qullan ajayup jan payachasis mayiskakiñasa. Ukat Diosan chʼamapampi yanaptʼatäsaxa kunatï chʼamasampik jan lurirjamäktan ukanakxa luraraksnawa. Jehová Diosax qullan ajayup churapxätamwa sasaw Jesusax arkirinakaparux akham säna: “Jumanakatix qhurükasin wawanakamarux sumanak churirïpxstaxa, ¡qawqha jukʼamps alaxpachankir Awkimax qullan ajayxa churanixa mayipki ukanakaruxa!” sasa (Luc. 11:13). Ukhamax Jehová Diosan qullan ajayup mayiskakiñäni, ukaw Supayar saykatañatakisa atipañatakisa yanaptʼistani. Supayan yantʼanakaparu atipaskakiñatakixa, Diosat mayisiskakiñasawa ukat kawkïr armanaktï jarkʼaqasiñataki churkistu ukanak uchasiñasarakiwa (Efe. 6:11-18).

17. Supayar saykatañatakixa, ¿kunas Jesusarux yanaptʼäna?

¹⁷ Biblianxa, kunatï Jesusar yanaptʼkatayna uka yaqha yanaptʼatxa parlarakiwa, ukax jiwasarux yanaptʼarakistaspawa. “Jesusasti [mä tʼaqhisiñ lawanwa, NM] tʼaqhisi, jan uka casta jiwañaru pʼinqasisa. Jupax yatisïnwa uka tʼaqhisitapatxa qhipürunxa kusisiñ jikxatañapata; ukatsti Diosan tronopan kupïxaparuw quntʼasi.” (Heb. 12:2.) Jiwasatï Jesusjam kusisita Diosan jachʼakankañapar iyawsañänixa, sutipxa jachʼañchañäniwa ukat wiñay jakañ suytäwisxa janirakiw chhaqtkaniti. Kunapachatï Supayasa ukat aka ñanqhapachapas tʼunjatäni ukhaxa, wali kusisitaw aka profecía phuqasitap uñjañäni: “Llampʼu chuymaninakasti uraq katuqapxani, jilarkir sumankañampiw kusisipxarakini” (Sal. 37:11). Ukhamaxa, Jesusat yatiqasisa sarnaqaskakiñäni ukat taqi chʼamasampi Supayarus saykataskakiñäni (Santiago 4:7, 8 liytʼasiñapawa).

¿Yattati?

• Jehová Diosax markaparux jan walinakat jarkʼaqiwa, ¿kunjamatsa uk yattanxa?

• Jesusax yatiqaskañwa Supayarux saykatäna, ¿kunatsa ukham sissna?

• ¿Kunjamatsa Supayar saykatsna?

[Jisktʼanaka]

[29 janan fotopa]

Akapachampitï sum apasiñänixa, Diosan uñisirinakaparuw tukupxanäni

[31 janan fotopa]

Supayax Uraqpachan utjkäna uka markanak Jesusar uñachtʼayäna ukhaxa, Jesusax janiw ukanak munkänti