Diosax kuna luräwtï markapan churkistu uk wali askirjam uñjapxañäni

“Diosax cuerporux sapaqat partenaksa kawkharutix jupax munki ukkharuw uchi.” (1 COR. 12:18)

1, 2. 1) Diosan markapanxa Jupan taqi luqtirinakapaw mä luräwinïtanxa, ¿kunatsa ukham sissna? 2) ¿Kuna jisktʼanakarus aka yatichäwin qhanañchasiskani?

 NAYRA Israel markan tiemponakatpachwa, Jehová Diosax luqtirinakaparux markap tuqnam irpi ukat yaticharaki. Amuytʼañataki, israelitanakax Hai sat marka katuntapkäna uka qhipatxa, “Josué chachax Diosan leyipatxa leetʼänwa bendición arunaka ukhamaraki maldición arunaksa [...,] taqi Israel markaru” (Jos. 8:34, 35).

² Nayra patak maranakanxa, apóstol Pablox irpir chuymanjam irnaqtʼir Timoteoruw cristiano tamax ‘Diosan utapawa’, (MT) ukat “Diosan chiqa arunakap katxäski arxatkaraki” ukawa sasaw satayna (1 Tim. 3:15). Jichhürunxa, ‘Diosan utapax’ Jehová Diosaru Uraqpachan luqtir chiqpach cristianonakawa. Corintonkirinakaru mayïr qillqatap apaykatayna uka 12 jaljanxa cristiano tamax mä cuerpor uñtasitaw sasaw Pablox säna. Diosamp amuytʼayatäsinxa, cuerpon utjki uka partenakax may may luräwinïpkchisa, taqpachaw wali wakiskirixa sasin säna. Jupax akham sasaw qillqäna: “Ukampis Diosax cuerporux sapaqat partenaksa kawkharutix jupax munki ukkharuw uchi”. Ukat “kawkhawjanakarutix jan wali munktan ukawjanakaruw sum isthapiytanxa” sasa (1 Cor. 12:18, 23). Ukhamarakiw Diosat jan jithiqtir mä cristianox ‘Diosan utapan’ kuna luräwinïkitix ukax janiw mayni jilat  kullakanakan luräwipat sipansa jukʼamp sumäkiti ni jan walïkarakisa. ¿Kunjamsa Diosan markapan kuna luräwinïktantix uk phuqsna, ukat ukxa kunjamatsa wali askirjam uñjatas uñachtʼaysna? Chʼamasarjamax qhawqxay irnaqtʼirjamästan ukarjamaw Diosan markapan kuna luräwinïktantix uk phuqaraksna, ¿kunatsa ukham sissna? Ukatxa, ¿“nayraqataru sar[tktan] uk taqini uñjapxañapataki[x]” kuns lursna? (1 Tim. 4:15.)

Diosan markapan mä luräwinïtanwa, ¿kunjamsa uk askirjam uñjatas uñachtʼaytan?

3. ¿Kunjamsa Diosan markapan kuna luräwinïktantix uk phuqsna, ukat uk wali askirjam uñjatas uñachtʼaysna?

³ Diosan markapan kuna luräwinïktantix uk sum phuqañataki ukat askirjam uñjañatakisa ‘Amuyasiri Chiqapa Uywataru’, (MT) ukat uka taypit Uraqpachan Jilïr Irpirinakjam uttʼayatäpki ukanakar yanaptʼaña ukat istʼañasaw wakisi (Mateo 24:45-47 liytʼasiñapawa). Ukhamasti, uywatan iwxtʼanakapar istʼasktanti janicha ukxa sapa mayniw amuyasiñasa. Amuytʼañataki, kunjamsa isisiñasa kʼachachtʼasiñasa, kuna kasta kusistʼäwinaksa ajlliñasa ukat Internetan kunanakas jan uñchʼukiñasäki uka tuqinakatxa walja iwxtʼanak katuqawaytanxa. Niyakixay uka iwxtʼanakax Diosampi sum apasiñasatak yanaptʼchistuxa, ¿taqi chuymat uka iwxtʼanakaru istʼaskstanxa? Ukatxa familpach Diosar yupaychañataki tiempo apstʼasipxañasatakiw chʼamañchtʼapxarakistu. ¿Ukar istʼasktanti? ¿Uk phuqañatakix tiempo apstʼasisktanti? Ukat jan jaqichatäkstan ukhasa, ¿Bibliat jukʼamp yatxatañatakix tiempo apstʼasiskaraktanti? Amuyasiri Chiqapa Uywatarutï istʼañänixa Jehová Diosax sapaqat mayniru ukat familiasarusa bendicistaniwa.

4. Kunjamtï isisiñasäki, kʼachachtʼasiñasäki ukat kʼuchirtʼäwinak ajlliñ tuqinakatsa, ¿kunanak amtañas wakisispa?

⁴ Kunjam isthaptʼasiñasa kʼachachtʼasiñasa ukat kuna kusistʼäwinak ajlliñasa sapa maynitäxiwa sasaw yaqhipanakax sapxaspa. Ukampis Diosan markapan kuna luräwtï katuqki uk wali askirjam uñjir cristianonakaxa uka tuqinakat mä amtar puriñatakix janiw munañanakaparuki amtañ yatipkiti. Kuntï Jehová Diosax uka tuqinakat amuyki ukaw jupanakatakix jukʼamp wakiskirixa, kunsa uka tuqinakat Diosax amuyi ukax Biblianwa jikxatasi. Diosan Arupan jikxataski uka yatichäwinakax jiwasan “sarnaqäwisatak[ix] qhanawa” ukat “thaki[sans] qhantirirakiwa” (Sal. 119:105). Uka tuqinakat mä amtar puriñax Diosat yatiyir sarañarusa ukat jiwasamp chikäki ukanakarusa, Diosar luqtirïpansa janisa, kunjamtʼayaspas uk amuyañasaw wakisi (2 Corintios 6:3, 4 liytʼasiñapawa).

5. ¿Kunatsa amtasarjamaki jan sarnaqañasäki?

⁵ Kawkïr ajayutix ‘Diosar jan istʼirinakaru’ chʼamañchki uka ajayuxa samanar uñtataw taqi chiqan jikxatasi (Efe. 2:2). Uka ajayuw Jehová Diosan markapampi janis irpayasiñasax wakiskaspa ukham amuyayistaspa. Ukampis janiw khitisa Diótrefes jaqjamäñ munktanti, jupax apóstol Juanatxa janiw kunsa respetomp katuqirïkänti (3 Juan 9, 10). Ukhamasti amtasarjamaki sarnaqañax janipuniw chuymasan utjañapäkiti. Jichhürunxa Jehová Diosax markap tuqnamwa yatichistu ukat irpistu, janipuniw kunäkipansa arsutasampisa luräwisampis markap contra jan wal parlañ munktanti (Núm. 16:1-3). Jan ukasti, Amuyasiri Chiqapa Uywatar yanaptʼañsa istʼañsa wali askirjam uñjapxañäni ukat taman pʼiqtʼapki ukanakar altʼat chuymampi istʼañatakis chʼamachasipxañäni (Hebreos 13:7, 17 liytʼasiñapawa).

6. Chʼamasarjamax qhawqsa yatiyirjamätan uk sum amuykiptʼasiñasawa, ¿kunatsa ukham sistanxa?

⁶ Diosan markapan kuna luräwinïktantix uk wali askirjam uñjañatakixa, ¿kunanakamps lursna? Chʼamasarjamax qhawqsa lurirjamätan ukat taqi chuymati suma yatiyäwinak yatiyasax Jehová Diosaru jachʼañchasktan ukwa sapa mayni sum amuykiptʼasiñasa (Rom. 11:13). Yaqhipax precursor regularjamaw irnaqtʼapxaspa. Waljaniw misioneronakjama, tamanak tumptʼirinakjama jan ukax Betel utan irnaqtʼasipki. Yaqhipanakasti Tantachasiñ Utanak lurañwa yanaptʼapxi. Ukat Jehová Diosar luqtirinakapatxa waljaniw familiapar Bibliat jukʼamp  yatichañataki ukat sapa semana yatiyir sarañatakis wal chʼamachasipxaraki (Colosenses 3:23, 24 liytʼasiñapawa). Jehová Diosarutï taqi chuyma luqtañänixa markapan kuna luräwinïktantix ukxa sum phuqañäni.

Chʼamasarjamaw kuna luräwinïktantix uk phuqaraksna

7. Chʼamasarjamax qhawqxay irnaqtʼirjamästan ukarjamaw Diosan markapan kuna luräwinïktantix uk phuqaraksna, ¿kunatsa ukham sistanxa?

⁷ Chʼamasarjamax qhawqsa Diosatak irnaqtʼirjamätan ukarjamaw kuns luraraksna. Amuytʼañataki, tama taypinxa, mä jilatax kuna luräwinïkitix ukax janiw mä kullakan luräwipampix kikpäkiti. Ukhamarusa, yaqhipax chuymankipstatäxapxi, usutäxapxi jan ukasti yaqha jan walinwa uñjasipxi, ukarjamaw Jehová Diosatakix qhawqsa irnaqtʼapxani uk amtapxaspa. Proverbios 20:29 qillqatax akham siwa: ‘Wayn tawaqunakax wali chʼamanïpxiwa’, (NM) ukampis “chuyman awkinakanxa janqʼu ñikʼutanakapawa mä jachʼañchäwixa” sasa. Chiqpachansa, tamankir wayn tawaqunakax chʼamanïpxatapatwa jukʼamp irnaqtʼapxaspa, ukampis chuymankipstatanakax yatiñkankañanïpxatapata ukat experiencianïpxatapatwa wali askit uñjatäpxi. Ukampisa, Jehová Diosan markapan kuna askinaktï katuqktan ukanakxa Diosan khuyapayasiñapatwa katuqtanxa, ukxa janiw armañasäkiti (Hech. 14:26; Rom. 12:6-8).

8. Kuntï lurañ munktan ukarjamaw Diosan markapan kuna luräwinïktantix uk sum phuqaraksna, ¿kunats ukham sissna?

⁸ Diosan markapan kuna luräwinïktantix uk sum phuqañatakix aka tuqit amuytʼañax wakisirakispawa. Amuytʼañataki, pä kullakat parltʼañäni. Panpachaniw Diosar jukʼamp luqtapxasapäna. Colegion yatiqañ tukuyasax precursor regularjam irnaqtʼapxañapatakiw awk taykapax taqi chuyma jupanakar chʼamañchtʼapxatayna. Ukampis 18 maraniru, colegion yatiqañ tukuyasaxa, maynix precursorjamaw irnaqtʼañ qalltäna, ukampis maynïrixa jornalpach irnaqañwa qalltawayarakïna. ¿Kunatsa ukham may may amtawayapxäna? Kuntï chuymapan lurañ munapkäna ukarjamaw amtapxäna. Chiqpachansa, kuntï lurañ munapkäna uk lurapxäna. ¿Jiwasax ukham amtaraksnaxaya? Ukatwa Diosar luqtkasax kuna askinaksa jikxatañ muntan uk sum amuytʼasiñasa. ¿Munañasaki thaqhañat sipans Jehová Diosatak jukʼamp irnaqtʼañatakix chʼamachäsnati? (2 Cor. 9:7.)

9, 10. Jehová Diosatak jukʼamp jan irnaqtʼañ munkstan ukhaxa, ¿kun lurañasasa?

⁹ Ukampis taman jukʼamp irnaqtʼañataki jan chʼamachaskstan jan ukax janirak jukʼamp lurañ munkstan ukhaxa, ¿kunas yanaptʼistaspa? Pablox Filipos markankir cristianonakarux akham sasaw qillqäna: “Diosaw suma amtäwinak churapxtam, jupa pachparakiw yanapasipktamxa uka lurañanak phuqhañanxa jupan munañaparjama” sasa. Chiqansa, Jehová Diosan qullan ajayupaw amuyusaru ukat chuymasar wiytistu, ukhamat taqi chuyma Jupatak jukʼamp irnaqtʼañ munañasataki (Fili. 2:13; 4:13).

¹⁰ ¿Janit ukham mayiskaraksna? David reyix ukham luräna. Jupax akham sasaw mayisïna: “Tatay, thakim uñachtʼayita, thakiman irpnaqasita, jumat jan jithiqtas sarnaqayita; jumaw Diosaxätaxa, Qhispiyirixätasa, jumaruw taqi chuymamp sapür suytʼasksma” sasa (Sal. 25:4, 5). Kunatï chuymamar kusisiyki ukanak lurañajataki yanaptʼita sasaw Jehová  Diosat mayisiraksna. Jehová Diosasa Yuqapasa wali askirjamaw luqtäwis uñjapxi, uka tuqit lupʼtan ukhaxa, chuymasanx wal yuspärtanxa (Mat. 26:6-10; Luc. 21:1-4). Ukaw nayraqataru jukʼamp sartañ munañasataki Diosar achiktʼasisin mayisiñasatak wiytistaspa. Isaiasat yatiqasipxañäni. Kunapachatï Jehová Diosaxa: “¿Khitirus khitäxa? ¿Khitis [nänakat] arsur sarani?” sasin jisktʼäna ukhaxa, jupax akham sänwa: “Akankasktwa nayax, nayar khitasita” sasa (Isa. 6:8).

Diosar yupaychañ tuqitxa kunjamsa nayrar sartsna

11. 1) ¿Kunatsa jilatanakax taman jukʼamp aski luräwinak katuqañatakix chʼamachasipxañapa? 2) ¿Taman jukʼamp aski luräwinak katuqañatakix kunsa mä jilatax lurañapa?

¹¹ Uraqpachanxa, 2007 septiembre phaxsit 2008 agosto tukuykamax 289.678 jaqinakaw bautisasipxäna, ukax tamanakan pʼiqtʼapxañapatak jilatanakax jukʼamp wakisxatap uñachtʼayistu. Ukhamasti, ¿kunsa jilatanakax lurapxañapa? Bibliarjamax irpir chuymanïñataki jan ukax irpir chuymaninakan yanapiripäñatakix kunanak phuqañas wakisispa ukanak phuqañatakiw chʼamachasipxañapa (1 Tim. 3:1-10, 12, 13; Tito 1:5-9). ¿Ukanak phuqañatakix kunsa mä jilatax lurañapa? Taqi chuymaw Diosan Arupat yatiyir sarañapa, kuna lurañanaktï taman katuqki ukanak suma phuqirïñapa, tantachäwinakan sum arstañatak chʼamachasiñapa ukat jilat kullakanakarus yanaptʼañaparaki. Ukhamtï luranixa, Diosan markapan kuna luräwinïkitix uk askirjam uñjatapwa uñachtʼayani.

12. ¿Kunjamsa waynanakax Diosar luqtañax jakäwipan nayrankatap uñachtʼayapxaspa?

¹² Waynitunakasa qʼaxu waynanakas taman nayrar sartañatakixa, ¿kuns lurapxaspa? Qullan Qillqatanak sum uñtʼapxañapa ukhamat yatiñkankañansa “ajay tuqin amuytʼañanak[an]sa” jiltapxani (Col. 1:9). Ukatakix Diosan Arupxa sum yatxatapxañapa ukat tantachäwinakansa arstʼapxañaparakiwa. Ukatxa kunanakatï phuqapxañapax wakiski uk phuqañatakiw chʼamachasipxañapa, ukhamat ‘wakichata jachʼa punknäm’ mantapxarakini, mä arunxa, kunayman luräwinakana Diosatak sapür irnaqtʼapxaspa (1 Cor. 16:9, MT). Diosar luqtañatï jakäwipan nayrankanixa, wali kusisita ukat aski bendicionanakwa jikxatapxarakini (Eclesiastés 12:1 liytʼasiñapawa).

13, 14. ¿Kunjamatsa kullakanakax Diosan markapan kuna luräwinïpkitix uk wali askirjam uñjapxatap uñachtʼayapxaspa?

¹³ Salmo 68:11 qillqatanxa akham siwa: “Tatituw mä yatiyäw arsu, waranq waranq [‘warminakaw suma yatiyäwinak yatiyapxi’, NM]” sasa. Kullakanakax uka arunak phuqasiñapatak yanaptʼapxatapatxa wali askirjam uñjapxatap uñachtʼayapxarakispa (Mat. 28:19, 20). Chiqansa, munañanakap jaytasa Diosan Arupat taqi chuyma yatiyasaw Diosan markapan kuna luräwinïpkitix uk wali askirjam uñjapxatap uñachtʼayapxi.

 ¹⁴ Pablox akham sasaw Titor qillqäna: “Jilïri warminakax suma sarnaqirïpxpan. [...] Mayninakatakisti mä sumar uñtatäpxañapawa. Ukhamat tawuq warminakarus chachanakapar munañ yatichañataki, ukhamarak wawanakapar munañsa. Suma amuyunïpxañapawa, qʼuma chuymaninaka, ukhamarak utapsa sum apnaqirinaka, suma chuymaninaka, chachanakaparus istʼirinaka, jan khitisa Diosan arupatxa jan wali parlañapataki” sasa (Tito 2:3-5). Kunjamtï uka arunakat amuyktanxa, suma amuytʼasiri yatxattʼat kullakanakaw tamar yanaptʼapxaspa. Jupanakax taman pʼiqtʼapki uka jilatanakarus respetapxi, ukat kusistʼaña, isthapisiña ukat kʼachachtʼasiñ tuqitsa suma amtanakaruw puripxi. Ukhamatwa taqinins yatiqaskañ sarnaqapxi ukat Diosan markapan kuna luräwinïpkitix uk wali askirjam uñjapxatapwa uñachtʼayapxaraki.

15. ¿Solter kullakanakax sapak jan jikxatasipxañapatakix kunsa lurapxaspa?

¹⁵ Awisax solter kullakanakatakix Diosan markapan kuna luräwinïpkitix uk phuqañax chʼamäspawa. Mä kullakax akham siwa: “Awisax jan khiti yanaptʼirini sapakiw jikxatasta” sasa. Ukham jan jikxatasiñamatakix kuns lurta sasin jisktʼapxäna ukhaxa, jupax akham sänwa: “Diosat mayisiñampi ukat Bibliat yatxatañampiw Diosan markapan kuna luräwinïktix uk phuqañajatak yanaptʼitu. Jehová Diosax kunjamsa nayar uñjitu uka tuqit yanaptʼir iwxtʼanak thaqtxa, ukat taman jilat kullakanakar yanaptʼañatakis chʼamachasiraktwa. Ukaw nä pachpat llakisiñat sipansa mayninakar yanaptʼañ yanapitu” sasa. Salmo 32:8 qillqatarjamaxa, Jehová Diosax Davitarux akham sänwa: “Nayaw amuytʼayaskäma nayaw sarañamäki uka thak uñachayaskäma” sasa. Ukhamäskapuniwa, Jehová Diosax sapa mayni luqtirinakapatwa llakisi, solter kullakanakatsa ukhamaraki. Jupaw taqinir markapan kuna luräwinïktantix uk phuqañ yanapistani.

Kuna luräwinïktantix uk janipun jaytjapxañäniti

16, 17. 1) Jehová Diosax markapankañasatakiw jawstʼistu, ¿kunatsa uka jawstʼäwiru istʼañax jiwasatakix mä suma amtäwixa? 2) Diosan markapan kuna luräwinïktantix uk sum phuqañatakixa, ¿kun lurañasasa?

¹⁶ Jehová Diosax munasiñapatwa sapa mayni luqtirinakaparux Jupampi sum apasipxañapatakix markapar irpani. Jesusax akham sänwa: “Janiw khitis nayaru jutkaspati, janitix khitankitu uka Awkix [irpankaspa] ukaxa” sasa (Juan 6:44). Aka Uraqinkir millón millón jaqinakatxa jiwasaruw markapankañasatak jawstʼistu. Uka jawstʼäwiru istʼañax mä suma amtäwiwa, kunattix ukawa jakäwisan mä suytʼäwi churistu. Diosan markapan kuna luräwinïktantix uk phuqasax chuymas phuqtʼata ukat wali kusisitarakiw jikxatastanxa.

¹⁷ Salmonak qillqirix akham sänwa: “Tatay, qullan utamarux munastwa”. Ukat akham saskakïnwa: “Kayuxax chʼullqhi uraqxar taktʼatawa, ¡Tatiturux qullan markap taypin jachañchä” sasa (Sal. 26:8, 12). Jehová Diosax sapaqat mayniruw markapan mä luräwi churistu. Markapampi irpayasisipkakiñäni ukat taqi chuyma Jupar luqtaskakiñäni; ukhamatwa markapan kuna luräwinïktantix uk sum phuqañäni.

¿Amttati?

• Diosan markapanxa sapa mayni cristianow mä luräwinïtanxa, ¿kunatsa ukham sissna?

• ¿Kunjamsa Diosan markapan kuna luräwinïktantix uk wali askirjam uñjatas uñachtʼaysna?

• Chʼamasarjamax qhawqxay irnaqtʼirjamästan ukarjamaw Diosan markapan kuna luräwinïktantix uk phuqaraksna, ¿kunatsa ukham sistanxa?

• ¿Kunjamsa wayn tawaqunakasa jilïr jilat kullakanas Diosan markapan kuna luräwinïpkitix uk wali askirjam uñjapxatap uñachtʼayapxaspa?

[Jisktʼanaka]

[16 janan fotonakapa]

¿Taman jukʼamp aski luräwinak katuqañatakix kunsa jilatanakax lurapxañapa?

[17 janan fotopa]

¿Kunjamatsa kullakanakax Diosan markapan kuna luräwinïpkitix uk wali askirjam uñjapxatap uñachtʼayapxaspa?