Jehová Diosaw jupanakarux ‘sum uñtani’

AJANUSAX kimsa tunka jila musculonakaniwa. Ukanakatxa, lartʼañatakix pusi tunkakiw munasi. Jan ukanakanïksnaxa, janiw lartʼasis parltʼasiñax utjkaspati. Ukampis uqaranakatakix ajanupan utjki uka musculonakax janiw aliq lartʼasis parltʼasiñatakikïkiti. Jan ukasti anjanu unxtayasa, cuerpo unxtayasa amparampi parltʼapxi ukhaxa, kunanakatï amuyupankki ukwa yatiyapxaraki. Amparampi parlasax taqi kasta chʼama amuyunakwa qhañachtʼapxi, uk uñjasax walja jaqinakaw muspharapxi. Ukham parlañaxa, lengua de señas satarakiwa.

Aka qhipa maranakanxa, Uraqpachan walja uqaranakax janiw amparampi sum parltʼir mä jaqin ajunupak uñjapkiti. Jan ukasti, ‘Jehová Diosan ajanupsa’ uñjapkaspa ukham amuyapxi (Lam. 2:19, NM). Ukampis ukax janiw akatjamatak paskiti. Jehová Diosax uqaranakarux wali munasiñampipuniw uñjäna. Nayra Israel markan tiemponakatpachwa ukax qhan amuyasi (Lev. 19:14). Ukat jichhürunakansa Jehová Diosax kunjsa jupanakar munasi uk uñachtʼayaskakiwa, kunattix “taqinin qhispiyatäñapwa muni, kunatix chiqäki uk uñtʼapxañapataki” (1 Tim. 2:4). Diosat sum yatiqapxatap laykuw walja uqaranakax Diosan ‘ajanup’ uñjapxaraki. Uqaranakax chiqa yatichäwinak janixay istʼapkchitixa, ¿kunjamarak Diosat yatiqapxpachasti? Uka jisktʼar qhanañchañatakixa, kunatsa jupanakatakix amparampi parltʼasiñax wali wakiskirixa uk uñjañäni.

Nayrampiw istʼapxi

Uqaranakatsa ukat amparampi parltʼasipxatapatsa jaqin uñstayat kunayman pantjat amuyunakaw utji. Uqaranakax autxa apnaqapxaspawa. Jupanakatakix parlir jaqin lakap uñkatas kuntï arsupki uk amuyañax chʼamakïspawa. Amparampi parltʼañax janiw aliqaki ajansa jan ukax cuerpsa unxtayañakïkiti. Ukat janirakiw Uraqpachanxa amparampi parltʼañax mä kastak utjkiti, jan ukasti waljaw utji. Mä pachpa markansa mayj mayj parltʼasiñ yatipxaraki.

¿Uqaranakax liytʼapxaspati? Yaqhipanakax liytʼañ yatipxiwa, ukampis jila part uqaranakatakix chʼamakiwa. ¿Kunatsa? Kunattix parltʼasitasarjamaw qillqtanxa. Jan uqaräki uka wawax kunjamsa parlañ yatiqi uk amuytʼañäni. Uka wawax yurki ukhatpachaw jaqinakar parlir istʼapuni, ukhamatwa mä qhawqha tiempotxa jukʼat jukʼat arsuñsa sum parlañsa yatiqxaraki. Jaqinakar istʼasakiw parlañ yatiqi. Ukatwa, uka wawax liytʼañ yatiqxi ukhaxa, kunatï papelan qillqatäki uka letranakax kawkïrinakas aruparjamax ukakwa yatiqxañapa.

Jichhax akham amuytʼañäni, anqäx markar irpapxiristam ukat janirak uka markan arupsa yatkasmati, ukatxa vidriot lurat jan kun istʼkañ cuartor jistʼantapxiristam. Ukat sapüruw jaqinakax parlxayir jutapxi, ukampis jumax janiw jupanakar istʼkaraktati; lakanakap unxtayirikwa uñjtaxa. Juman jan istʼatam amuyasax mä jiskʼa papelar qillqtʼasaw uñachtʼayanipxtam ukhamatch jupax amuyxistani sasina. ¿Kuntï sañ munapki uk amuyätati? Janiwa.  ¿Kunatsa? Kunattix papelar qillqtʼarapipxtam uka arxa janipuniw parlir istʼirïktati. Chiqpachansa, ukhamanwa jila part uqaranakax jikxatasipxi.

Amparamp parlasaw uqaranakax parltʼasipxi. Jupanakax janiw ampar mayampik parlapkiti, jan ukasti kuntï sañ munki ukxa, ajanup unxtayasa cuerpop unxtayasaw yatiyi. Ukham unxtasaxa kamsañs muni ukat kuntï sañ munki ukx qhan amuyasi, ukhamatwa mayninakampis parltʼasipxi.

Chiqpachans mä uqarax amparapa cuerpopa ukat ajanups parlasiñatak unxtayi ukhaxa, janiw ukhamak unxtaykiti, jan ukasti kuns ukamp sañ munaski uk amuyapxañapatakiwa. Ajan unxtayasax janiw kuntï sañ munapki uk qhanstayañatakikïkiti, jan ukax ukham parlirinakax mayninakan amuyapxañapatakix ukhampunwa parlapxañapa. Uka tuqit amuytʼañäni. Yaqhipanxa, amuytʼayañataki jan ukax jïsa, janiwa sas arunakampi mä jisktʼar qhanañchtʼapxañapatakix nayra phichhunakxa (ceja) amstaruw unxtayapxi. Ukampisa, khiti, kuna, kawkina, kunapacha, kunata jan ukax kunjama sas arunakampi jisktʼañatakix janiw alayar unxtayapkiti. Lak unxtayasax qhawqchʼas yänakaxa jan ukax kunjamsa maynix kuns luraski uk qhanañchtʼañatakiwa. Kuntï sañ munki ukat kunjamsa sañ muni ukhamarjamaw uqarax pʼiqʼipsa kallachipsa ajanupsa ukat nayrapsa unxtayi.

Taqi ukanakaw amparamp parltʼirinakarux kunanakatï uñjatäki ukat llamktʼañjamäki, ukat jan uñjatäki jan llamktʼañjamäkaraki ukanakat qhana ukat amuytʼkañ parlasiñ yanaptʼi.

Amparamp parlirinakataki yanaptʼanaka

Amparampi parltʼasa Jehová Diosan yatichäwinakap yatiyasi ukhaxa, uqarax uk uñjasax yatiqaspawa ukat khitittix uka yatiyäwix jutki uka Diosarus ‘iyawsaspawa’. Ukatwa Jehová Diosan Qhanañchirinakapax Uraqpachankir taqi uqaranakar yatiyañataki ukat jupanakataki yanaptʼanak lurañatakis taqi chuyma chʼamachasipxi (Rom. 10:14). Jichhürunakan Uraqpachanxa, walja equiponakaw utji ukanakax uqaranakar yanaptʼañatakiw 58 kastar jaqukipasipki, ukanakatxa pusi tunkaw Biblian yatichäwinakap DVD discor apsupxaraki. Ukham chʼamachasipxatapaxa, ¿inamayäpachati?

Jeremy sat jilatax uqar awk taykaniwa, jupax akham siwa: “Ak amtasipuntwa, mä kutix 12 maranïkayäta ukhaxa, papitujax Yatiyañataki sat revistan yatichäwipat mä qhawqha tʼaqanakapat amuytʼañ munasaw walja horanak cuartopar jistʼantasïna. Ukat akatjamat mistunisaw wali kusisita amparamp parltʼasax akham situ: ‘¡Jichhakuchaw amuyxta!’ sasa. Ukxarusti uka tʼaqanakat qhanañchañ qalltitu. Ukat uka revistat mä jukʼa uñakipasax amparamp parltʼasax akham sarakïyätwa: ‘Papitu, janjamakiw uk sañ munkiti’ sasa. Ukat qhanañchtʼaskayäta ukhaw janik qhanañchxistati sasaw situ, ukat wasitatwa cuartopar kutintawayxäna uka yatichäwit sapaki jupa pachpa amuyañataki. Kunja  llakitakis jupax jikxatasïna ukx janipuniw armkäti ukat yatiqaskakiñatak chʼamachasitap uñjasax wal kusisirakiyäta. Jichhax uqaranakataki DVD discon Biblian yatichäwinakap utjxatap laykux Diosan yatichäwinakapat jupax sum amuytʼxaraki. Kunapachatï Jehová Diosat parltʼaski ukhax wali kusisitapuniw jupax jikxatasi, uk uñjañax nätakix wali kusiskañapuniwa” sasa.

Jichhaxa, mä chacha warmit parltʼarakiñäni, jupanakax Jehová Diosan Qhanañchirinakapäpxiwa. Jupanakax Jessenia sat mä uqar tawaqumpiw parltʼapxatayna, jupax Chile markatawa. Uka tawaqun mamapat permiso mayisinxa, uka chacha warmix Bibliat apstʼat sarnaqäwinaka DVD discon amparamp parltʼirinakataki wakichtʼatäki uk uñjayapxatayna. Uk uñjasax kunas pasäna, jupanakax akham sapxiwa: “Kunapachatï Jesseniax uka video uñjañ qalltäna ukhaxa, lartʼasinwa ukxarusti jachxarakïnwa. Kunats jachaskta sasaw mamapax jisktʼäna, kuntï uñjasktxa ukax wali sumapuniwa sasaw jupax säna. Ukhaw mamapax amuyasïna, kuntï wawapax uñjaskäna uk amuyatapxa” sasa.

Venezuela markan pata pampanakanxa, mä uqar warmiw jakasïna. Jupax mä imill wawanïnwa, ukampis wasitatwa usur jaqïxäna ukat qullqi pistʼañan jikxatasipxatap laykux purakat waw apsuyasiñatakiw chachapamp amtasipkäna. Ukhamaruw Jehová Diosan Qhanañchirinakapax jupanakan utapar puripxäna, ukampis kunatï paskäna ukx janiw yatipkänti, ukat uka markankir uqaranakataki ¿Kunsa Diosax jiwasanakaru mayistu? sat videon 12 yatichäwip uñjayapxatayna. Ukanxa, purakat apsuyasisin wawa jiwayañata ukat jaqi masisar jiwayañatxa kunsa Diosax amuyi ukwa qhanañchtʼi. Uka yatichäwi uñjatajatxa wal yuspärtxa, kunattix nayarusa chachajarus waw jan jiwayasiñatakiw yanaptʼapxitu sasaw qhiparux uka warmix säna. Ukhamawa, uqaranakataki uka video uñjapxatapatwa uka wawax jan jiwayatäkänti.

Lorraine sat uqar kullakax akham siwa: “Biblian yatichäwinakap yatiqañaxa, mä jachʼa rompecabeza sat anatañ armthaphiñäkaspas ukhamawa. Nätakix janis ukax phuqatäkaspa ukham amuyasiyäta, kunattix Biblian yatichäwinakapat janiw qhanpach amuykayätti. Ukampis uqaranakataki videonak katuqxayät ukhaxa, jukʼat jukʼat sum amuyxayäta, uka rompecabeza armthapis phuqachkirïstsa ukhama” sasa. Ukat George sat uqar jilatax 38 maranakaw Jehová Diosan Qhanañchiripäxi, jupax akham sarakiwa: “Chiqpachansa, nayapachpa kuns sum amuyta ukhaxa, wali sum jikxatasta ukat chuymas chuymarakiwa. Uqaranakataki video apsupxi, ukanakaw Jehová Diosampi jukʼampi sum apasiñajatak yanaptʼitu” sasa.

“¡Tantachäwinakar sarañax wali kusiskañapuniwa!”

Jehová Diosan Qhanañchirinakapax janiw amparamp parlirinakataki Biblian apstʼat yatichäwinakak lakirapkiti, jan ukasti tamanaksa uttʼayapxarakiwa. Jichhürunakanxa, ukham  tamanakax 1.100 jilaw Uraqpachan utjxi. Uka tamanakanwa jilat kullakanakax jupanakan amuytʼkaña Biblian chiqa yatichäwinakap katuqapxaraki, amparamp parltʼasipxi ukhaw kuntï jupanakax amuyapki, kuna luräwinakanïpxisa, kunjamsa jakasipxi ukanak qhan amuyasi.

Uka tamanak uttʼayañatak chʼamachasitatxa, ¿kuna askinakas uñjasiwayi? Kuntï Cyril jilatar paskatayna ukaw uka jisktʼar qhanañchtʼistani. Uka jilatax 1955 maranwa bautisasitayna ukat walja maranakaw Biblian apstʼat qillqatanakat amuyañatak chʼamachasïna, ukat tantachäwinakan amparamp parlirinakataki jaqukipir jilat kullakanakax janis utjkchïnxa, tantachäwinakarux jan qhiparas saraskakïnwa. Ukat kunapachatï uka jaqukipirinakax jan utjkänxa, jilat kullakanakaw kuntï arstʼirix arstʼkäna uk qillqtʼarapipxirïna. 1989 maranwa Estados Unidos (Nueva York) markan amparamp parlir jilat kullakanakatak nayrïr tama uttʼayasïna. Uka maratakixa, Cyril jilatax 34 maranakaw Jehová Diosar luqtxäna. Uka tamankasaxa, ¿kunjamakis Cyril jilatax jikxatasi? Jupax akham sasaw qhanañchtʼi: “Mä chʼamak chʼumi manqhat mistunisax qhanarus mistunkirïstxa ukham amuyasiyäta. ¡Tantachäwinakar sarañax wali kusiskañapuniwa!” sasa.

Uka tamanakanwa uqaranakax Diosar yupaychañataki ukat Jupat yatiqañataki tantachasipxi. Akapachanxa uqaranakarux yaqhachapxiwa, ukampis uka tamanakanxa wali munataw jikxatasipxi, jupanakpura parltʼasipxi ukat amigonaksa jikxatapxaraki. Uka tamanakanwa nayrar sartañ yatiqapxaspa, Diosarus suma ukat jukʼamp luqtapxarakispa. Jupanakatxa waljaniw Diosatak sapür irnaqtʼasipkaraki. Yaqhipasti anqäx markanakaruw sarapxi uqar masinakapar yanaptʼañataki, ukhamat Jehová Diosar uñtʼapxañapataki. Ukat yaqhipasti suma yatichirinaka, wakichirinaka ukat irpir chuymanïxapxiwa, ukat tamansa kunayman aski luräwinak katuqapxaraki.

Estados Unidos markanxa 100 jila tamanakaw utjxi ukat 80 gruponaka. Brasilanxa niya 300 tamanakaw utjxi ukat 400 jila gruponaka. Mexiconxa niya 300 tamanaka ukat Rusia markansti 30 tamanaka ukat 113 gruponakaraki. * Taqi ukanakaw kunjamsa Uraqpachan jilxattaski uk uñachtʼayistu.

Janiw tamanakak utjkiti, jan ukasti pä uru jachʼa tantachäwinakasa ukat kimsa uru jachʼa tantachäwinaksa wakichasirakiwa. Pasïr marax 120 jila tantachäwinakaw Uraqpachan apasïna. Uka jachʼa tantachäwinakanwa uqar jilat kullakanakax mayni jilat kullakanakampi chika Diosan markapankatapsa, ukhamaraki tiempoparu Diosan markapan suma yatichäwinak katuqapxatapsa amuyapxaraki.

Leonard sat uqar jilatax 25 jila maranakaw bautisatäxi, jupax akham siwa: “Jehová Diosax chiqpach Diosätap yatkchïyatsa, kunatsa Jupax tʼaqhisiñanak ukhamaki uñji uk janiw qhanpach amuykayäti. Chiqansa ukaw Dios contra colerayitäna. Ukampis amparamp parlirinakataki kimsüru jachʼa tantachäwinwa mä arstʼäwin uka tuqit qhanañchasïna ukanwa sum amuyxta. Uka arstʼäwix tukuyxäna ukhaxa, warmijax chhallmitatitänwa ukat kusisitaw akham sas jisktʼitäna: ‘¿Uka qhanañchtʼäwix amuytʼayawayxtamti?’ sasa. Ukhapuniw jïsa sasin sayätxa. Jehová Diosarux munasipuntwa, ukampis kunatsa jan walinakxa ukhamak uñjpacha uk janiw amuykayätti. Jichhax uka tuqit amuyxtwa. ¡Walikpun Jupat jan jithiqtkchiyätti!” sasa.

Taqi chuymaw yuspärapxi

Uqaranakax Jehová Diosat chiqa yatichäwinak yatiqasaxa, ¿kunjam Diosätapsa yatiqapxi? Jupax wali munasirïtapa, khuyaptʼayasirïtapa, taqi kunsa chiqaparjam uñjirïtapwa yatiqapxi.

Kunayman markanakanwa Jehová Diosan uqar Qhanañchirinakapax Diosan ajanupsa uñjapkaspa ukhamäpxi ukat jukʼamp qhanpach uñjasipkakiniwa. Jehová Diosax jachʼa munasiñapänwa jupanakarux ‘sum uñtani’ (Núm. 6:25). Jehová Diosar uñtʼawayapxatapatxa wali kusisitapuniw jikxatasipxi.

[Qhanañchäwi]

[24, 25 jananakan fotonakapa]

Uraqpachanxa, uqaranakataki uttʼayat tamanakax 1.100 jilaw utjxi

[26 janan fotonakapa]

Jehová Diosaw uqaranakarux sum uñtani