“Diosan munasiñapan jakasipxañäni”

“Diosan munasiñapan jakapxam, kunürutï Tatit Jesucristosax khuyapayasiñapanxa wiñay jakañxa churkistani uka uru suytʼasina.” (JUD. 21.)

1, 2. 1) ¿Kunjamsa Jehová Diosax munasiñap uñachtʼayawayistu? 2) Jan walinak luraskañäni ukhaxa, ¿Jehová Diosax munasiñapan jakasiyistaspati? Kunatsa ukham sista uk qhanañchtʼam.

 JEHOVÁ DIOSAX kunaymanitwa munasiñap uñachtʼayistu. Chiqpachansa, wali jachʼa munasiñapatwa mä qhispiyir khitanistu. Jïsa, jaqinakar wal munasitapatwa munat Yuqapar jiwas layku jiwañapataki aka Uraqir khitanitayna (Juan 3:16). Wiñay jakañ jikxatañasataki ukat wiñayataki Jupan munasiñapan jakasipxañasatakiw uk lurawayi.

² Ukhamasti, jan walinak luraskañäni ukhaxa, ¿Jehová Diosax munasiñapan jakasiyistaspati? Janiwa, kunattix akham sasaw Judas 21 jiskʼa tʼaqan iwxtʼistu: “Diosan munasiñapan jakapxam, kunürutï Tatit Jesucristosax khuyapayasiñapanxa wiñay jakañxa churkistani uka uru suytʼasina” sasa. “Diosan munasiñapan jakapxam” sasaxa, luräwinakasamp uñachtʼayañxat parlaski. ¿Diosan munasiñapan jakasiñatakix kunsa lurañasa?

¿Diosan munasiñapan jakasiñatakix kunsa lurañasa?

3. Jesusax Awkipan munasiñapan jakasiñatakixa, ¿kunsa lurañapäna?

³ Uk qhanañchtʼañatakixa, Jesusax jiwañapäkäna uka arumax kunsa arsuwayäna uk uñjañäni. Jupax akham sänwa: “Nayan mandamientonakaxtï phuqhapxäta ukaxa, nayax munasipksma uka munasiñanwa sarnaqapxäta, kunjämtix nayax Awkixan mandamientonakap phuqtxa ukhamarak jupax nayar munasitu ukanarakwa sarnaqta” sasa (Juan 15:10). Jesusax Awkipan munasiñapan jakasiñxa wal  munäna, ukatakix Awkipan kamachinakapwa phuqañapäna, uk jupax sum yatïna. Jesusax janis juchanïkchïnxa Awkiparux istʼapunïnwa, jiwasax juchararanakjamax jukʼamp istʼasirïñasaw wakisi.

4, 5. 1) ¿Kunjamsa Jehová Diosar munasitas uñachtʼaytanxa? 2) Jehová Diosan kamachinakap phuqañax wali chʼamäkaspas ukhamxa, ¿kunatsa jan amuyañasäki?

⁴ Jehová Diosar munasitas uñachtʼayañatakixa, kamachinakapar istʼañasawa. Apóstol Juanax akham sänwa: “Diosar munañaxa mandamientonakar phuqhañawa; mandamientonakapasti janirakiw jan phuqhañjamäkiti” sasa (1 Juan 5:3). Chiqas jila part jaqinakax janiw istʼasiñ munapkiti. Ukampis Diosan kamachinakapax janiw “jan phuqhañjamäkiti” sasaw Bibliax qhanañchistu. Ukhamawa, Jehová Diosax janipuniw jan phuqirjamäktan uk maykistuti.

⁵ Akham amuytʼañäni: ¿mä munat masimaruxa, jan qʼiptañjam wali jathi qʼipi qʼiptayasmati? Janipuniw ukham lurkasmati. Jehová Diosax ukhamarakiwa, kunattix wali khuyaptʼayasiriwa ukat kuntï jan lurirjamäktan uk jiwasat sipansa sum yati. Jupax “laqʼätas” yatiwa, sasaw Bibliax qhanañchistu (Sal. 103:14). Jupax kuntï jan lurirjamäktan uk janipuniw maykistaspati. Ukhamax Jehová Diosan kamachinakap phuqañax wali chʼamäkaspas ukham janiw amuyañasäkiti. Jan ukasti, kamachinakapar istʼasaw alaxpachankir Awkisar munatassa ukat munasiñapan jakasiskañak munatassa uñachtʼaytanxa.

Jehová Diosan mä aski churäwipa

6, 7. 1) ¿Kunas amuyasir chuymaxa? 2) Kunjamsa amuyasir chuymasax Diosan munasiñapan jakasiñatakix yanaptʼistu, uk mä uñachtʼäwimp qhanañchtʼam.

⁶ Jan walinakamp phuqantat akapachanxa, kunayman amtanakaruw puriñasa. Ukampis ¿uka amtanakasax Jehová Diosan munañaparjamati janicha uk yatiñatakix kun lurañasasa? Jehová Diosax sapa mayniruw mä regalo churawayistu ukaw jupar istʼañ yanapistu. Ukaxa amuyasir chuymasawa, mä arunxa, concienciasawa. ¿Kunas amuyasir chuymaxa? Amuyasir chuymaxa jiwaspachpa uñtʼasiña, kunjamas sarnaqasktan uk amuytʼayiri ukat mä taripirjamarakiwa. Mä tuqitxa, kuna amtäwir puriñatakis yanaptʼistuwa, maysa tuqitsti, kunanaktï lurawayktan ukax walikïskänti janicha, ukat kuntï lurkañäni ukax walikiskaniti janich uk amuytʼasiñsa yanaptʼarakistuwa (Romanos 2:14, 15 liytʼasiñapawa).

⁷ ¿Kunjamsa amuyasir chuymasax yanaptʼistu? Mä jaqix jan uñtʼat chiqan saraskaspa ukham amuytʼañäni. Ukat janirakiw jaqi thakisa ni auto sarañ thakis utjkiti, janiw kawksar sarañas amuyasiñjamäkiti. Ukampis Inti uñtasaw amuytʼasi, kawkharutï puriñ munki ukhar puriñatak jan axsartʼas sarantaskaki. Chiqansa, Intix sapürupuniw maysa tuqit jalsusin maysa tuqir tiempopar jalantaraki. Jan Intïkaspänxa, uka jaqix sumpun chhaqxasapänxa. Ukhamarakiwa, jiwasatï jan amuyasir chuymanïksna ukhaxa, kunjam jaqïñasasa kunjam sarnaqañasasa ukat kunatï walïki jan walïki ukxa, janirakiw amuyksnati.

8, 9. 1) ¿Amuyasir chuymasar chʼamaktʼaysnati? 2) ¿Amuyasir chuymasamp yanaptʼayasiñasatakix kun lurañasasa?

⁸ Ukampis qinayrantatäxi ukhaxa, janiw Intir uñjktanti ukat janiw kawkhankatas amuyañjamäxiti. Niya ukhamarakiw amuyasir chuymasaxa, jiwasatï munañasarjamaki sarnaqañäni ukhaxa, amuyusax qinayrantatäkaspas ukhamäspawa ukat janiw sum amuyxsnati. Ak janipuniw armañasäkiti: “Jaqin chuymapjama ñanqha, kʼarintirix janiw utjkiti” (Jer. 17:9; Pro. 4:23). Ukat Intïx qinayamp chʼamaktʼatäxi ukhaxa, janiw kuna horas uk sum amuyañjamäkiti ukat pantjasiraksnawa. Ukhamarakiwa, jiwasatï Diosan Aruparjam jan sarnaqkañäni ukhaxa, pantjassnawa, inamayaw amuyasir chuymanïsksna (Sal. 119:105). Chiqpachansa, jaqinakax waljaniw munañanakaparjamak sarnaqapxi ukat Diosan Arupan jikxataski uka kamachinakarus janiw yäqapkiti, ukaw wali llakkañaxa (Efesios 4:17-19 liytʼasiñapawa). Ukatpï jaqinakax amuyasir chuymanïpkchisa, waljanix ñanqha jan wali luräwinak lurasipkaki (1 Tim. 4:2).

 ⁹ Ukampis jiwasax janiw jupanakjamäñ munktanti. Ukatwa amtanakasarjamak jan sarnaqktanti, jan ukasti Diosan Arupampi yatichayastanxa, ukhamat suma amuyumpi sarnaqañasataki. Ukat munat jilat kullakanakasan amuyunakapsa respetaraktanwa. Ukatwa kunanaktï pantjayïrjamäspa ukanak jan lurañatak chʼamachastanxa, ukat kunanakatï jiwasatak walïki ukax mayninakatakix janiw walïkaspati uksa amuyaraktanwa (1 Cor. 8:12; 2 Cor. 4:2; 1 Ped. 3:16).

10. ¿Kuna tuqinakatsa yatxataskañäni?

¹⁰ Kunjamsa Jehová Diosaru istʼatäsxa ukat munasitäsxa uñachtʼaysna, uk jichhax kimsa tuqit uñjañäni: 1) khitinakarutï Diosax munaski ukanakar munasa, 2) khitinakatï pʼiqtʼapki ukanakar respetasa ukat 3) Jehová Diosan nayraqatapan qʼumaskakiñatak chʼamachasisina. Uka kimsa tuqit Diosar istʼañatakixa, amuyasir chuymasax Biblian jikxataski uka kamachinakaparjam yatichatäñapawa.

Khitinakarutï Jehová Diosax munasi ukanakar munasiñäni

11. Khitinakarutï Jehová Diosax munasi ukanakaruxa, ¿kunatsa munasiñasaraki?

¹¹ Nayraqatxa, khitinakarutï Jehová Diosax munaski ukanakaruw munasiñasa. Chiqpachansa, jaqinakax qhiya tʼawra muruqʼur uñtasitätanwa. Kunjamtï tʼarwax um chʼamthapkixa, ukhamarakiw jiwas jakʼankirinakat yatiqastanxa. Amigonakasaxa, aski lurañasatakiw yanaptʼistaspa, jan waltʼañarus purtʼasiyarakistaspawa, ukxa Luririsax sum yati. Ukatwa akham sasin iwxtʼistu: “Suma yatiñan jaqinakamp chika sarnaqirixa, suma yatiñanirakïniwa; jan amuytʼan jaqinakamp chika sarnaqiristi, jan waltʼañaruwa purirakini” sasa (Pro. 13:20; 1 Cor. 15:33). Chiqpachansa, taqiniw yatiñan jaqïñ muntanxa, kunattix janiw jan waltʼañanakar puriñ munktanti. Ukatwa Jehová Diosat yatiqasiñasaxa. Jupax wali yatiñaniwa, janiw jukʼampi yatiñanïñapax wakiskarakiti ukat janirakiw jaqinakan jan wali luräwinakapas  jan waltʼaykaspati. Ukhamäkchisa, Jupax sumwa amigonakapxa ajllisi. Ukhamaxa, ¿Diosax khiti jaqinakarus amigopäpxañapatakix ajlliwayatayna?

12. ¿Khitinakarus Jehová Diosax amigopäpxañapatakix ajlli?

¹² Amtaskpachätanwa, “nayan munata”, mä arunxa, amigoja sasaw Jehová Diosax Abrahamar säna (Isa. 41:8). Abrahamax Diosat jan jithiqtiri, chiqa sarnaqiri, wali istʼasiri ukham jaqïnwa (Sant. 2:21-23). Jehová Diosax uka kasta jaqinakaruw amigopäpxañapatak thaqhi. Jupatï Abrahamjam sum sarnaqir jaqinakar ajllchixa, jiwasax jucharar jaqinakjamaxa, wali amuyumpiw amigonakasxa ajllipxañasa. Ukhamasti yatiñan jaqinakampitï sarnaqañänixa yatiñan jaqïpxarakiñäniwa.

13. ¿Kunas suma amigonak ajlliñatakix yanaptʼistani?

¹³ Suma amigonak ajlliñatakixa, ¿kunas yanaptʼistani? Biblian qillqatäki uka jaqinakan sarnaqäwinakapaw yanaptʼistani. Amtañäni, Rut warmix Noemí taykchʼipampix wali sum apasipxäna, ukat Davitampi Jonatanampix ukhamwa apasipxarakïna ukat Pablompi Timoteompix ukhamarakïnwa (Rut 1:16, 17; 1 Sam. 23:16-18; Fili. 2:19-22). Jupanakaxa Jehová Diosaruw taqi chuyma munasipxäna, ukatwa jupanakax ukham sum apasipxarakïna. ¿Jiwasat ukham sasirakispati? ¿Ukhamarakiti jiwasjama, Jehová Diosaru munasir amigonak thaqhasktanxa? Chiqansa, tama taypinwa uka kasta amigonak jikxatsnaxa. Ukham amigonakaxa, Diosar yupaychäwisanx janiw aynachtʼaykistaniti, jan ukasti Jehová Diosar istʼañataki, yupaychäwisan jiltañasataki ukat Diosan kamachinakaparjam sarnaqaskakiñasatakiw yanaptʼistani (Gálatas 6:7, 8 liytʼasiñapawa). Ukhamatwa Diosan munasiñapan jakasiskakiñäni.

Pʼiqtʼirinakar respetañasawa

14. ¿Kunatsa pʼiqtʼirinakar respetañax chʼamäspa?

¹⁴ Ukat pʼiqtʼirinakar respetasawa Jehová Diosar respetatas uñachtʼayaraktanxa. Ukampis awisax uk lurañax chʼamakispawa. ¿Kunatsa? Mä tuqitxa, jiwasar pʼiqtʼkistu jupanakax pantjasirinakäpxarakiwa. Maysa tuqitsti, jiwasax pantjasirirakïtanwa, ukat yurktan ukhatpachaw kutkatasiñ munirïtanxa.

15, 16. 1) Jehová Diosax markapar uñjapxañapatak uttʼayki ukanakaruxa, ¿kunatsa respetañasa? 2) Israelitanakan Moisesar kutkatasipxatapatxa, ¿kunsa yatiqsna?

¹⁵ Ukat inas akham jisktʼassna: “Pʼiqtʼapki ukanakar respetañatï chʼamächixa, ¿kunatsa respetañasa?” sasa. Uka jisktʼar qhanañchañatakixa, akham jisktʼasiñarakispawa: ¿khitirus Apnaqirjam ajlltanxa? Maynitï taqi kunxaru Munañani Jehová Diosar ajlliwaychixa, Juparuw Apnaqirjam respetañapa. Janitï ukhamäkaspaxa, janirakiw Juparux Reyiparjam iyaw siskaspati. Ukatxa, Jehová Diosax pantjasir jaqinakaruw markap uñjañapatak uttʼayawayi, jupanak tuqnamwa markaparux sum uñjaraki. Jiwasatï jupanakar jan istʼsknaxa, ¿kunjamsa Jehová Diosax uñjistaspa? (1 Tesalonicenses 5:12, 13 liytʼasiñapawa.)

¹⁶ Uk amuytʼañatakix israelitanakat parltʼañäni: Moisés contra parlapxäna ukat jupa contra kutkatasipxäna ukhaxa, Jupa contras saytʼasipkaspa ukhamwa Jehová Diosax uñjäna (Núm. 14: 26, 27). Diosax uka kikpwa jichhürunakan uñjaskaraki. Jupan uttʼayat jaqinakar kutkatassna ukhaxa, Jehová Dios contras kutkatasksna ukhamäspawa.

17. ¿Kunjamsa taman pʼiqtʼapki ukanakarux uñjañasa?

¹⁷ Taman pʼiqtʼapki ukanakarux kunjamsa uñjañasa ukxa, apóstol Pablow qhanañchtʼistu. Jupax akham sasaw qillqatayna: “lstʼapxam irpirinakamaruxa, jaysapxarakim jupanakaruxa; jupanakaw almanakamatxa llakisipxi, Diosar taqi jumanakat cuenta churañäki uk yatisina. Janirak chʼamsa tukuyapxamti, jan ukasti kunatix juparux kusisïyki uk lurapxam, jan ukhamäspaxa janiw kuna askïkaspas jumanakatakixa” sasa (Heb. 13:17). Chiqpachansa, istʼasirïñasax chʼamakïspawa. Ukampis Diosan munasiñapan jakasiskakiñatakix istʼasirïñasawa, uk janipun armañäniti. ¡Chʼamachasitasax janiw inamayäkaniti!

 Jehová Diosan nayraqatapan qʼumaskakiñatak chʼamachasiñasawa.

18. ¿Kunatsa Diosax wali qʼumäpxañas muni?

¹⁸ Ukatxa, Jehová Diosan nayraqatapan qʼumaskakiñatak chʼamachasisawa, Jupar munasitas uñachtʼaytanxa, uk kunjamsa lursna uka jichhax uñjañäni. Chiqas awk taykanakax wawanakapax qʼumti sarnaqasipki ukat suma isthaptʼatäpxiti janicha uk sum uñjapxi. ¿Kunatsa awk taykanakax wawanakapan wali qʼuma sarnaqapxañap munapxpacha? Kuna laykutix kʼumara jakasipxañapwa munapxi. Ukatxa, jaqinakax mä jiskʼa wawar wali suma isthaptʼata ukat qʼuma uñjapxi ukhaxa, awk taykapan wali suma uñjata ukat munatäpachaw sasaw sapxi, ukat awk taykapatsa wali sum parlapxaraki. Ukatarakwa Jehová Diosax jiwasan wali qʼuma sarnaqapxañas muni. Qʼumäñax jiwasan askisatakiwa, ukat jaqinakax alaxpachankir Awkisat sum parlapxarakïni. Ukhamax qʼuma sarnaqañaxa wali wakiskiriwa, ukat jaqinakax akapachan qʼañu sarnaqäwinakapat jithiqtat wali qʼuma sarnaqir uñjistani ukhaxa, Jehová Diosar luqtañ munapxarakiniwa.

19. ¿Kunatsa qʼumäñax wali wakiskirixa?

¹⁹ Cristianonakax taqi kunanwa wali qʼuma sarnaqapxañasa. Jehová Diosax nayra tiempon jakir israelitanakaruxa, kunatsa qʼumäñax wali wakiskiri ukxa sum qhanañchtʼatayna (Lev. 15:31). Ukhamawa, Moisesax katuqkäna uka Leyirjamaxa, khuchichatanakxa laqʼampiw allxatapxañapäna ukat phukhunaksa sum umamp jarsupxañapäna, isinakapsa tʼaxsupxañapänwa, ukat kayunakapsa amparanakapsa jariqasipxañaparakïnwa (Éxo. 30:17-21; Lev. 11:32; Núm. 19:17-20; Deu. 23:13, 14). Uka Leyinakax Jehová Diosax qullanätapa, mä arunxa, qʼumätapwa Israel markarux amtayäna. Ukhamax qullan Diosar luqtirinakapjamaxa, qullanäpxañasarakiwa (Levítico 11:44, 45 liytʼasiñapawa).

20. ¿Kuna tuqinakatsa qʼumäñasa ?

²⁰ Ukampis janiw jañchi tuqitak qʼumäñasäkiti, jan ukasti chuymasasa amuyusasa qʼumäñaparakiwa. Sañäni, amuyunakasax qʼumäñapatakiw chʼamachastanxa. Ukat wachuq juchanakana ukat kunayman jan wali lurañanakan sarnaqir jaqinak taypins jakaskstanxa, Jehová Diosan kamachinakaparjam wali qʼuma sarnaqañatakiw chʼamachasisktanxa. Taqi kunat sipansa, kʼari yupaychäwinakan yatichäwinakapamp jan qʼañuchayasiñasatakiw wal chʼamachastanxa, ukhamat Jehová Diosar qʼuma yupaychañataki. Isaías 52:11 qillqatan jikxataski uka iwxtʼar istʼasaw sarnaqtanxa, ukan akham siwa: “¡Mistunxapxam, mistunxapxam Babiloniatxa, jan kuna qʼañurus llamktʼapxamti, mistunxapxam Babiloniatxa! ¡Jan kunampis qʼañuchtʼasipxamti [...]!” sasa. Jichhürunakanxa, kawkïr kʼari yupaychäwinakatï alaxpachankir Awkisatakix qʼañüki ukanakat jithiqtasaw yupaychäwisan wali qʼuma jikxatastanxa. Ukatwa kʼari yupaychäwinakan wali uñtʼat fiestanakapatsa ukat kunayman jan wali luräwinakapats jithiqttanxa. Chiqansa, taqi kunan qʼuma jikxatasiñax chʼamakiwa, ukampis jiwasatï qʼumäñatak chʼamachasiñänixa, Diosan munasiñapanwa jakasiskakiñäni.

21. ¿Diosan munasiñapan jakasiñatakix kun lurañasasa?

²¹ Jehová Diosax wiñayatak munasiñapan jakasiñaswa muni. Ukatakixa, sapa mayniw chʼamachasiñasa. Jesusat yatiqasipxañäni ukat Jehová Diosan kamachinakap istʼasa Jupar munasitas uñachtʼayañäni. Ukhamtï lurañänixa, janipuniw “kuna yaqha yänakasa Diosan munañapatxa apaqkista[ni]ti, uka munasiñsti Cristo Jesús Tatitus tuqwa uñachtʼayistu” (Rom. 8:38, 39).

¿Amtasktati?

• ¿Kunjamsa amuyasir chuymasax Diosan munasiñapan jakasiskakiñatakix yanaptʼistu?

• Khitinakarutï Diosax munaski ukanakaruxa, ¿kunatsa munasiñasaraki?

• Pʼiqtʼirinakar repetañaxa, ¿kunatsa wali wakisirïpacha?

• ¿Kunatsa Diosan markapanx qʼumäñax wali wakiskirïpacha?

[Jisktʼanaka]

[20 janan recuadropa/fotopa]

Aka librow Cristianjam jakasiñataki yanaptʼistu

2008 maran kimsüru jachʼa tantachäwinwa, “Diosan munasiñapan jakasipxañäni” sat libro apstʼasiwayi. Uka librox 224 jananakaniwa. ¿Kuna amtampis qillqtʼasiwayi? Diosan luqtirinakapax Diosan kamachinakap sum uñtʼapxañapataki ukat wali askirjam uñjapxañapatak yanaptʼañatakiwa. Cristianonakax kunjamäpxañapasa uka tuqitwa qhanañchtʼi ukat sum yatxatañäni ukhaxa, Jehová Diosan kamachinakapax jiwasan askisatakipunïtapwa amuyañäni, ukat uka kamachinakar istʼañarakiw wiñay jakañarus apistani.

Ukatxa, Diosan kamachinakapax janiw jan phuqañjamäkiti, jan ukasti kamachinakapar istʼañax Jupar wal munasitas uñachtʼayañatakiwa, ukwa aka librox amuytʼayarakistu. Aka libro liytʼkasaxa, akham sasaw jisktʼasiñasa: “¿Kunatsa Jehová Diosar luqtasktxa?” sasa.

Chiqas walja cristianonakaw Diosata ukat munasiñapat jithiqtawayxapxi, ukaw wali llakkañaxa. ¿Kunatsa jithiqtapxpacha? Jithiqtirinakaxa, janiw Biblian mä yatichäwip jan sum amuyapxatapat jithiqtapkiti, jan ukasti jan walinak lurapxatapatwa jithiqtapxi. Ukhamasti, Jehová Diosan kamachinakaparu ukat iwxanakapar jukʼampi munasiñatakiw chʼamachasiñasa, ukawa sapürutjam sum sarnaqañatak yanaptʼistani. Chiqpachansa, aka librow Jehová Diosan Uraqpachankir luqtirinakaparux Diosan kamachinakap arxataña ukat Supayan kʼarïtap uñachtʼayañ yanaptʼani, ukat taqi kunat sipansa Diosan munasiñapan jakasiñatakiw yanaptʼarakini (Judas 21).

[18 janan fotopa]

“Nayan mandamientonakaxtï phuqhapxäta ukaxa, nayax munasipksma uka munasiñanwa sarnaqapxäta, kunjämtix nayax Awkixan mandamientonakap phuqtxa ukhamarak jupax nayar munasitu ukanarakwa sarnaqta”