Diosan khuyapayasiñapampi maynit maynikam yanaptʼasipxañäni

“Maynit maynikamaw munasipxañama jila purjam taqi chuymampi, suma aytat sarnaqañansti purapat suma axsartʼañampi uñjasisa.” (ROM. 12:10.)

1. ¿Diosan Arupax kamsasas chʼamañchistu?

 LLAKINAKAMP aynachtʼatäkañäni ukhaxa, Jehová Diosaw yanaptʼistani, sasaw walja kuti Diosan Arupax chʼamañchtʼistu. Aka chuymachtʼir arunakat amuytʼañäni: “[Jehová] Diosaw katxäsiski liwisirinakaru, ukhamarak aptaraki taqi tʼaqhisiyatanakarusa”. “Jupaw chuyma usuchjatanakarux waliptayi, chhuxrinakap kʼumaracharaki.” (Sal. 145:14, Aymar Biblia, 1992; Sal. 147:3.) Alaxpachankir Awkisax akham sistuwa: “Naya, juman Tatitu Diosamawa, jumarux [kupi] amparamat wayxarsma, irparaksma; nayaw saraksma: ‘Jan axsaramti, nayaw yanapaskäma’” sasa (Isa. 41:13).

2. ¿Kunjamanakatsa Jehová Diosax luqtirinakaparux chʼamañchtʼi?

² Jehová Diosax alaxpachanxay jakchixa, ¿kunjamaraki amparats wayxaristaspa ukat wali llakitäktan ukhax yanaptʼistaspa? Jupax kunaymanitwa yanaptʼistaspa. Amuytʼañataki, qullan ajayup churistu ukhamat “jachʼa chʼama[nïñasataki]” (2 Cor. 4:7; Juan 14:16, 17). Ukat Jupan amuytʼayat Arupampiw chʼamañcharakistu (Heb. 4:12). Ukat Jehová Diosan yaqha yanaptʼapax utjarakiwa. ¿Kawkïrisa? Uka jisktʼar qhanañchañatakix apóstol Pedron nayrïr qillqatapat yatxatañäni.

Diosan khuyapayasiñapax kunaymanitwa uñjasi

3. 1) ¿Apóstol Pedrox kamsis yantʼanakatxa? 2) ¿Pedrox mayïri carta qillqatapan tukuyaparux kamsisa?

³ Qillqatapanxa Pedrox ajllit cristianonakarux kusisitäpxañamawa, kunattix jumanakax mä suma suytʼäwinïpxtawa sasaw säna. Ukampisa, akham sarakïna: “[Jichhaxa] inas wakisirakchi mä jukʼa pacha kunayman yantʼanakan tʼaqhisipxañama” sasa (1 Ped. 1:1-6). Pedrox janiw mä yantʼatak parlkänti, jan ukasti “kunayman” yantʼanakat parläna. ¿Jilat kullakanakax taqi uka yantʼanakar atipjapxaspati? Pedrox uka tuqit parlkasax janiw jilat kullakanakarux payachasiykänti, kunayman yantʼanakansay uñjaschiñäni Jehová Diosaw taqi ukanakar atipjañ yanaptʼistani, sasaw säna. Qillqatapan niya tukuyaparuw uka arunakapax jikxatasi, “taqi kunan tukusiñapa[t]” parlkäna ukkha (1 Ped. 4:7).

4. ¿Kunatsa 1 Pedro 4:10 jiskʼa tʼaqan jikxataski uka arunakax wal chuymachtʼistu?

⁴ Pedrox akham siwa: “[Sapa maynis] Diosat katuqataparjama mayninakarux sirvpan, Diosan kunaymani luräwinakani askipata suma lakirinakjama” sasa (1 Ped. 4:10, MT). Uka qillqatanxa wasitatwa ‘kunayman’ siski uka arux uñsti. Ukhamasti, Pedrox wasitatwa yantʼanakax kunaymanit jutaspa sasin qhanañchtʼkchisa, Diosax khuyaptʼayasiñapatxa kunaymanitwa yanaptʼarakistaspa sasaw säna. ¿Kunatsa uk yatiñax chuymachtʼistu? Kuna yantʼanakansay uñjaschiñänixa, Diosan khuyaptʼayasiñap katuqapuniñäniwa, ukaw kunayman yantʼar atipjañatakix yanaptʼistani, ukwa yatichistu. Jichhasti, ¿kunjamatsa Jehová Diosax khuyaptʼayasistu? Jilat kullakanakasampiw yanaptʼayistu.

 Maynit maynikama yanaptʼasipxañäni

5. 1) ¿Kunsa cristianonakax lurapxañasa? 2) Suma churäw tuqitxa, ¿kuna jisktʼanakas utji?

⁵ Pedrox tamankir taqi jilat kullakanakarux akham sänwa: “Ukat sipana jumanakanxa munasiñax utjapunpan” sasa. Ukat saskakïnwa: “[Sapa maynis] Diosat katuqataparjama mayninakarux sirvpan, Diosan kunaymani luräwinakani askipata suma lakirinakjama, MT” sasa (1 Ped. 4:8, 10). Ukhamawa, sapa mayniw jilat kullakanakar chʼamañchtʼañasa. Taqiniw Jehová Diosat suma churäwi katuqtanxa, uka suma churawxa taqiniruw lakirañasaraki. ¿Kunatsa parlasktanxa? Pedrox mä suma churäwiw siwa. ¿Kunas uka suma churäwixa? ¿Ukat kunjamatsa uka churäwimpix mayninakar yanaptʼaraksna?

6. ¿Kawkïr suma churäwinaksa katuqtanxa?

⁶ Diosan Arupax akham siwa: “Taqi kunatix askïki ukhamarak chiqäki ukax alaxpachatwa juti” (Sant. 1:17). Jehová Diosax uka suma churäwinak churasaw khuyaptʼayasiñap uñachtʼayarakistu. Taqi uka suma churäwinakatxa, maynïrix qullan ajayupawa. Uka suma churäwiw cristianjam suma jaqïñasatakix yanapistu, sañäni, munasirïñasataki, suma chuymanïñasataki ukat llampʼu chuymanïñasataki, taqi ukanakaw jilat kullanakasar munasiñamp uñjañasataki ukat yanaptʼañasataki yanapistu. Yatiñkankañanïñasa ukat Diosar sum uñtʼañasa mä suma churäwirakiwa, qullan ajayun yanaptʼapampirakiw ukanak jikxattanxa (1 Cor. 2:10-16; Gál. 5:22, 23). Chiqpachansa, kuntï sum lurañ yatktan ukanakax alaxpachankir Awkisan mä suma churäwipawa, Jupar yupaychañasataki ukat jachʼañchañasatakiw ukanak churistu. Ukhamaxa, Diosan khuyaptʼayasiñapwa jilat kullakanakasar uñachtʼayañasa, ukwa Diosax muni.

¿Katuqatasarjamax kunjamsa mayninakar yanaptʼsna?

7. 1) ¿“Katuqataparjama mayninakarux sirvpan” siski uka arux kun sañs muni? 2) ¿Kunanaksa jisktʼasiñasäspa, ukat kunatsa?

⁷ Uka churäwinak katuqatasat parlkasaxa, Pedrox akham sänwa: “[Sapa maynis] Diosat katuqataparjama mayninakarux sirvpan”. Kunjamtix uka arunakax siskixa, taqinix janiw taqi kunsa sum lurañ yatkapuntanti. Ukhamarusa, katuqatasarjamaxa “mayninakarux sirvpan” sasaw apóstol Pedrox chʼamañchistu. “Mayninakarux sirvpan” siski uka aruxa mäki ukhamarjam phuqapxañapataki qillqtʼatawa. Ukatwa akham jisktʼasiñasa: “¿Jehová Diosat katuqatajarjamax jilat kullakanakar yanaptʼasktti?” (1 Timoteo 5:9, 10 uñxattʼarakismawa).  “¿Jan ukax qamiriptañataki ukat taqi kuntï munktxa uka jikxatañatakich chʼamachasisktxa?” sasa (1 Cor. 4:7). Kuntï katuqktan uka churäwinakampitï mayninakar yanaptʼtan ukhax Jehová Diosax kusisiwa (Pro. 19:17; Hebreos 13:16 liytʼasiñapawa).

8, 9. 1) ¿Kunjamanakatsa cristianonakax jilat kullakanakapar yanaptʼapxi? 2) ¿Kunjamsa tamamankir jilat kullakanakax maynit maynikam yanaptʼasipxi?

⁸ Nayra patak maranakan jakasir cristianonakax kunaymanitwa jilat kullakanakaparux yanaptʼapxirïna sasaw Bibliax qhanañchtʼi (Romanos 15:25, 26; 2 Timoteo 1:16-18 liytʼasiñapawa). Jichhürunakanxa, chiqpach cristianonakax uka kikparakiw ‘Diosat katuqataparjamax mayninakarux sirvpan’ siski uka arur taqi chuymaw istʼaraktanxa. Kunjamsa uk lurapxi uk uñjapxañäni.

⁹ Walja jilatanakaw arstʼañatakisa tamankir jilat kullakanakar sum chʼamachtʼañatakisa walja horanak wakichtʼasipxi. Ukhamatwa chʼamachtʼir arunakapax tamankir jilat kullakanakar aguantapxañapatakix yanaptʼaraki (1 Tim. 5:17). Yaqhip jilat kullakanakax munasirïpxatapata khuyaptʼayasirïpxatapatwa uñtʼatäpxaraki (Rom. 12:15). Yaqhipanakax llakimp aynachtʼatanakar visittʼañsa ukat jupanakampi Diosat mayisiñsa janipuniw armasipkiti (1 Tes. 5:14). Yaqhipanakax jan waltʼäwinakan uñjasipki ukanakaruw chʼamañchtʼir arunakampi cartanak qillqtʼapxaraki. Yaqhipanakasti usutäpki ukanakaruw tantachäwinakar irpapxaraki. Ukat waranq waranq jilat kullakanakaw chijinakampi jan walin uñjasipxi ukanakan utanakap wasitat utachtʼasa yanaptʼapxaraki. Ukham munasiñamp yanaptʼasaxa, “Diosan kunayman luräwinakani” khuyapayasiñapwa uñachtʼayasipki (1 Pedro 4:11 liytʼasiñapawa).

¿Uka pä luräwinakatxa kawkïris jukʼamp wakiskirixa?

10. 1) ¿Kawkïr pä qullan luräwinakasa Pablotakix wali wakiskirïnxa? 2) ¿Kunjamatsa Pablot yatiqassna?

¹⁰ Jilat kullakanakar yanaptʼañat sipansa yaqha luräwi katuqaraktanxa, jaqinakar suma yatiyäwinak yatiyaña. Apóstol Pablotakix uka pä luräwiw Diosar luqtäwipan wali wakiskirïnxa. Éfesonkir cristianonakaruxa, kunjamsa jupanakar sirviñatakix mä luräwi katuqatayna uka tuqitwa parläna (Efe. 3:2, NM). Ukampisa, akham sarakïnwa: ‘Diosax askit uñtʼapxistu, pachpa qhispiyasiñ arunak parliriw khitapxistu’ sasa (1 Tes. 2:4). Jiwasax Pabljamarakiw Diosan Apnaqäwipat yatiyañataki mä luräwi katuqtanxa. Jupax jan qarjtasaw yatiyirïnxa, jiwasax jupat yatiqasisaw taqi chuyma yatiyaskaraktanxa (Hech. 20:20, 21; 1 Cor. 11:1). Diosan Apnaqäwipat yatiyañaxa jaqinakarux qhispiyaspawa, uk sum yattanxa, ukampis jilat kullakanakasarux yanaptʼañasarakiwa “ukhamat ajayu tuqin chʼamañchtʼañataki”, kunjamtï Pablox lurirïnxa ukhama (Romanos 1:11, 12; 10:13-15 liytʼasiñapawa).

11. Suma yatiyäwinak yatiyañampiru jilat kullakanakar chʼamañchtʼañampiruxa, ¿kunjamsa uñjañasa?

¹¹ ¿Uka pä luräwinakatxa kawkïrisa jukʼamp wakiskirixa? Paypachaw wali wakiskirixa. Mä jamachʼin chhiqhanakapjamawa. Kunjamatï, mä jamachʼin jaltañapatakix paypach chhiqhapax wali wakiskirixa, ukhamarakiw jiwasatakix qullan luräwinakanxa uka pä luräwi lurañasax wali wakiskirirakixa, ukhamatwa suma cristinüsnaxa. Ukatwa, suma yatiyäwinak jaqinakar yatiyañampi jilat kullakanakar chʼamañchtʼañampi janis mä luräwikïkaspa ukham amuyañat sipansa, kunjamtix apóstol Pedrompi Pablompix uka pä luräwirux uñjapxirïna ukham uñjaraktanxa, paypachaw wali wakiskirixa. ¿Kunatsa paypachax wali wakiskirixa?

12. ¿Kunjamatsa Jehová Diosarus yanaptʼksna ukhamäspa?

¹² Yatiyir sarasinxa, kuntï yatktan ukarjamaw Diosan Apnaqäwipat chʼamañchtʼir arunakampi jaqinakan chuymapar purtʼañatakix yatichtanxa. Ukhamatwa Criston arkirinakapäpxañapatakix yanaptʼtanxa. Uka kikparakiwa jilat kullakanakasarux chʼamañchtʼaraktanxa.  Chʼamañchtʼir arunakasa ukat jan kuns suyasa jilat kullanakar yanaptʼañasa, Diosan khuyaptʼayasiñap uñachtʼayaraki (Pro. 3:27; 12:25). Ukhamatwa Cristor arkasipkakiñapatakix yanaptʼtanxa. Uka pä luräwinxa —jaqinakar yatiyasa ukat jilat kullakanakar yanaptʼasaxa— Jehová Diosarus yanaptʼksna ukham suma luräwi katuqaraktanxa (Gál. 6:10).

“Maynit maynikamaw munasipxañama”

13. Maynit maynikama yanaptʼasiñax jan utjxaspa ukhaxa, ¿kunarus purtʼassna?

¹³ Pablox akham sasaw jilat kullakanakarux chʼamañchtʼäna: “Maynit maynikamaw munasipxañama jila purjam taqi chuymampi, suma aytat sarnaqañansti purapat suma axsartʼañampi uñjasisa” sasa (Rom. 12:10). Jilat kullakanakar munasitas laykuw taqi chuyma yanaptʼtanxa, ukhamat Diosan khuyapayasiñap uñachtʼaytanxa. Supayax janiw maynit maynikam yanaptʼasiñas munkiti, ukhamarutï purtʼassnaxa janiw mä wawaki mayachtʼat jakasiñax utjxaspati, jiwasax uk sum amuytanxa (Col. 3:14). Janitï mayachtʼat jakasiñax utjxaspaxa, janirakiw kusisit chuymampi yatiyxsnati. Ukhamatwa Supayax qʼal aynachtʼayistaspa.

14. ¿Khitinakas jilat kullakanakar yanaptʼasax askinak katuqapxi? Mä experienciat arstʼma.

¹⁴ Jilat kullakanakar yanaptʼañaxa, janiw jupanakatakik askïkiti, jan ukasti jiwasatakix askirakiwa (Pro. 11:25). Ryan ukat Roni, Illinois (Estados Unidos) uksa tuqinkir mä chacha warmit uk yatiqaraksna. Kunapachatï Katrina sat mä jachʼa thayax walja jilat kullakanakan utanakap qʼal tʼunthapitap yatipkäna ukhaxa, irnaqäwipsa ukat kawkhantï utjasipkäna uka utsa jaytanukuniwayxapxänwa, munasiñanïpxatapatwa ukham lurapxatayna. Mä mirqʼi auto alapxatayna, uka autox janiw ukham autokïkänti jan ukasti uka manqhax utjasiñatak wakichtʼatänwa, uka auto askichtʼasinxa 1.400 kilometronakwa Luisiana satäkis uksa tuqir puriñkamaw sarapxäna. Mara jilaw ukankapxäna ukat tiempopsa chʼamapsa ukat qullqipsa jilat kullakanakar yanaptʼañatakiw churapxäna. Ryan sat 29 maran jilataxa, akham sänwa: “Jilat kullakanakar yanaptʼasaxa jukʼampwa Diosar jakʼachasta. Kunjamsa Jehová Diosax markapar sum uñji uk uñjta”. Ukat saskakïnwa: “Yatxattʼat cristianonakampi irnaqtʼañaxa, jilat kullakanakar sum yanaptʼañatakiw  yatichitu. Ukatxa Jehová Diosan markapankapki uka wayn tawaqunakatakixa walja luräwinakaw utjistu, uk yaticharakitu” sasa. Roni, 25 maran kullakax akham sarakïnwa: “Mayninakar ukham yanaptʼatajatxa walpun yuspärtxa. Janipuniw ukham kusisit jikxatasirïkti. Kuntï mayninakar yanaptʼasax yatiqawayktxa ukax nayan askijatakïskapuniniwa” sasa.

15. ¿Kunatsa maynit maynikama yanaptʼasiskakiñasa?

¹⁵ Kunjamtï uñjtanxa, jaqinakar suma yatiyäwinak yatiyapxam siski uka kamachir istʼañasa ukat jilat kullakanakar yanaptʼañasa taqinin askisatakiwa. Khitinakatï jiwasat yanaptʼa katuqapki ukanakax Diosar yupaychañ tuqitxa chʼamañchtʼataw jikxatasipxi, ukat jiwasax jupanakar yanaptʼasaxa wali kusisitarakiw jikxatastanxa (Hech. 20:35). Sapa maynitï jilat kullakanakasat llakisiñänixa, tamankañax wali kusiskañapunïniwa. Ukhamaraki, munasiñampi maynit maynikama uñjasiñänixa chiqpach cristianütaswa uñachtʼayarakiñäni uk janiw armañasäkiti. Jesusax akham sänwa: “Jumanakatakix maynit maynikama munasipxätaxa, taqiniw amuyapxani nayan discipulonakaxäpxatama” sasa (Juan 13:35). Jehová Dios Awkisaruw jukʼamp yuspärtanxa, kunattix Jupaw kunayman yantʼanakan uñjasipki ukanakarux aka Uraqinkir luqtirinakapampix chʼamañchayaraki. Ukhamasti, Diosat churäwi katuqatasarjamax maynit maynikama yanaptʼasiskakiñäni. ¿Jumax ukham lurañatakix chʼamachasiskakïtati? (Hebreos 6:10 liytʼasiñapawa.)

¿Amttati?

• ¿Kunjamatsa Jehová Diosax luqtirinakaparux chʼamañchtʼi?

• ¿Kuna luräwsa katuqtanxa?

• ¿Kunjamatsa jilat kullakanakar yanaptʼsna?

• Katuqatasarjamaxa, ¿kunas jilat kullakanakar yanaptʼaskakiñatakix wiytistani?

[Jisktʼanaka]

[13 janan fotopa]

¿Kuntï sum lurañ yatktan ukampix mayninakar yanaptʼasktanti, jan ukax jiwasan askisakcha thaqhasktanxa?

[15 janan fotopa]

Jaqinakarux suma yatiyäwinak yatiyañasawa, ukat jilat kullakanakar yanaptʼañasarakiwa

[16 janan fotopa]

Khitinakatï jilat kullakanakapat khuyaptʼayasipki ukanakax wali askit uñjatäpxiwa