Aka revista liytʼirinakan jisktʼäwinakapa

¿Kunsa Proverbios 24:27 jiskʼa tʼaqat yatiqsna?

Proverbios 24:27 jiskʼa tʼaqanxa akham sasaw mä waynar iwxtʼi: “Anqan negociomäki ukxa tukuyam, pampan lurañanakamäki ukxa luram, ukatwa utama lurasismaxa” sasa. ¿Uka arunakax kamsañs munpacha? Kunjamsa mä chachax janïra familianïkasax wakichasiñapa ukat kunanak lurañapasa uka tuqinakat parlaski.

Kunatsa familiani chachanakax utapankirinakataki qullqi thaqhapxañapa ukat kunjamsa familianakapar yanaptʼapxaspa, mä arunxa, kunjamsa Diosar jakʼachasiñ yanaptʼapxaspa, uka tuqinakat parli sasaw awisax uka jiskʼa tʼaqat qhanañchasiwayi. Chiqasa, chachanakax ukhamwa familianakapar yanaptʼapxañapa sasaw Biblianxa parli. Ukampis Proverbios 24:27 jiskʼa tʼaqax yaqha tuqitsa amuytʼayañ munkistaspa ukhamawa. ¿Kunatsa ukham sistanxa? Uk jichhax pä tuqit amuytʼañäni.

“Utam lurasismaxa” siski uka arunakat nayraqat amuytʼañäni. Hebreo arunxa, janiw mä chiqa uta lurañ tuqitpun parlkiti. Mä qamäwitsa jan ukax familia uttʼayañatsa parlkaspa uksar uñtataw uka arunakax jaqukipasirakispa.

Ukxarusti, kunanak lurañas nayraqat wakisispa uka tuqinakatwa amuytʼayarakistu. “Nayraqat ak luram, ukat uk lurarakïta” siskistaspas ukhamawa. Ukampis ¿qullqi thaqhañataki irnaqañaw Diosar yupaychañat sipansa nayrankañapa sañti munpacha? Janiwa.

Bibliax qillqaskäna uka urunakanxa, mä jaqix utapa utachañ munasaxa, mä arunxa, mä familia uttʼayañ munasaxa, akham sasaw jisktʼasiñapäna: “¿Mä warmir sum uywañataki wakichatätti? Ukat wawanak utjaspa ukhaxa, ¿sumti wawanak uywiristxa?” sasa. Janïr jaqichaskasaw yapunakapan irnaqañapäna. Ukatwa yaqha Biblianxa uka jiskʼa tʼaqax akham sasin jaqukipata: “Janïr uta lurkasaxa, yapunakam nayraqat sum uñjañamawa ukat lurañanakamas suma phuqatäñaparakiwa” sasa (La Palabra de Dios para Todos). ¿Uka arunakax askikïskiti?

Jïsa, jiwasatakix wali askiwa. Jaqichasiñ munir mä chachaxa, kunanak lurañapatï wakiskani ukanakamp phuqañatakix wakichtʼatäñapawa. Irnaqirjamäsax irnaqañapapuniwa. Ukatxa familiar taqi tuqit sum uñjañaw wakisirakini. Kunjamtï Diosan Arupax siskixa, kunjamas jikxatasipxi, qullqix utjaskit janicha ukat Diosampix kunjamas apasisipki uka tuqinakatwa mä chachax familiapar sum uñjañapa. Jan ukanakampi phuqir jaqix Diosar jan iyawsirit sipansa jukʼamp jan askiwa sasaw Bibliax qhanañchi (1 Tim. 5:8). Ukhamasti, jaqichasiñ munir mä jaqix akham jisktʼasiñapawa: “¿Mä familiar sumti uñjiristxa? ¿Kuntï familia pʼiqtʼirjamax lurañäki ukanak phuqiristti? ¿Familiajar Bibliat jan qhiparasa sum yatichiristti?” sasa. Ukanak phuqañax wali wakiskiripuniw sasaw Bibliax amtayistu (Deu. 6:6-8; Efe. 6:4).

Ukhamasti, jaqichasiñ munir chachaxa, kuntï Proverbios 24:27 jiskʼa tʼaqax siski ukarjamaw wal amuytʼasiñapa. Maysa tuqitsti, mä warmis ukarjamaw amuytʼasiñaparaki; “¿warmjamas jan ukax taykjamas sumti phuqiristxa?” sasin jisktʼasiñapawa. Ukat wawanïñ munasas mä chacha warmix wal amuytʼasipxañaparakiwa (Luc. 14:28). Uka tuqinakat Diosan arunakaparjam sum amuytʼastan ukhaxa, wali askiw jiwasatakixa, familiansa wali kusisitaw jakassna, jan walinakatsa amuyasirakiñäniwa.

[12 janan qhanañchäwipa]

¿Jaqichasiñ munir mä waynax kuna tuqinakatsa jisktʼasiñapa?