Diosan yatichäwipax janiw akapachan yatichäwinakapjamäkiti

“Taqi kunatix nayan utjkitu ukanaksti chhaqatäkaspas ukhamwa amuyta, Cristo Tatituxar uñtʼañax mä jachʼa askïtap layku.” (FILI. 3:8.)

1, 2. ¿Kun lurañsa yaqhip cristianonakax amtawayapxi, ukat kunatsa?

 JISKʼATPACHAW Robertox suma yatiqirïnxa. Kimsaqallqu maranïkana ukhaw mä yatichiripax utapar sarasin akham satayna: ‘Jumax taqi kuntï munkta uk jikxatasmawa ukat doctoräsm ukhax walpun kusisirïstxa’ sasa. Ukat qʼaxu waynaxän ukhax suma notanakanipunïnwa, markapan utjkäna uka suma jachʼa yatiqañ utanakarus sarasapänwa. Ukampis mayninakatakix ukar sarañax wali wakiskirïkchïnsa, jupax janiw ukar sarañ munkänti, kunattix precursor regularäñ wal munäna.

² Robertjamaxa, waljaniw wayn tawaqutsa jan ukax jilïr jilat kullakatsa akapachan nayrar sartapxasapäna, ukampis Diosar jukʼampi luqtañ laykuw taqi ukanak aptʼawayapxi (1 Cor. 7:29-31). ¿Kunatsa uka cristianonakax Diosat jukʼamp yatiyañatakix chʼamachasipxpacha? Kuna laykutix Jehová Diosaruw wal munasipxi, ukatxa Jupan yatichäwipax janiw akapachan yatichäwinakapjamäkiti, ukwa amuyapxaraki. Jumatï chiqa yatichäwinak jan yatiqkasamän ukhaxa, ¿kunjamakis jikxatasisamäna uk jisktʼasirïtati? Diosampi yatichayasisax kuna askinaksa jikxattan ukwa jichhax mä qhawqha amuytʼañäni. Ukhamatwa suma yatiyäwinakxa wali askirjam uñjañäni ukat taqi chuymarakiw yaqhanakar yatiyañäni.

Jehová Diosamp yatichatäñax wali askipuniwa

3. Jehová Diosaw pantjasir jaqinakar yatichañ muni sasaxa, ¿kunatsa sissna?

³ Wali munasiñapatwa Jehová Diosax pantjasir jaqinakar yatichañ muni. Ukat alaxpachar sarañatak ajllitäpki ukanakat parlkasaxa, Isaías 54:13 qillqatan jikxataski uka profeciarjamax akham siwa: “Wawanakamarux nayaw yatichä; taqi jupanakatakisti jachʼa aski sumankañaw utjani” sasa. Uka arunakaxa, ‘yaqha ovejanakjam’ uñtʼatäpki ukanakatakis askirakiwa (Juan 10:16). ¿Kunjamatsa uk yattanxa? Kuna profeciatï jichhürunakatak qillqatäkäna ukax phuqasiskiwa, ukatwa ukham sissnaxa. Isaiasax mä unañchäwinwa walja jaqinakar taqi markanakat Diosar yupaychañatak jutaskiri uñjatayna. Ukat uka profeciarjamax maynit maynikamaw akham sasipxäna: “[Jehová] Tatitun qullupar makhatapxañäni, Jacobun Diosapan temploparu, jupax jiwasar sarnaqäwinakap yatichañapataki, ukat uka thakipanjam sarañasataki” sasa (Isa. 2:1-3). Ukhamawa, Jehová Diosampi yatichatäpxañapänwa. ¡Ukax wali askipuniwa!

4. Jehová Diosampi yatichayasiñatakixa, ¿kunsa lurañasa?

 ⁴ Jehová Diosan yatichäwip katuqañatakixa, ¿kun lurañas wakisispa? Taqi kuntï maykistu uk phuqañasawa ukat yatichayasiñasarakiwa, ukaw wali wakiskirixa. Salmonak qillqir Davitax akham sänwa: “Tatitux askiwa, chiqaparakiwa, [...] jupaw llampʼu chuymaninakarux chiqa thakin irpi” sasa (Sal. 25:8, 9). Ukat Jesusax akham sarakïnwa: “Yupaychsmaw Awkiy, alaxpachansa ukhamarak akapachansa Tatitupa. Jumax akanakx wali yatiñaninakatsa ukhamaraki amuytʼaninakampitsa imanttawa, ukatsti jukʼa yatiñan jaqinakaruw uñachtʼaytaxa” sasa (Luc. 10:21). Diosaw munasiñapanxa “altʼat chuymani[nakar]” yanaptʼi, uk yatiñaw Jupar munasiñasatak wiytistu (1 Ped. 5:5 MT).

5. ¿Kuna tuqnamsa Diosar uñtʼsna?

⁵ ¿Jiwasan chʼamachasitasatti yatiñanïtasatcha chiqa yatichäw yatiqawaytanxa? Janiwa. Janipuniw jiwas pachpax Diosar uñtʼkasänti. Jesusax akham sänwa: “Janiw khitis nayaru jutkaspati, janitix khitankitu uka Awkix apankaspa ukaxa” sasa (Juan 6:44). Ukhamawa, Jehová Diosaw ‘taqi markanakan suma munkañanakap’ apani, mä arunxa, llampʼu chuyman jaqinakar irpani, ukxa suma yatiyäwinak yatiyañ tuqi ukat qullan ajayup tuqiw uk luri (Ageo 2:7, NM). Jehová Diosaw Yuqapar arkañasatak irpanistu, ¿uk walpunxay yuspärtanxa? (Jeremías 9:23, 24 liytʼasiñapawa.)

Sum sarnaqañatakiw yanaptʼistu

6. ¿Jehová Diosan ‘yatiñapa’ jikxatasax kunjamäxapxis jaqinakaxa?

⁶ Isaías profetax mä uñachtʼäwimpiw kunjamsa jichhürunakan jan wali lurir jaqinakax suma jaqir tukusipki uk amuytʼayistu. Nayrax ñanqha lurirïpxäna ukanakax janiw ukhamäxapxiti (Isaías 11:6-9 liytʼasiñapawa). Ukat khitinakatï yaqha kasta janchinïtapata, mayja sarnaqäwinïtapata ukat yaqha markankirïtapat uñisisipxäna ukanakax wali suma mayachtʼat jakasiñwa yatiqawayapxi. ‘Espadanakapsa qhulliñ aradorus’ tukuyapkaspa ukhamäpxiwa (Isa. 2:4). ¿Kunatsa ukham lurapxpacha? Kunattix uka jaqinakax Jehová Diosan ‘yatiñapwa’ jikxatapxi ukat ukarjamarakiw sarnaqapxi. Diosan luqtirinakapax pantjasirïpkchisa, mä wawakiw mayachtʼat Uraqpachan jakasipxi. Ukat taqi markanakanwa suma yatiyäwinakax suma chuyman jaqinakar kusisiyi ukat ukham yatiyasitapatwa wali askinak jikxatasiwayi, ukaw kunja wakiskiris Diosampi yatichayasiñax uk uñachtʼayistu (Mat. 11:19).

7, 8. 1) “Kunanakatix chʼamanïki” ukanakwa Diosan yatichäwinakapax tukji, ¿ukanakax kunanakäpxisa? 2) Jehová Diosan yatichäwipax Jupar jachʼañchañatakiw wiytistu, ¿kunas uk uñachtʼayistu?

⁷ Diosan luqtirinakapax yatiyir sarasax ñanqha ajayunakampis nuwasir sarksna ukhamawa, sasaw apóstol Pablox amuytʼayäna. Ukat akham sasaw qillqäna: “Nanakan nuwasiñanakaxatakix janiw akapach armanakati uskutäkixa, jan ukasti nanakan armanakaxax pachpa Diosan chʼamapawa, kunanakatix chʼamanïki ukanakar tukjañataki. Ukhampï nanakax tʼunjapxtxa Dios contra jan wali parlanak utjatapxa, ukhamarak Diosan arunakapax jan uñtʼatäñapataki jarkʼkis uka arunakarusa” sasa (2 Cor. 10:4, 5). “Kunanakatix chʼamanïki” ukanakwa Diosan yatichäwipax tukji, ¿ukanakax kunanakäpxisa? Mä qhawqhax akanakäspawa: kʼari yatichäwinaka, watiw sapki ukanaka ukat jaqinakan amuyunakaparjam yatichäwinaka (Col. 2:8). Jehová Diosan yatichäwinakapax jan wali luräwinak jaytapxañapataki ukat cristianjam sarnaqapxañapatakiw jaqinakar yanaptʼi (1 Cor. 6:9-11). Ukatxa, familian kusisit jakasiñatakisa mä suytʼäwinïñatakisa yanaptʼarakiwa. Uka yatichäwinakaw jichhürunakan wakisi.

⁸ Jehová Diosan yanaptʼapampixa, jaqinakax sum sarnaqañwa yatiqapxaspa, kunjamatï aka sarnaqäwix uñachtʼaykistu ukhama (Heb. 13:18). India markanxa, mä mamaw Bibliat yatiqañ qalltatayna ukat tiempompix janïr bautisaskasinwa yatiyir mistxäna. Mä uruxa, Tantachasiñ Uta lurañ yanaptʼaniwayasaw utapar kuttʼaskäna ukhaw kawkhantï autonakax sayapki uka chiqan qurit lurat mä cadena jikxatatayna. Jupax pisins jakaschïnxa, mä irpir chuyman jilatampiw uka cadena polician ukar apatayna  dueñopar kuttʼayapxañapataki. Uk uñjasaxa policiax wal muspharäna, kunattix uka cadenan valorapax 800 dolaränwa. Ukat qhipatxa, yaqha policiaw juparux akham sas jisktʼäna: “¿Kunatsa uka caden kuttʼayta?” sasa. Ukat akham sänwa: “Bibliat yatiqasaw uk lurañ yatiqta. Jichhax sum sarnaqxta” sasa. Uk istʼasax akhamwa policiax irpir chuymanir säna: “Aka markanxa, 38 millón jaqinakaw utji. Jumatï tunkaniruki kunjamäkiti aka mamax ukham tukuyasma ukax wali khusapunispawa” sasa. Uraqpachanxa, Jehová Diosan yatichäwipax waranqa waranq jaqinakan jakäwinakapwa sumaptayi. Ukatwa Jehová Diosar jachʼañchañasa.

9. ¿Kunatsa jaqinakax sum sarnaqxapxaspa?

⁹ Diosan Arupax jaqinakan jakäwip sumaptayañatak chʼamanïtapata ukhamarak Jehová Diosax qullan ajayupa tuqnam yanaptʼatapatwa jaqinakax sum sarnaqxapxaraki (Rom. 12:2; Gál. 5:22, 23). Colosenses 3:10 qillqatax akham sasaw iwxtʼistu: “Machaqat isthapi[sipxam], uka machaqar tukuñasti sapürunjamarakiw jukʼamp machaqar tukus saraski Diosan munañaparjama, uka Diosarakiw uka machaqar tukuñxa luri” sasa. Jaqix kunjam chuymanis ukxa Diosan Arupaw qhanstayi, ukhamatwa jan wali lupʼïwinakapsa chuyman jan wali amtanakapsa jaytxañapatak yanaptʼi (Hebreos 4:12 liytʼasiñapawa). Maynixa, Biblian chiqa yatichäwinakap yatxatasawa ukat ukarjam sarnaqañatak chʼamachasisawa Diosampix sum apasispa ukat wiñay jakañ suytʼäwinirakïspa.

Diosaw jutïr urunakatak wakichtʼasiñ yanaptʼistu

10. 1) Jehová Diosakiw jutïr urunakatak sum wakichtʼasiñ yanaptʼistaspa sasaxa, ¿kunatsa sissna? 2) ¿Akat mä jukʼarux kunanakas Uraqpachan pasani?

¹⁰ Jehová Diosakiw jutïr urunakatak sum wakichtʼasiñ yanaptʼistaspa, kunattix jupaw kunas jutïrin pasani uk sum yati. Chiqansa, kunanakas jutïr urunakan jaqinakar pasani uk Jupakiw yati (Isa. 46:9, 10). “Jakʼankiwa Tatitun khä jachʼa urupaxa” sasaw Bibliax qhanañchistu (Sof. 1:14). Ukat uka uruw Proverbios 11:4 qillqatan jikxataski uka arunakax phuqasini, ukanx akham siwa: “Taripäwi urun qamir kankañax maynirux janiw yanapkaniti, ukampis chiqa kankañaxa jiwañatwa qhispiyani”. Jehová Diosax Supayan aka ñanqha pachapar tʼunjani ukhaxa, Jupampi askit uñjatäñaw taqi kunat sipansa jukʼampi wakiskirïnixa. Qullqix inamayäniwa, kunjamatï Ezequiel 7:19 qillqatan siskixa: “Qullqinakapsa callenakaruw willtapxani, qurinakapsa qʼañu tʼunanakäkaspas ukhamwa wartapxarakini”. Ukanak yatiñaw jichhatpach suma amuyumpi sarnaqañ yanaptʼistani.

11. ¿Jehová Diosan yatichäwipax kunjamsa Jupan taripäwi urupatak wakichtʼasiñ yanaptʼistu?

¹¹ Jehová Diosan yatichäwipawa, kunanakas nayrankañapa uk amuytʼasiñ yanaptʼistu, ukhamat Diosan taripäw urupatak wakichtʼatäñasataki. Apóstol Pablox akham sasaw Timoteor qillqatayna: “Aka uraqinkir qamirinakarux sañamawa: “Jan jachʼa jachʼa tukupxamti” sasa, janiraki qamir kankañaparus alkatasipxpati, ukanakasti tukusirikiwa. Ukat sipanxa jakkiri Diosaru  katuyasipxpan” sasa. Janis qamirïkstan Diosan amuytʼayat uka iwxtʼax wali wakiskiriw jiwasatakixa. ¿Kunatsa? Akapachan qamiripstañataki chʼamachasiñat sipansa, ‘sum sarnaqañasataki’ ukat ‘aski luräwinakan qamirkipstañatakiw’ chʼamachasiñasa sasaw iwxtʼistu. Jiwasatakitï Jehová Diosar luqtañax nayrankanixa, jutïrinx ‘suma saytʼatäñäniwa’ (1 Tim. 6:17-19). Ukham lurañatak chʼamachasitasax suma amuytʼasirïtaswa uñachtʼayi, kunjamatï Jesusax siskänxa, “¿kuna askirak jaqitakisti aka uraqpacha jupankxaspa, ukat almap chhaqayasispa ukasti?” (Mat. 16:26, 27). Jehová Diosan taripäw urupa jakʼankxatap yatisax akham sasaw sapa mayni jisktʼasiñasa: “¿Kawkinsa suma yänak imasisktxa? ¿Diosan sirviripatti jan ukax qullqin sirviripatcha?” sasa (Mat. 6:19, 20, 24).

12. Jaqinakax yatiyäwisar jan askirjam uñjapxani ukhaxa, ¿kunatsa yatiyaskakiñasa?

¹² Kuna ‘aski luräwinaktix’ cristianonakjam lurañasäki ukanakatxa, mayax akäspawa: Diosan Apnaqäwipat yatiyaña ukat Jesusan arkirip tukuyaña (Mat. 24:14; 28:19, 20). Ukampisa, kunjamäkäntix nayra tiemponx ukhamarakiw yaqhipanakax yatiyäwisarux janis askïkaspa ukham uñjapxi (1 Corintios 1:18-21). Ukampis janiw suma yatiyäwinakax janis askïkaspa ukat janis wakiskirïkaspa ukham sañ munkiti, jan ukasti tiempo utjkipan yatiyaskakiñasawa (Rom. 10:13, 14). Ukat Jehová Diosan yatichäwip yatiqapxañapatak jaqinakar yanaptʼaskakiñäni ukhaxa, walja bendicionanakwa katuqarakiñäni.

¿Kun lurasas bendicionanak katuqsna?

13. ¿Kunsa Pablox suma yatiyäwinak yatiyañ laykux luratayna?

¹³ Apóstol Pablox waynitutpachaw akapachan judionak taypin nayrar sartañapatak suma yatichäwinak katuqäna. Tarso markata, kawkhantï jupax yuriwaykäna, ukhat Jerusalén markar sarxäna ukhaxa, janiw 13 maranïkpachänsa, ukanwa Ley yatichiri Gamaliel sat wali uñtʼat chachax jupar yatichäna (Hech. 22:3). Pablox marka masinakapatxa taqi kunans nayrankänwa, jupatï jukʼamp yatxataskakisapäna ukhaxa, judionakan religionapanxa wali aytat jaqïsapänwa (Gál. 1:13, 14). Ukampis kunapachatï suma yatiyäwinakar iyaw säna ukat yatiyañ qalltawayäna ukhaxa, taqi ukanakwa jaytawayäna. ¿Kuntï jaytawaykäna ukanakat amtaspachänti? Janiwa. Jan ukasti akham sasaw qillqatayna: “Taqi kunatix nayan utjkitu ukanaksti chhaqatäkaspas ukhamwa amuyta, Cristo Tatituxar uñtʼañax mä jachʼa askïtap layku. Cristo laykuw taqi kunsa apanukta. Taqi kunsa mä jan kunatak servir tʼunäkaspas ukhamwa uñjta” sasa (Fili. 3:8).

14, 15. ‘Diosan yanapirinakapaxa’, ¿kuna bendicionanaksa katuqtanxa?

¹⁴ Jichhürunakanxa, Pabljamarakiw cristianonakax  suma yatiyäwinak yatiyañ laykux taqi kuntï jiwasatak jikxatañ munkayätan uk jaytawaytanxa (Mar. 10:29, 30). Ukampis ¿uk luratasatti kunatï jakañatak wakiski ukanakax jan utjpachïstu? Qalltan parlkayatän uka Roberto jilatax kamsisa uk uñjañäni, jupan arunakapaw kunjamsa walja jilat kullakanakax jikxatasipxi uk amuytʼayistu. Jupax akham siwa: “Janipuniw ukham luratajat amtaskti. Diosatak sapüru irnaqtʼañax wali kusiskañapuniwa ukat wali askinakwa jikxatarakta. Kunja ‘munasiris’ Jehová Diosax uk amuyañwa yanaptʼitu. Diosar jukʼampi luqtañatak kunanaktï aptʼawayktxa ukat sipansa jukʼampwa Jupax bendicitu. Ukat qhipatxa janis kuns aptʼawaykirista ukhamwa amuyasta, kunattix jukʼamp bendicionanakwa katuqawayta” sasa (Sal. 34:8; Pro. 10:22).

¹⁵ Jumatï ukham yatiyiri ukat yatichir saraskstaxa, kunja munasiris Jehová Diosax uk amuyarakpachätawa. ¿Suma yatiyäwinak yatiykasax mä kutis Diosan qullan ajayupamp yanaptʼat amuyasirïtati? ¿Kunapachatï Jehová Diosax suma yatiyäwinak istʼapxañapatak jaqinakan chuymanakap jistʼari ukhaxa, kunja kusisitas jikxatasipxi uk amuyirïtati? (Hech. 16:14.) Diosar jukʼamp luqtañatakix kun inas jarkʼtchiyätam uk atipjañxa, ¿Jupax yanaptʼawaytamti? ¿Jan waltʼäwinakan uñjaskasas Diosan yanaptʼap amuyirïtati? ¿Ukat wali aynachtʼatjam amuyasiyäta ukhax nayrar sartaskakiñatak chʼamap katuqtati? (Fili. 4:13, NM.) Yatiyir sarkasax Diosan yanaptʼat amuyastan ukhaxa, Jupas jiwasamp chikäskaspa ukham amuytanxa ukat jukʼampwa Jupar jakʼachastanxa (Isa. 41:10). Chiqpachansa, Biblian wali wakiskir yatichäwinakap yatichañatak ‘Diosan yanapirïpañax’ mä bendicionapuniwa (1 Cor. 3:9, MT).

16. ¿Jehová Diosan yatichäwip yatichañ laykux taqi kunanaktï aptʼasiwaykta ukanakat jumax kamsasmasa?

¹⁶ Walja jaqinakaw jupat amtasipxañapatakix kuns lurañ munapxi. Ukampis kunjamatï yatktanxa, uka luräwinakapax wali muspharkañäkchisa tiempompix janiw khitis amtxiti. Ukampis Jehová Diosax kuntï juchhürunakan Jupan sutip jachʼañchañatak luraski ukxa, janipuniw armatäkaniti (Pro. 10:7; Heb. 6:10). Ukhamasti, Jehová Diosat yaqhanakar yatichañxa, wali askirjam uñjapxañäni, uka luräwix janipuniw armatäkaniti.

¿Kamsasmasa?

• Jehová Diosamp yatichayasiñatakixa, ¿kunsa lurañasa?

• Diosan yatichäwipax sum sarnaqañatakiw yanaptʼistu, ¿kunjamatsa uk yattanxa?

• Jehová Diosan yatichäwinakap yaqhanakar yatichasaxa, ¿kuna bendicionanaksa katuqtanxa?

[Jisktʼanaka]

[23 janan fotopa]

Khitinakatï Jehová Diosamp yatichatäpki ukanakax mä wawakïpkaspas ukhamwa Uraqpachan jakasipxi

[24 janan fotopa]

‘Diosan yanapiripäñax’ mä suma bendicionapuniwa