Aka revista liytʼirinakan jisktʼäwinakapa

Niyakixay Jesusax Israel markan taqi chiqan yatiychïnxa, ¿kunatsa apóstol Pedrox judionakaru ukat jilïri apnaqirinakaparus ‘jan sum amuytʼasiripxtawa’ sasin sispachänxa? (Hech. 3:17.)

Mesiasar jiwayapxatapatxa apóstol Pedrox akham sasaw mä qhawqha judionakar säna: “Jichhasti jilatanaka, nayax yattwa jan sum amuytʼasaw jumanakasa, ukhamarak jilïrinakamasa Jesusarux jiwayapxtaxa” sasa (Hech. 3:14-17). Yaqhip judionakax janiw Jesusax Mesiasätapa amuyapkänti ukat janirakiw yatichäwinakapsa sum amuyapkänti, ukat yaqhanakax Jesusar wal uñisipxäna, jiskʼachapxäna, ukat janirakiw Diosar luqtañ munapkänati, taqi ukanakat inas jan sum amuyasipkchïnti.

Diosan arunakap jan yäqasax kunjamsa yaqhip judionakax aynachtʼapxäna uk amuytʼañäni. Jesusax uñachtʼäwinakampiw yatichirïna, ukat khitinakatï jukʼamp yatiqañ munapkäna ukanakarux sum qhanañchirïna. Ukampis yaqhip judionakax janiw istʼañ munapkänti ukatwa sarxapxäna. Mä kutixa, Jesusax mä uñachtʼäwimpiw yatichäna, uk istʼasax wal yaqhip arkirinakapax colerasipxäna (Juan 6:52-66). Chiqas jakäwipan kunjam jaqïpxisa kunjamäpxañapasa uk amuytʼapxañapatakiw Jesusax uñachtʼäwinakampi yatichäna, janiw jupanakax uk amuyapkänti (Isa. 6:9, 10; 44:18; Mat. 13:10-15). Ukat Mesiasax uñachtʼäwinak tuqiw yatichani sasin Biblian mä profeciax qhanañchi, uksti janirakiw amuyapkänti (Sal. 78:2).

Yaqhip judionakax Jesusarux uñisipxänwa, ukatwa janix istʼañ munapkarakïnti. Amtañäni, kunapachatï Jesusax Nazaret markapan mä sinagogan yatichkäna ukhaxa, jaqinakax wal muspharapxäna. Ukampis chiqpach Mesiasätap amuyañat sipansa, kawkinsa jakasi, kuna kast familiatsa juti ukakwa uñchʼukipxäna, ukatwa akham sas parlapxäna: “Aka jaqisti taqi akanak ¿kawkitrak yatiqanpacha? [...] Akax Marian carpintero yuqapakïchixaya. Jilanakapasti Jacobo, José, Judas, Simón. Kullakanakapasti jiwasanakamp chikarakiw jakasipkaraki” sasa (Mar. 6:1-3). Jïsa, kuna kasta jaqïnsa uk uñjasakiw yatichäwinakapar janix istʼañ munapkänti.

¿Jichhax judionakan yupaychäwip irpirinakat kamsasispasa? Jupanakax mayni jaqinakjamarakiw lupʼipxäna, ukatwa Jesusar janix istʼañ munapkänti (Juan 7:47-52). Ukampis jaqinakax wal Jesusar istʼapxäna, uk uñjasaw jupanakax uñisipxäna (Mar. 15:10). Ukat kunapachatï Jesusax kʼari chuyman jaqinakäpxatap qhankatäna ukhaxa, janiw ukhamäkiti sasaw jan phinqʼaninakax sapxäna (Mat. 23:13-36). Chiqas jupanakax janiw uka tuqit amuytʼañ munapkänti, ukatwa Jesusax akham säna: “¡Ay, kamachapkakïta, ley yatichirinaka! Jumanakasti yatiñ punkun llavepxa katuntasipxtawa, janirakiw jumanakas mantapktati, ni mantañ munirinakarus mantayapktati” sasa (Luc. 11:37-52).

Jesusax kimsa mara chikataniw suma yatiyäwinak Israel markan yatiyaskäna. Ukat walja arkirinakaparuw ukham yatiyapxañapatakix wakicharakïna (Luc. 9:1, 2; 10:1, 16, 17). Jïsa, Jesusas arkirinakapas wali sumwa yatichapxäna, uk uñjasax fariseonakax akham sapxänwa: “Taqinirakiw jupar arkxapxi” sasa (Juan 12:19). Kunjamtï uñjawayktanxa, judionakax Jesusarux uñtʼapxänwa. Ukampis chiqpach Mesiasätapxa janiw amuyasipkänti. Jïsa, jupanakax Jesusat yatiqasipxasapänwa ukat munasiñsa uñachtʼayapxasapänwa, ukampis janiw uk lurapkänti. Yaqhipanakax Jesusar jiwayirinakapxänwa. Ukatwa apóstol Pedrox jupanakar akham säna: “Ukhamasti jan wali lurañanakxa apanukupxam, ukatsti arrepientisipxam juchanakamax perdonatäñapataki. Ukatwa Diosax jumanakar kusiskañ urunak churapxätam, Cristo Jesusar khitanisa. Jupasti nayratpach jumanakataki wakichatäkäna, ukawa” sasa (Hech. 3:19, 20). Chiqas walja judionakaw uka iwxanakar istʼasax arkiri tukupxäna, ukat “walja sacerdotenak kunaw Tatiturux iyawsapxarakïna”. Jïsa, jupanakax amuyasxapxänwa ukat Jehová Diosampis sum apasxapxarakïna (Hech. 2:41; 4:4; 5:14; 6:7).