Familiana Diosar Yupaychañasti qhispiñatakix wali wakisiriwa

¿“TAQI chʼaman Diosan jachʼa urupa[xa]” kunja axsarkañänis uk amuyasmati? (Apo. 16:14.) Wali musparkañ arunakampiw Miqueas profetax uka urut parli: “Qullunakax pampaw tukuni, kunjämatix likʼix ninar uñachtʼayatax umatatki ukhama, vallenakasti payaruw jistʼjtapxani, jalkir uman kharjatjama” sasa (Miq. 1:4). Diosar jan yupaychirinakax tʼunjatäpxaniwa. Bibliax akham siwa: “Khitinakarutix Tatitux uka urux jiwaraykani ukanakasti aka uraqinxa mä thiyat mä thiyakamaw liwirtapxani” sasa (Jer. 25:33).

Uka arunakat amuyasisaxa, awk taykanakasa, ukhamaraki khitinakatï wawanakapar sapaki uywasipki ukanakasa, akham jisktʼasipxañapawa: “¿Uka uru purinkani ukhax amuyasirïxapxi uka wawanakajax qhispipxaniti?” sasa. Jïsa, Bibliarjamax qhispipxaspawa, ukampis uka uru purinkani ukhax qhawqha maranïpxis ukarjamaw Diosamp sum apasipxañapa (Mat. 24:21).

¿Kunatsa tiempo apstʼasiñasa?

Awk taykjamaxa, wawanakamar “chiqapar yatichasina sum uywapxa[ñamatakix]” wal chʼamachasipxañamawa (Efe. 6:4). Chiqansa, wawanakamampi Bibliat yatiqañax wali wakisiriwa, Filipos markankiri cristianonakjamäpxaspa uk wal muntanxa, jupanakax taqi chuymaw Jehová Diosar luqtapxirïna. Pablox jupanakarux aka suma arunak säna: “Munat jilatanaka, kunjämtï jumanakax istʼapxapunistaxa kunapachatix jumanakampïkäyät ukkhaxa, jichhasti jukʼampi istʼapxita jayankatax layku. Jumanakan kipka qhispiyasiñanakamatsti, altʼat chuymampi axsarañampirak phuqhapxam” sasa (Fili. 2:12).

¿Juman uñjatakit wawanakamax Jehová Diosar istʼapxi? ¿Yatiqañ utanxa kunjamäpxisa? Diosan kamachinakaparjam sarnaqañax wali askïtapxa, ¿kunjamsa wawanakamar amuytʼayasma?

Diosar familjam yupaychañaxa, Diosar jukʼamp iyawsapxañapatakiw wawanakamar yanaptʼani. Ukhamax familjam sum yatxatañatakix kunas munasispa uk kimsa tuqit uñjañäni.

Sapa semanaw apasiñapa

Diosax janiw alaxpachankir wawanakapampix akatjamataki tantachaskiti, ukham Bibliax amuytʼayistu (Job 1:6). Niya ukhamarakwa lurasma. Kuna urusa, kuna horas Bibliat yatxatapxasma uk sum waktʼayañamawa, ukat ukarjam phuqapxañamawa. Ukampis jittʼayañ wakisinixa, kuna urus apasispa uk amtañamarakiwa.

Inas tiempompix Bibliat sapa semana yatxatañax janis wakisirïkaspa ukham amuyxchisma. Ak amtapunim: Niyakixay Supayax kunaymanit wawanakamar aynachtʼayañ munchixa, Bibliat yatiqirinakamat sipansa jupanakaruw jukʼamp yanaptʼañamaxa (1 Ped. 5:8). Jumanakatï Biblia yatiqañat sipansa televisión uñchʼukisipkasma jan ukax yaqhanak lurasipkasma ukhaxa, Supayan atipataw uñjasipxasma (Efe. 5:15, 16; 6:12; Fili. 1:10).

Familiatakjamaw apasiñapa

Janiw Bibliat yatiñ laykukix Diosar familjam yupaychañasäkiti; jan ukasti, kunjamsa ukarjam sum sarnaqapxasma uk amuytʼañatakïñapawa. ¿Kunjamatsa ukarjam apasma? Kuna jan walinakansa wawanakamax jutïr urunakana jan ukax jutïr semananakansa uñjasipxaspa uka tuqitwa awisax parltʼapxasma. Ukat yatiyir sarañatakis wakichtʼapxarakismawa. Amtañäni, wawanakax kun waltʼayasas wal lurañ munapxi. Ukhamax Diosat yatichir jan ukax yatiyir sarañatakiw jupanakar wakichapxasma; kunjamsa qalltapxaspa ukat  janiw sirinakarux kamsapxaspasa uka tuqinakatwa uñachtʼawinakampi yatichapxasma (2 Tim. 2:15).

Ukat masinakan jan walinakar wiytatax kunjamsa saykatapxaspa uk wawanakamar uñachtʼäwinakampi yatichapxarakisma. Ukatakix Kunsa wayn tawaqunakax yatiñ munapxi sat payïr libron 15 yatichäwipaw wal yanaptʼapxiristamxa. Uka libron 132 ukat 133 jananakanxa, “¿Jan walir wiytatax kamachasmasa?” siski uka recuadrox wali wakiskir iwxanakaniwa. Ukat yantʼatax kuns wawamax luraspa, uk amuyañapatakiw uka chiqax yanaptʼaraki. Ukat 133 janan tukuyxarux akham sarakiwa: “Kamsätas ukxa, mä familiaramampi jan ukax khitimpitï sum apasta jupamp yantʼma” sasa. Ukhamax wali askiw Diosar familjam yupaychkasax uka tuqinakat wakichasiñaxa.

Diosar jukʼamp luqtañatakix kunatsa amtanak uchasiñax wali askixa, uka tuqitwa awk taykanakax Familiana Diosar Yupaychañataki Arumanxa wawankaparux amuytʼayapxaspa. Uka tuqit parlkasax Kunsa wayn tawaqunakax yatiñ munapxi sat payïr libron 38 yatichäwinxa wali sum parlaraki, akham pʼiqiñchaniwa: “¿Jakäwijan kuns luräxa?” sasa. Jehová Diosar luqtañax kunatsa wali askixa, ukwa uka chiq uñakiptʼasax wawanakamar amuytʼayasma. Ukat precursorjama, jan ukax Betel utan irnaqapxañapatakiw chʼamanchasma, ukat Escuela de Entrenamiento Ministerial siski ukar sarañapxañapatakis Diosar sapürjam kunaymanit luqtapxañapatakis chʼamañcharakismawa.

Ukampis yaqhip awk taykanakaxa, kuntï wawanakapan jikxatañap munapki ukanak lupʼisipki, ukat kuntï niya jikxatapxi ukanakxa janiw amtapkiti. Chiqansa askiw wawanakar Betel utar sarapxañapataki, misionerjam luqtapxañapataki uchasipxañapataki chʼamachañaxa. Ukampis “phuqañamapuniw” sasin sapa kuti sataxa wawanakax colerapxaspawa ukat janiw kuntï munkta ukanak phuqañ munapkaspati (Col. 3:21). Kuna askinaksa wawanakamax jikxatawayapxi uk amuyañamawa ukat “walik ukham lurtaxa” sañamarakiwa; janiw kuntï jan lurapki ukak uñjañamäkiti. Jehová Diosar munasitap laykuw luqtapxañapaxa, janiw jumar kusisiyañ laykukiti luqtapxañapäkiti (Mat. 22:37). Taqi kuntï Diosax lurawayki ukanakar munasipxañapatakiw wawanakamar yanaptʼañama, ukat uka munasiñapaw Diosar luqtañatakix chʼamañchaskani.

Chuymar purtʼkiriw apasiñapa

Bibliat familjam yatiqañax askïñapawa, chuymar purtʼkir apasiñapawa. ¿Kunjamsa uk lurasma? Akanak lurañamawa: Diosan markapan utjki uka dramanak istʼapxasma jan ukax videonak uñjapxasma. Ukatxa taqinirakiw Biblia liytʼapxasma; ukat khiti jaqinakattï parlki uka jaqïpkaspas ukhamaw wawanakax mayn mayni liytʼapxaspa. Jan ukax sapa mayniw mä jukʼakam liytʼapxaspa.

Ukhamarakiw familjam yatxatañatakix Yatiyañataki ukat ¡Despertad! siski uka revistanakan walja yatichäwinakax utji. ¡Despertad! siski uka revistanxa 31 janapanxa “¿Qué respondería usted?” sat yatichäwiw utji. Ukat jaqinakar churañataki Yatiyañataki sat revistanxa,  “Wayn tawaqunakataki” siski uka yatichäwiw utji, ukxa sapakiw wawamax liytʼaspa; ukat “Wawanakar yatichañataki” sat yatichäwis utjarakiwa, ukax wawanakar yatichañataki waktʼäyatawa.

Wawanakamatï qʼaxu wayn tawaqüpxchi ukaxa, “Los jóvenes preguntan” sat yatichäwiw ¡Despertad! revistan misturaki, ukat Kunsa wayn tawaqunakax yatiñ munapxi sat payïr librow wal yanaptʼiristamxa. Uka libro wawamampi liytʼasaxa, “Jumasti ¿kamsasmasa?” siski uka recuadro uñakiptʼañamapuniwa, ukax sapa yatichäwi tukuyaruw uñsti, janiw yatiqatanak amtañatakïkiti jan ukasti wawamampi parltʼasiñamatakiwa.

Ukampis Bibliat familjam yatxatkasax janiw wawanakar jiskhiñamäkiti. Inas wawanakax “Amuytʼäwinakama” siski uka chiqan jan ukax yaqhawjanakana qillqtʼasipxchispa, janiw ukanak “jachʼat liytʼarapita” sañamäkiti. Uka libron 3 janapanxa, awk taykanakar akham siwa: “Wawanakamax kunatï chuymapan utjki uk aka libror qillqtʼasipxañapatakixa, ‘janiw uñxatapkäti’ sasaw amtapxañama. Ukhamarjamatï phuqapxätaxa, kuns qillqasipxi ukxa awistʼapxarakiristamwa” sasa.

Sapa semana jan jaytasa Bibliat yatxatañataki, familiatak aski ukat chuymar purtʼkir tantachäwi apañataki chʼamañchasïta ukhaxa, Jehová Diosaw yanaptʼätamxa. Jïsa, kunapachatix familjam Diosar yupaychapki ukhaxa, jukʼampwa familiax Diosar jakʼachasi.

[31 janan recuadropa]

Wawanakar jan qariyamti

“Kunanakatsa tantachäwinakan parlasini, ukanakatwa chachajampi, jiskʼa imill wawanakajampi Bibliat yatxatapxirïta, ukat ‘kunsa jichhax yatiqawayktan uk dibujtʼam’ sasaw sapxirïta. Ukat kuntï Bibliax parlki ukanak amuytʼañatakix mä dramäkaspas ukhama lurapxirïta; awisax yatiyir sarañatakiw wakichtʼasipxirïtxa. Ukat wawanakax qawqha maranipxänsa ukarjamaw panpachani wakichtʼasipxirïta, ukhamat wawanakar jan qariyañataki.” (J. M., Estados Unidos.)

“Mä warmiruw Bibliat yatichasipkayäta, ukat wawaparuw kunjamsa nayrax Diosan Arupax apnakasïna uk yatichañ munapxayäta. Ukatwa Isaías librot mä rollo lurañ amtapxta. Computadoratwa jan jaljani, jan jiskʼa tʼaqanakani Isaías libro apsupxta. Ukat uka hojanak lipʼthapiyasaw purapat pä tubonakar llawthapipxta. Ukat ‘jichhax kunjamtï Jesusax Nazaret sinagogan rollot liytʼanxa ukham liytʼam’ sasaw churapxta. Kunjamtï Lucas 4:16-21 uka jiskʼa tʼaqanakan siskixa, Jesusax kuntï liytʼañ munkäna ukwa Isaiasan qillqatapat ‘jistʼarasinsti mä chiq jikxa[täna]’ (Isa. 61:1, 2). Ukat kunapachatix wawax yantʼi ukhax jan numeronakani uka jachʼa rollon uka chiq jikxatañax wali chʼamänwa. Jesusax rollonak wali sum apnaqirïtapwa amuyäna. Wali musparataw akham säna: ‘¡Jesusax khusapunïnwa!’” sasa. (Y. T., Japón.)

[30 janan fotopa]

Uñachtʼäwinakampiw wawanakamarux yantʼanakar saykatañxa yatichañama

[31 janan fotopa]

Familiana Diosar Yupaychañataki Arumxa chuymar purtʼkir apañatakiw chʼamachasiñama