Chachanaka, Cristot yatiqasis warminakamar munasipxam

KATUNTAPKÄNA uka arumax akham sasaw Jesusax chiqa chuyman apostolanakapar säna: “Machaq mandamientwa churapxsma: Maynit maynikama munasipxam. Kunjämtix nayax munasipxsma, ukhama jumanakax maynit maynikam munasipxañamarakiwa. Jumanakatix maynit maynikama munasipxätaxa, taqiniw amuyapxani nayan discipulonakaxäpxatama” sasa (Juan 13:34, 35). Ukhamaw chiqa cristianonakax maynit maynikama munasipxañapa.

Ukat qhiparux akham sasarakiw apóstol Pablox cristiano chachanakar qillqatayna: “Chachanaka, munasipxam warminakamaru, kunjämtix Cristox [‘tamaru’, NM] munasi, ukhamarak jakañapsa jupa layku aptʼasiwayi ukhama” sasa (Efe. 5:25). ¿Ukhamax kunjamsa warmin jaqinakax uka kamachinakar phuqapxaspa? ¿Yamas esposapax Jehová Diosan luqtiripächi ukhaxa?

Cristox wali sumwa tamapar uñji

Bibliax akham siwa: “Chachax warmiparux munasiñapa[wa], pachpa janchiparjama. Khititix warmiparux munaski ukax jupa pachpaw munasi. Janiw khitis pachpa janchiparux uñiskiti, jan ukasti manqʼayiwa ukhamarak imaraki. Cristox uka pachparakiw [tamampixa, NM] luri” sasa (Efe. 5:28, 29). Amtañäni, Jesusax wali munasiñampipuniw arkirinakapar uñjäna, juchararäpkchïnsa, janiw pantjasitanakapak thaqkänti, jan ukasti, kuna askinakas chuymanakapan utji ukaw jupatakix jukʼamp askïna, ukhamata uka tamax ‘jupa nayraqatan’ askïñapataki (Efe. 5:27).

Kunjamtï Jesusax tamar munaskänxa, ukhamwa cristiano chachax warmipar munasiñaparaki. Arunakampis luratanakampis qhawqsa munasi ukwa uñachtʼayañapa. Kunapachatï mä warmix chachapan wali munata sarnaqasi ukhaxa, wali kusisitawa jikxatasi. Ukampis chachatï jan sum uñjkani, jan yäqkani ukhaxa, inamayaw jachʼa utanïskaspasa walja yänakanïskaspasa, warmix llakitakiw sarnaqani.

¿Ukhamax kunjamatsa mä cristianox warmipar wal munasitap uñachtʼayaspa? Warmipar munasirix janiw jaqinak taypinxa phinqʼachkiti, jan ukasti suma arunakampiw parlxayi ukat wakiski ukhaxa, kuna luratanakapatsa yuspärtʼapuniwa. Ukat kunjamsa jupan yanaptʼatax familiapax nayrar sarti uk mayninak nayraqatan arsuñxa, janiw axsarayaskiti. Maysa tuqitxa, paniniki jikxatasipki ukhasa, ukhamarakiw munasiñapxa uñachtʼayi. Inas maynitakix qhumanttʼañasa amparat katthaptʼañasa jan ukax uñkattʼañas janis kunäkchispa, ukampis ukanakaw warmin chuymaparux kusisiyaspa.

“Jilatanaka” sañxa janiw phinqʼaskänti

Ajllit arkirinakapar “jilatanaka” sañxa janipuniw Jesusax phinqʼaskänti (Heb. 2:11, 12, 17). Ukhamasti, chacha warmpacha Diosar luqtasipksta ukhaxa, ak amtañamawa: janiw warmimakïkiti, jan ukasti, kullakamarakiwa. Jupax Jehová Diosaruw jakäwipxa katuyasi. Ukhamax jaqichasiñ urux arsuwayki uka arunak phuqañax wali wakisirïkchisa, Jehová Diosan munañapa phuqañataki arsuwayki ukaw jukʼamp wakiskirixa, ukat jaqichatäxäna uka qhipatsa Jehová Diosar jakäwip katuyasiwaychixa, ukaw jukʼamp wakiskirixa. Ukatwa tantachäwinak nayraqatan sarayapki uka jilatanakaxa, warmipan arstʼapxañapatakix “kullaka” sasinxa sapxi. Ukhamasti, warmimax janiw tama taypinaki kullakamäkiti, jan ukasti utansa kullakamarakiwa. Ukatwa kawkinsa munasiñampi ukat respetompi uñjañamaxa.

Inas jumax tama taypin kun lurañatakis uttʼayatästa ukat lurañanakax walïchi, ukhamax  familiatakiw awisax tiempo jan utjxaspati. Ukampis irpir chuymaninakampi yanapirinakapampi lurañanak sum jaljtʼasipxäta ukhaxa, utamankir kullakataki, mä arunxa, munat warmimatakix tiempox utjaniwa. Jan armasimti, tamanxa kuntï jumax lurañamäki ukanakxa, yaqha jilatanakaw lurapxaspa, ukampis janipuniw khitis juma lantix warmimar uñjkaspati.

Maysa tuqitxa, jumarakiw warmiman pʼiqipätaxa. Diosan Arupax akham siwa: “Cristowa taqi chachan pʼiqipaxa, chachasti warmin pʼiqiparakiwa” sasa (1 Cor. 11:3). Ukampis ¿kunjamsa jumax warmimar uñjañama? Wali munasiñampiw uñjañama, janiw sapa kutis nayar istʼañamaw sasax uka jiskʼa tʼaqa aytasiñamäkiti, jan ukasti Jesusat yatiqasisaw munasiñampi uñjañama, ukaw wali wakiskirixa (1 Ped. 2:21).

“Nayan amigonakaxäpxtawa”

Amigonaka sasaw Jesusax arkirinakapar säna. Mä kutix akham sänwa: “Janiw ‘uywatanak’ sas sutichkxapsmati, mä uywatasti janiw uywiripan luratanakap yatkiti uka layku. Nayax jumanakarux ‘amigonak’ sapxsmawa, kuntix Awkixax siskitu uka jumanakar yatiyatax layku” sasa (Juan 15:14, 15). Jesusax wali sum arkirinakapampix parltʼasirïna, kuns jupanakampipuniw lurirïna. Caná markan utjir jaqichasïwirus arkirinakapamp chikaw saräna (Juan 2:2). Ukat jupanakampi samartʼañ chiqanakas utjarakïnwa, mayaxa Getsemaní satänwa. ‘Jesusax walja kutiw discipulonakapampi ukäwjaru sarapxirïna’ sasaw Bibliax qhanañchi (Juan 18:2).

Kunapachatï chacha warmi wali sum apasipxi ukhaxa, wali sumaw warmix chuymapan jikxatasiraki. Ukatwa kunsa panpachanipuni lurapxañama. Ukat Jehová Diosar luqtañansa mayachtʼatäpxañamawa. Diosan Arupsa panpachaniw liyipxañamaraki, ukat janirakiw chacha warmi parltʼasiñsa manqʼtʼasiñsa kawk sarañsa armisipxañamäkiti. Chiqansa, janiw aliqakix chacha warmjam sarnaqapxañamäkiti, jan ukasti wali suma amigonakjam apasipxañamawa.

“Munasiñapsti qhipakamarakiw uñachtʼayäna”

Jesusax ‘qhipakamaw’ arkirinakapar munasïna (Juan 13:1). Ukampis yaqhip chachanakax janiw uk lurapkiti, yaqha tawaq warmi laykukiw ‘waynäkasin casaraskäna uka warmirux’ apanukuwayxapxi (Mal. 2:14, 15).

Yaqhipasti Wili sat jilatjamarakiw Cristot yatiqasisa warmipar sum uñjañatakix wal chʼamachasipxi. Uka jilatan warmipax mara maranakaw usuntatayna, ukhamasti walja maranakaw munat warmipar wali sum uñjatayna. Ukat Wilix akham siwa: “Diosas jupar khitankitaspa ukham amuyasta. Nayatakix jupampïñax wali askipuniwa. Walinsa jan walinsa nayaw uñjaskäma sasaw jaqichasipkta uka urux arsuwayta. Ukhat jichhakamax 60 maranakäxchisa, janipuniw uka arunak armkäti” sasa.

Ukhamasti warmin jilatanaka, Cristot yatiqasisa warminakamar wali sum uñjapxam, jupaw kullakamasa, amigamasa.

[20 janan fotopa]

¿Wali sumti warmimampi jumax apasta?

[20 janan fotopa]

“Munasipxam warminakamaru”