‘Suma saphintatäpxañäni’

UÑJIRÏPACHÄTAWA, thayax wal phustʼanki ukhaxa awisax quqanaksa liwnuqirjamawa, ukampis quqanakax janiw liwnuqtapkiti, kunattix uraqir wali suma saphintatäpxiwa. Jiwasax uka quqanakar uñtatarakïsnawa. Jan waltʼäwinakan uñjasiñäni ukhaxa, ‘suma saphintatjamaw’ wal saytʼasipxañäni (Efe. 3:14-17, MT). Ukampis ¿kuna tuqits parlasktanxa?

Cristian tamanxa “pachpa Jesucristo[wa] qallta esquin qalaxa” siw Diosan Arupaxa (Efe. 2:20; 1 Cor. 3:11). Ukat akham iwxtʼarakistu: “Mayaki jupampi jakapxañamaxa. Jumanakan jakañanakamasti jupan saphintatäñapawa, jupxaru suma uttʼatäpxañamarakiwa iyawsäwi layku” sasa. Uka iwxtʼarjam sarnaqañäni ukhaxa, kunatï iyawsäwis aynachtʼayan munani ukanakxa aguantañäniwa, ukanakaxa awisax “suma arunakampi sallqja[ñataki]” jaqin ‘kʼari amuytʼanakapatwa’ jutaspa (Col. 2:4-8).

“Taqi tuqiru sinti jachʼätapa amuytʼapxañamataki”

¿Kunjamatsa suma ‘saphintatäsna’, ukat iyawsäwi tuqin ‘suma uttʼatäsna’? Qalltañatakixa, saphinakasax wali manqhankañapawa, mä arunxa, Diosan amuytʼayat Arupatxa jan jaytas yatxatañasawa. Ukhamatwa kunatï chiqäki ukanakxa, “taqi tuqiru sinti jachʼätapa amuytʼa[ñäni]”, ukwa Jehová Diosax muni (Efe. 3:18). Ukhamaxa, janiw aliqaki yatiqañasäkiti, janiw Diosan Arupat “qallta yatichäwinaka[ki]” yatiñasäkiti (Heb. 5:12; 6:1). Jan ukasti, Biblian yatichäwinakapat taqi chuym yatxatañasawa (Pro. 2:1-5).

Chiqansa, janiw yatiqasakix ‘suma saphintatäksnati, janirakiw iyawsäwisas ‘suma uttʼatäkarakispati’. Supay pachpas sum yatix kuntï Bibliax yatichki ukanakxa. Ukhamax janiw yatiñasakïkiti; jan ukasti ‘Criston munasiñap uñtʼañasawa uka munasiñapax taqi kuntix uñtʼktan ukat sipansa sinti jachʼawa’ (Efe. 3:19). Ukhamaxa, kunapachatix Jehová Diosar munasisa ukhamaraki chiqa yatichäwinakap munasisa Jupan Arupat yatiqañäni ukhaxa, iwaysäwisax chʼamachatäniwa (Col. 2:2).

Qhawqsa yatiqawaytaxa

Bibliat sapak jan jaytasa yatxatañatakixa, akham jisktʼasiñaw  yanapiristamxa: “¿Kuntï Bibliax yatichki ukanakxa sumti amuytxa?” sasa. Ukhamax kuntï Pablox Efesonkirinakar qillqkatayna uka nayrir jiskʼa tʼaqanakapat amuytʼañäni ( “Efesonkirinakaru” siski uka recuadro uñxattʼäta). Uka jiskʼa tʼaqanak liytʼasaxa, ¿kuntï altʼat letranakax sañ munki uk yattati? Mayat may ukanakat amuytʼañäni.

“Janïra aka uraqix utjkän ukkhatpacha [...] ajllisiwayistu”

Pablox jupamp chik luqtir jilat kullakanakaparux akham qillqatayna: “[Diosax] nayratpach ajllisiwayistu, Jesucristo tuqi wawanakapat katuqatäñasataki” sasa. Chiqansa, Jehová Diosaw alaxpach familiap taypinkapxañapatakix yaqhip jaqinakar ajllitayna. Uka ajllit wawanakapaxa, sacerdotenakjamaw alaxpachan Cristomp chika apnaqapxañapäna (Rom. 8:19-23; Apo. 5:9, 10). Diosan jachʼakankañap contra Supayax qallasïna ukhax akham sänwa: “Jaqinakax janiw suma luratäpkiti” sasa. Ukatwa Jehová Diosax mä qhawqha jaqinakar ajllitayna, ukhamata Uraqitsa alaxpachatsa jan walinak tukjapxañapataki ukat khititix jan walinak utjayki uka Supayar tukjañatakisa, ukham ajllitapax wali askïnwa. Ukampis Diosax janiw qalltatpach khitinakas wawanakapjam ajllitäpxani ukxa siskänti; jan ukasti, mä tama, mä qhawqha jaqinakaw utjani Cristomp chik alaxpachan apnaqapxañapataki, sasaw amtäna (Apo. 14:3, 4).

Pablox cristiano jilatanakaparux akham sasaw qillqatayna: “Diosax Cristotakiw ajllisistu janïra aka uraqix utjkän ukkhatpacha” sasa. ¿Kuna uraqits Pablox parlaskäna? ¿Janïr jaqis Uraqis utjkäna uka tiempot  parlaskäna? Janiw uka tiempot parlkänti. Ukhamäsapän ukhaxa, Adanas Evas juchachasitapat janiw juchanïpkaspänti, kunattix janïr utjapkän ukhaxay juchachasipxaniw satäxchispänxa. Ukham lurasax chiqakankañwa Diosax pʼakintaspäna. Ukhamaxa, ¿kunapachas Jehová Diosax jachʼakankañap contra qallasiri Supayarusa Adanarusa ukat Evarusa chhaqtayañ amtäna? Nayrïr awk taykasax juchar puripxäna uka qhipatwa uk amtawayäna. Ukampis, Adanampi Evampix janïr wawanïpkäna, mä arunxa, janïr aka Uraqin jucharar jaqinakax utjkipanwa Jehová Diosax jaqinakar qhispiyañ amtäna.

“Jachʼa munasiñapatwa”

Diosan “jachʼa munasiñapatwa” kuna askinaksa katuqtanxa ukwa Pablox nayrïri jiskʼa tʼaqanakapanxa Efesonkirinakar qhanañchatayna. ¿Kunatsa ukham sispachäna? Kunatix Jehová Diosax janiw jucharar jaqinakarux qhispiyañapapunïkänti.

Jucharar jaqinakjamaxa, janiw kun lurasas jiwaspach qhispiyasksnati. Ukampis Jehová Diosax munasiñatwa qhispiyasiñasatakix wali wakiskirinak amtawayi ukat ukarjamaw phuqawayaraki. Ukhamax kunjamtï Pablox qillqkänxa, Diosax jachʼa munasiñapatwa qhispiyawayistu.

“Jan amuytʼkañ amtäwi[pa]”

Qalltanxa, kuna jan walinaktï Supayax lurawayki ukanakxa kunjamsa askichani ukxa Diosax janiw siskänti; “jan amuytʼkañ amtäwï[nwa]” (Efe. 3:4, 5). Ukampis cristian tama uttʼasxän ukhaw kunjamsa nayra amtäwipax jaqinakatakisa ukhamaraki aka Uraqitakisa phuqani uk qhanstayäna. Kunjamtï Pablox siskixa, kunapachatï wakiskäna ukhaw Diosax ‘amtäwipa’ phuqañ qalltäna, ukhamata angelanakampi jaqinakampix mayachtʼat yupaychapxañapataki.

Diosar ukham mayachtʼat yupaychañax Pentecostés 33 maratwa qalltawayixa, uka marat aksarurakiw Jehová Diosax khitinakatix Cristomp chika alaxpachan apnaqapxani ukanakar ajlliñ qalltawayixa (Hech. 1:13-15; 2:1-4). Ukxarusti, khitinakatix aka Uraqin Cristomp apnaqatäsin jakapxani ukanakar apthapiñwa qalltawayarakixa (Apo. 7:14-17; 21:1-5). ¿Diosan uka ‘amtäwipax’ Cristor katuyat Apnaqäwimpix mayakïpachati? Janiwa, kunatix uka apnaqäwix 1914 maran uttʼasiwayixa. Kunjamsa Diosax mayachtʼat yupaychayasiñatakix uka amtap phuqañ qalltawayi uk sañ muni.

“Amuytʼasiñ tuqinsti jachʼa jaqinakja[mäpxañäni]”

Bibliat yatxatañataki tiempo apstʼasiñäni ukhaxa, chiqa yatichäwinakax ‘taqi tuqirus kunja jachʼasa’ ukwa amuytʼañäni. Maysa tuqitxa, janiw Supayax Bibliat yatiqañataki tiempo apsusiñas munkiti. Ukhamasti, jiwasatï jan tiemponi sarnaqañänixa, Supayatakix janiw chʼamäkaniti uka tiempo apaqañaxa. Ukampis jan jupampi atipayasiñäniti. Jïsa, Diosax ‘amuytʼasiñ’ churistu, ukhamax ukarjam sarnaqapxañäni, ukhamatwa “amuytʼasiñ tuqinsti jachʼa jaqinakjamapxaraki[ñäni]” (1 Juan 5:20; 1 Cor. 14:20). Kuntï yatktan ukanakax chiqapunit janicha uk sum yatxatañasawa, ukhamatwa ‘suytʼawisatsa’ sum qhanañcharakiñänixa (1 Ped. 3:15).

Efesonkirinakamp chika Pablon cartap liytʼasmäna ukhaxa, ¿kunjamas jikxatasisamäna? ¿Janit ‘Diosan Yuqapatsa’ jukʼamp yatxatañ munkasmäna? (Efe. 4:13, 14.) Jïsa, ukhamäsapänwa. Jiwasasti, Diosan amuytʼayat arunakapampix chʼamachasiskakiñäni, Jehová Diosar taqi chuym munasiñäni ukat Bibliat sum yatxatañäni ukhaxa, Criston wali suma saphintatas saytʼasksna ukhamäniwa. Ukhamatwa aka ñanqha pachan janïr tukuskipanxa Supayan kuna yantʼanakaparus saykatañäni (Sal. 1:1-3; Jer. 17:7, 8).

[27 janan recuadropa/fotopa]

 “Efesonkirinakaru”

“Yupaychañäni Diosaru, Tatit Jesucristosan Awkiparu, Cristompi mayachasitas laykuwa jupax bendeciwayistu taqi casta ajayun bendecionanakampi alaxpachanakana. Diosax Cristotakiw ajllisistu janïra aka uraqix utjkän ukkhatpacha, qʼumachata, jan kuna juchani jupan nayraqatapankañasataki. Munasiñapatwa jupax nayratpach ajllisiwayistu, Jesucristo tuqi wawanakapat katuqatäñasataki, kunjämäkitix munañapax ukhamarjama. Ukatpï Diosarux yupaychapuntanxa muspharkañ khuyapayasiñapata, uka pachpa khuyapayasiñapampiw bendecistu munat Yuqapampi mayakïtas layku. Diosax jachʼa munasiñapatwa Yuqapan jiwäwipa tuqi qhispiyistu, juchanakassa perdonasaraki. Diosax jachʼa munasiñapwa uñachtʼayistu, taqi yatiñ kankaña ukhamaraki amuytʼa churasina. Ukhamarakiw uñtʼayistu jan amuytʼkañ amtäwipxa, ukasti kuntix jupax munañaparjam amtki ukawa. Aka amtäwirjamawa phuqhasini kunapachatix uka urux purkani ukkhaxa. Diosasti mayachthapiniwa taqi kunsa, alaxpachankirinaksa aka uraqinkirinaksa, Criston munañapankañapataki.” (Efesios 1:3-10.)