Jan qarjtasa yatiyaskakiñäni

¿QARITA ukat llakita ukham jikxatasirïtati, ukat janiw yatiyirix sarxäti sasin sirïtati? Kunapachatï uñisipxistu, jan ukax llakinakas apxattasi, masinakas jan walinak lurayañ munapxistu, usuntxaraktan ukhaxa, wali chʼamäspaw aguantañaxa, inamayakis Diosar luqtañataki chʼamachasisksna ukham amuyassna. Ukampisa, Jesusan sarnaqäwipaw wal chʼamachtʼistaspa. “Jupax yatisïnwa uka tʼaqhisitapatxa qhipürunxa kusisiñ jikxatañapata”, ukatwa kunayman tʼaqhisiñanak aguantäna (Heb. 12:2). Supayan kʼarïtap qhanstayañapänwa, ukhamatwa Awkipar wal kusisiyaspäna, Jesusax uk sum yatïna (Pro. 27:11, NM).

Jumatï jan qarjtasa Diosan arunakapat yatiyaskakïta ukhaxa, Jehová Diosan chuymap kusisiyarakismawa. Ukampis kuna jan waltʼäwinakatï yatiyir sarañataki aynachtʼayañ munstam ukhaxa, ¿kamachasmasa? Cristina sat mä chuymankipstat kullakat parltʼañäni, jupax usutaw jikxatasi, ukat akham siwa: “Sapa kutiw qarjata ukat jan kun lurirjama jikxatasta. Awisaxa, ukham chuymankipstat jikxatasisax usuntatakiw jikxatasta ukat kunatï jakañatak munaski ukanakat llakisisax janikiw yatiyirix sarañjamäxiti” sasa. Ukampis jumax jan waltʼäwinakan jikxatasisaxa, ¿kunjamasa yatiyirix saraskakisma?

Profetanakat yatiqasiñasawa

Yatiyir saraskakiñatakixa, kunjamtï nayra profetanakax lupʼipkäna ukham lupʼiñatakiw chʼamachasiñasa. Jeremías profetat yatxatañäni. Kunapachatï Jehová Diosax profetäñapataki uttʼaykäna ukhaxa, jupax wal axsarayasïna. Ukampis Diosar wal atinisisaw pusi tunka jila maranaka kuntï lurañapäkäna uk taqi chuym phuqatayna (Jer. 1:6; 20:7-11).

Henrrirux Jeremiasan sarnaqäwipax wal chʼamachtʼatayna, jupax akham siwa: “Paqallq tunka maranak jilaw yatiyaskta, ukampis yatiyir sarkta ukhaxa, janiw jaqinakax istʼañ munapkiti, yaqhipax tuqisipxi ukhamawa, ukanak uñjasaw awisax aynachtʼañjamaxa. Ukhaman jikxatasta ukhaxa, Jeremiyasat amtasta, jupax wal Jehová Diosar munasïna ukat taqi chuymaw jupar atinisïna, ukaw juparux chʼam churäna. Ukhamatwa uka profetax Diosataki irnaqaskakïna” sasa (Jer. 1:17). Uka profetan luratanakapax ukhamarakiw Rafaelarux chʼamañchatayna, jupax akham siwa: “Jeremiasaxa, kunjamsa jupax jikxatasïna uk janiw lupʼkänti, jan ukasti Jehová Diosaruw atinisïna ukat janipuniw jaqinakan uñisitpachas aynachtʼkänti, nayrar sarantaskakïnwa. Ukxa amtasipuntwa, janiw armañ munkti” sasa.

Jan qarjtasa yatiyir sarañatakix Isaías profetat yatiqasiñaw yanaptʼarakistani. Israelitanakax janiw istʼapkätamti sasaw Jehová Diosax jayäkipan Isaiasar satayna. Ukat “aka markan amuyupsti chhaqtayam, jinchunakapsti lluptʼarakim, nayranakapsa chʼuqantam, jan uñjapxañapataki ni istʼapxañapatakisa” sasaw säna. Ukhamasti, ¿inamayakit uka profetax yatiyaskpachäna? Diosax janiw ukham uñjkänti. Kunapachatï profetjam uttʼaykäna ukhaxa, akham sasaw Isaiasax säna: “Akankasktwa nayax, nayar khitasita” sasa (Isa. 6:8-10). Tukuyañkamaw kuntï lurañapäkäna uk phuqäna. ¿Jumax ukham phuqañatakit chʼamachasta? ¿Diosan Apnaqäwipat yatiyaskakiñatak chʼamachastati?

Jiwasatï Isaiasjam jan qarjtas yatiyaskakiñ munstan ukhaxa, Diosan arunakap jan yäqapki ukat jan istʼañ munapki ukanakampix janiw chuym ustʼayasiñasäkiti, jan ukasti yatiyaskakiñasawa. ¿Kunas Rafaelarux jan aynachtʼañatak yanaptʼatayna? Jupax akham siwa: “Kunapachatï yatiyir sarkta ukat jaqinakax jan walinak parlapxitu ukhaxa, janiw uka tuqit lupʼkti. Chiqansa, kunjamtï jupanakax arsuñ munapki ukxa, janiw khitis jarkʼkaspati” sasa. Ukat Anna sat mä kullakax akham sarakiwa: “Kunatï aynachtʼaykitaspa ukanakat janiw lupʼktti. Janïr yatiyir mistkasax Jehová Diosaruw mayista ukat sapürutak Bibliat apstʼat qillqatanak liytʼta, ukhamatwa llakimpix jan atipayasktti” sasa.

Maysa tuqitxa, Ezequiel profetax Babiloniar apat qala chuyman judionak taypinwa yatiyarakïna (Eze. 2:6). Jupatï Diosan arunakapat jan yatiykasapäna, ukat mä jan wali jaqix jiwaspäna  ukhaxa, jupaw jiwatapat juchanïsapäna. Jehová Diosax akham sasaw uka profetarux säna: “Nayax jumaruw uka jaqin jiwatapatxa waytʼäma” sasa (Eze. 3:17, 18).

Henrrix Ezequielat yatiqasiñatakiw chʼamachasi, ukat akham sarakiwa: “Janiw khiti jaqin jiwatapat juchanïñ munkti. Ukatwa jankʼak yatiyir sarta, ukhamatwa jaqinakax qhispipxanisa janisa” sasa (Hech. 20:26, 27). Zbigniew sat mä jilatax akham sarakiwa: “Kunsay jaqinakax sasipkpan Ezequielax yatiyaskakiñapänwa. Uk yatiñaxa, kunjamtï Diosax irnaqäwis uñji ukham uñjañatakiw yañaptʼitu” sasa.

Janiw sapäktati

Yatiyir sarktan ukhax janiw sapäktanti. Kunjamtï apóstol Pablox siskänxa, jiwasax ‘Diosan serviripätanwa’ (1 Cor. 3:9). Cristinax wali aynachtʼataw awisax jikxatasi sasaw saskayätanxa, jupax akham siwa: “Sapa kutipuniw Jehovä Diosar chʼamap mayista, ukat Jupax janipuniw jaytkituti” sasa. Chiqas ukhamawa, Diosan qullan ajayupaw yatiyir saraskakiñatakix wakisi (Zac. 4:6).

Kunapachatï suma yatiyäwinak yatiyasktan ukhaxa, Diosan qullan ajayupawa pachpa ‘qullan ajayun luräwipa’ uñachtʼayañatakix yanaptʼistu (Gál. 5:22, 23). Ukhamatwa kuna jan walinakansa Diosan arunakapatxa jan qhiparas yatiyaskakiñäni. Henrrix akham siwa: “Yatiyir sarañawa, llampʼu chuymanïña, mayninakar sum uñjaña ukat nayrar sartañ yanaptʼitu” sasa. Jumatï jan qarjtasa yatiyir saraskakïta ukhaxa, wali suma jaqïyatawa, mä arunxa, qullan ajayun luräwiparjamaw sarnaqäta.

Ukham yatiyaskakiñatakixa, Jehová Diosaw angelanakapampi yanaptʼistu (Apo. 14:6). Ukat ‘waranqan waranqanakapaw’ utji sasaw Bibliax qhanañchi (Apo. 5:11). Jesusan pʼiqtʼataw uka angelanakax Jehová Diosan Qhanañchirinakaparu aka Uraqin yanaptʼasipki. ¿Yatiyir sarkta ukhax angelanakaw yanaptʼaskitu sasmati?

Uka tuqitxa Annax akham siwa: “Yatiyir sarktan ukhax angelanakaw jiwasamp chikäski uk yatiñax walpun chʼamañchitu; kunjamsa jupanakax Jehová Diosampi ukat Jesucristumpi irpayasisax yanaptʼaskitu ukxa, wali askitpun uñjta” sasa. ¡Wali askipuniw angelanakampi chik yatiyir sarañaxa!

¿Ukat kunjamsa jilat kullakanakasax jan qarjtasa yatiyaskakiñataki yanaptʼistaspa? Chiqansa, jiwasax Jehová Diosar taqi chuym luqtirinakaruw uñtʼtanxa, ukax wali kusiskañapuniwa. Juma pachpaw kuntï Proverbios 27:17 qillqatan siski uka arunakax chiqätap amuypachäta, ukan akham siwa: “Kunjamatix hierroxa yaqha hierrompi liqʼjasa ariptayataxa, ukhamarakiw jaqix jaqi masipampi suma amuytʼayataraki” sasa.

Jilat kullakanakamp chika yatiyir sarasaxa, kunjamsa jukʼamp sum jaqinakar yatichsna ukwa jupanakat yatiqassna. Elizabet kullakax akham siwa: “Kunapachatï mayn maynimp yatiyir sarta ukhaxa, qhawqsa jupanakaru ukat jaqi masijar munasta ukwa uñachtʼayta” sasa. Jumax ukham mayn maynimp yatiyir sarañatak chʼamachasiñamarakiwa, ukhamatwa jan qarjtasa yatiyaskakïta ukat ukax wali askirakïniw jumatakixa.

Jan walinakat amuyasiñamawa

Taqi chuyma yatiyir saraskakiñatakixa, sapa mayniw Diosan Arupat sum yatxatañasa ukat tiempsa taqi kunatakiw apstʼasiñasa, maysa tuqitxa, sum samartʼañsa janirakiw armasiñasäkiti. Mä arunxa, jan usuntañatakisa Diosat jan jithiqtañatakis wal amuyasiñasawa.

Bibliax akham siwa: “Suma amuytʼampi kuna amtäwinaka wakichatasa sumakiwa phuqhasi” sasa (Pro. 21:5). Simón jilatax 88 maranïxiwa, jupax akham siwa: “Niyakixay taqi kunsa yäpar lurstxa, ukat ukax yatiyir sarkta ukhax kuntï lurañ amtkta uk lurañatakiw yanaptʼitu. Taqi kunsa suma amuytʼampiw wakichtʼasta, ukhamatwa yatiyir sarañataki jukʼamp tiempo apstʼasta” sasa.

Kunjamtï kʼumar jakasiñatakix manqʼañax wakiskixa, ukhamarakiw Bibliat sum yatxatañax yatiyir saraskakiñatak wali wakiskirixa. Ukhamasti yatiyaskakiñatakixa, yatxataskakiñasawa. Jiwasatï sapüru Diosan Arupat yatxataskakiñäni ukat Bibliat apstʼat qillqatanakat yatxataskakiñäni ukhaxa, wali chʼamañchataw yatiyir sarañatakix jikxatasiñäni (Mat. 24:45-47).

Elizabetax akham siwa: “Janiw jichhax televisión añcha uñchʼukxti, ukhamatwa yatiyir sarañatakix wakichtʼasta. Ukat kunapachatï arumanakax familiajampi Biblia liyipkta ukhaxa, kawkir jaqinakarutï Bibliat parlaniwaykta ukanakatwa  lupʼta. Ukat kunas jupanakarux yanaptʼaspa, ukwa Bibliat apstʼat qillqatanakata ukhamarak Bibliat jiskʼa tʼaqanakap thaqharakta” sasa. Ukhamatwa uka kullakax Diosan arunakapat jukʼamp yatiyir sarañatakix tiempo apstʼasïna.

Jumatï sum samartʼäta ukhaxa, chʼamanïyätawa ukat yatiyir sarasax sumarakwa yatiyäta. Ukampisa, kusistʼañanakaru jan ukax anatañaruk tiempo aptʼaskäta ukat janirak sum samartʼkäta ukhaxa, janiw sum yatiyirix sarkätati. Taqi chuyma Diosan Arupat yatiyiri Andrés sat mä jilatax akham siwa: “Jan sum samartʼktan ukhaxa, wali qaritaw sarnaqtanxa, ukat qarit sarnaqasax aynachtʼataw sarnaqaraktanxa. Jan ukham jikxatasiñatakix walpun nayax chʼamachasta” sasa (Ecl. 4:6).

Ukat awisax inaw wal chʼamachasisksna, chiqansa mä qhawqhanikiw taqi chuyma istʼapxistu. Ukampisa, kuntï lurktan ukxa, janipuniw Jehová Diosax armaskaniti (Heb. 6:10). Janisay istʼañ munkchistpan ukampis sarxañäni ukhaxa, inas yatiyäwisat parlapxchini. Amtañäni, Ezequiel profetax jakkäna uka tiemponxa, “jupanakax yati[pxänwa] mä profetan jupanak taypin utjatapa”, jichhürunakanxa niya ukhamarakiw yatiyatasat parlapxani (Eze 2:5). Chiqpachansa, yatiyir sarañax chʼamakiwa, ukampis wali askinakwa jikxatsna, ukat janiw jiwas mayakix askinak jikxatkañäniti, jan ukasti khitinakatï istʼapkistu ukanakamppachatakiwa.

“Yatiyir sarañaxa, machaq jaqit isthapisiñataki ukat Diosar ukhamaraki jaqi masisar munasitas uñachtʼayañatakiw yanaptʼistu” sasaw Simón jilatax amuytʼi. Ukat Andrés jilatax akham sarakiwa: “Ukham qhispiyir arunaka yatiyir sarañax wali wakiskiripuniwa. Kunjamtï jichhürunakan yatiyasiski ukhamxa, janiw mayampis yatiyasxaniti” sasa. Jumatï ukham jan qarjtasa yatiyaskakïta ukhaxa, wali askinakwa jikxatarakisma (2 Cor. 4:1, 2).

[31 janan fotonakapa]

Jan qarjtasa yatiyaskakiñatakixa, sum samartʼañasawa ukat Bibliat yatxatañasarakiwa