Galaad Escuelar saririnaka, 125 Yatichäwi

Jeremiasjamäpxañamawa

“AKA yatichäwixa janipuniw mayninakjamäkiti” sasaw Geoffrey Jackson sat jilatax Escuela Bíblica de Galaad de la Watchtower 125 siski ukat misturi machaq misioneronakat satayna, uka jilatax Uraqpachan Jilïr Irpirinakatxa maynïriwa. Uka arstʼäw istʼirix 6.156 ukha jilat kullakanakaw 2008 marana septiembre phaxsit 13 urunak saraqatar sarapxatayna. Uka wakichäwinxa, 56 jilat kullakanakaruw misionerotaki wakichasiwayi, ukhamasti jupanakampix 8.000 jila misioneronakaruw jichhakamax ‘uraqpachar’ khitasiwayi (Hech. 1:8).

Geoffrey Jackson uka jilataw uka graduacionanxa pʼiqtʼäna, ukat akham sasaw jisktʼäna: “¿Chiqa chuymanïsax jukʼamp sumti luqtapxäta?” sasa. Ukatxa, kunas uka tuqit wal yanaptʼaspa ukanakwa pusi tuqit amtayäna: suma amtanïña, sum sarnaqaña, Diosan arunakapatpun yatichaña ukat Jehová Diosan sutip yatiyañataki wal chʼamachasiña.

“¿Taqi kunsa sumti amuyäta?” siski uka tuqitwa David Schafer jilatax arstʼarakïna, jupax Yatichañ tuqit Uñjirinaka taypin irnaqtʼaski. Uka arstʼäwinxa, kunjamsa Jehová Diosar thaqañasa Amuyasiri Chiqap Uywatar altʼat chuymampi iyawsañax machaq misioneronakar taqi kun amuyañ yanaptʼaspa ukwa qhanañchäna (Prov. 28:5; Mat. 24:45).

Ukxarusti, John E. Barr sat jilatarakiw arstʼäna, jupax Uraqpachan Jilïr Irpirinakatxa maynïrirakiwa, pʼiqiñchäwipax akham satänwa: “Janipuni kunäkipansa Diosan munasiñapat jithiqtapxamti” sasa. Uka jilatax mä awkjamaw uka machaq misioneronakarus familiaranakaparus wal chuymachtʼäna. Chiqansa, qalltkasax taqiniw llakissna. Ukatwa akham säna: “Diosan munasiñapan jakasiñax wali askiwa, ukaw jan walinakatsa jarkʼaqistu” sasa. Janiw kunas Diosan munasiñapatxa misioneronakar apaqkaspati, jupanak pachpakiw jithiqtasipkaspa, sasaw amuytʼayäna.

Ukat Sam Roberson jilataw arstʼarakïna, jupax Yatichañ Wakichirinakamp chikaw irnaqtʼi. “Suma isimpi isthaptʼasiñ” tuqitwa jupax parlarakïna. Kuntï Jesusax lurkäna uk sum yatxatasin ukarjam sarnaqasaw ‘Jesucristompi isthapisipxasma’ sasaw uka machaq misioneronakar amuytʼayäna (Rom. 13:14). Ukxarusti uka pachpan irnaqtʼir William Samuelson sat jilatarakiw arstʼäna, kunjamsa maynix askit uñtʼatäspa uka tuqit qhanañchtʼäna, janiw jaqin askit uñtʼataki sarnaqañasäkiti, jan ukasti Dios nayraqatan askit uñtʼatäñasawa, ukaw wali askixa sasaw säna.

Ukat Michael Burnett jilatasti, kunjamsa Diosan arunakapat uka yatichäwinkkasax utat uta yatiyir sarapxi uka tuqitwa uka machaq misioneronakar jisktʼarakïna, jupax misioneronakar yatichiriwa. Chiqansa, uka urunakax kawkintï wali yatiyatäki uka chiqanakaruw sarapxäna, Patterson, New York. Ukampis Bibliat yatiqañ munirinakar jikxatasipkakitaynawa. Maysa tuqitsti, Jachʼa Tantachäwinak Wakichirinakamp chika irnaqtʼir Gerald Grizzle jilatawa, sucursalanakan uñjirinakataki mä wakichäwix utjki ukar sarir kimsa jilatar jisktʼarakitayna. Kunjamsa machaq misioneronakax yaqha markan jikxatasisax nayrar sartapxaspa uka tuqitwa uka kimsa jilatan arunakapax yanaptʼarakïna.

“Jeremiasjamäpxam” siski ukxa, David Splane  jilataw arstʼarakïna, jupax Uraqpachan Jilïr Irpirinakat maynïriwa ukat Escuela de Galaad 42 yatichäwitwa misionerjam misturakitayna. Jeremiasax axsartʼayaskchïnsa Jehová Diosaw jupar yanaptʼäna, jumanakarux ukhamwa Diosax chʼam churapxarakïtamxa sasaw säna (Jer. 1:7, 8). Ukatxa “maynimpi jan waltʼayasipkäta ukhaxa, quntʼasisin kuna tuqinakatsa uka jilatax jan ukax kullakax wali aski uka tuqinakatwa tunka qillqtʼasiñama, ukampis jan tunkar puriñjamäkani ukhaxa, jupar sum uñtʼañataki chʼamachasiñamawa” sasarakiw uka jilatax qhanañchtʼäna.

Chiqansa, Jeremiasax taqi chuymaw Jehová Diosataki irnaqäna, ukampis jaytxañ munäna ukhaxa, Jehová Diosaruw maytʼasïna, Jupaw yanaptʼäna (Jer. 20:11). “Llakit jikxatasipkäta ukhaxa, Jehová Diosar jakʼachasipxañamawa, Jupax wali muspharkañwa yanaptʼapxätamxa” sasaw David Splane jilatax sarakïna.

Ukat tukuyañatakix akham sasaw uka wakichäwi pʼiqtʼirix sarakïna: “Machaq misioneronakax chiqa chuyman sarnaqasax atiniskañjamäpxaniwa. Ukat yatichäwinakapax wali chʼamaniw jaqinakan chuymapar purtʼani” sasa (Isa. 43:8-12).

[22 janan recuadropa]

YATIQIRINAKA

Qhawqha markanakatsa jutapxi: 6

Qhawqha markanakarus sarapxi: 21

Qhawqhanis yatiqirinakaxa: 56

Qhawqha maranakanïpxisa: 32,9

Qhawqha maranakas bautisatäxapxi: 17,4

Qhawqha maranakas precursorjam irnaqtʼxapxi: 13

[23 janan fotopa]

Escuela Bíblica de Galaad de la Watchtower sat yatichäwit graduasirinakasa, clase 125.

Nayraxat qhiparuwa jakhuñ qalltasiski, sutinakapasti chʼiqat kupi tuqiruwa uñstaraki.

1) Hodgson, A.; Wall, A.; Beerens, K.; Hortelano, M.; Newman, L.; De Caso, A. 2) Jenkins, J.; Jarzemski, T.; Méndez, N.; Corona, V.; Canalita, L. 3) Fryer, H.; Savage, M.; Tidwell, K.; Erickson, N.; Dyck, E.; McBeath, R. 4) Pérez, L.; Puse, L.; Skidmore, A.; Young, B.; McBride, N.; Rondón, P.; Goodman, E. 5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. 6) Pérez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. 7) Corona, M.; Wall, R.; Puse, S.; Méndez, F.; Jarzemski, S.; Savage, T. 8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. 9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.