Diosan arunakapax jaya chiqanakaruw puri

TUVA markankirinakax wali jaya chiqanakan jakasipxi ukatwa jupanakar Diosan arunakap yatiyir sarañax wali chʼamaxa. Uka markaxa, Siberia markan aynach tuqinwa jikxatasi, Mongolia markamp qurpanïpxiwa. Ukampisa, jichhakiw uka jayanakan jakasir jaqinakax Kyzyl markar mä tantachäwir jutapxäna, uka markax Tuva markan capitalapawa. Jutapxatap yatisaxa, uka markan jakasir María sat mä precursorax akham sasaw amuytʼäna: ‘Jupanakar suma yatiyäwinak yatiyañax walipunïspawa’ sasa.

¿Kunas pasatayna? Mariax akham siwa: “Yatichirjam irnaqkta uka escuelanxa, machjasiñ tuqit ukat jan wali qullanakamp qulljasiñ tuqit parlañatakiw mä tantachäwir jawstʼapxäna. Ukanxa, Tuva markankir jaya chiqanakan jakasirinakatxa inas phisqa tunkan jutapxchini sasaw suyasipkäna. Yatichirinaka, jaqinakan amuyunakapat yatxattʼat jaqinaka, wawanakar arxatañ tuqit yatxattʼat jaqinaka ukat yaqhanakamp kunaw ukar jutapxäna” sasa. Mariax jupanakar Bibliat yatiyañ wal munäna, ukampis jupatakix chʼamänwa, ¿kunatsa? Jupax akham siwa: “Axsarirïtwa ukat kawkha chiqanakan yatiyañas chʼamakiwa. Ukampisa Jehová Diosaruw jan axsarañataki ukat uka jaqinakar yatiyañatak chʼam mayista” sasa. ¿Ukat kuns luratayna?

Jupax saskakiwa: “¡Despertad! sat revist jikxatta, ukanxa axsarañ tuqitwa parläna. ‘Akxa jaqinakan amuyunakapat yatxattʼat jaqinakax munapxaspawa’ sasaw uka revist escuelar apasta. Uküruxa, uka tantachäwir jutir mä yatichiriw oficinajar jutatayna, uka revistxa juparuw churta ukat wali sumwa katuqtʼasïna. Chiqansa, nayax axsarayasiraktwa, sasaw jupax situ. Ukat qhipürusti, Kunsa wayn tawaqunakax yatiñ munapxi, mayïr libro churta ukat ukhamarakwa katuqtʼasitu. Kunjamsa jupax sum katuqtʼasïna uk uñjasaxa, mayni yatichir masinakapax munapxarakispawa, sasaw amuytʼasta, ukatwa mä caja phuqpachwa Wayn tawaqunakataki sat libro ukat Bibliat apstʼat yaqha qillqatanakamp aptxa” sasa. Uka cajax jankʼakiw chʼusäxatayna, ¿kunatsa? Jupax saskakiwa: “Parlkayäta uka yatichirin masinakapaw oficinajar akham jisktʼasir jutapxäna: ‘¿Kawkhansa uka libronak lakirasipki?’” sasa. Kawkhantï lakirkayätxa ukharupuniw jutapxatayna.

Uka tantachäwix sabadow tukuyäna. Ukürux Mariax janiw irnaqkänti, ukhamasti oficinapan utjkäna uka mesanakxaruw Bibliat apstʼat qillqatanak jaytawayatayna, ukat akham sasaw pizarrar qillqtʼawayatayna: “Munat yatichirinaka, aka qillqatanakxa jumanakatakisa amigonakamatakis apasipxasmawa. Aka qillqatanakax yatichañatakis wal yanaptʼapxätam ukat familianakamarus chʼamañchtʼarakiniwa” sasa. ¿Ukat kunas pasatayna? Jupax siwa: “Ukürux oficinajaruw sarta, ukat niya qʼalwa qillqatanak apasxapxatayna. Uk uñjasax jankʼakiw jukʼampi libronaka ukat revistanak aptir sarta” sasa. Uka tantachäwi tukuyxäna ukhaxa, Mariax 380 revistanaka, 173 libronaka ukat 34 folletonak lakiratayna. Uka tantachäwir jutirinakaxa, kawkhantï jakasipkäna ukat irnaqapkäna uka chiqanakaruw Bibliat apstʼat qillqatanak apasipxäna. Mariax akham siwa: “Tuva markan jaya chiqanakan jakasirinakax Diosan arunakap ukham katuqapxatapat walpun kusistxa” sasa (Ecl. 11:6).

[32 janankir mapa]

(Sumpach amuytʼañatakix qillqatn mistki uk uñxatañamawa)

RUSIA

TUVA SAT MARKA