¿Mayisïwinakamax kunsa jumxat uñachtʼayi?

“Jumax mayisitanakar istʼirïtawa. Taqi jaqinakaw jumarux makhatapxtam.” (SAL. 65:2.)

1, 2. ¿Kunatsa Diosax luqtirinakapan mayisitanakaparux istʼapuniw sasax sissna?

 LURIRISAXA, Jupat jan jithiqtir luqtirinakapan mayisitanakaparux istʼapuniwa. Millón millón luqtirinakapasay Jupar mayisipxchixa sapa mayniruw istʼi.

² Achiktʼasitanakajarux Diosax istʼapuniwa sasaw Davitax taqi chuyma atinisïna, ukatwa akham sas qʼuchüna: “Jumax mayisitanakar istʼirïtawa. Taqi jaqinakaw jumarux makhatapxtam” sasa (Sal. 65:2). Jehová Diosax Davitan achiktʼasitanakaparux istʼänwa kunattix taqi chuymaw Diosar luqtäna. Jiwasan akham jisktʼasiñasaw wakisispa: “¿Mayisïwinakajax Diosar taqi chuyma atinisitajti ukat Jupar yupaychañax taqi kunat sipansa nayrankatapti uñachtʼayi? ¿Mayisïwinakajanxa kunjam chuymanïtajsa amuyasi?” sasa.

Altʼat chuymampi mayisipxañäni

3, 4. 1) ¿Kunjam chuymampis Diosat mayisiñasa? 2) ¿Mä jachʼa juchar purtʼasitas layku llakimp wali aynachtʼirjamästan ukhaxa, kuns lurañasa?

³ Jehová Diosampitï istʼayasiñ munstanxa, altʼat chuymampiw mayisiñasa (Sal. 138:6). Davitax akham sasaw mayisïna: “Diosay, uñakipitaya, chuymaxar uñantam, nayarux yantʼitaya, lupʼitanakax uñtʼarakim, nayatix ñanqha thakin sarnaqiristxa, chiqa thakinjamay irpasita” sasa. Jiwasax jupjam mayisiñasarakiwa (Sal. 139:23, 24). Ukampis janiw mayisiñasakikïti, jan ukasti Diosampiw irpayasiñasa ukat Arupan utjki uka iwxanakaparus istʼañasarakiwa. Jupaw “chiqa thakinjam” irpistani, mä arunxa, sum sarnaqañasatakiw yanapistani ukhamat wiñay jakañ jikxatañasataki.

⁴ Mä jachʼa juchar purtʼasitas layku wali llakita jikxatassna ukhaxa, ¿kuns lursna? (Salmo 32:1-5 liytʼasiñapawa.) Janiw uka juchxa chuymasan imxasiñasäkiti, ukhamäspa ukhax llakimpiw qʼal aynachtʼawayxsna, kamisatix lupimp wañsut quqax qʼal aynachtʼkixa ukhama. Davitax juchar purtʼasitapatwa wal llakisïna, ukat inas usuntxchïna. Ukampis juchap arsusxäna ukhaxa, janiw sinti llakitaxänti. Juchapax pampachatäxatap yatisinxa ¡kunja kusisitakis jikxatasxpachäna! Jiwasax Diosar juchas arsusisax ukhamarakiw jikxatasiñäni, ukat Diosampi wasitat sum apasxañatakix irpir chuymaninakan yanaptʼapaw wakisiraki (Pro. 28:13; Sant. 5:13-16).

Diosar achiktʼasipxañäni ukat yuspärapxañäni

5. ¿Jehová Diosar achiktʼasiñax kun sañs muni?

⁵ Kunayman jan walinakans jikxataskchiñänixa, Pablon aka iwxtʼapar istʼañasawa, jupax akham sänwa: “Jan jumanakax kunatsa llakipxamti; ukatsipana jumanakan mayisitanakamax Dios nayraqatana uñtʼatäpan oracionanak tuqi, achikasiñanak tuqiraki, yuspagarañanakampi” sasa (Fili. 4:6, MT). ‘Achiktʼasiñaxa’ “altʼat chuymampi kuns mayisiña sañ muni”. Ukat jakäwis aptʼasirjamassna jan ukax arknaqat jikxatassna ukhaw yanaptʼita amuytʼayita sasin Jehová Diosar jukʼampi achiktʼassna.

6, 7. ¿Diosat mayiskasaxa kunanakat yuspärañas wakisispa?

⁶ Jichhasti, kun jikxatañ laykuki Diosat mayissna ukhaxa, ¿kunjam chuymanïtassa amuyasispa? Diosar achiktʼastan ukhaxa ‘yuspärañasarakiwa’ sasaw Pablox säna. Chiqansa Davidjamarakiw Jehová Diosar taqi kunat yuspärsna, jupax akham sänwa: “¡Jumankiwa, Tata, jachʼa kankañamasa, chʼamamasa, jachʼar aptatäñamasa, apnaqañasa, jachʼa reyi kankañamasa! Kunattix alaxpachansa aka uraqinsa utjki ukanakaxa jumankiwa. Jumankarakiwa apnaqañamasa, jumax Tata taqinxarusa jilïritam layku.  [...] Ukatwa jichhaxa nanakan Diosaxa yuspagarapxsma ukhamarak jachʼa sutimsa yupaychapxaraksma” sasa (1 Cró. 29:11-13).

⁷ Awkiparux manqʼa churatapatwa Jesusax yuspärana. Ukat Santa Cena uttʼaykäna ukhaxa, tʼantʼatsa vinotsa yuspärarakïnwa (Mat. 15:36; Mar. 14:22, 23). Jiwasax ukhamarakiw manqʼa churatapatxa Diosar yuspärañasa, ukatxa “jaqinakatak muspharkañanak luratapata”, ‘chiqapa taripäwi arsüwinakapata’ ukat Biblian qillqatäki uka arunakapatsa yuspärañasarakiwa (Sal. 107:15; 119:62, NM; 119:105).

Mayninakatak mayipxañäni

8, 9. ¿Kunatsa jilat kullakanakatakix mayiñasa?

⁸ Jiwasatak mayiskasinxa, jilat kullanakasatakix mayiñasawa, khitinakarutix jan sum uñtʼktan ukanakatakis ukhamaraki. Pablox Colosankir taqi jilat kullakanakar inas jan uñtʼkchïnti, ukampis jupax akham sänwa: “Jesucristo Tatitusan Dios Awkiparux yuspagarapxapuntwa jumanakatak Diosat maykasinxa. Yatipxaraktwa jumanakan Jesucristor iyawsapxatama, ukhamarak taqi Diosankirinakarus munapxatama” sasa (Col. 1:3, 4). Pablox Tesalonicankir cristianonakatakix mayirakïnwa (2 Tes. 1:11, 12). Uka kasta mayisïwinakaw kunjam chuymanïtansa ukat kunjamsa jilat kullakanakasar uñjtan uk amuytʼayistu.

⁹ Alaxpachar sarañatak ajllitäpki ukat “yaqha ovenakjam” uñtʼatäpki uka jilat kullakanakatak mayisaw Diosan markapax kunja askis jiwasatakix uk uñachtʼaytanxa (Juan 10:16). Nayatakix Jehová Diosat mayipxarakim “taqi chʼamampi parlañaxataki” ukhamat “imantatäki uka qhispiyasiñ arunak” mayninakar yatiyañajataki sasaw Efesonkir cristianonakarux Pablox mayïna (Efe. 6:17-20). ¿Jumasti jilat kullakanakatakix mayipunirïtati?

10. ¿Kunatsa mayninakatak mayiñax wali askïspa?

¹⁰ Mayninakatak mayiñax jupanakar munasiñampi uñjañatakiw yanaptʼistaspa. Mä jilatampi jan ukax mä kullakampitï jan sum apaskstan ukhaxa, ¿janixay jupatak mayisinxa jupar uñiskaraksnatixa? (1 Juan 4:20, 21.) Chiqansa, uka kasta mayisïwinakaw wali askixa ukat mayachtʼatäñasatakis yanaptʼistu. Ukat Cristjam munasirïtaswa uñachtʼayaraki (Juan 13:34, 35). Uka kasta munasiñaw qullan ajayun luräwip taypin jakhutaraki. ¿Jehová Diosarux qullan ajayup mayisisktanti? ¿Munasiña, kusisiña, sumankaña, wali paciencianïña, suma chuymanïña, suma jaqïña, iyawsäwinïña, llampʼu chuymanïña ukat munañajampi jan atipjayasiñajatakis yanaptʼita sasin mayisisktanti? (Luc. 11:13; Gál. 5:22, 23, NM.) Ukhamächi ukhaxa, arsutasasa luräwisasa qullan ajayun luräwiparjam sarnaqaskataswa uñachtʼayani (Gálatas 5:16, 25 liytʼasiñapawa).

11. ¿Mayninakarux Diosat mayirapipxitätaw sañax walikïskaspati?

¹¹ Awk taykanakax wawanakapatak mayipxañapax wali wakiskiripuniwa. Sañäni, mä awkitix wawanakapan examenan copiasiñ munaskatap yatispa ukhaxa, jupanakatakiw Diosat mayiñapa ukat Bibliampi iwxtʼasax kunatsa examenan jan copiasipxañapas wali aski uk amuytʼañwa yanaptʼañapa. Pablox Corintonkir jilat kullakanakarux  akham sänwa: “Diosat mayipxaraktwa jan jumanakan kuna jan walinaksa lurapxañamataki” sasa (2 Cor. 13:7). Altʼat chuymampi mayninakatak mayiñawa Jehová Diosarux kusisiyi ukat Jupan nayraqatapansa suma chuyman jaqjam uñtʼayasiraktanxa (Proverbios 15:8 liytʼasiñapawa). Ukat nätakix Diosat mayirapipxitätaw sasaw mayninakar saraksna, kunjamtï Pablox sirïkänxa ukhama. Jupax akham sasaw qillqäna: “Orapxamay nanakataki. Yatisipxaraktwa nanakan chuymanakaxax walikïskatapa taqi kunans sum sarnaqañ munapxatanakax layku” sasa (Heb. 13:18).

Mayisïwinakasanwa kunjam chuymanïktantix ukax qhan amuyasi

12. ¿Diosat mayiskasaxa kuna tuqinakat mayiñas wakisispa?

¹² ¿Mayisïwinakasanxa Jehová Diosar kusisita ukat taqi chuyma luqtatasti amuyasi? ¿Diosat mayiskasaxa, Arupat yatiyir sarañataki, Diosan amtap phuqasiñapataki, jachʼa kankañapax jachʼañchatäñapataki ukat sutipax qullanjam uñjatäñapatakit jukʼamppach mayisktanxa? Diosat mayiskasaxa janipuniw uka tuqinakat mayiñ armasiñasäkiti. Chiqansa, Jesusax yatichkäna uka mayisïwix akham sasaw qallti: ‘Alaxpachankir nanakan Awkija, sutimax jachʼañchatäpan, Apnaqäwimax jutpan. Munañamax luraspan, alaxpachansa ukhamaraki aka Uraqinsa’ sasa (Mat. 6:9, 10, NM).

13, 14. ¿Mayisïwinakasax kunsa jiwasat uñachtʼayi?

¹³ Mayisïwinakasanwa, kuntï munktan ukat kunjam chuymampis Diosar luqtasktan ukanakax qhan amuyasi. Jehová Diosax kunjamäktantix uk yatiwa. Proverbios 17:3 qillqatax akham siwa: “Qurisa qullqisa ninamp yantʼatawa; jaqin amtanakapsti Tatituw yantʼaraki”, mä arunxa, Jupaw kunatï chuymasan utjki uk yati (1 Sam. 16:7). Kunjam chuymampis jilat kullakanakaru, tantachäwinakaru, yatiyir sarañaru uñjasktan ukxa Diosax sum yati. Ukat kunjamsa Criston ajllit jilat kullakanakapar uñjtan uks yatirakiwa (Mat. 25:40). Kuntï mayktan ukxa chiqpachapunit katuqañ muntan, jan ukasti, ukar yatinuqtätas laykukich pachpa arunakampiki kutin kutin mayisiktan uks yatirakiwa. Jesusax akham sänwa: “Oración lurkasinxa jan inamaya arunakxa arsumti, kunjämti Diosar jan uñtʼir jaqinakax lurki ukhamxa. Jupanakasti amuyapxiwa Diosax jupanakarux walja arunaka arsutap layku istʼkaspa ukhama” sasa (Mat. 6:7).

¹⁴ Kuna arunakampitï mayisktan ukaw qhawqsa Diosarux atinistan uk uñachtʼayaraki. Davitax Jehová Diosarux akham sänwa: “Jumaw nayan imantasiñaxätaxa. Jumaw timasirixat jarkʼaqir chʼaman [torrejätaxa]. Wiñayatakiw utaman jakañ munta amparamamp jarkʼaqataw utjasiñ munarakta” sasa (Sal. 61:3, 4). Diosaw uñjaskistu ukat jarkʼaqaskistu sasaw Bibliax saraki (Apo. 7:15). Kunayman yantʼanakan jikxatasktan ukhaxa, Diosax ‘jiwasampïskatap’ yatiñaw wal chuymachtʼistu (Salmo 118:5-9 liytʼasiñapawa).

15, 16. Taman jukʼamp aski luräwinakanïñ munstan ukhaxa, Diosat mayisiñaw kunatsa uka aski luräwinak katuqañ muntan uk amuyañ yanapistani, ¿kunatsa ukham sistanxa?

¹⁵ Diosat taqi chuyma mayisiñaw chuymasan kuna amtanakas utji uk yatiñ yanapistani. Amuytʼañataki, Diosan markapan irpir chuymanïñ munstan ukhaxa, ¿jilat kullakanakaru altʼat chuymampi ukat taqi chuyma yanaptʼañ laykut ukham irnaqtʼañ muntanxa? Jan ukasti, ¿taqinit sipansa ‘jilïriñ munasakicha’ jan ukax jupanakxaru munañäniñ laykukich uk jikxatañ muntanxa? Jehová Diosan markapanxa janiw ukhamäkiti (3 Juan 9, 10 ukat Lucas 22:24-27 liytʼasiñapawa). Taqi chuyma jan kun imtʼasa Diosar mayisiñänixa, suma amtampiti uka aski  luräwinak jikxatañ muntan janicha ukat uka amtanakatï jan sumäkchi ukhaxa, chuymasan janïr saphintkipan jaytañasatakiw Diosax yanapistani.

¹⁶ Chiqansa, walja jaqichasit kullakanakaw chachapax irpir chuymaninakan yanapiripjama ukat tiempompix irpir chuymaninakjam luqtapxañap munapxi. Diosar uka tuqit mayisisaxa, chachanakapan nayrar sartapxañapatakix yatiqaskañ sum sarnaqasaw yanaptʼapxaspa. Ukax wali wakiskiriwa, kunattix kunjamas familiapan arsüwipasa luräwipasa ukarjamaw tamankirinakax uka jilatarux askirjamas jan ukax jan wals uñjapxi.

Tantachäwin mayninakatak mayktan ukha

17. ¿Kunatsa sapaki mayisiñatakix tiempo apstʼasiñax wali wakiskirixa?

¹⁷ Jesusax Diosat sapak mayisiñatakix tiempo apstʼasipunirïnwa (Mat. 14:13; Luc. 5:16; 6:12). Jiwasax ukham lurañasarakiwa. Sapaki jan kuna pantjayirini mayisktan ukhaxa, Diosar kusisiykir amtäwinakaruw puriñäni ukat yupaychäw tuqit suma saytʼatäñasatakis yanaptʼarakistaniwa. Ukampisa, Jesusax jaqinakampïkasinxa mayisirakïnwa. ¿Mayninakampitaki maykañäni ukhax kunjam mayiñasasa?

18. Tamankirinakataki mayipxani ukhaxa, ¿jilatanakax kunanak amtapxañapasa?

¹⁸ Tantachäwinakasanxa Diosar taqi chuyma luqtir jilatanakaw utji, jupanakaw tamankirinatakix mayipxi (1 Tim. 2:8). Uka mayisïwi tukuyatarux taqiniw “ukhamäpan” sas sapxaraki. Ukampis ukham sañatakixa, kuntï mayisïwin arstʼaski ukarux iyaw sapxañaparakiwa. Nänakan Awkija ukham uñtʼatäkis uka mayisïwinxa, Jesusax janiw mayninakar chuyma ustʼayirjamasa ni mayjtʼayirjamas arskänti (Luc. 11:2-4). Janirakiw sapa mayni istʼirinakapan llakinakapatsa jan waltʼäwinakapatsa arsurïkänti. Kunatï jiwasar llakisiyistu ukanakax sapaki mayisktan ukhaw mayisiñasa, janiw taqinin istʼkañ mayisiñasäkiti. Ukat tantachäwinakan tamankirinakataki Diosat mayktan ukhaxa, janipuniw kunatï jan yatiyasiñapäki uk arsuñäsakiti.

19. Tantachäwin Diosat mayiskani ukhaxa, ¿kun lurañas jan wakiskaspa?

¹⁹ Kunapachatï maynix tamankirinakatak mayinixa, ‘Diosar axsarataswa’ uñachtʼayañasa (1 Ped. 2:17). Yaqhip costumbrenakax tiempoparu ukat wakisitarjam luratächi ukhax janiw jan walïkapuniti, ukampis tantachäwinkkasax janiw ukanak lurañax askïkaspati (Ecl. 3:1). Sañäni, maynitix amparat katxartʼasisin mayisipxañäni, sasin mä qhawqhanir saspa ukhaxa, yaqhip jilat kullakanakasa tamar visittʼirinakas uk uñjasax inas mayjtʼasipxchispa jan ukax colerasipxchispa. Mä jilatax inas mayisiñatakix warmipan amparap katxartʼañ munchispa, ukampis qhumantxaspa ukhaxa, inas maynir jan wal amuyayxchispa. Jehová Diosampi sum apasiñat sipansa chacha warmjam sum apasiñakis  nayrankaspa ukhamwa mayninakax amuyxapxaspa. Ukhamasti, Diosar axsartʼiri ukat respetiripxañäni, “taqi kunsa Diosar jachʼañchañatakiki” lurapxañäni ukat kunatï mayninakar pantjayirjamäspa jan ukax colerayirjamäspa ukanak jan lurapxañäniti (1 Cor. 10:31, 32; 2 Cor. 6:3).

¿Kunsa mayiñasa?

20. ¿Kunjamsa Romanos 8:26, 27 qillqatat qhanañchtʼasma?

²⁰ Diosat sapaki mayiskasaxa, awisax janiw kun mayiñs yatksnati. Pablox akham sänwa: “Janiw yatktanti kunjämatix oración lurañax wakiski ukxa, ukampis qullan ajayuw Diosarux achiktʼaski jiwasatxa jan amuytʼkaya ayquñanakampi. Ukampis Diosax chuymanaka uñantasinxa yatiwa kuntix ajayux sañ munki ukxa” sasa (Rom. 8:26, 27). Jehová Diosaw Biblian walja mayisïwinak qillqayäna. Jupaw kuntï qillqirinakax sañ munapkäna uk yati, kunattix uka mayisïwinak qillqasiñapatakix Jupaw amuytʼayäna. Ukhamarusa, Diosaw sum uñtʼistu. Ukatwa, Jupan amuytʼayat mayisïwinakxa jiwasas mayisksna ukham istʼi. Qullan ajayux jiwasat “achiktʼaski”, jan ukax mayisïwisan yanaptʼkistu ukhaw Jehová Diosax mayisïwinakasar istʼi. Ukat Arupat jukʼamp yatxatañäni ukhaxa, janiw kuntï mayiñ munktan ukax chʼamäkarakiniti.

21. ¿Kunsa jutïr yatichäwin yatxataskañäni?

²¹ Kunjam chuymanïktantix ukax mayisïwinakasanwa qhan amuyasi, ukwa yatiqawaytanxa. Jehová Diosampix sumti apasiktan ukat Arupxa sumt uñtʼaraktan ukaw qhan amuyasi (Sant. 4:8). Jutïr yatichäwinxa, Diosaru altʼat chuymamp luqtirinakapan mayisïwinakapatwa yatxataskañäni, ukanakax Biblian qillqatawa, uka mayisïwinakaw kunjamsa mayisisktan uk amuytʼañ yanapistani.

¿Kamsasmasa?

• ¿Kunjam chuymampis Diosat mayisiñasa?

• ¿Kunatsa jilat kullakanakatak mayiñasa?

• Mayisïwinakasaw kunjam chuymanïktantix ukat kunjam amtanïktantix uk uñachtʼayistu, ¿kunatsa ukham sistanxa?

• Tantachäwinakan Diosat mayiskani ukhaxa, ¿kun lurañasas jan walïkaspa?

[Jisktʼanaka]

[4 janan fotopa]

¿Jehová Diosar jachʼañchtati ukat yuspäraraktati?

[6 janan fotopa]

Kunapachatï Diosat mayisktan ukhax Jehová Diosar respetataswa uñachtʼayañasa