¿Kawkïr yupaychäwirutï sarañajäki uk nayat ajlliñajaxa awk taykajacha?

POLONIA markankir yaqhip jaqinakax akham sasaw Jehová Diosan Qhanañchirinakapar sapxi: “Aka religionanwa naciwaytxa janiw yaqhar sarkiristti akan jiwä” sasa. Ukham sasaxa, wawanakapas allchhinakapas pachpa yupaychäwirukis sarapxañapäkaspa ukham amuyapxi. Kawkhantï jumax jakaskta ukan inas ukham sapxarakchi. Ukham amuyapxi ukhaxa, ¿kunas kamachi? Uka yupaychäwirukis sarapxañapäkaspa ukham amuyapxi. ¿Jehová Diosan Qhanañchirinakapax awk taykapat jan ukax achachil awichapat Biblian chiqa yatichäwinak yatiqasax ukham amuyapxarakispati?

Timoteorux janiw ukham paskänti. Jupax Qullan Qillqatanakat “wawatpach[say]” uñtʼkchïnxa, awichapan ukat taykapan yanaptʼataw kuntï istʼkäna ukar iyaw säna ukat chiqpach Diosarus munasxarakïna. Ukat jupax mamapampi awichapampi chikaw Criston arkirinakapax chiqa yupaychäwinkapxatap amuyxäna. Kuntï Cristot istʼkäna ukarux ‘iyawsarakïnwa’ (2 Tim. 1:5; 3:14, 15). Jichhürunakanxa, awk taykax wawanakapar Jehová Diosar luqtapxañapatak kunaymanits yanaptʼapkchixa, wawanakaw Diosar luqtañx amtxapxañapa (Mar. 8:34).

Chiqpach yupaychäwit janicha uk yatiñatakixa, sum yatxatañasawa. Ukhamatwa iyawsäwisax chʼullqhïni, Jehová Diosarus munasiñat luqtañäni ukat janirakiw kunäkipans Jupat jithiqtkañäniti (Efe. 3:17; Col. 2:6, 7).

¿Wawanakax kuns lurapxañapa?

“Jehová Diosan Qhanañchirinakapax chiq yatichapxatap yatkchïyätsa nätakix Biblian yatichäwinakaparjam sarnaqañax chʼamänwa” siw Albertoxa, * jupax Jehová Diosar luqtir familianwa jilsuwayatayna. Wayn tawaqu, ¿jumax ukhamarakt amuyta? Ukhamächixa, Jehová Diosax kunjam jakasiñams muni uk yatxatañatakiw chʼamachasiñama. Ukhamatwa Diosan munañap lurañax jan chʼamäkaniti (Sal. 40:8). Albertox akham siwa: “Mä uruxa, Diosar mayisiñatakiw nä pachpa amtta. Qalltan chʼamänwa, ukampis mun jan munaw mayistxa. Ukat mä qhawqha tiempotxa ak amuyasiyäta, jukʼamp sum lurañatak chʼamächasirist ukhaxa, Diosax askirjamaw uk uñjaspa. Ukaw jakäwijan taki kun sum lurañatak yanaptʼitu” sasa. Jehová Diosamp sum apasiñatakitï chʼamachasïtaxa, kuntï Jupax mayktam uk lurañ wal munäta (Sal. 25:14; Sant. 4:8).

Amuytʼañäni, inas pelot anattʼsta. Ukampis kunjamsa anattʼasiñapa uk jan yatkasma ukat janirak sum anatkasmati ukhaxa, ¿janixay kusisit anatkasmatixa? Ukampis kunjams anattʼasiñapa uk yatxatasin suma anattʼirïxasma ukhaxa, wali kusisitaw anattʼasma, ukat anattʼañatak tiemps  apstʼasirakismawa. Jehová Diosar luqtañax ukhamarakiwa. Kusisit luqtañatakixa, ¿kuns lurasma? Tantachäwinakatakix sum wakichtʼasiñama ukat ukans arstʼañamarakiwa. Ukhamatwa wayn tawaqükasinsa mayninakar chʼamañchtʼasmaxa (Heb. 10:24, 25).

Diosan Arupat yatiyir sarañax ukhamarakiwa. Janiw yaqhan jariyataki yatiyir sarañasäkiti, jan ukasti munasiñatwa sarañasa. Ukatwa akham jisktʼasiñama: “¿Kunatsa Diosat jaqinakar parlañ muntxa? ¿Kunanakatsa Diosar munastxa?” sasa. Jupax mä munasir Awkiwa, ukham uñjañatak chʼamachasim. Jeremías tuqnamwa Jupax akham säna: “Nayarusti thaqapxitätawa, ukatsti jikxatapxarakitätawa, taqi chuymampi nayar thaqtapxatam layku” sasa (Jer. 29:13, 14). ¿Kunjamsa uk lursna? Jakub jilataw akham sasin qhanañchtʼi: “Janiw nayrjam amuyxañajax wakisxänti. Yatinuqtataj laykukiw jiskʼatpach tantachäwinakaru ukat yatiyiris sarayätxa. Ukampis Jehová Diosaru taqi chuyma luqtañatakixa, Jupar sum uñtʼañataki ukat Jupampi sum apasiñatakirakiw chʼamachasta” sasa.

Kusisita yatiyir sarañatakix suma amigonakanïñaw yanaptʼätamxa. “Suma yatiñan jaqinakamp chika sarnaqirixa, suma yatiñanirakïniwa”, sasaw Bibliax qhanañchi (Pro. 13:20). Jehová Diosar jukʼamp luqtir munirinakampi chika sarnaqañatak chʼamachasim. Yola sat mä kullakax akham sänwa: “Diosar luqtir walja wayn tawaqunak taypinkañaw wal chʼamañchtʼitu, ukhamatwa jan qhipaqtas yatiyir sarxta ukat yatiyasax wal kusisiraktxa” sasa.

¿Awk taykanakax kuns lurapxañapa?

Yolax akham siwa: “Jehová Diosar luqtañ yatichapxatapatx walpun awk taykajar yuspärtxa” sasa. Ukhamawa, awk taykapar uñjasaw wawanakax kuns lurañ amtapxi. Ukatwa Pablox akham qillqatayna: ‘Jumanakax, awk taykanaka, wawanakamarux [...] Jehová Diosan yatichañapana ukatsti amuyu chiqachañapan uywasipkakim’ sasa (Efe. 6:4, NM). Awk taykanakax wawanakapar janiw amtaparjamak uywapxañapäkiti, jan ukasti kunjämti Diosax siski ukarjamaw uywapxañapa, ukwa Biblian uka iwxtʼapax qhan amuytʼayistu. Ukhamasti awk taykax janiw kuntï munapki ukaruk wiytapxañapäkiti, jan ukasti Jehová Diosan amtanakaparjam sarnaqapxañapatakiw yanaptʼapxañapa.

Awk taykanaka, Jehová Diosan yatichäwinakapwa wawanakamar yatichapxañama, kunjamtï Bibliax judío awk taykanakarux iwxtʼkäna ukhama: “Wawanakamaruw yaticharakïta; utamankkasina, thakinjam sarkasina, ukhamarakiw parlarakïta ikintañataki, sartañatakisa” sasa (Deu. 6:6, 7). Ryszard ukat Ewa, kimsa yuqan awk taykax akham sasaw arstʼapxi: “Utanxa, kunjamanakatsa Diosar jukʼamp luqtapxiristxa ukanakatpun parlakipapxirïta”. Ukham lurasax ¿kuna askinaksa jikxatawayapxi? Jupanakax akham sapxiwa: “Jiskʼäsipkan ukhaw Yatiyañataki Diosan Yatichäwipa sat tantachäwin arstʼañataki qillqtʼayasipxäna ukat yatiyiriw mistxapxäna, ukat tiempompix bautisasiñ amtxapxarakïna. Qhipatsti Diosatak sapür irnaqtʼañwa qalltawayxapxaraki” sasa.

 Awk taykan sarnaqäwinakapaw askïñapa. Ryszard jilatax saskakiwa: “Janipuniw jamasat jan walinak lurkañäniti sasaw warmijampix amtapxta ukhamat tamansa utans sum sarnaqasiñataki” sasa. Awk taykanaka akham jisktʼasipxañamawa: “Wawanakajaxa, ¿kunsa nayat yatiqasisipki? Kunapachatï Jehová Diosar mayisktxa, kunürutï Bibliat sapak yatxatañataki amtawayktxa uk phuqaskti, ukat kunjam chuymampis yatiyirir sarañarusa anattʼañarus ukat qullqirus uñjasktxa ukhamarak jilat kullakanakat kuns parlasktxa, taqi ukanakanxa, ¿Jehová Diosar munatajti amuyapxitu?” sasa (Luc. 6:40). Amtapxapunim wawanakamax sapüruw arsutamarjamat sarnaqaskt janicha uk amuyapxi.

Wawanakar chiqañchañax wali wakiskirirakiwa. Diosan Arupax aka suma iwxtʼaniwa: “Wawaruxa suma sarnaqañapatakixa jiskʼatpach sum yaticham” sasa (Pro. 22:6). Ryszard jilatamp Ewa kullakampix ukham lurapxirïna: “Bibliat sapa mayni wawanakajampi yatxatañatakiw tiempo apstʼasipxirïta” sasaw sapxi. Ukhamarjamat lurapxani janich ukxa sapa awk taykaw amtxañapa, ukampis sapa wawatwa llakipxañapa. Awk taykax janiw sinti waytʼiripxañapäkiti, jan ukasti amuytʼayirïpxañapawa. Amuytʼañataki, uka musicanakax janiw ischʼukiñäkiti sañat sipansa jupa pachpa amuytʼasiñapatakiw Bibliarjam yatichapxañama.

Wawanakajax kunjamtï nayax sarnaqapxañap munkta ukarjamaw sarnaqasipki ukat taqi kuns walirak lurasipki, sasin inas amuysta. Ukampis chuymapar purtʼañatakiw chʼamachasiñama. Ak amtañamawa: “Imantata amtäwi arunakax jaqin chuymapanxa walja umar uñtatawa, ukampis khititï chʼikhi jaqïki ukaxa, yatiwa kunjam jikxatañsa” (Pro. 20:5). Ukatakix amuyirïñamawa, wawaman kuna jan wali amuyunakatix utjki uk amuyañamawa ukat jankʼakirakiw chiqañchañama. Janiw jankʼak juchañchañamäkiti jan ukasti “jumat wal llakisiptxa” sañamawa, ukat wali amuyumpiw jisktʼañama. Ukat parlapkät ukhax janirakiw sinti jiskhiñamäkiti. Jupanakat llakisipxatam amuyasaw wawanakamax chuym chʼallxtayasipxani, ukhamat jupanakar yanaptʼañax jan chʼamäkaniti.

¿Tamankirinakax kuns lurapxañapa?

Biblian chiqa yatichäwipa, wiñay jakañ suytʼäwi ukat Jehová Diosan Qhanañchiripäñwa  wayn tawaqunakax katuqawayapxi, ¿tamankir jilat kullakanakax uka aski churäwinak wali askirjam uñjapxañapatak yanaptʼapxaspati? Chiqas awk taykaw wawanakapar yatichapxañapa, ukampis tamankir jilat kullakanakax yanaptʼapxaspawa, irpir chuyman jilatanakaw jukʼamp yanaptʼapxaspa. Khitinakatï awkipaki jan ukax taykapak Jehová Diosan Qhanañchiripäpxi uka wayn tawaqunakaruw jukʼamp yanaptʼañax wakisi.

Wayn tawaqunakax Jehová Diosar jukʼamp munasipxañapatak ukat tamansa askit uñjatäpxatap amuyapxañapatakixa, ¿kunsa irpir chuymaninakax lurapxaspa? Mariox irpir chuymanjamaw Polonia markan irnaqtʼaski, jupax akham siwa: “Irpir chuymaninakax wayn tawaqunakampix parltʼapxañasapuniwa. Janiw jan waltʼawin jikxatasipki ukhakix parltʼañasäkiti, jan ukasti tiempo utjki ukhax parltʼañasapuniwa. Jupanakampix yatiyir sarktan ukat tantachäw tukuyatatwa parltʼsnaxa ukat jiwasampi chika juntʼüma umtʼasiñatakis jawstʼaraksnawa” sasa. ¿Kunjamakis tamam jikxatasta?, sasin jisktʼarakismawa. Chuymatpach parltʼañaw tamar jakʼachasiñ yanaptʼani ukat suma uñjataw jikxatasirakini.

Jumatï irpir chuymanïstaxa, tamaman taqi wayn tawaqunakar uñtʼañataki, ¿chʼamachasisktati? Albertox irpir chuymanïxchisa, qʼaxu waynäkasax kunayman jan waltʼäwinakaruw saykatäna. Jupax akham siwa: “Mä kutixa, irpir chuyman jilatanakaw nayar chʼamañchtʼañataki ukat iwxtʼañataki utar jutapxi”. Iyawsäwipan suma saytʼatäpxañapatakiw Jehová Diosar mayiñasa, ukhamatwa wayn tawaqunakat llakitas uñachtʼayaraksna (2 Tim. 1:3).

Kun lurañtï tamax amtki ukankapxañapatakiw wayn tawaqunakarux chʼamañchtʼañasa. Jan ukhamäkaspaxa, akapachan amtäwinakapampiw apayasipxaspa. Jilïr jilat kullakanaka, ¿jupanakamp chik yatiyir mistupxasmati, ukat amigopäpxasmati? Jupanakampix kunayman aski luräwinakwa wachichtʼarakisma, ukampis munasiñaw ukan utjañapa. Yolax akham sasaw amti: “Precursor mä kullakaw jakʼachasinitu ukat yanaptʼitu. Ukürupuniw taqi chuyma yatiyir sarta” sasa.

Jumaw amtxañama

Wayn tawaqu, ¿kuna amtanakanïtasa? Janitï bautisatäkstaxa, ¿bautisasiñ amttati? Jumax janiw maynin jariyatakisa ni familiajaw ukar sari sasin bautisasiñamäkiti, jan ukasti Jehová Diosar chiqpach munasitamatwa bautisasiñama.

Jehová Diosax amigomäspawa, ukat chiqa yatichäwix qurit sipans jukʼamp askirakïspawa. Diosax Isaías tuqnamwa akham säna: “Jan axsaramti, nayasktwa juman Diosamaxa” sasa. Jehová Diosat jan jithiqtkätaxa Jupax jumampïskaniwa, ukat chʼamañcharakïtamwa, ‘atipjiri amparapampiw uywaskatam’ (Isa. 41:10).

[Qhanañchäwi]

[4 janan fotopa]

Kunatï wawaman chuymapan utjki uk yatiñatak chʼamachasim

[6 janan fotopa]

Bautisasiñtï amtaskstaxa, Jehová Diosar chiqpach munasitamatwa bautisasiñama