Jaqinakar Jesusan arkirinakapar tukuyañax kusiskañawa

“Yatiyir sarapxam, nayar arkir tukuyapxam.” (MAT. 28:19.)

1-3. 1) Walja jilat kullanakax arkirinak tukuyañ luräwiruxa, ¿kunjams uñjapxi? 2) ¿Kuna jisktʼanakarus qhanañchtʼasiskani?

 “PAKISTÁN markankir mä familiaruwa, tunka mayan semananak Diosan arunakapat yatichxta ukat jupanakampix wali sumpun apasipxta” sasaw Estados Unidos markan mä grupon hindi aru parlirinakamp chika luqtir kullakax qillqatayna. Ukat saskakiwa: “Niyaw markapar sarxapxani, janiw jupanakampïxäti ukxat lupʼisax jachañ jachañakiw jutitu. Jehová Diosat kunatï chiqäki uk jupanakar yatichañaxa nätakix wali kusiskañapunïnwa” sasa.

² Jumax maynir Bibliat yatichasaxa, ¿kusisirakirïtati? Jesucristosa arkirinakapasa yaqhanakar arkirinakar tukuyasax wal kusisipxirïna. Kunapachatï Jesusan 70 yatichtʼat arkirinakapax yatiyir saräwit kuttʼanipkäna ukat kunanaksa lurapxatayna uk kusisit arstʼapxäna ukhaxa, Jesús pachpaw ‘qullan ajayump phuqtʼatäsax’ wali kusisit jikxatasïna (Luc. 10:17-21). Jichhürunakanxa, waljaniw Diosan arunakapat yatiyir sarañ munapxaraki. Amuytʼañataki,  2007 maranxa sapa phaxsinxa niya suxta millón chikatan jaqinakaruw Diosan Arupat yatichasiwayi.

³ Ukampisa, yaqhip yatiyir jilat kullakanakax janiw Bibliat mä yatiqirinïpkiti. Ukat yaqhipanakax walja tiempow jan mä yatiqirinïpkarakiti. ¿Kunanakas jan yatiqirinïñatakix jarktʼistaspa? ¿Kunjamats ukanakar atipsna? Jesusax akham sasaw arkirinakapar säna: “Yatiyir sarapxam, nayar arkir tukuyapxam” sasa, ¿kunatsa uka arunakar phuqañatakix wal chamañchasiñasa? (Mat. 28:19.)

Kunanakas aynachtʼayistaspa

4, 5. 1) ¿Kunjamsa yaqha markanakanxa Diosan arunakap istʼapxi? 2) Yatiyir sarasinxa, ¿kuna jan waltʼäwinsa jilat kullakanakax yaqhip chiqanakan jikxatasipxi?

⁴ Yaqhip markanakanxa jaqinakax kusisiñ chuymampiw Bibliat apstʼat qillqatanak katuqtʼasipxi ukat Bibliat yatichtʼirisma satax jankʼakiw iyaw sapxaraki. Australia markat Zambia markar qamartʼañatak jutir mä chacha warmix akham sasaw Zambia markankirinakat qillqatayna: “Kuntix sapkitäna ukax chiqäskapuniwa, uka markan Bibliat yatxatañ munirinakax waljapuniw utji. Yamas callenakan yatiyañax wali sumapuniwa. Jupanakaw jakʼachasinipxitu, yaqhipanakax kawkïr revistti munapki uk mayipxitu” sasa. 2007 maran uka markanxa, pä patak waranqats jila yatiqirinakaruw Bibliat yatichasiwayi, sapa yatiyirix niya pä yatiqirinïpkaspas ukhama.

⁵ Ukampisa, yaqha chiqanakanxa Bibliat apstʼat qillqatanak liytʼañ munirinakaru ukat Bibliat yatiqan munirinakar jikxatañax chʼamakirakiwa. ¿Kunatsa? Kunattix yatiyktan ukhax janiw utanakapankapkiti ukat yaqhanakax janiw yupaychañ tuqit parlañ munapkiti. Ukat waljaniw jan kuna yupaychäwin uywata jilsuwayapxi, jan ukax kʼari yupaychäwinakan luräwinakap uñjasax Bibliat janiw kunsa yatiñ munxapxarakiti. Yaqhanakasti yupaychañ tuqit kʼari irpirinakapamp aynachtʼayata ukat jan awatirin uwijanakjam jaytanukut uñjasiwayapxi (Mat. 9:36). Ukatwa Bibliat yatichäma satax jan istʼañ munxapxarakiti .

6. Yaqhip jilat kullakanakaxa, ¿kuna jan walinakans jikxatasipxi?

⁶ Jilat kullakanakatxa, yaqhipanakax yaqha jan walinakan uñjasisaw llakisipxaraki, sañäni, chuymankipstatäxasinsa usutäxasinsa, janiw nayrjam jaqinakar yatichirjamäxapxiti. Ukat yaqhanakasti inas jaqinakar yatichañataki jan wakichtʼatäpkaspas ukham amuyasipxarakchi. Kamisatï Moisesax Faraonampi parlanim satax jikxataskäna ukhamaw jikxatasipxaraki, Moisesax Diosarux akham sänwa: “¡Ay Tata! Nayax janiw suma parlirïkti, ni nayrasa, ni jichha naya servirimampi parlkta ukkhasa” sasa (Éxo. 4:10). Awisax inasa, maynix janis kunatakis askïkaspa ukham amuyaschispa, ukat aynachtʼiristwa sasa axsarayaschispa. Inas akham sissna: ‘Janiw suma yatichirïkti janjakiw mä yatiqirirus bautisasiñapkam yanaptʼkirïstti’ sasa. Ukhamax yatichirjam aynachtʼiristwa sas amuyasisaxa, inas kunatakirak chʼam tukuskä sasax sissna. ¿Kunjamats uka jan wali amuyunakar atipsna?

Chuymas wakichtʼasiñäni

7. ¿Kunatsa Jesusax taqi chuyma yatiyirïna?

⁷ Nayraqatax chuymas wakichtʼasiñasa. Jesusax akham sataynawa: “Suma jaqix sumanakwa arsu suma chuymanïtap layku” sasa (Luc. 6:45). ¿Kunas Jesusan chuymapan utjäna? Mayninakar wal yanaptʼañ munirïna. Ukatwa jaqinakar taqi chuyma yatiyarakïnxa. Amuytʼañataki, kunapachatï judío jilanakapax yupaychaw tuqit aynachtʼat jikxatasipxatap uñjäna ukhaxa, wal jupanakat khuyaptʼayasïna ukat arkirinakaparux akham sarakïnwa: “Cosecha apthapiñax waljawa [...]. Mayipxamaya yapunirux jukʼamp irnaqirinaka khitaniñapataki” sasa (Mat. 9:36-38).

8. 1) ¿Kun amtañasasa? 2)  Kuntï Bibliat yatiqir mamax siskäna ukatxa, ¿kuns yatiqassna?

⁸ Maynix tiempo apstʼasisaw yatichtʼawayistu, ukaw wali askïnxa. Uk amtañaw kunjamsa yatiyäwisax jaqinakatakix wali askïspa uk amuytʼañ yanaptʼistani. Mä yatiqir mamax markapan sucursalax utjki ukaruw akham sas qillqatayna: “Diosan Qhanañchirinakapax Bibliat nayaru yatichir jutapxatapatxa wal  kusistxa. Ukat kunayman jisktʼanakajaru qhanañchtʼañatakix wal chʼamachtʼasipxi, walja horaw yatxatapxta janiw ukhamäniw sapkayätti. Ukampis nayampix wali paciencia chuymanïpxiwa, taqi kuntï yatipki ukanaksa yatichirjamäpxänwa. Ukatwa jupanakar uñtʼatajatxa Jehová Diosarusa Jesusarusa wal yuspärtxa” sasa.

9. ¿Jesusax kun lurañatakis jukʼamp chʼamachtʼasirïna, ukat kunjamsa jupat yatiqassna?

⁹ Amtañasarakiwa, janiw Jesusar istʼapkäna ukanakax taqini jupan arkirinakapar tukupkänti (Mat. 23:37). Ukat arkirinakapar tukupkäna ukanakat yaqhipanakax Jesusatsa yatichäwinakapatsa jithiqtasaw sarxapxäna (Juan 6:66). Ukhamäkipansa, Jesusax janiw yatichäwijax inamayaw siskänti. Waljanis yatichäwinakapar jan istʼapkchïnxa, kuna askinaktix jikxatkäna uk uñjäna. Jupax yapunakax puquratäkaspas niya apthapiñ horasäkaspas ukham amuyäna, ukatwa yatiyasax wali kusisit jikxatasirakïna (Juan 4:35, 36 liytʼasiñapawa). Ukhamaraki, kawkha chiqantï jaqinakar yatiyktan ukan jukʼanikis istʼapkchistuxa, khitinakatï istʼapki ukanakar yanaptʼañatakiw chʼamachasiñasa. ¿Kunjamats ukham lursna?

Apthapiñatak yapuchañäni

10, 11. ¿Kusisit yatiyaskakiñatakix kun lurañas wakisispa?

¹⁰ Mä yapuchirix suma achunaka apthapï sasaw yapuchi. Ukhamarakiw jiwasax yatiyir sarktan ukhaxa, Bibliat yaqhanakar yatichañ qalltä sasaw chʼamachasiñasa. Ukat wal chʼamachtʼasiskasasa, yatiyktan jan ukax wasitat kutʼktan ukhasa, mä qhawqhaniruk jikxatasax inas llaktʼat jikxatassna. Ukhamäspa ukhaxa, ¿janit utat uta yatiyir sarxañäni? Janiwa, saraskakiñasawa. Kunattix utat uta yatiyir saratas laykux Diosan Arupat jan mä kutis istʼapkäna ukanakarux jikxataskaktanwa.

¹¹ Kusisit yatiyaskakiñatakix kunaymanitwa  jaqinakar yatiyaraksna. Amuytʼañataki, ¿callenakana qhatunakana yatiyirïtati? ¿Telefonot jawstʼas yatiyasmati, jan ukax khitinakampitï parlkta ukanakan telefon numerop mayisax yaqhüru jawstʼasmati? Jumatï yatiyaskakiñatak kunayman tuqit chʼamachtʼasïta ukhaxa, Diosan Apnaqäwipat istʼirinakax utjaniwa, ukat ukham uñjasax wali kusisitarakiw jikxatasïta.

¿Jan yäqapkistani ukhax kamachsnasa?

12. ¿Khitinakarutï yatiyktan ukanakax yupaychañ tuqit jan yatiñ munapkaspa ukhax kamachsnasa?

¹² ¿Khitinakarutï yatiyktan ukanakax yupaychañ tuqit jan yatiñ munapkaspa ukhax kamachsnasa? Kunanakatï llakisiyki ukanakat parltʼañasawa. Apóstol Pablox Corintonkir jilat kullakanakarux akham sasaw qillqäna: “Kunapachatï nayax judionak taypinkta ukkhaxa, judiökiristsa ukhamarakiw tukta [...]. Mä tuqitsti khitinakatix jan Moisesan leyinakaparjam sarnaqki ukanak taypinxa jupanakjamakirakiw nayax tukta, chiqpachansa Diosan leyiparjama sarnaqkta ukasa [...]. Jupanakjamaw tukta”. ¿Kunatsa Pablox ukham luräna? “Ukhamata jupanakat mä qawqhanirus [qhispiyañataki]” sasaw qhanañchtʼäna (1 Cor. 9:20-22). Jiwasax ukhamarakiw uta jakʼankirinakasarux kunanakatti llakisipki uka tuqinakat parltʼsnaxa. Waljaniw familiapan sum jakasiñ munapxi. Jan ukax inas kunatakis jaktan uk yatxatañ thaqhasipkarakchi. ¿Janit Diosan Apnaqäwipat chuymar purtʼkir yatichäwinak yatichtʼañax wakiskaspa?

13, 14. ¿Kusisit yatiyaskakiñatakix kuns lursna?

¹³ Yatiyäwisar jan yäqapki uka lugaranakanxa, walja jilat kullakanakax kusisit yatiyaskakiñatakix kunaymanitwa yatiyapxaraki. ¿Kuns lurapxi? Yaqha aru yatiqañ amtapxaraki. Mä chacha warmix suxta tunkanits jila maranïpxiwa, khawkhantï jakasipxi ukanxa, China markat waranq waranq yatiqir wayn tawaqunakaru familianakapampi uka chiqan jakasir uñjasaxa, chachax akham sänwa: “Askïspaw chino aru yatiqañax sasaw amuyapxayäta. Sapürus yatiqapkchiyätxa janiw inak yatiqapkatätti, kunattix waljaniruw Bibliat yatichañ qalltapxta” sasa.

¹⁴ Janis yaqha aru yatiqkchiñänixa, yaqha aru parlir jaqinakamp jikisiñäni ukhaxa, Buenas nuevas para gente de todas las naciones sat folletompiw yatiysna. Ukampisa, yatiyktan ukanakatakix Bibliat apstʼat qillqatanakax arunakapat utjarakiwa. Chiqansa, yaqha markanakan jakasiri ukat yaqha arut parlir jaqinakamp parlañax jiwasatak chʼamäspawa. Ukampis janipuniw aka arunakat armasiñasäkiti: “Walja yapuchasiristi, waljaraki apthapini” (2 Cor. 9:6).

Taqiniw yanaptʼaraksna

15, 16. 1) ¿Kunats arkirinak tukuyañax janiw jiwasan luräwisakïkiti sasax sistanxa? 2) ¿Chuymankipstatanakax kunjamsa yanaptʼapxaraki?

¹⁵ Arkirinak tukuyañax janiw jiwasan luräwisakïkiti, jan ukasti taqiniw yanaptʼapxaspa. ¿Kunats ukham sistanxa? Kunattix Jesusaw akham satayna: “Jumanakatix maynit maynikama munasipxätaxa, taqiniw amuyapxani nayan discipulonakaxäpxatama” sasa (Juan 13:35). Yatiqirinakax tantachäwinakar jutasax ukham munasirïtaswa amuyapxi. Bibliat mä yatiqirix akham sasaw qillqäna: “Tantachäwinakar sarañ wal muntxa. ¡Taqiniw munasiñampi uñjapxitu!” sasa. Jesusax arkirinakaparux familia taypitsa uñisirinakaw sartani sasaw säna (Mateo 10:35-37 liytʼasiñapawa). Ukampis tama taypinwa “jilanaka, kullakanaka, tayka, wawanaka” jikxatapxäta sasaw sarakïna (Mar. 10:30).

¹⁶ Yatiqirinakaruxa, chuymankipstat jilat kullakanakax yupaychäwin jiltapxañapatakix yanaptʼapxarakiwa. ¿Kunjamatsa? Janis Bibliat yaqhanakar yatichapkchixa, tantachäwinakan arstʼasaw machaqanakan iyawsäwip chʼamañchapxi. Ukampisa, walja maranaka “chiqa thakin” sarnaqatanakapaxa tamankirinakarux chʼamañchtʼiwa, ukat suma chuymani jaqinakarus chiqpach yupaychäwir mantanipxañapatakiw yanaptʼaraki (Pro. 16:31).

Jan axsarayasiñäniti

17. Mayniru yatichañataki jan wakichtʼatjam amuyassna ukhaxa, ¿kamachsnasa?

¹⁷ Mayniru yatichañataki jan wakichtʼatjam  amuyassna ukhaxa, ¿kamachsnasa? Amtañäni, Jehová Diosaw Moisesar qullan ajayup tuqnamwa yanaptʼäna. Aarón jilapar kunaw jupamp chik sarañapatak khitäna (Éxo. 4:10-17). Jesusax ukhamarakiw arkirinakaparux Diosan ajayupaw yatiyañatakix yanaptʼapxätam sasaw säna (Hech. 1:8). Ukat kunja askis mä yanapirinïñax uk amuyasaw panin panin yatiyapxañapatak khitäna (Luc. 10:1). Ukhamaxa jumatakitï yaqhanakar Bibliat yatichañax chʼamänixa, Diosaruw qullan ajayupa, yatiñkankañap mayiñama, ukat kawkïr yatxattʼat jilatarutï jan ukax kullakarutï atiniskta ukaruw yanaptʼa mayiñama. Jehová Diosax aliq jaqinakarukiwa, “pisi chʼamanit uñtʼatanakaru[kiwa]”, amtap phuqañatakix ajlliwayi uk amtañaw chuymachtʼistu (1 Cor. 1:26-29).

18. ¿‘Aynachtʼiristwa’ sasin axsarayasirïtati, ukat kunjamsa ukar atipasma?

¹⁸ ¿‘Aynachtʼiristwa’ sasin axsarayasirïtati, ukat kunjamsa ukar atipasma? Mä arkir tukuyañax janiw yatichirin luräwipakïkiti, uk amtañasawa. Janiw manqʼa phayañamp saskiti, manqʼax sumäñapatakixa, phayiritäxiwa. Ukampisa, mä arkir tukuyañatakix kimsaniw yanaptʼapxi. ¿Khitinakäpxisa? Maynïrix Jehová Diosawa, jupaw jaqinakarux irpani ukaw jukʼamp wakiskirixa (Juan 6:44). Maysa tuqitxa, jiwasaw yaqha jilat kullakanakamp chika yatiqirirux chiqap yatichäwi sum yatiqañapataki ukat yupaychäwin jiltañapatak yanaptʼtanxa (2 Timoteo 2:15 liytʼasiñapawa). Ukat qhiparusti, yatiqir pachpawa yatiqataparjama sarnaqxañapa (Mat. 7:24-27). Chiqpachansa, mä yatiqirisax Diosan Arupat jan yatiqañ munxchi ukhaxa, llakitaw jikxatastanxa, kunattix mä yatiqirix Jehová Diosar luqtxaspa uk muntanxa. Ukampis yattanwa, sapa mayniw “Diosarux luräwinakasat cuenta churañänixa” (Rom. 14:12).

Chʼamachtʼasiñax wali askipuniwa

19-21. 1) ¿Mayninakar Bibliat yatichañax kunjamsa yanaptʼistu? 2) ¿Kunjamsa Jehová Diosax yatiyapki ukanakarux uñji?

¹⁹ Yaqhanakaru Bibliat yatichañax Diosan Apnaqäwip jakäwisan nayrar uchañatakiw yanaptʼistu. Ukat amuyusansa chuymasansa wali chʼamampi Diosan Arupat chiqa yatichäwinak amxäsiyistu. Amuytʼañataki, Barak sat mä precursor jilatax akham siwa: “Mayniru Bibliat yatichañax juma pachparuw jukʼamp sum Diosan Arupat yatiqirïñamataki yanaptʼtamxa. Chiqans yatichkta ukhaxa, yatichäwinakamat janiw pächasiñamäkiti” sasa.

²⁰ Jumatï Bibliat jan mä yatiqirinïksta ukhaxa, ¿Diosatakix luqtatamax inamayakïpachati? Janiwa. Jehová Diosax Juparu jachʼañchañatak chʼamachasitasatxa wal yuspäraraki. Taqi khitinakatix yatiyktan ukanakax ‘Diosan yanapirinakapäpxtänwa’. Ukampis jumatï Bibliat mä yatiqirinïstaxa, wali kusisitaw jikxatasïta, kunattix kunjamsa Diosax yatiqirirux jiltayi uk uñjäta (1 Cor. 3:6, 9, MT). Amy sat mä precursorax akham sarakiwa: “Kunapachatï yatiqirinakamaru yupaychäw tuqit jiltir uñjkta ukhaxa, Jehová Diosaruw ukham suma churäwi churañatak yanaptʼatapat wal yuspärtaxa, uka churäwisti Jehová Diosar uñtʼaña ukat wiñay jakañ suytʼäwi katuqañawa” sasa.

²¹ Jiwasatï yaqhanakar yatichañataki chʼamachtʼasiskakiñänixa, Diosar luqtäwisaxa nayrankaniwa ukat jutïrpachan jakañatak suytʼäwisasa chʼamañchtʼatarakïniwa. Ukat Jehová Diosan yanaptʼapampixa, inas khitinakatï istʼkistu ukanakan qhispiyasipxañapatakis yanaptʼaraksna (1 Timoteo 4:16 liytʼasiñapawa). ¡Janipuniw yaqha luräwinxa ukham kusisiñax utjkaspati!

¿Jumax amttati?

• ¿Kunanakasa Bibliat jan yatiqirinïñatakix jarktʼistaspa?

• ¿Yatiyktan uka chiqanakan Bibliat yatiyäwisar jan yäqapkchi ukhax kamachsnasa?

• ¿Kunatsa jaqinakaru Bibliat yatichañatakix chʼamachtʼasiskakiñasa?

[Jisktʼanaka]

[9 janan fotonakapa]

Kunayman tuqita, ¿suma chuyman jaqinakar yatiyañatakix chʼamachasisktanti?