Jehová Diosan Arupax jakkiriwa

Apocalipsis libron aski yatichäwinakapa (2)

KHITINAKATÏ Jehová Diosar yupaychapki ukat jan yupaychapki ukanakaruxa, ¿kunas pasani? ¿Supayampi saxranakapampix kunarus purtʼasipxani? Diosan kamachinakapar phuqapki ukanakax Criston Waranq Mara apnaqäwipanxa, ¿kunsa katuqapxani? Aka wali wakiskir jisktʼanakan qhanañchtʼäwinakapax Apocalipsis 13:1–22:21 qillqatanakanwa jikxatasi. * Apóstol Juanax niya 96 marana tunka suxtan unañchäwinak katuqkatayna ukanakatxa, llätunka qhip qhipa unañchäwinakaw uka jaljanakan jikxatasi.

Apóstol Juanax akham sasaw qillqäna: “Wali kusisiñaniwa khititix aka arunak [liyki] ukaxa. Wali kusisiñanïpxarakiw khitinakatix Diosat katuqat aka arunaka istʼapki, ukhamarak uka arunakarjam sarnaqapki ukanakaxa” sasa (Apo. 1:3; 22:7). Jiwasatï Apocalipsis libro liyiñäni ukat kuntï yatiqktan ukarjam sarnaqañäni ukhaxa, jukʼamp kusisitaw Diosar yupaychañäni ukat jukʼampirakiw Juparusa ukat Jesucristo Yuqaparus atinisiñäni, ukatxa mä suma suytʼäwinïñäniwa (Heb. 4:12). *

PAQALLQU COPANAKAN PHUQHANTATA DIOSAN MUTUYÄWINAKAPAW WARANUKUSXI

(Apo. 13:1–16:21)

Apocalipsis 11:18 qillqatax akham siwa: “Markanakax wal colerasipxi, [Diosana] mutuyañ urusti purinirakiwa, [...]. Aka uraqi tʼunjirinakarusa, jumax tʼunjarakïtawa” sasa. ¿Kunatsa Diosax jaqinakar mutuyani? Paqallq pʼiqini ukat tunka waxrani mä jachʼa axsarkañ animalaw utji, ukan luräwinakap laykuw Diosax mutuyani, ukxa kimsaqallqu unañchäwinwa qhanañchi (Apo. 13:1).

Llätunka unañchäwinxa, apóstol Juanax ‘Corderoruw uñji Sión qullu patana sayaskiri. Jupamp chikasti pataka pusi tunka pusini waranqa jaqinakaw’ sayasipki, jupanakax jaqinak taypit qhispiyatäpxiwa (Apo. 14:1, 4). Ukxarusti, angelanakaw yatiyapxaraki. “Paqallqu angelanakaw uñstanïna paqallqu qhipa tʼaqhisïwimpi” ukwa Juanax tunka unañchäwin uñji. Jehová Dios pachpaw uka paqallq angelanakar akham säna: “Sarapxam, ukatsti waranukunipxam uraqxaru [Supayan aka ñanqha pachapxaru] kuna mutuyañanakatix uka paqallqu copanakan phuqhantatäkis ukanaka” sasa. Uka copanakanxa, kunjamsa Diosax taripani uka yatiyäwinakaw utji (Apo. 15:1; 16:1). Uka pä unañchäwinakax Diosan Apnaqäwipan yaqha taripäwinakapatwa sum qhanañcharakistu. Ukaxa paqallqüri trompet phustʼäwimpi kimsïr tʼaqhisïwimpi mayachatäkaspas ukhamawa (Apo. 11:14, 15).

Biblia tuqit jisktʼäwinakar qhanañchäwinaka:

13:8. ¿Kunas ‘Corderon jakañ libropaxa’? Janiw chiqpach librükiti, ukampis khitinakas Jesusamp chik alaxpachat Diosan Apnaqäwipan apnaqaski ukanakan sutinakapaw ukan uñsti. Ukatxa, khitinakatï aka Uraqinkasipki ukat alaxpachar sarañatak suytʼäwinïpki ukanakan sutinakapasa ukankarakiwa.

13:11-13. Pä waxrani axsarkañ jachʼa animalan parlapax dragonan parlapjamarakïnwa ukat Uraqirux nina jalluyanirakïna, ¿ukax kamsañs muni? Uka axsarkañ jachʼa animalana (potencia mundial angloamericana) dragonjam parlatapaxa, akapach apnaqäwi sañ muni, ukat jupanakax axsarayañampi, tʼaqhisiñampi ukat yantʼanakampiw munañapar apnaqañ munistu. Ukatxa mä profetar uñtasitarakiw nina jalluyani, mä arunxa, jupas 1900  maranakan utjkäna uka payïr Jachʼa Chʼaxwäwinakan jan walinak tukjkaspa ukat comunismo sat apnaqäwirus atipkaspa ukham jachʼañchasi.

16:17. “Paqallqüri angelasti samana thayarurakiw copapxa waranuku”, ¿kunas uka samana thayaxa? Supayan apnaqat akapachan ñanqha amtäwinakapawa, ‘Diosar jan istʼirinakaru’ chʼamañchkis ukamp sasiwa. Supayan apnaqat akapachax uka samanan venentʼatawa (Efe. 2:2).

Yatichäwinaka:

13:1-4, 18. Markanak apnaqirinakaxa ‘mä jachʼa axsarkañ animalamp’ sasiwa, uka animalax ‘jachʼa qutatwa’ mistuni. Uka jachʼa qutasti, akapachan jan waltʼäwinakampi phuqantat jaktanxa ukamp sasiwa (Isa. 17:12, 13; Dan. 7:2-8, 17). Uka jachʼa axsarkañ animalax Supayan uñstayatawa. Supayatwa chʼamsa ukat 666 chimpsa uka animalax katuqaraki, uka chimpusti sinti jan walinaka sañ muni. Khitis uka axsarkañ animalax uk jiwasax yattanwa, ukatwa juparux jan jachʼañchktanti ni yupaychkaraktansa, kunjamtï jichhürunakax jaqinakax lurasipki ukhama (Juan 12:31; 15:19).

13:16, 17. Inas kun lurañas chʼamakïxchispa, sañäni, ‘alasiñasa aljasiñasa’, ukampis janiw uka axsarkañ animalampix atipayasiñasäkiti, janirakiw jupan munañaparjamas sarnaqañasäkiti. Amparar jan ukax parar chimpup katuqañaxa, uka axsarkañ animalampis sarnaqäwisa ukat amuyusa apnaqayasksna ukamp sasiwa.

14:6, 7. Kuntï angelanakax yatiyki ukaxa, kunja wakiskirisa Diosan Apnaqäwipat suma yatiyäwinak yatiyañaxa ukwa uñachtʼayistu. Ukatxa, Jehová Diosarux janiw chuym ustʼayañ munktanti, jan ukasti sutip jachʼañchañ muntanxa, ukwa Bibliat yatiqirisarux yatichañasa.

14:14-20. Kunapachatï ‘cosecha’ apthapiñ horasax tukuyxani, mä arunxa, khitinakatï qhispitäpkani ukanakar apthapiñax tukusxäni ukhawa angelax “uva achunaka”, mä arunxa, ‘Diosan mutuyäwipa’ waranukuni. Ukhaw wiñayatak tukjatäpxani. Uva alixa, Supayan apnaqata jan wali lurir politiconakamp sasiwa, ukat ‘uva achunakasti’ jan wali luräwinakapamp sasirakiwa. Janipuniw akapachan jan wali luräwinakapampi apayasiñasäkiti.

16:13-16. ‘Ñanqha qʼañu arunakaxa, (NM)’ Supayan ñanqha amtanakapawa. Diosan yatiyäwinakap jan istʼapxañapataki ukat Dios contra saytʼasipxañapatakiw akapach apnaqirinakar apnaqasipki (Mat. 24:42, 44).

16:21. Akapachax niya tukusiñampïxani ukhaw Supayan ñanqha pachapar taripañataki Diosan yatiyäwinakapax wali muspharkañ yatiyasini, inas ukax jachʼa qalanakar uñtat chhijchhinakjamächispa. Ukhampachasa, walja jaqinakaw Dios contra kʼarinak parlasipkakini.

ATIPIR REYEXA NIYAW APNAQASKI

(Apo. 17:1–22:21)

Supayax “Jachʼa Babilonia”, mä arunxa, Uraqpach apnaqir kʼari yupaychäwinak tuqirakiw jan walinak apani, uka Jachʼa Babiloniaxa, ‘qʼañu lurañanakan sarnaqir’ mä warmimp sasiwa uka tuqitwa tunka mayan unañchäwinx parli. Uka warmix “mä jachʼa wila axsarkañ animalxaru latʼxata[tawa]”. Chiqpachansa, uka axsarkañ animalan ‘tunka waxranakapaw’ juparux qʼal tukjani (Apo. 17:1, 3, 5, 16). Ukat tunka payan unañchäwinsti, uka qʼañu lurir warmirux mä “jachʼa marka[mpiw]” uñachtʼayasi, ukxarusti tʼunjäwip yatiyasi, ukat Diosan markaparuw jankʼak jawsayasiraki, akham sasa: “Mistxapxam uka markata” sasa. Ukatxa waljaniw Jachʼa Babilonian tʼunjäwipat jachapxi, ukampis alaxpachanxa “Corderon casarasiñapa[twa]” wal kusisipxi (Apo. 18:4, 9, 10, 15-19; 19:7). Tunka kimsani unañchäwinsti, ‘janqʼu caballor’ latʼxatat jaqiw taqi markanakamp nuwasi ukat Supayan ñanqha pachap tʼunji (Apo. 19:11-16).

“Nayrapacha katari” satäki uka Supayaxa, ¿kunarus purtʼasini? ¿Kunapachas ‘nina asufre qutaru jaquntatäni’? Uka tuqitwa tunka pusini unañchawix parli (Apo. 20:2, 10). Jesusax Waranq Maranak apnaqkani ukhaxa, kunjamänis jakäwix ukwa qhip qhipa pä unañchanakax uñachtʼayistu. Ukat niya qhipa unañchäwinxa, apóstol Juanax “jakañ churir mä suma qʼuma jawir” uñji, uka jawir umapasti mä jachʼa thaki taypwa jalaski, ukat “khititix umat pharjayaski”  ukanakar jawstʼirwa istʼaraki (Apo. 1:1; 22:1, 2, 17).

Biblia tuqit jisktʼäwinakar qhanañchäwinaka:

17:16; 18:9, 10. ¿Kunatsa ‘akapachankir reyenakax’ jupanak pachpa Jachʼa Babiloniar tukjasax jachapxi? Jupanakan munañap jikxatañ laykukiw jachapxi. Kunattix tʼunjäwip qhipatakwa kunja askïnsa jupanakatakix uk amuyasipxi. Kunattix uka Jachʼa Babiloniaw waynanakar jachʼa chʼaxwäwinakar khittʼasax jupanakar yanaptʼäna. Ukatxa apnaqirinakar istʼañsa yatichkaspa ukhamwa akapach apnaqirinakarux yanaptʼawayi.

19:12. Jesusan sutipxa janiw khitis yatkiti, jupa sapakiw yati siski ukaxa, ¿kamsañs muni? Amuyataxa, uka sutix Reyjam uttʼayata ukat uka qhipat kuna aski luräwinaktï Tatitun urupan katuqki ukamp sasiwa, kunjamtï Isaías 9:6 qillqatan siski ukhama. Chiqansa, kunjamas Diosan Apnaqäwipan Apnaqirïñax ukxa jupakiw yati, ukxa janipuniw khitis amuykaspati. Ukampisa, khitinakatï alaxpachar jupamp chik apnaqir sarapxani ukanakarurakiw askinak katuqasax churani, ukat jupanakxarurakiw uka ‘machaq sutxa’ qillqxati (Apo. 3:12).

19:14. ¿Khitinakas Armagedonan Jesusamp chika nuwasipxani? Angelanakaw Jesusamp chik Diosan jachʼa chʼaxwäwipan nuwasipxäni, ukatxa khitinakatix akapachar atipjapki ukat alaxpachar sarañatak ajllitäpki ukanakax sarapxarakiniwa (Mat. 25:31, 32; Apo. 2:26, 27).

20:11-15. ¿Khitinakan sutinakapas “jakañ libron” qillqata? Khitinakatï wiñay jakañ suytʼäwinïpki taqi ukanakan sutinakapaw uka jakañ libron qillaqata, mä arunxa, alaxpachar sarir cristianonakana, jan jaktʼkañ walja jaqinakana ukat ‘aski jaqinakax jaktanipxani’ ukanakan sutinakapaw ukan qillqataxa, jupanakax Diosat jan jithiqtasaw luqtawayapxi (Hech. 24:15, MT; Apo. 2:10; 7:9). ¿Ukat ‘jan aski jaqinakax’ jaktanipkani ukanakat kamsasirakispasa? “Uka libron” yatichäwinakaparjam Waranq Maranakan sarnaqapxani ukhakiw uka “jakañ libron” sutinakapax qillqatäni. Ukampisa, taqi jupanakan sutinakapax janiw qalltatpacha wiñayataki qillqaskaniti. Ukat alaxpachar saririnakanxa, Diosar taqi chuym luqtasa jiwawayxapxi ukhatpachaw sutinakapax ukan wiñayatak qillqantatäxi (Apo. 3:5). Ukat khitinakatï aka Uraqin jakapxani ukanakan sutinakapaxa, qhip qhipa yantʼar atipapxäni ukhaw uka libror qillqatäni, ukax Waranq Maranaka phuqasxani ukhaw pasani (Apo. 20:7, 8).

Yatichäwinaka:

17:3, 5, 7, 16. ‘Paqallq pʼiqini, tunka waxrani wila axsarkañ jachʼa animalax’ kunasa ukat ‘warmix’ kunarakisa ukanakxa ‘Diosan yatiñäpaw’ sum amuytʼayistu (Sant. 3:17). Uka axsarkañ jachʼa animalax Liga de Naciones ukat qhipatxa Organización de las Naciones Unidas sat sutimpi uñtʼatäxi ukawa. Ukhamaxa kunas uka axsarkañ jachʼa animalax uk jiwasax yatxtanwa, ukhamasti taqi chuymaw Jehová Diosan Apnaqäwipata ukat mutuyañ urupat yatiyañasa.

21:1-6. Kuntï Diosax churapxämaw siski ukanakxa chiqpachapuniw katuqañäni. ¿Kunatsa ukham sistanxa? Kuna laykutix Bibliax akham siwa: “Taqi kunas luratäxiwa” sasa.

22:1, 17. ¿“Jakañ churir mä suma qʼuma Jawir[ax]” kunamp sasisa? Kunanakampitï Jehová Diosax jucha ukat jiwañ chhaqtayanixa ukanakamp sasiwa. Ukampisa jichhürunakan jakañ churir umax istʼasirinakatakix utjaskiwa. Diosax “jakañ umat inak umtʼa[ñatakiw]” jawstʼistu. Ukxa taqi chuym katuqtʼasiñäni ukat jaqi masisarus wali kusisit aparakiñäni.

[Qhanañchäwinaka]

[5 janan fotopa]

Khitinakatï Diosar istʼapki ukanakaxa, walja bendicionanakwa Diosan Apnaqäwipat katuqapxani