Amay imäwinxa, ¿kunjamsa Diosar jachʼañchsna?

KUNAPACHATÏ maynix jiwxi ukhaxa, waljaniw jachapxi ukat wararipxaraki. Yaqhipax lutusitaw jaqnuqtasin wararipxi ukhamat llakisipxatap uñachtʼayapxañapataki. Ukat mä qhawqhanix cervezampi ukat alcoholampi machjasisaw pampanakan jaqusipxi. Yaqhipasti chʼiyar isimpiw chʼuqantasipxaraki. Ukhamata amayar chhaqtayañataki.

Jehová Diosan Qhanañchirinakapax kawkhantï ukhamanak lurañ yatipki uka chiqanakanwa jakaraktanxa. Jiwatanakax ajayur tukusas jaqinakar yanaptʼapkaspa ukat yaqhipanakarux jan walinaksa lurapkaspa ukhamwa millón millón jaqinakax amuyapxi, ukatwa mayni jiwxi ukhaxa, kunaymaninak lurañ yatipxi. Chiqpachansa, mä munat familiarax jiwxi ukhax taqiniw jachtanxa; ukhamarakiw nayrapachax Jesusampi arkirinakapampix chuym chʼallxtayasisin jachapxirïna (Juan 11:33-35, 38; Hech. 8:2; 9:39). Ukampis ukürunakanxa Jesusampi apostolanakapampix janiw añcha llakita sarnaqapxirïkänti kunjamtï yaqhip jaqinakax sarnaqapxirïkäna ukhama (Luc. 23:27, 28; 1 Tes. 4:13). ¿Kunatsa? Kunattix jiwatanakax kunjamäsipkisa ukxa sum yatipxäna.

Bibliax qhanpachwa akham saraki: “Khitinakatix jakasipki ukanakaxa yatisipxiwa jiwxañanakapa, ukampis jiwatanakax janiw kunsa yatipkiti [...]. Ukanwa jupanakan munasiñapax tukusxi, uñisiñapasa, envidiasiñapasa, [...] jumax sepulcror sarkätas ukanxa janiw kuna lurañas utjkiti, kuna lupʼiñasa, uñtʼañasa, janirakiw yatiñanïñasa utjkiti” sasa (Ecl. 9:5, 6, 10). Jiwatanakax janiw kunsa yatipkiti sasaw Bibliax yatichi. Janiw jupanakax lupʼipkiti, janirakiw parlapkiti ni kuns amuyapkiti ni kuns yatipkiti. Uk yatisaxa, ¿kunjamsa cristianonakax amaya imantapxañapa?

“Qʼañu lurañanaksti jan lurapxamti”

Jiwatanakan ajayupax jakaskiwa ukat yanaptʼistaniwa sasaw jaqinakax sañ yatipxi, ukampis Jehová Diosan Qhanañchirinakapax kawkinsay jakaskañäni, janipuniw uka luräwinakapar mitisktanti. Kunapachatï maynix jiwxi ukhaxa, kunayninak lurañ yatipxi, sañäni: kimsaqallqu urunakat amtaña, mara jiwatapat amtaña, jiwatanakar apxataña ukat chʼiyar isinakampi lutusiña. Ukanakaxa Diosatakix jan wali luräwinakawa ukat axtaskayarakiwa. Ukampis ¿kunatsa jaqinakax ukham jan walinak lurapxi? Kunattix janiw Biblian yatichäwiparjam sarnaqapkiti, jan ukasti ñanqha ajayunakan yatichäwinakaparjamaw sarnaqapxi, ukatwa jan jiwir almaw utji sasin sapxaraki (Eze. 18:4, NM). Cristianonakax janiw uka jan wali luräwinakan mitisktanti, kunattix janiw “[Jehová] Tatitun mesapampita ñanqha ajayunakan mesapampitsa man[qʼktanti]” (1 Cor. 10:21). Ukatxa, “jupanakat jithiqtapxarakim. Qʼañu lurañanaksti jan lurapxamti” siski uka yatichäwirjam sarnaqañatakiw chʼamachastanxa (2 Cor. 6:17). Chiqas uka arunakar istʼañax wali chʼamäspawa.

Jiwatanakan ajayupax jan uruyatax colerasipxiwa sasaw jaqinakax sapxi. Ukat ukhamanak jan lurapxatap laykuwa Jehová  Diosan Qhanañchirinakapax familiaranakapampi uta jakʼankirinakapampi uñisita, jiskʼachata ukat tuqjata uñjasipxi. Ukat yaqhip jilat kullakanakaruxa jan chuyman jaqïpkaspasa ukat janis jiwatar respetapkaspa ukhamwa uñjapxi. Awisax mä cristianox jiwxi ukhaxa, familiaranakapax munañaparjamaw taqi kuns lurañ munapxi. Kunayman jan walinak lurasaw Diosar jiskʼachapxi, ¿ukhamax jupanakamp jan chʼaxwañatakix kun lurañas wakisispa? Ukham jan wali ñanqha luräwinaka lurasax Jehová Diosaruw chuym ustʼaysna, ukampis ¿kunjamatsa uka jan walinakat jithiqtsna?

Qhanañchañamawa

Awisax yaqha familiaranakas jan ukax marka pʼiqtʼirinakas munañaparjamaw amay imañxa munapxarakispa. Ukhamasti, mä cristianox Jehová Diosan Qhanañchiripjama, mä arunxa, Biblian yatichäwinakaparjam imayasiñ munasax mä qillqat jaytañapawa (2 Cor. 6:14-16). Janiw yaqhanakar pantjasiyirjamax kunsa mayiñapäkiti. Kunjamtï Bibliax jiwatanak tuqit yatichki ukarjam jan lurasax yaqhanakaruw tinkuysna.

Awisax tama taypinkir mä jilataw amay imañatakix kunanakas lurasini ukanak amtaspa, ukampis familiranakax ukham mayipxani ukhakiw uk luraspa. Ukat uka jilatarakiw Biblian kamachinakap jan pʼakintapxañaptakix jiwirin familiaranakapar amuytʼayaspa. Kunapachatï mä jaqix amay imäwin jan walinak lurañ munkani ukhaxa, kunatsa ukanak jan lurkaspa ukxa, respetompi qhan sañaw wakisispa (1 Ped. 3:15). Maysa tuqitxa, inas jiwirin chachapas jan ukax warmipas Jehová Diosan jan luqtiripäkchispa, ukat munañaparjamaki kunsa lurañ munaspa ukhaxa, ¿kun lurañas wakisispa? Ukhamäspa ukhaxa, cristiano familianakax uka chiqat sarxapxañapaw wakisispa (1 Cor. 10:20). Ukat Tantachasiñ Utan jan ukax kawkhantï wakisirjamächi ukanwa jiwirin cristiano familaranakaparux ‘Qullan Qillqatanakan chuymachäwipampi’ yanaptʼañax wakisispa (Rom. 15:4, NM). Ukatxa, janis amayax uka tantachäwinkchinixa, mä suma tantachäwiw lurasispa, ukhamata familiaranakar chuymachtʼañataki (Deu. 34:5, 6, 8). Diosar jan luqtirïpki uka familiaranakapan ukham jan wal lurapxatap laykux inas jilat kullakanakasax chuym wal usuyasipxchispa, ukampis Jehová Diosan munañaparjam lurapxatapatxa chuymachataw jikxatasipxani. Chiqpachansa, Jehová Diosan “jachʼa chʼama[p]” katuqapxani (2 Cor. 4:7).

Kunjamsa imayasiñ munta ukxa qillqtʼasiñamawa

Kunapachatï maynix kunjamsa imayasiñ muni ukarjam mä qillqat jaytawayi ukhaxa,  familiapatakix wali askiwa, kunattix ukampiw Diosar jan luqtirïpki uka familiaranakarux kuntï jiwir jaqix munkäna uk repetayapxaspa. Uka qillqatanxa, kunjamänisa kawkhankanisa ukat khitis imäw urux pʼiqtʼani ukanakwa maynix qhanañchañapa (Gén. 50:5). Ukat uka qillqatax maynin jan ukax paninin uñjkata firmtʼasini ukhaxa, jukʼampwa respetapxani. Chiqas Bibliax janïräkipan amuytʼasiñasatakiw yanaptʼistu. Ukhamax khititix uka suma iwxanakapar istʼki ukax janiw añcha chuymankipstatäñkamax suyañapäkiti ni jiwirjamäxi ukhakis qillqtʼä sasin sañapäkiti (Pro. 22:3; Ecl. 9:12).

Yaqhip jilat kullakanakax ukanak qillqañxa axsarayasipxiwa. Chiqpachansa, ukham qillqañani ukhaxa, Diosar ukat khitinakatï Diosar luqtapki uka familianakasar munasitaswa uñachtʼaytanxa (Fili. 2:4). Diosar luqtapki uka familianakapar jan ukham jan waltʼäwinakampi jaytañatakixa janïräkipan ukanak qhanañchtʼañax wali askïspa, ukhamatwa Diosar luqtir familiaranakax llakitas jikxatasipkchïni ukhasa, janiw kuntï Diosax uñiski ukanakxa lurapkaniti ukat jiwirix kuntï amtawayki uksa respetapxarakiniwa.

Jan mayninakjam lurapxañäniti

Kunapachatï maynix jiwxi ukhaxa, wali suma yänakampi kʼachʼachtʼatwa imantañ yatipxi, ukhamata nayra ajayunakar jan colerayañataki. Ukampisa, yaqhipanakax wali qamirïpkaspas ukhamaw “jachʼa jachʼa” tukupxi (1 Juan 2:16). Yaqhipanakax amayar “wali sum” imañatakix wal chʼamachasipxi, tiempsa apstʼasipxi ukat qullqs irtañ yatipxi. Yaqhip jachʼa familianakanxa, niya taqinjamaw jiwatar imayxañatakix janïräkipan qullq tantasipxi. Chiqansa, niya taqiniw jiwatar uñjañtakix mä uta wakichapxi. Ukat tumptʼirinakatakix manqʼa wakichapxi, ukat awisax jayat jutirinakaruw qurpachapxaraki. Ukatxa, walja urunakaw suyañ yatipxaraki, ukatakix inamayakiw jiwirin familiaranakapax qullqi tukjasipxi. Ukat janïr allintkasax jiwatar uñxatasaw wal jachapxi. Awisaxa, kunatsa jiwi uk yatxatañatakix layqanakan ukaruw sarapxaraki. Ukampis ¿mä cristianox ukanak luraskaspati?

Khitinakatï Diosar taqi chuyma luqtapki ukanakaxa, Biblian yatichäwinakap jan yatipki jan ukax jan yatiñ munapki uka jaqinakan luräwinakapatxa jithiqtapxiwa. Ukat  jachʼa jachʼa tukuñaxa “janiw Dios Awkit jutkiti, jan ukasti akapachatwa juti” ukxa sum amuyasipxi (1 Juan 2:15-17). Akapachan amuyunakapampi jan apayasiñatakix sum amuytʼasiñasawa (Gál. 5:26). Kunjamtï uñjawayktanxa, amay imäwinakanx kunayman jan walinak lurañ yatipxi. Ukat yaqhip imäwinakanxa, jiwatar qhumantasaw wal jachapxi, ukarukis taqi kunas tukusxaspa ukhama, ukatwa amay imañ cajonarux yänaksa manqʼañanakasa qullqsa ukat yaqhanakampi uchañ yatipxi. Ukatxa wali jachtʼasisaw jiwatar arxayapxaraki. Mä cristianotï ukhamanak luraspa ukhaxa, Jehová Diosan sutipwa qʼañuchaspa ukat markaparus jan walitwa uñjayarakispa (1 Ped. 1:14-16).

Jiwatanakax kuna suytʼäwinïpxis uk yatiñaxa, Diosar jan uñtʼapki uka jaqinakan luräwinakapat jithiqtañwa yanapistu (Efe. 4:17-19). Jesusax Diosan Yuqapäkchïnsa, janiw amayap imañatakix ukham wal wakichrantapkänti (Juan 19:40-42). Ukhamax khitinakatix “Cristo Tatitun amtäwinaka[panïpki]” ukanakaxa, kunjamtï Jesusar imapkäna ukham imañatakix janiw phinqʼasipkiti (1 Cor. 2:16). Ukhamasti, mä familiarax jiwani ukhaxa, janiw aliq wakichrantasiñax wakiskaspati, jan ukasti kunjamtï Diosan Arupax yatichki ukarjamakiw wali amuyumpi wakichtʼasiñasa.

Amay imañ qhipata

Amaya imantxapxi uka qhipatxa, yanapirinakatakiw manqʼañanak wakichañ yatipxaraki. Awisax kawkinti allintapki uka chiqanwa manqʼañ yatipxaraki, jiwatar apxatañäkaspas ukhama. Ukat yaqhipax mä marat jiwatar amtañatakiw wakichasipxaraki, ukhamata jiwatan ajayupax jan colerasiñapataki ukat nayra jiwatanakar sumachañataki. Maysa tuqitxa, maynis jiwañataki layqjaykaspa ukham amuyapxaraki, uk yatxatañatakiw layqanakan ukar sarapxi, ukhamata uka jan wali kuttʼayañataki. Chiqansa, jiwatanakar yupaychañatakiw jan ukax jachʼañchañatakiw taqi ukanak lurapxi.

Ukampis chiqpach cristianonakax kunjamas jiwatanakax jikxatasipxi ukxa sum yattanxa ukat janirakiw axsarktanti (Eclesiastés 9:5, 10). Ukhamasti, kunjamtï uñjawayktanxa, mä cristianox janiw jiwatar imantxañatakix taqi uka jan walinak lurkaspati. Ukanakax nañqha ajayunakampi mayachasiñawa. Ukanak lurasax Jehová Diosarus jan respetksna ukhamäspawa ukat jilat kullakanakasarus pantjasiysnawa.

Jiwasax Diosan yupaychiripätanwa uk yatipxañapa

Jichhürunakanxa, walja jaqinakaw jiwatanakar axsartʼas jakapxi. Ukampis janiw jiwasax ukham axsarxtanti. Ukatwa Diosar wal yuspärtanxa (Juan 8:32). Kunapachatï mayni jiwxi ukhax janiw sinti llakisktanti, kunattix “qhanankirï[tänwa]” ukat kunjamäsipkis jiwatanakax uksa yatiraktanwa. Niyakixay jiwatanakax jaktanxapxchinixa, janiw sinti llakisktanti, ukat mayninakarus respetaraktanwa (Efe. 5:8; Juan 5:28, 29). Uk yatisaxa janiw sinti llakisktanti, mä arunxa, janiw llakisiñat jan walinak lurktanti, kunjamtï Diosar jan uñtʼirinakax lurapki ukhama (1 Tes. 4:13). Ukampis chiqa yupaychäwxa taqi chuymaw arxatañäni ukat janirakiw axsarkañäniti (1 Ped. 3:13, 14).

Kuntï Biblian yatichki ukarjam sarnaqañäni ukhaxa, jaqinakax amuyasipxaniwa “khititix Diosaru yupaychki, jan yupaychki ukana[katxa]” (Mal. 3:18). Jiwañas janiw utjkxaniti sasaw Bibliax yatichi (Apo. 21:4). Uka uru puriniñäpkamasti, “jan juchani ni kuna qʼañunsa” Jehová Dios nayraqatan jikxatasiñataki wal chʼamachtʼasiñasawa. Ukat aka ñanqha pachan utjki uka jan wali luräwinakatsa ukat amay imäwin lurapki ukanakatsa jithiqtañasawa, kunattix Diosaruw jiskʼachi (2 Ped. 3:14).

[30 janan fotopa]

Janïr jiwkasax kunjamsa imayasiñ muntan uka tuqit mä qillqat jaytañaw wakisispa

[31 janan fotopa]

Kunatix wakiski ukarjamakiw cristianonakax amayxa imapxañapa