¿Kunjam jaqïñsa munasma?

MÄ MARKANXA, Filipinas uksa tuqinxa, polician mä jefepax akham sasaw mä precursor kullakarux jisktʼäna: “¿Kunjamatsa uka jaqin jan wali luräwinakap apanukuñapatakix yanaptʼta?” sasa. Ukat escritoriopankkäna uka walja papelanak uñachtʼayasaxa, akham sänwa: “¿Kunanakas uka papelanakax uk yattati? Kuna jan wali luräwinakatsa uka jaqir juchañchasïna ukanakaw uka papelanakan qillqata. Jumaxa aka markarux walpun yanaptʼawaytaxa” sasa. Uka jaqixa machjatäsinxa jaqinakamp wali nuwasir jaqïtaynawa. ¿Kunasa jan ukhamäxañapatak yanaptʼäna? Diosan arunakapaw yanaptʼäna.

Walja jaqinakaw Pablon iwxanakaparjama ‘nayra jakäwinakaparjam lurapkäna uka sarnaqañxa apanukupxi, ukatsti Diosan munañaparjama luratäki uka machaq jakäwimpiw isthapisipxaraki’ (Efe. 4:22-24). Sarnaqäwisan kunanakay askichañjam wakischi uk askichañasawa, khititix Criston arkiripäñ munki ukaxa, machaq jakäwimpiw isthapisiñapa, yaqha amtanïxañapawa.

Ukampisa, kunanaktï bautisasiñatak lurktan ukanakax qalltakiwa. Kunapachatï mä jaqix bautisasxi ukhaxa, mä artesanox kʼullut khitsuta kuns lurkixa uka luratapamp sasiwa. Uka luratapax inas sum uñnaqtʼarakchispa, ukampisa jukʼamp suma uñnaqtʼanïñapatakixa, uka artesanox tukuyañkamaw uka luratapxa khitsuskakiñapa. Ukhamarakiw khititix jichhak bautisaski ukaxa luräwinakapansa amuyunakapansa kunjamäñapäkitix Diosan luqtiripax ukham sum uñnaqtʼarakispa. Ukampisa, uka jilatasa jan ukax uka kullakasa machaq jakäwimpi isthapisiñwa qalltaski. Ukhamasti, nayrar sartaskakiñapawa.

Pablo kikpaw ukham amuyasirakïna. Jupax akham sänwa: “Kunapachatix aski lurañ munkta ukaxa, nayanxa ñanqhakwa jikxatta” sasa (Rom. 7:21). Pabloxa kunjam jaqïkantix uk sum yatisïna ukat kunjam jaqïñsa munäna uk yatisirakïnwa. Jiwasaxa uka kikparakiw chuymasan kuna amtanïtansa uk yatiñasa, ukat akham jisktʼasiñasaraki: “¿Kuna jan wali amtanakas nayan utjitu? ¿Kunjam jaqïtsa, ukat kunjam jaqïñsa munaraktxa?”sasa.

¿Kuna jan wali amtanakas nayan utjitu?

Amuytʼañataki, mä mirqʼi uta askichtʼañ munsna ukhaxa, janiw pintañak wakiskaspati.  Manqhax kunjam lurtʼatas ukanak jan walïxatap amuyasaxa, janiw ukhamak uñjksnati, tiempompix jukʼamp jan walïxaspawa. Jiwasarux ukhamarakiw pasistaspa: janiwa uka jan wali amuyunakxa ukhamak jaytañasäkiti. Kunjamäktantix chuyma manqhasanxa uk amuytʼasiñasa, ukhamatwa pantjasitanakas amuysna; jan ukham lursna ukhaxa, nayrax kunjamäkayätantix ukaruw kutʼssna. Sapa maynix kunjam jaqïtansa, uk amuytʼasiñasax wali wakiskiriwa (2 Cor. 13:5). Ukat kuna jan wali amuyunakas utjistu uk yatisaxa, apanukuñasawa. Jehová Diosaw ukanak apanukuñasatakix yanaptʼistaspa.

Pablox akham qillqäna: “Diosan arupasti jakaskiwa, jachʼa chʼamanirakiwa. Purapar arini espadat sipansa jukʼampi ariraki, ukasti almampir ajayumpirux jukʼamp manqhakamaw puri, lupʼïwinaksa, chuyman amtäwinakapsa qhanstayarakiwa” sasa (Heb. 4:12). Diosan arunakapax suma jaqïñasatakiw yanaptʼistu. Chiqansa, chuymar purtʼkiripuniwa. Diosan Arupaxa chuymasan utjki uka lupʼïwinaksa amtäwinaksa qhanstayarakiwa, ukhamat kunjam jaqïktantix ukax amuyasirakispa. Ukaxa janiw kunjamtix mayninakax uñjkistu jan ukax kuntï jiwas pachpat amuyasktan ukhamapunïkaspati. Bibliax jan wali amtanak qhanstayañatakixa, ¡wali wakiskiripuniwa!

Mä mirqʼi uta sumaptayañatakixa, janiw uka utan kunanakatï jan walïki ukanakak askichañax wakiskiti, jan ukasti kunatsa ukham jan waltʼxi uk amuyañasarakiwa. Ukhamatwa kuntï askichktan ukax sumäskakini. Ukhamarakiwa, janiw kuna jan wali amuyunakas utjistu ukak amuyañasäkiti, jan ukasti kunatsa uka jan wali amuyunakasax utjistu ukat kunanakasa ukham jan walinak amtaskakiñatakix wiytistu ukanak yatxatañasawa, ukaw ukanakar atipjañatakix yanapistani. Akanakaw kunjam jaqïktantix uk mayjtʼayistu; sañäni, kuna kasta familiatätansa qhawqha yatiñanïtansa qhawqha qullqinïtansa kawkhan jakasirïtansa kunjam uywatätansa khitinakas munat masinakasaxa ukat kuna kasta yupaychäwinïtansa ukanakäspawa. Ukhamaraki kusistʼañanakasa, sañäni, televisionan utjki uka wakichäwinakasa ukat peliculanakasa, mayjtʼayarakistaspawa. Jiwasatï kunas mayjtʼayistu uk yatiñänixa, uka jan walinakarux saykatarakiñäniwa.

Pantjasitanakas uñjasaxa, inasa “nayax ukhamapunïtwa” sasin sissna. Ukampis ukham amuyañax janiw walïkiti. Pablox Corintonkir jilat kullakanakar qillqkäna uka arunakapatwa ukham amuyañax jan walïtap yatiraksnaxa, jupanakaxa wachuq juchan sarnaqirinaka, chacha pura jan wali sarnaqirinaka, machirinaka ukham jaqinakäpxänwa. Jupanakarux akham sänwa: “Jumanakatxa yaqhipanakax ukhamäpxarakïyätawa, ukampis jichhax qʼumachatäxapxtawa [...] Diosan qullan ajayup tuqiraki” sasa (1 Cor. 6:9-11). Jehová Diosan qullan ajayupan yanaptʼapampixa, jan wali amuyunakasxa apanukuraksnawa.

Filipinas markana, Marcos * sat mä jaqit amuytʼarakiñäni. Nayrax kunjamänsa jakäwipax ukxat arskasax akham siwa: “Chʼaxwiri ukat nuwasiri ukham familian jilsuwaytxa; ukatwa 19 maranïxasaxa familiajar kutkatasxayäta” sasa. Marcosax qullqit anatiri ukat lunthat jaqit uñtʼatäxänwa. Chiqansa, amigonakapampixa mä avión secuestrañ amtapxatayna, ukampis janirakiw uka amtanakaparjam lurapkänti. Jaqichatäkasinsa ukham jan walinak luraskakïnwa ukat qhiparux qullqit anatañanwa taqi kunatï jupan utjkäna ukanak aptʼasxäna. Qhiparuxa, Jehová Diosan Qhanañchirinakapax Bibliat warmipar yatichapkäna ukamp chikarakiwa yatiqxäna. Qalltanxa cristianüñax janis jupatakïkaspa ukham amuyasïna.  Ukampisa, yatiqataparjamaw sarnaqäna ukat tantachäwinakarus sarxarakïnwa, ukanakaw kunjamtï nayrax sarnaqirikäna ukanak apanukuñ yanaptʼäna. Jichhaxa, Marcosax bautisatäxiwa, ukat kunjamsa jan wali luräwinak apunukupxaspa ukwa jaqinakar yatichaskaraki.

¿Kunjam jaqïñsa munasma?

Sapürunjam suma jaqïñatakixa, ¿kunsa luraskakiñasa? Apóstol Pablox akham iwxtʼäna: “Apanukxapxam taqi akanaka: colerasiñanaka, janchin munañanaka, ukhamarak jan wali arunaka. Jan jumanakax kʼarintasipxamti, nayra jakäwinakamsa, luräwinakamsa apanukxapxsta ukaxa. Jichhasti machaqat isthapitäpxtawa, uka machaqar tukuñasti sapürunjamarakiw jukʼamp machaqar tukus saraski Diosan munañaparjama, uka Diosarakiw uka machaqar tukuñxa luri, jupar sum uñtʼañaskama” sasa (Col. 3:8-10).

Ukhamasti, nayra jakäwisarjam lurkayätan ukanak apanukuñasawa ukat machaqat isthapisiñasawa. ¿Kunas ukhamarjam lurañatakixa munasi? Pablox akham siwa: “Khuyapayasiñampi, suma jaqïñampi, jiskʼar tukuñampi, llampʼu chuymanïñampi isthapitay sarnaqapxam. Jumanakax llampʼu chuymampi sarnaqapxam maynit maynirus perdonasipxarakim jan wali lurasipxsta ukapachaxa. Kunjämtï jumanakarux [Jehová Diosax, NM] perdonapxtamxa, ukhamarak jumanakax perdonapxam. Ukat sipansa wali munasiñanïpxam munasiñasti mayaruw tukuyi, taqi kunsa phuqharakiwa” sasa (Col. 3:12-14). Jiwasatï ukhamarjam lurañataki taqi chuyma chʼamachasiñänixa, ‘Jehová Diosatakisa ukhamarak jaqinakatakisa’ aski jaqit uñtʼatarakïñäniwa (1 Sam. 2:26). Jesusax aka Uraqinkkäna ukhaxa, wali suma jaqïtap uñachtʼayarakïna. Jesusan sarnaqäwipat yatxatasaxa, jupjamäñasataki ukat awkipjamäñasatakiw yanaptʼarakistaspa, chiqpachansa Diosax kunjamäkitix ukhamäpxarakiñäniwa (Efe. 5:1, 2).

Biblian qillqatäki uka jaqinakan sarnaqäwinakapaxa, sumänti janicha, ukanakat amuykiptʼasaw kunanakansa pantjasisktan uk amuytʼasiñ yanapistani. Jacob chachan José sat yuqapat amuytʼapxañäni. Ina chʼusataksay tʼaqhiskchïnsa, janipuniw jupax aynachtʼkänti ni mayjtʼkarakïnsa (Gén. 45:1-15). Maysa tuqitxa, David reyin Absalón sat yuqapat amtarakiñäni. Jaqinakan nayraqatapan wali suma uñtani jaqit uñtʼatakchïnsa jaqinakat wali llakisirjamäkchinsa awkip contra saytʼasiri ukat jaqi jiwayir jaqïnwa (2 Sam. 13:28, 29; 14:25; 15:1-12). Kunjamtï uka sarnaqäwit amuyktanxa, suma jaqïñatakixa, janiw suma uñtanïñasa ni jaqinakampi suma jaqïksnas ukham uñjayasiñas wakiskirïkiti.

Nayrar sartaskaksnawa

Nayrar sartaskakiñ munstan ukat Jehová Diosampi suma jaqit uñtʼayasiñ munstan ukhaxa, kunjam jaqïktantix chuyma manqhasanxa, ukwa sum amuyasiñasa (1 Ped. 3:3, 4). Kunjamtï yatiqawayktanxa, kuna jan wali amuyunakasas utjistu, kunatsa uka jan wali amuyunakax utji ukat kunanakasa jan walinak amtaskakiñatakix wiytistu uk yatxatañasawa, ukat kunjamäkitix Diosan luqtiripax ukhamäñasatakiw chʼamachasiñasa, ukaw sapürutjam suma jaqir tukuskakiñatakix wakisi. ¿Ukhamarjam lursnati?

Chiqpachansa, lursnawa. Jehová Diosan yanaptʼapampixa, machaq jakäwimpi isthapisiraksnawa. Salmonak qillqirjamarakiw mayissna: “Diosay, qʼuma chuymay utjayita, machaq aski ajay churarakita” sasa (Sal. 51:10). ‘Qullan ajayumax nayar yanaptʼitpanaya, ukhamat jukʼamp sum munañam lurañajataki’ sasinwa Jehová Diosar mayisiraksna. Chiqansa, Jehová Diosar kusisiyañatakixa sapürutjamaw suma jaqïñasatakix chʼamachasiñasa.

[Qhanañchäwi]

[4 janan fotopa]

¿Jallumpi thayampi tukjat utarux pintañakit wakisispa?

[5 janan fotopa]

¿Jesusjam suma jaqirakïtanti?