Phuqir mayordomo ukat Uraqpachan Jilïr Irpirinaka

“¿Khitirak suma phuqhiri amuytʼan mayordomosti, khitirutï utanipax utapankirinakar horasapar manqʼayañatak jaytisti?” (LUC. 12:42.)

1, 2. ¿Aka qhipa urunak tuqit parlkasax kunsa Jesusax jisktʼäna?

 KUNANAKAS aka qhipa urunakan pasañapäna ukanakat parlkasax akham sasaw Jesusax jisktʼäna: “¿Khitis suma uywataxa amuyunirakixa, ukat utanipax jupar jaytawayaspan taqi utankkis ukanakar horasapar manqʼanaks churañapataki?” sasa. Ukat uka suma uywatax askinak katuqani, Uywiripax taqi yänakapxaruw uchani sasaw sarakïna (Mat. 24:45-47).

² Ukat mä qhawqha phaxsinak nayrakiw niya ukham jisktʼarakitayna (Lucas 12:42-44 liytʼasiñapawa). “Suma uywatarux” “mayordomo” sasaw säna ukat “utankkis ukanakarux” “utapankirinaka” sasaw sarakïna. Kunas mayordomox uk amuytʼañäni, khititix yaqhataki kunsa uñjarapki ukat mayni irnaqirinakxar pʼiqtʼki ukaw mayordomo sataxa. Ukhamax suma uywataw jan ukax phuqir mayordomow sasinxa, ¿khititsa Jesusax parlaskäna, ukat kunjamatsa utankkis ukanakar manqʼañ  tiempopar churpacha? Uk yatiñax taqinitakis wali askiwa, kunattix uka uywat tuqiw Diosax Arupat yatichistu.

3. 1) ¿Suma uywatax khitinakaw sasinsa yupaychäwinak tuqit yatxattʼat jaqinakax sapxi? 2) ¿Suma uywatas jan ukax mayordomos khitisa, ukat “utankki ukanakasa” jan ukax “utapankïrinakas” khitinakarakisa?

³ Khitinakatix iglesianakan pʼiqtʼasipki ukanakat Jesusax parlaskäna sasaw yupaychäwinak tuqit yatxattʼat jaqinakax sapxi. Ukampis kuntï “utanix” mä arunxa, Jesusax siskäna uk sum amuytʼañasawa, janiw iglesianakan utjki uka walja pʼiqiñchirinakat parlkänti. Jan ukasti, mä sapa mayordomotak jan ukax mä sapa uywatatak parläna. Uka uywataw taqi kunsa uñjarapiñapäna. Ukhamasti, kunjamtï aka revistan walja kuti qhanañchasiwaykixa, mayordomo siski uka aruxa, khitinakatix alaxpachar sarañataki ajllitäpki uka “jiskʼa tama” sañ muni. Ukat kunjamtï Lucas libron siskixa, Jesusax janïra mayordomot parlkasax uka jiskʼa tamatwa parlaskäna (Luc. 12:32). Ukatxa, “utankkis ukanaka” jan ukax “utapankirinaka” sasinxa, sapa mayni arkirinakapat parlaskäna, mä arunxa, janiw mä tamat parlkänti. Ukhamaxa, ¿alaxpachar sarir taqi cristianonakat Diosan Arupat manqʼäkaspas ukham mayninakar yatichañatakiti tiempopar wakichapxpacha? Uk sum amuytʼañatakix Qullan Qillqatanakax kamsisa uk sumpach yatxatañäni.

Jehová Diosan nayra luqtiripa

4. ¿Jehová Diosax kunjamsa nayra Israel markapar uñjäna, ukat kun amuyañas wakisi?

⁴ Khä nayra Israel markarux “luqtirija” sasaw Jehová Diosax säna. Ukat akham sarakïnwa: “Jumanakäpxtaw nayan qhanañchirinakaxaxa, nayan ajllit [‘luqtirija’, NM]” sasa (Isa. 43:10). ¿Amuytati? Nayraqatxa waljanit parli ukat qhiparusti maynitak parlaraki. Ukhamasti markpacha israelitanakax Diosan mä luqtiripakïkaspas ukhamänwa. Ukatxa ak amuyañasawa, janiw taqinis yatichapkänti, jan ukasti, sacerdotenakampi mä qhawqha levitanakampikiw markar yatichapxirïna (2 Cró. 35:3; Mal. 2:7).

5. ¿Jesusan arunakaparjamax kunas kamachawayi?

⁵ Ukampisa, ¿suma uywata sasinxa Israel markatti Jesusax parlaskäna? Janiwa, akham sasaw jupax judionakar säna: “Jumanakatxa Diosan reinopax apaqatäniwa, churasirakiniw khitinakatix horasapar achunak churkis ukanakaru” sasa (Mat. 21:43). Ukhamasti Jehová Diosax yaqha marka ajllisiñapäna. Ukampis kunjamatix nayra ‘luqtiripax’ mä arunxa, nayra Israel markapan yatichaskänxa ukham yatichasiñaparakïnwa.

Amuyasiri Chiqapa Uywataw uñstani

6. ¿Pentecostés 33 maranxa kuna machaq markas uttʼasiwayi, ukat khitinakas ukankapxi?

⁶ Ukhamaw Diosax mä machaq marka ajllisïna, uka markax “Diosan Israelapa” satawa, khitinakatix alaxpachar sarañataki ajllitäpki ukanakaw uka markankapxi (Gál. 6:16, MT; Rom. 2:28, 29; 9:6). Ukat 33 marana, Pentecostés urun Diosax qullan ajayupa cristiano tamxar apayankäna ukhaw uka tamax uñstawayäna. Ukat aksarux khititix qullan ajayu katuqapki ukanakaxa, uka tamaruw mantapxi. Jesusax uka tamatwa suma uywata sasinxa parlaskäna. Jupa pachpaw uka uywatarux ajllisiwayi. Ukat uka markankirinakatxa sapa mayniw Diosan arunakapat yatiyir sarapxañapa, ukhamata Jesusan arkiripar jaqinakar tukuyañataki (Mat. 28:19, 20). Ukampisa, ¿Diosan markapar yatichañatakix taqinit wakichapxañapäna ukhamat tiempopar luqtañataki? Qullan Qillqatanakax uka tuqit kamsis uk amuytʼañäni.

7. ¿Qalltanxa kunas apostolanakatakix nayrankañapäna, ukat kunas qhiparux utjäna?

⁷ Amtañäni, 12 apostolanakapar ajllisax yatiyir sarapxam sasaw Jesusax khitäna, ukaw jupanakatakix nayrankañapäna (Marcos 3:13-15 liytʼasiñapawa). Uka luräwix apóstolos siski uka griego arurjamaw phuqasiñapäna, uka arux “khitaña” sañ muni. Ukhamasti, ukaw taqi kunat sipansa nayrankañapäna. Ukampis cristian  tamax niya uttʼasiñampïkäna ukhaxa, ‘yaqha luräwinakampiw’ apostolanakatakix utjäna (Hech. 1:20-26).

8, 9. 1) ¿Pentecostés urut aksarux kun lurañatakis apostolanakax wal chʼamachasipxäna? 2) ¿Khitinakarakis yaqha aski lurañanak katuqapxäna, ukat kunjamsa Jerusalenakir Jilïr Irpirinakax uk uñjapxäna?

⁸ Ukhamaxa, ¿kun lurañatakis tunka payan apostolanakax chʼamachasipxäna? Uk yatxatañatakix kunas Pentecostés qhipat pasatayna uk uñjañäni. Ijma warminakar kunjamsa manqʼanak churasini uka tuqitwa mä jan waltʼäwix utjäna sasaw Bibliax qhanañchi. Ukatwa apostolanakax mayni jilatanakar jawsasin akham sapxäna: “Nanakatakix janiw walïkiti Diosan arunakap parlañ apanukusina manqʼa serviñaxa” sasa (Hechos 6:1-6 liytʼasiñapawa). Ukatxa yatxattʼat walja jilatanakaruw ajllipxäna, jupanakan uk uñjapxañapataki, ukhamatwa apostolanakax Diosan “arunakap yatichañaru” uchasipxäna. Uka amtar puripxatapax wali askïnwa. ‘Diosan arunakapasti jukʼampiw Jerusalenan yatiyasïna. Ukat iyawsirinakas waljanirakiw yapxattapxäna’ (Hech. 6:7). Ukhamasti, apostolanakax tamar yatichañatakiw nayraqat chʼamachasipxäna (Hech. 2:42).

⁹ Maysa tuqitxa, yaqha jilatanakarux wali wakiskir luräwinakaw churasirakïna. Uk amuytʼañatakix Pablompit Bernabeampit parltʼañäni. Qullan ajayun amuytʼayataw uka pä jilatarux Antioquía markat yaqha chiqar mesionerjam khitapxatayna. Janis uka paninix apostoläpkchïnxa, apostolat uñtʼatäpxänwa (Hech. 13:1-3; 14:14; Gál. 1:19). Uka qhipatwa Jerusalenankir Jilïr Irpir jilatanakax apostoljam uka paninir uttʼayxapxäna (Gál. 2:7-10). Ukat apostoljam uttʼayatäxasaw Pablox mä tamataki nayrïr carta qillqatayna, ukhamaw Diosan arunakapat tamanakar yatichañ qalltäna.

10. Khä nayra patak maranakanxa, ¿taqinit Diosan arunakapat yatiyasiñapatakix tamxar pʼiqtʼapxpachäna jan ukax tamanakar yatichapxpachäna? Uk qhanañchtʼma.

¹⁰ Ukampisa, ¿taqinit Diosan arunakapat yatiyasiñapatakix tamxar pʼiqtʼapxpachäna jan ukax tamanakar yatichapxpachäna? Janiwa. Uka tuqit akham sasaw Pablox qillqatayna: “¿Taqpachaniti apostolüpxi? ¿Taqpachaniti Diosan arunakap parlirinakäpxi? ¿Taqinit yatichi? ¿Taqinich jan ukax milagronak lurixa? [...] Janiw taqinïkiti” sasa (1 Cor. 12:29, 30). Chiqansa alaxpachar sarir taqi cristianonakaw jaqinakar Diosan arunakapat yatiyirix sarapxirïna, ukampis kimsaqallqunikiw jupanakatxa Griego Arut Qullan Qillqatanakan utjki uka 27 libronakxa qillqapxatayna.

Aka urunakan Amuyasiri Chiqapa Uywata

11. ¿Kunanaksa Amuyasiri Chiqapa Uywatax uñjañapa?

¹¹ Aka qhipa urunakansa uka Amuyasiri Chiqapa Uywatax utjaskakiniwa sasaw Mateo 24:45 jiskʼa tʼaqanxa Jesusax qhan uñachtʼayistu. Ukat Apocalipsis 12:17 qillqatanxa uka jiskʼa tamax ‘warmin mayni wawanakapa’ satarakiwa. Ukhamasti jupanakaw Criston yänakapxa aka Uraqin uñjasipki. Kunanakatix Diosan Apnaqäwipat yatiyañataki utjki taqi ukanakwa sum uñjasipki. Ukat aka Uraqin wiñay jakañ katuqapkani ukanakarus jupanakarakiw uñjasipki.

12, 13. ¿Kunjamatsa mä cristianox alaxpachar sarañataki ajllitätapa yatisispa?

¹² Ukampisa, ¿kunjamatsa mä cristianox Diosan ajllita markankatapa jan ukax alaxpachar sarañataki ajllitätapa yatisispa? Uk amuytʼañatakix kuntï Pablox alaxpachar jupjam saririnakarux siskäna uk uñjañäni, akham sänwa: “Taqi khitinakatix Diosan Ajayupampi irpatäki ukanakaxa Diosan wawanakapawa. Janiw esclavo tukuyir ajayu katuqapktati axsaratak sarnaqaskañataki, jan ukasti katuqapxtawa Diosan wawapa tukuykistu uka Ajayu, ukat jupax arsuyistu: ‘Nayan Awkixa’ sasa. Uka kipka Ajayurakiw jiwasan ajayusamp chika Diosan wawanakapätas qhanañchi. Wawanakapätas laykuxa Diosatxa herencia katuqarakiñäni jupan arsutaparjama.  Uka herenciaxa Cristompirakiw katuqañäni, jiwasanakatix jupamp chika taqi kunans tʼaqhisiñäni ukaxa, ukat alaxpachan jupampirakiñäni” sasa (Rom. 8:14-17).

¹³ Mä arunxa, uka cristianonakax qullan ajayun Ajllitäpxiwa ukat alaxpachar sarañataki ‘jawsatäpxiwa’ (Heb. 3:1). Chiqansa, pachpa Jehová Diosaw jupanakar jawsi. Ukampis jupanakax jan pächasisa ukat jan axsarasaw jankʼaki iyawsapxaraki, ukhamata Diosan wawapjam uñtʼatäxañataki. Bibliax akham siwa: “Jumanakax Qullanana jawitäpxtawa, taqi kunanakwa yatipxta” sasa (1 Juan 2:20 MT). Ukhamasti, kawkirus sarapxani ukxa, Jehová Diosaw amti, janiw jupanakpach amtapkiti (2 Cor. 1:21, 22; 1 Ped. 1:3, 4).

¿Kunjamsa jupanakar uñjañasa?

14. Alaxpachar sarañataki ajllitäpki ukanakaxa, ¿kunjamsa amuyasipxañapa?

¹⁴ Nayraqatxa, khitinakatix alaxpachar sarañataki ajllitäpki ukanakaxa, ¿kunjamsa amuyasipxañapa? Janiw jachʼañchasipkiti. Alaxpachar sarañataki jawsatäpkchisa, aliq jawsatakïpxiwa. Ukat alaxpachar sarañatakix jiwañkamaw jan pantjasiñatakix wal chʼamachasipxañapa. Kunjamtï Pablox siskäna ukhamarakiw sapxi: “Jilatanaka, janiw nayax ukampix sañ munapksmati niyas jikxatkirista ukhama, jan ukasti kunatix qhipankki ukxa, armanuktwa, nayrankkis uk jikxatañkamaw chʼamañchasiskta, kawkharutix puriñasäki, ukar puriñataki, alaxpachan churäwi katuqañataki, kunatakitix Diosax Cristo Jesús tuqix jawskistu uk katuqañataki” sasa (Fili. 3:13, 14). Ukhamasti, khitinakatix uka jiskʼa tamat aka Uraqinkasipki ukanakaxa, “Diosan jawsatanakjama[w]” “altʼat chuymampi axsarañampirak” sum sarnaqapxañapa (Efe. 4:1, 2; Fili. 2:12; 1 Tes. 2:12).

15. Mä cristianox Jesusan jiwäwipa amtaski uka tantachäwin tʼantʼsa manqʼtʼaspa jan ukax vinsa umtʼaspa ukhaxa, ¿kamachsnasa, ukat kunsa jupanakax jan thaqhapxañapäki?

¹⁵ Ukat mä cristianox alaxpachar sarañataki ajllitätwa saspa jan ukax Jesusan jiwäwipa amtaski uka tantachäwin tʼantʼsa manqʼtʼaspa jan ukax vinsa umtʼaspa ukhaxa, ¿kamachsnasa? Janiw uñchʼukiñasäkiti, Jehová Diosaw uk uñjaskani (Rom. 14:12). Ukat khitinakatix chiqpachapuni alaxpachar sarañataki ajllitäpki ukanakasa janiw mayj sarnaqapkiti. Janirakiw ‘walja jaqinakat’ mä arunxa ‘yaqha ovejanakat’ sipansa jukʼamp qullan ajayunïpkaspas  ukham amuyasipkiti (Apo. 7:9; Juan 10:16). Maysa tuqitxa, janirakiw tʼantʼa jan ukax vino umtʼasakix irpir chuymaninakat sipansa jukʼamp munañanïpkaspas ukham tukupkiti, janiw jachʼañchatäñsa thaqhapkarakiti.

16-18. 1) ¿Alaxpachar sarir taqi cristianonakat Diosan arunakapat yatichäwinak apayanipxistu? Uk mä uñachtʼäwimpi qhanañchtʼma. 2) Kuna amtar puriñatakisa, ¿kunatsa Uraqpachan Jilïr Irpirinakax alaxpachar sarañataki ajllitätwa sirinakarux jan jisktʼapxañapäki?

¹⁶ Ukat alaxpachar janïr sarapki ukanakaxa, ¿Biblia tuqit kuna yatichäwi apsuñatakis taqinit yatiykipasipxpacha jan ukax parlapxpacha? Janiwa. Tamjamax Criston ajllit jilat kullakanakar Diosan arunakapat yatichapxañapäkchisa, sapa mayniw kunayman lurañanakanïpxi (1 Corintios 12:14-18 liytʼasiñapawa). Kunjamtï uñjawayktanxa, khä nayra patak maranakanxa taqi jilat kullakanakaw Diosan arunakapat yatiyirix sarapxirïna. Ukampis mä qhawqhanikiw uka taypitxa Biblian utjki uka libronaksa qillqapxäna ukat tamanakxarus pʼiqtʼapxäna.

¹⁷ Amuytʼañäni, awisax kuna jan walinak utjipansa “tamaw” uñjañapa sasaw Bibliax parli (Mat. 18:17, NM). Ukampis janiw tamankirinakax taqini uk uñjapkiti, jan ukasti, irpir chuymaninakaw sarayirinakjamax uñjapxi. Ukat mä amtar puriñatakix janirakiw taqi jilat kullakanakar jisktʼapkiti. Ukhamaw lurañanakapsa phuqapxi ukat taman sutipxarus kunsa amtapxaraki.

¹⁸ Jichhürunakanxa niya ukhamaw Amuyasiri Chiqapa Uywata satäki uka tamanxa uñjasiraki. Qullan ajayun ajllita mä qhawqha jilatanakakiw uka taman sutipxarux pʼiqtʼapxi. Uka jilatanakaw Jehová Diosan Qhanañchirinakapan Uraqpachan Jilïr Irpirinaka satäpxi. Jupanakaw kunjamsa Diosan Apnaqäwipat yatiyasiski ukxa uñjasipki ukat jiwasatakix yatichäwinaksa wakichapxaraki. Ukat kuna amtar puriñatakis janiw alaxpachar sarir taqi cristianonakar jisktʼapkiti, kunjamtï khä nayra patak maranakan Jilïr Irpirinakax taman sutipxaru kunsa amtapxirïna ukhama (Hechos 16:4, 5 liytʼasiñapawa). Ukampis alaxpachar sarir taqi jilat kullakanakaw Diosan arunakapat taqi chuym yatiyasipki. Ukhamasti ‘Amuyasiri Chiqapa Uywataxa’ mä sapa cuerpokïkaspas ukhamawa, sapa mayninwa kun lurañas utji (1 Cor. 12:19-26).

19, 20. ¿Aka Uraqin wiñay jakañ suyirinakax kunanakatsa amuyasipxañapa?

¹⁹ Kunanaktï aka yatichäwin yatxatawayktan ukanakax aka Uraqin wiñay jakañ suyirinakaruxa, ¿kun lurañatakis chʼamañchistu? Chiqansa, khitinakatix Uraqpachan Jilïr Irpirinakjama Amuyasiri Chiqapa Uywatan sutipxaru sarayasipki ukanakarux taqi chuyma yanaptʼañasawa, mä arunxa, Diosan Apnaqäwipat yatiyañasawa. Ukat jupanak tuqi aski yatichäwinak katuqasaxa wal Diosar yuspärtanxa. Ukat amtapuniñäni, Amuyasiri Chiqapa Uywatarux wali respetompis mä tamarjamax uñjkstanxa, janiw alaxpachar sarañataki ajllitätwa sirinakar wal jachʼañchañax wakiskaspati. Khitinakatix chiqpach ajllitäpki ukanakaxa janiw maynis ukham jachʼañchayasiñ munapkiti (Hech. 10:25, 26; 14:14, 15).

²⁰ Ukhamasti, alaxpachar sarañataki ajllitanakjamasa jan ukax aka Uraqin wiñay jakañ suyirinakjamasa, taqi chuymaw phuqir mayordomompir ukat Uraqpachan Jilïr Irpirinakampir yanaptʼañasa. Amuyasipxapuniñäni ukat tukuykam saytʼatäñataki wal chʼamachasipxañäni (Mat. 24:13, 42).

¿Qhanañchtʼasmati?

• ¿Khitis Amuyasiri Chiqapa Uywataxa, ukat khitinakarakis utankasipki ukanakaxa?

• ¿Kunjamatsa mä cristianox alaxpachar sarañataki ajllitätap yatisispa?

• ¿Khitis yatichäwinakxa wakichañapa?

• ¿Alaxpachar sarir cristianonakax kunjamsa jupanakpachat amuyasipxi?

[Jisktʼanaka]

[23 janan fotopa]

Uraqpachan Jilïr Irpirinakaxa Amuyasiri Chiqapa Uywatan sutipxaruw kun lurañsa amti, khä nayra patak maranakanjama