Diosan ajllit sirviriparu wali amuyumpi uñtañäni
Diosan ajllit sirviriparu wali amuyumpi uñtañäni
“Akax sirvirixaxa, [...] jupanrakwa kusistxa.” (ISA. 42:1.)
1. Jesusan jiwäwip amtañax niya jakʼänxatap yatisinsti, ¿kunsa Diosan luqtirinakapax lurapxañasa, ukat kunatsa?
JESUSAN jiwäwip amtañax niya jakʼankxatap yatisinsti, Pablon aka iwxtʼapar istʼañaw wakisispa: “Jesusaruy uñtañäni, jupatwa iyawsañasax juti, juparakiw uka iyawsañasxa phuqhachani. [...] Jumanakax amuyapxam Jesusana uñachtʼäwipatxa, juchararanakan amparanakapanwa jupax wal tʼaqhisïna. Uka layku, janipun qarjasipxamti ni pächasipxamsa” (Heb. 12:2, 3). Chiqpachansa, Jesusan Diosat jan jithiqtasa jiwañkam sarnaqäwiparu wali amuyumpi uñjañäni ukhaxa, ajllit cristianonakasa yaqha uwijanakjam uñtʼatäpki ukanakasa jan qarjasaw Diosar luqtaskakiñäni (Gálatas 6:9 uñxattʼarakismawa).
2. ¿Isaías libron Jesusxat parlki uka profecianakat kunsa yatiqsna?
2 Isaías profeta tuqnamwa, Jehová Diosax walja profecianak Yuqapxat qillqayäna. Uka profecianakax Jesucristor khitittix ‘iyawsañasax jutki ukat iyawsäwis phuqacharaki’ ukar suma amuyumpi uñtañwa yanapistani. * Uka profecianakat yatxatasax jupax kunjamänsa, kunjams tʼaqhisïna, ukat Reyjamasa Qhispiyirjamasa kunjam jachʼañchatänisa ukanak sum yatiqarakiñäni. Ukhamaraki Jesusan jiwäwip amtañax kun sañs muni uk sum amuyarakiñäni, jichha maraxa Jesusan jiwäwip amtañax abril phaxsit llätunka urunak saraqataru Inti jalantxaruw apasini.
Khitisa Diosan Sirviripax ukax yatisxiwa
3, 4. 1) ¿Isaías libronxa khitinakarus ‘sirviri’ sasin sasixa? 2) ¿Kunjamsa Bibliax Isaías libron 42, 49, 50, 52 ukat 53 jaljanakan qillqatäki ukax Diosan Sirviripat qhanañchi?
3 “Sirviri” siski uka arux walja kutiw Isaías libron uñsti. Awisaxa, Isaías profeta pachpat parlaraki (Isa. 20:3; 44:26). Ukat awisasti Israel markatwa parli, uka markarusti “Jacob” sasaw sasiraki (Isa. 41:8, 9; 44:1, 2, 21). Ukampisa 42, 49, 50, 52 ukat 53 jaljanakanxa, uka arux yaqhat parlaraki ¿Khititsa parli? Uka jisktʼar qhanañchañatakixa, Griego Arut Qullan Qillqatanakat liytʼañasawa, ukanwa khitisa Jehová Diosan Sirviripax uk qhanañchtʼi. Amuytʼañäni, Hechos libronxa Etiopía markankir gobiernon irnaqir mä jaqit parli, uka jaqix Isaías libron jikxataski ukan mä profeciat liyiskäna, ukkhawa qullan ajayumpi irpatäsinxa Felipe sat mä cristianox jupar jakʼachasïna. Etiopía markankir jaqixa Isaías 53:7, 8 jikxataski uka profecía liytʼasaxa, akham sasaw Feliperux jisktʼäna: “¿Khitits profetax ukxa parli? ¿Jupa kikpatti, jan ukax yaqhatcha?” sasa. Mesías Jesusatwa uka qillqatax parlaski sasaw Felipex jankʼak qhanañchäna (Hech. 8:26-35).
4 Kunapachatï Jesusax mä asu wawaskäna ukhaxa, Diosar axsartʼir Simeón sutini mä jaqixa, Diosan amuytʼayatäsax aka wawax “markanakar qhantir qhan[äniwa]”, sasaw säna, kunjamtix Isaías 42:6 ukat 49:6 qillqatan qillqasitayna ukhama (Luc. 2:25-32). Ukhamaraki, taripapkäna uka arumax kunjamsa jiskʼachatäñapäna, uka profeciax Isaías 50:6-9 qillqatanwa jikxatasiraki (Mat. 26:67; Luc. 22:63). Ukat 33 maran Pentecostés fiesta pasatatxa apóstol Pedrox Jesusaw Jehová Diosan Sirviripaxa, sasaw qhanañchtʼarakïna (Isa. 52:13; 53:11; Hechos 3:13, 26 liytʼasiñapawa). Mesiasat parlki uka profecianakatxa, ¿kuns yatiqassna?
Jehová Diosaw Sirviriparux yatichi
5. Diosan Sirviripaxa, ¿khitin yatichatänsa?
5 Diosan Sirviripat parlki uka profecianakatxa, maynïrixa kunjamsa aka Uraqir janïr jutkasax Jehová Diosampi sapa Yuqapampix wali sum apasipxirïna uka tuqit parlistu (Isaías 50:4-9 liytʼasiñapawa). Diosan Sirvirip pachpawa, Jehová Diosaw nayarux yatichitu sasax säna: “Sapa qhantatiw sum [...] istʼañaxataki [yatichitu]” sasa (Isa. 50:4, NM). Awkipampïkäna ukhaxa istʼasirïnwa, Jupat yatiqasïna ukat taqi kunans iyaw sarakïnwa. ¡Kunja askïnsa, taqi kun Lurir Diosamp yatichatäñaxa!
6. ¿Kunjamsa Diosan Sirviripax Awkiparu taqi chuyma istʼirïtap uñachtʼayäna?
6 Uka profecianxa, aka Sirvirixa Awkiparux ‘taqi kunxaru Munañani Jehová Dios’ sasaw sutichäna, ukham sasinxa Diosax alaxpachansa aka Uraqinsa taqi kunxaru munañanïtap amuyäna. Jupan taqi chuyma Diosar istʼirïtapaxa aka arunakanwa qhan amuyasi, ukanx akham siwa: “[Taqi kunxaru Munañani Jehová Diosaw] nayarux amuytʼa churarakitu, nayasti janiw [kutkataskti], janirakiw maysarux uñtkaraktti” sasa (Isa. 50:5). Uka Yuqawa qalltatpach Diosamp chikänxa, ukat jupa tuqiw Jehová Diosax jaqirusa ukat taqi kunatï utjki ukanaksa luräna. Jupasti Jehová Diosan nayraqatapan kusisitarakïnwa ukat aka Uraqi luraskän ukhaxa, ‘kusisitaw jaqinakar uñjarakïna’ (Pro. 8:22-31).
7. Aka Sirvirix Jehová Diosaw taqi yantʼanakan nayar yanaptʼitani sasaw taqi chuyma atinisïna, ¿kunjamatsa uk yattanxa?
7 Diosan Sirviripax suma yatichtʼatänwa ukhamarak jaqinakarus wal munasïna, ukanakaw aka Uraqir jutkäna ukhax yanaptʼäna. Arknaqatas jikxataskchïnxa, jupatakix Awkipan munañap lurañapuniw wali kusiskañänxa (Sal. 40:8; Mat. 26:42; Juan 6:38). Jesusax kunayman yantʼanakansay jikxatasiñapäkchïnxa, Awkipan yanaptʼapatxa janipuniw pächaskänti. Kunjamtï Isaías profetax siskänxa, jupax akham sänwa: “Jakʼaxankaskiw nayar arxatirixaxa. ¿Khiticha naya tuqi kun saña muni? [...] [Jehová] Tatituw nayarux yanapaskitu” sasa (Isa. 50:8, 9). Chiqpachansa, Diosat jan jithiqtiri aka Sirvirix yatiykäna uka maranakanxa, Diosan yanaptʼap katuqäna, kunjamtï jupxat yaqha profeciax uñachtʼayki ukhama.
Aka Uranqinkkasin Diosan Sirviripan yatiyäwipa
8. Isaías 42:1 qillqatan jikxataski ukarjamax Jesusaw Jehová Diosan ‘ajllitapaxa’, ¿kunjamatsa uk yattanxa?
8 Jesusax 29 marana bautisaskäna ukhax kunas pasäna ukxa, akham sasaw Bibliax qhanañchi: “Qullan ajayuw jupxaru saraqanirakïna [...], ukatsti mä aru alaxpachat istʼasïna: ‘Jumätaw nayan munat Wawaxaxa, kawkïrirutix nayax ajlliskta ukaxa’” sasa (Luc. 3:21, 22). Ukhamatwa Jehová Diosax Isaías libron qillqatäkäna uka ‘ajllitax’ khitïnsa uk qhan uñachtʼayxäna (Isaías 42:1-7 liytʼasiñapawa). Jesusax yatiykäna ukhawa uka profeciax wali muspharkañ phuqasïna. Qillqatapanxa Mateox Isaías 42:1-4 qillqatatwa aytäna ukat Jesusanwa uka profecianakax phuqasi sarakïnwa (Mat. 12:15-21).
9, 10. 1) ¿Jesusax yatiykäna uka maranakanxa kunjamsa Isaías 42:3 qillqatan jikxataski uka profecía phuqäna? 2) ¿Kunjamsa kunäkitix chiqpach chiqakankañax uk uñachtʼayäna? 3) ¿Kunapachas aka Uraqxar chiqakankaña uttʼayani?
9 Jesusan urunakapanxa, judionakan yupaychäw irpirinakapax jaqinakarux uñisipxänwa (Juan 7:47-49). Jaqinakarux janiw sum uñjapkänti ukatwa jaqinakax “niya pʼakisirjam suqus law[aru]” jan ukax niya jiwtʼaskirjam ‘michar’ uñtasitjamäpxänwa. Ukampisa, Jesusax llakitanakatsa pisinkirinakatsa khuyaptʼayasirïnwa (Mat. 9:35, 36). Taqi ukanakaruw wali munasiñampi akham sas jawstʼäna: “Nayar jutapxam taqi qarjatanaka jatjatanaka, nayaw samarayapxäma” sasa (Mat. 11:28). Ukhamarak Jehová Diosan mayitanakaparjamax kunas walixa ukat kunas jan walïkaraki uk yatichäna, ukhamatwa kunas chiqpach chiqakankañax uk uñachtʼayarakïnxa (Isa. 42:3). Jaqinakar respetasina ukat jupanakar khuyaptʼayasaw Diosan leyipax uñjatäñapa sasaw Jesusax yatichäna (Mat. 23:23). Ukat qamirinakarusa pisinkirinakarusa jan yaqhachas yatiyasax chiqakañkañarjam sarnaqirïtapwa uñachtʼayäna (Mat. 11:5; Luc. 18:18-23).
10 Isaías profetan qillqataparjamaxa, Jehová Diosan ajllitapax ‘aka uraqinxa chiqakankaña’ uttʼayani sasaw qhanañchtʼäna (Isa. 42:4). Akat mä jukʼa tiemporuxa ukwa lurani, Cristox Diosan Apnaqäwipan uttʼayat Reyjamaxa, jaqinakan taqi apnaqäwinakap tʼunjani ukat suma apnaqäwipa uttʼayxäni. Ukhawa machaq uraqi uttʼayani, ukansti “taqi kunas chiqapapunïniwa” (2 Ped. 3:13; Dan. 2:44).
‘Qhana’ ukat ‘arustʼäwi’
11. ¿Kunjamatsa Jesusax nayra patak maranakanxa ‘markanakataki mä qhanjamänxa’, ukat kunjamatsa jichhürunakan ukhamäskakixa?
11 Isaías 42:6 qillqatan jikxataski uka profeciarjamaxa, Jesusax ‘markanakatakix mä qhanjamänwa’. Yatiykäna ukhaxa judionakarux jukʼampwa yatichäna (Mat. 15:24; Hech. 3:26). Ukhamarus akham sarakïnwa: “Nayatwa akapacha qhanaxa” sasa (Juan 8:12). Ukhamawa, taqiniruw yatichäna judionakarusa yaqha markankir jaqinakarusa, ukat jan juchan jakäwipsa taqinir qhispiyañatakiw luqtarakïna (Mat. 20:28). Jiwatat jaktasinxa, arkirinakaparux jumanakax nayat qhanañchapxitäta “taqi aka uraqpachana” sasaw säna (Hech. 1:8). Ukat kunapachatï Pablompi Bernabeampix Biblian jikxataski ‘markanakataki mä qhana’ siski uka arunakat aytapxäna ukhaxa, jan judiüpkis uka jaqinakar yatiyasaw uka profeciax phuqasi sasaw sapxäna (Hech. 13:46-48; Isaías 49:6 uñxattʼarakismawa). Jichhürunakanxa, Jesusan ajllit jilanakapax aka Uraqin jiltʼapki ukat yaqha uwijanakjam uñtʼatäpki ukanakaw aka Uraqpachan yatiyasipkaraki. Taqpachaniw suma yatiyäwinak yatiyapxaraki ukat Jesusarus ‘markanakataki mä qhanjamäki’ ukar iyawsapaxañapatakis yanaptʼapxaraki.
12. ¿Kunjamsa Jehová Diosax Sirviriparux ‘markataki mä arustʼawjam’ churäna?
12 Uka pachpa profecianxa, Jehová Diosax ajllit Sirviriparux akham sänwa: “Nayaw jumarux saytʼaysma, munaraktwa jumax mä chimpüñama markaxampi arustʼäwiru mantataxatxa” sasa (Isa. 42:6). Supayaxa, kunaymanitwa Jesusar jiwayañ munäna ukhamat kuntï aka Uraqin lurañapäkan uk jan phuqañapataki, ukampis Jehová Diosaw Yuqaparux jarkʼaqäna jiwañ horasap puriniñapkama (Mat. 2:13; Juan 7:30). Ukatsti, jiwatat jaktayasinsti mä ‘arustʼäwjamaw’ markapar churxäna. Uka arustʼäwisti Diosat jan jithiqtir Sirvirix ‘markanakatakix mä qhanjamäskakiniwa’ sasaw Diosax arsüna ukat Diosar yupaychañ tuqit chʼamakan jakirinakarux qhispiyañaparakïnwa (Isaías 49:8, 9 liytʼasiñapawa). *
13. ¿Kunjamsa Jesusax aka Uraqinkkasïnxa Diosar yupaychañ tuqit chʼamakan sarnaqapkäna ukanakarux qhispiyäna, ukat kunjamsa jichhürunakanxa uk luraskaraki?
13 Diosan uka arsutaparjamax Jehová Diosan aka ajllit Sirviripaxa ‘juykhunakarux uñjayañapänwa’ ukat ‘kawki chʼamaka calabosonakantix jakapki’ ukanakarus qhispiyañaparakïnwa (Isa. 42:7). Uk lurañatakixa, Jesusax kawkïr yatichäwitix jan Qullan Qillqatanakarjam yatichatäkäna ukanak qhanstʼayäna, ukat Diosan Apnaqäwipatsa suma yatiyäwinaksa yatiyarakïnwa (Mat. 15:3; Luc. 8:1). Ukhamatwa kʼari yupaychäwipatxa walja judionakar qhispiyäna, ukat jupanakax arkirinakapäxapxarakïnwa (Juan 8:31, 32). Jesusax millón millón jan judiüpki uka jaqinakarus qhispiyarakïwa. Jesusax taqi arkirinakaparux akham sänwa: “Taqi akapachankir jaqinakar yatiyir sarapxam [...] nayar arkir tukuyapxam” sasa. Ukat sapürupuniw jumanakampïskta “akapachan tukusiñapkama” sasaw sarakïna (Mat. 28:19, 20). Ukhamawa, Jesucristuw alaxpachat Uraqpachan Diosan Apnaqäwipat yatiyasiski ukxa uñjaskaraki.
Jehová Diosaw Sirviriparux wali jachʼar apti
14, 15. ¿Kunjamsa Jehová Diosax Sirviriparux wali jachʼar apti, ukat kunatsa ukham luräna?
14 Sirviripat parlki uka yaqha profecianxa, Jehová Diosax akham sänwa: “Sirvirixax taqi kunan atipjani, wali jachʼaru aptatäniwa” sasa (Isa. 52:13). Diosan apnaqäwipat jan jithiqtatapata ukat kunayman yantʼanakan aguantatapatwa Jehová Diosax Yuqaparux wali jachʼar aptäna.
15 Apóstol Pedrox Jesusat akham sänwa: “Jupasti alaxpacharuw makhatxi ukatsti Diosan kupïxaparuw quntʼasxi, ukhamarak jichhax angelanakasa, munañaninakasa, chʼamasa jupar katuyatawa” sasa (1 Ped. 3:22). Ukat saskakïnwa: “[Jesusax] jupa kikpaw jiskʼar tukuwayi, jaysatap laykusti [tʼaqhisiñ lawan’, NM] jiwañkamarakiw puriwayi, ukham jiwañax sinti pʼinqäkchïna ukasa. Ukatwa Diosax juparux wali jachʼaru apti, mä suti churaraki, uka sutisti taqi sutit sipans wali jachʼarakiwa. Ukhamat Jesusan sutip istʼasinxa taqi jakir jaqinakasa, akapachansa, alaxpachansa, manqhapachansa, killtʼasipxañapataki, ukat taqini arsuñapataki Jesucristox Tatitütapa Dios Awkix jachʼachatäñapataki” sasa (Fili. 2:8-11).
16. 1) ¿Kunjamsa 1914 maranxa Jesusax “wali jachʼaru aptatän[xa]”? 2) ¿Ukkhat jichhakamax kunsa Jesusax lurawayi?
16 Jesusax 1914 maranwa “wali jachʼaru aptatän[xa]” kunapachatï Jehová Diosax Jupan Apnaqäwipxaru ajllit Reyjama uttʼaykäna ukkha (Sal. 2:6; Dan. 7:13, 14). Ukkhat aksaruwa, ‘jupamp timasirinakarux atipjaski’ (Sal. 110:2). Nayraqatax Supayampiru saxranakapampiruw aka Uraqir jaquqanïna (Apo. 12:7-12). Ukxarusti, Jilïr Ciro apnaqirjamax ‘Jachʼa Babiloniatwa’ ajllit jilanakaparux qhispiyarakïna (Apo. 18:2; Isa. 44:28). Jichhaxa Uraqpachan yatiyasiñapatakiw pʼiqtʼaskaraki, ukhamat aka Uraqin jiltʼki uka ajllit jilanakaparusa ukat millón millón ‘yaqha ovejanakjam’ uñtʼatäpkis uka ‘jiskʼa tamar’ yanaptʼirinakarusa tantachaskaraki (Apo. 12:17; Juan 10:16; Luc. 12:32).
17. ¿Kunsa Diosan Sirviripat Isaías libron jikxataski uka profecianakat yatxattʼasax yatiqawaytanxa?
17 Isaías libron qillqatäki uka muspharkañ profecianakat yatxatañaxa Jesucristo Reyisaru ukat Qhispiyirisaru jukʼamp askit uñjañatakiw yanaptʼawayistu. Aka Uraqir jutkasax kunsa lurawayi ukat jupax kunjamänsa ukaxa, alaxpachankir Awkipat suma yatichäwi katuqatap uñachtʼayäna. Ukat yatiyäwipampisa ukat jichhürkama arkirinakapar yatiyapxañapatak uñjañampisa ‘markanakatakis mä qhanjamätapwa’ uñachtʼayaski. Kunjamsa Ajllit Sirvirix jiwasar qhispiyañatakix tʼaqhisiñapäna ukat jiwañapäna ukaw yaqha profecian qhanañchasiskaraki, ukxa jutïr yatichäwinwa yatxataskañäni. Taqi akanakatxa wali ‘amuyumpi’ lupʼikiptʼapxañasaw wakisi, Jesusan jiwäwipat amtañax jakʼachasinkipansti jukʼampïñapawa (Heb. 12:2, 3).
[Qhanañchäwinaka]
^ Uka profecianakax Isaías libron 42:1-7; 49:1-12; 50:4-9, ukat 52:13–53:12 qillqatanakan jikxatasi.
^ Isaías 49:1-12 jikxataski uka profeciat jukʼamp yatxatañatakixa Las profecías de Isaías, una luz para toda la humanidad II, sat libro 136-145 jananak uñxattʼarakisma.
Amtañataki
• ¿Khitisa Isaías libron qillqatäki uka ‘sirvirixa’, ukat kunjamatsa uk yattanxa?
• ¿Kunjamsa Jehová Diosax Sirviriparux yatichäna?
• ¿Kunatsa Jesusax ‘markanakatakix mä qhanjamaw’ sasixa?
• ¿Kunjamsa Diosan Sirviripax wali jachʼar aptatäna?
[Jisktʼanaka]
[21 janan fotopa]
Isaías libron qillqatäki uka ‘sirvirix’ Mesías Jesusawa, sasaw Felipex qhanañchtʼäna
[23 janan fotopa]
Diosan ajllit Jesús Sirviripaxa pisinkirinakarusa llaktʼatanakarusa khuyaptʼayasirïnwa
[24 janan fotopa]
Jehová Diosaw Jesusarux Apnaqäwipxaru Reyjam uttʼayasax wali jachʼar aptäna