Sapürutjam jukʼampi jilat kullakanakarux munasipxañäni

“Munasiñan jakapxam, kunjämtix Cristo Tatitux munaskistu ukhama.” (EFE. 5:2)

1. Jesusan arunakaparjamaxa, ¿kunjamäpxatapatsa arkinakaparux uñtʼasi?

 JEHOVÁ DIOSAN Qhanañchirinakapax utat uta yatiyirit uñtʼatätanwa. Ukhamäkipansa, Jesucristox chiqpach arkirinakajax yaqha luräwit uñtʼatäpxani sasaw säna. Jupax akham sänwa: “Aka machaq mandamientwa churapxsma: Maynit maynikama munasipxam. Kunjämtix nayax munasipxsma, ukhama jumanakax maynit maynikam munasipxañamarakiwa. Jumanakatix maynit maynikama munasipxätaxa, taqiniw amuyapxani nayan discipulonakaxäpxatama” sasa (Juan 13:34, 35).

2, 3. Tama taypin munasiñ utjatap uñjasaxa, ¿jaqinakax kunjamsa jikxatasipxaspa?

² Kunjamtï chiqpach cristianonakax munasipki ukham munasiñax janiw akapachanx utjkiti. Uka munasiñaw Jehová Diosar luqtirinakaparux mayachtʼi ukat suma chuyman jaqinakarux tamar jutapxañapatakis yanaptʼaraki. Camerún markankir Marcelinon sarnaqäwipaw uk sum uñachtʼayistu, jupax irnaqäwipan mä chijir purisaw juykhuptatayna. Uka qhipatxa jaqinakax layqätapatwa ukham juykhuptawayi sasaw parlapxäna. Ukampis iglesiapan pastorapasa ukat uka iglesiar sarir yaqhip jaqinakasa, chuymachtʼañat sipans iglesiat jaqsupxatayna. Uka qhipatsti, Jehová Diosan mä Qhanañchiripaw tantachäwir jawstʼatayna, ukampis jupax janiw sarañ munkanti, jaqsupxarakitaspaw sasaw axsarayasïna.

³ Qhipatxa, Marcelinox Tantachasiñ Utar sarañwa amtawayatayna, ukat kunja munasiñampis jupar katuqtʼapxäna uk uñjasax wal muspharäna. Bibliat apstʼat yatichäwinakap istʼasax wali chuymachtʼataw jikxatasirakïna. Ukat taqpach tantachäwinakaruw sarxäna, Diosar yupaychañ tuqit nayrar sartasax 2006 maranwa bautisasiwayäna. Jichhax chiqa yatichäwinakatxa familiaparu ukat vecinonakaparuw yatiyaski ukat waljaniruw Bibliat yatichaskaraki. Bibliat yatiqirinakapax kunjamtï jupax Diosan luqtirinakap taypin wali munata jikxastaskänxa ukham jikxatasipxañapwa munaraki.

4. Pablox “munasiñan sarnaqapxam” sasaw iwxtʼistu, ¿kunatsa uka iwxtʼar istʼañasa?

⁴ Cristianonakax maynit maynikam munasiritänwa ukaw wali askipunixa, ukampis uka munasiñax thayaraspawa. Amuytʼañataki, mä thaya arumanxa jaqinakax nina aqkiriruw juntʼurtasir sarañ yatipxi. Ukampis ninan aqaskakiñapatak jan khitis phäñamp apxatkaspa ukhaxa jiwarxaspawa. Ukhamarakiwa, mayachkistu uka munasiñ jan thayarañapatakix sapa mayni yanaptʼaraksna. ¿Kunas lurañasäspa? Uka tuqitxa apóstol Pablox akham siwa: “Munasiñan jakapxam, kunjämtix Cristo Tatitux munaskistu ukhama. Jupax jiwasanak laykuw jakañap aptʼasi, mä wilañchat ovejar uñtata, Diosatak suma qʼapkir ofrenda luqtasa” sasa (Efe. 5:2). ¿Kunjamsa ‘munasiñan jakaskaksna’? Jichhax uka jisktʼaruw qhanañchasiskani.

Taqinir munasipxarakim

5, 6. ¿Kunatsa Pablox Corintonkirinakarux taqinir munasipxam sasax sispachäna?

⁵ Pablox Corintonkir cristianonakarux akham sasaw qillqäna: “Nanakan arsuñajax utjapxituwa jumanakatakixa Corintonaka; chuymanakajaxa jitjayatawa. Janiw nanakanxa kʼullkʼthapitäpktati [nanakax munasipxsmawa], jan ukasti jumanakan chuymanakamanwa kʼullkʼthapitäpxtaxa [jumanakkamaw jan munasipktati]. Ukhamasti ukhamat ukhama kuttayañatakisti  (wawanakarjamaw parlapxsma) jumanakax chuymanakamxa jitjayasipxarakim [‘taqinir munasipxarakim’, NM]” sasa (2 Cor. 6:11-13 MT). ¿Kunatsa Pablox taqinir munasipxam sispachäna?

⁶ Corinto markankir tamax kunjamsa qalltawayäna uk amtañäni. Pablox Corinto markarux 50 mara tukuyaruw purïna, yatiyañ qalltkän ukhax yaqhip jaqinakax jupa contraw saytʼapxäna, ukampis jupax yatiyaskakïnwa. Jukʼa tiempotxa waljaniw suma yatiyäwinakarux iyawsapxäna. Apóstol Pablox mä mara chikataniw uka markan qhiparäna, ukäñkamax uka machaq tamar yatichañataki ukat chʼamañchtʼañatakiw chʼamachasïna. Chiqpachansa, Corintonkir jilat kullakanakarux wal munasïna (Hech. 18:5, 6, 9-11). Pablox kunaymanitwa jupanakarux yanaptʼäna, ukatwa jupanakax munasiñampi uñjapxañaparakïna. Ukampis yaqhipax jupatakiw chuym ustʼayasipxäna, kunattix inas jan wali luratanakapat jan iwxtʼayasiñ munapkchïnti (1 Cor. 5:1-5; 6:1-10). Jan ukasti, inas kʼarinak parlir jaqinakar istʼapxatap layku jupatak chuyma ustʼatäpxarakchïna (2 Cor. 11:5, 6). Jan waltʼäwinakas utjchïnxa, jilat kullakanakax jupar munasipxañapwa Pablox munäna. Ukatwa taqinir munasipxam sasax säna ukat jupampisa ukat mayni jilat kullakanakampis wali sum apasipxañapwa munarakïna.

7. ¿Kunjamatsa taqi jilat kullakanakarux munasiñ jukʼamp uñachtʼaysna?

⁷ Jiwasasti, ¿kunjamatsa taqi jilat kullakanakasarux jukʼamp munassna? Chiqansa taqiniw mitanakasampi jiwasjam sarnaqäwinïpki jan ukax jiwasjam amtanïpki ukanakampïñ muntanxa. Ukampis jupanakampik chikachasisax mayninakat jayarstʼañäni ukhaxa, ¿kun lurañas wakisispa? Jukʼamp amigonak jikxatañatakiw chʼamachasiñasa. Akham jisktʼasiñasawa: “¿Amigonakajampikit yatiyir sartxa? Kusistʼañ amtktxa ukhaxa, ¿mayni jilat kullakanakar jawstʼañax chʼamati? Tantachasiñ Utan machaqanakamp jan chikachasisaxa, ¿jupanakax amigojäpxañapatakix chʼamachipxañapaw sasint amuytxa? Tamanxa wayn tawaqüskpasa jilïr jilat kullakäskpasa, ¿taqinimpit aruntastxa?” sasa.

8, 9. Romanos 15:7 qillqatankki uka iwxtʼaxa, ¿kunjamsa jilat kullakanakar jukʼamp munasiñ uñachtʼayañatakix yanaptʼistu?

⁸ Pablox Romankirinakar qillqkäna uka arunakaw jiwasamp chika luqtasipki uka jilat kullakanakar sum uñjañatak yanaptʼistu (Romanos 15:7 liytʼasiñapawa). Griego arut “katuqasipxam” sas jaqukipatäki uka aruxa, “munasiñampi maynir katuqtʼaña ukat mayni amigonakasamp chika amigosäñapatak katuqtʼaña” sañ muni. Bibliax qillqaskäna uka tiemponakanxa, maynix utaparu amigonakapar jawstʼasax walikpun jutapxtax sasin wali munasiñampipuniw katuqtʼirïna. Ukham munasiñ chuymampiw Jesusax tamar katuqtʼistu, ukhamarakiw jiwasax jilat kullakanakasarux munasiñampi uñjañasa.

⁹ Tantachasiñ Utansa jan ukax yaqha chiqansa jilat kullakanakar aruntkasaxa, jaya tiempo jan jikiskta jan ukax jaya tiempo jan parlksta jupanakamp parltʼañatakixa, ¿janit mä qhawqha minutonak apstʼaskasma? Sapa tantachäwintï uk lurasmaxa, mä qhawqha tiempot niya taqpachanimpiw wali sum parltʼasisma. Mä tantachäwinaki taqinimpi jan parltʼasiwayksta ukhaxa,  janiw llakisiñamäkiti; janirakiw taqi tantachäwinakan maynir jan aruntawayksta ukhas khitis mayjtʼasiñapäkiti.

10. ¿Kunsa Diosan markapan jikxatsna, ukat ukxa kunjamatsa wali askirjam uñjsna?

¹⁰ Mayninakamp sum parltʼasiñatakisa suma amigonïñasatakis arunttʼasiñax wakisipuniwa. Amuytʼañataki, jachʼa tantachäwinakan yaqha jilat kullakanakar jakʼachtʼassna ukat jupanakamp uñtʼasisin parlañ qalltsna ukhaxa, machaq amigonakwa jikxatsna ukat jupanakamp wasitat jikistʼañsa munarakiñäniwa. Tantachasiñ Utanak lurañ yanaptʼapki jan ukax chijinakan uñjasipki uka jilat kullakanakar yanaptʼirinakax suma askinakwa jikxatapxi. Ukaw jupanakkam sum uñtʼasiñ yanaptʼi ukhamat suma amigonaks jikxatapxaraki. Chiqpachansa, Jehová Diosan markapanxa suma amigonakwa jikxatsna. Jiwasatï taqi jilat kullakanakasar munasiñäni ukat jukʼamp amigonakanïñasatak chʼamachasiñäni ukhaxa, Diosan markapan munasiñax mayachkistu ukax jukʼampiw jilxattani.

Mayninakatakix tiempo apstʼasipxañäni

11. Marcos 10:13-16 qillqataxa, ¿Jesusax kunjam chuymanïtapsa uñachtʼayistu?

¹¹ Jaqinakax Jesusarux jakʼachtʼasipxakirïnwa, jiwasax jupjamäñasatakiw chʼamachasiñasa. Mä kutix walja awk taykanakaw wawanakapar Jesusan ukar irpapxäna, ukampis arkirinakapax jarktʼapxänwa. Uk uñjasaxa, ¿Jesusax kuns luräna? “Wawanakax nayan ukar jutasipkpan sam; jan jarkʼapxamti, jupanakjamankiwa Diosan reinopaxa” sasaw säna. Ukatsti “wawanakar ichxarusinsti, amparapamp luqxatasaw jupanakarux bendecirakïna” (Mar. 10:13-16). Suma Yatichirix jupanakar wali munasiñampi uñjatapatxa wali kusisitapuniw uka wawanakax jikxatasipxpachäna.

12. ¿Kunanakas mayninakamp parltʼasiñ jarktʼistaspa?

¹² Sapa mayniw akham jisktʼasiñasa: “¿Mayninakax nayamp parltʼañatak jakʼachasipxituti, jan tiemponjam sarnaqiritch uñtʼapxitu?” sasa. Yaqhip luräwinakax janis jan waljamäkchixa, mayninakamp parltʼasiñasatakiw jarktʼistaspa. Sañäni, mayninakampïskasax celularat parlasksna, audifonomp musicanaks ischʼukisksnaxa, janis jupanakampïñ munksna ukhamwa amuyapxaspa. Ukat mayninakax agenda electrónica satäkis uk jan tiemponi uñaskir uñjapxistaspa ukhaxa, janis jupanakamp parlañ munksna ukham amuyapxaspa. Chiqansa “amuktʼañ horasa[x]” utjaspawa. Ukampis yaqhanakampïskasax ‘parlañ horasäspawa’ (Ecl. 3:7). Inas maynix akham sischispa: “Janiw mayninakamp parlañ munirïkti” jan ukax “Alwanakax janipuniw khitimpis parltʼañatak ganasax utjkituti” sasa. Ukampis parltʼañatak chʼamachasiñaw wali askïspa; ukhamatwa mayninakar munasitas uñachtʼayañäni, kunattix munasiñax “janirakiw kunsa jupatakiki” thaqkiti (1 Cor. 13:5).

13. Pablon arunakaparjamaxa, ¿kunjamsa Timoteox jilat kullakanakar uñjañapäna?

¹³ Tamankir taqi jilat kullakanakar respetompi uñjañapatakiw Pablox Timoteorux yanaptʼäna (1 Timoteo 5:1, 2 liytʼasiñapawa). Jiwasax ukham lurañasaraki: jilïr jilat kullakanakarux awk taykasarjam uñjañasa ukat wayn tawaqunakarusti, jila kullakanakasarjamaraki. Ukhamtï uñjañänixa, janiw khitisa jan uñtʼat jaqirjam uñjkistaniti.

14. Chʼamañchtʼkir arunakampi parlasaxa, ¿kuna askinaksa jikxatsna?

¹⁴ Chʼamañchtʼkir arunakamp parlañ yatinuqtañäni ukhaxa, maynirux Diosar luqtäwipanwa chʼamañchtʼañäni ukat kusisita jikxatasiñapatakis yanaptʼarakiñäniwa. Mä jilatax Betel utan irnaqañ qalltkäna ukhaxa, kunjamsa Betel utan wali experienciani jilat kullakanakax wali chʼamañchtʼkir arunakampi parltʼapxäna ukwa wali kusisit amtasi. Uka arunakaw Betel utan irnaqtʼir mayni jilat kullakanakampix mä familiäkaspas ukham jikxatasiñapatakix jupar yanaptʼäna. Jichhasti, ukhamarakiw yaqha betelitanakarux yanaptʼaski.

Altʼat chuymanïñaw sumankthapiñatakix yanaptʼistu

15. Cristianonakkamaxa jan waltʼayasiñanakax utjaspawa, ¿khitinakan sarnaqäwipas uk uñachtʼayistu?

¹⁵ Nayra Filipos markanxa, pä cristiana kullakanakaw utjäna Evodia ukat Síntique satapxänwa, jupanakkamax janiw waltʼayasipkänti, amuyatax uk askichañax chʼamänwa (Fili. 4:2, 3).  Ukhamarakiw Pablomp Bernabeampix jupanakkam chʼaxwapxäna ukat jaljtapxäna, ukxa waljaniw yatxapxäna (Hech. 15:37-39). Cristianonakkamasa jan waltʼayasiñanakax utjaspawa, ukwa uka sarnaqäwinakax uñachtʼayistu. Chiqansa, Jehová Diosaw jan waltäw askichañsa sumankthapiñsa yanaptʼistu, ukampis Jupax may jiwasat mayistu.

16, 17. 1) Jan waltʼayasiñanak askichañatakixa, ¿kunatsa altʼat chuymanïñax wali wakiskirixa? 2) Jacobux Esaú jilapampi wasitat jikisipxatapaw kunatsa altʼat chuymanïñax wali askixa uk yatichistu, ¿kunatsa ukham sistanxa?

¹⁶ Kunjamtï mä auton motorap naktayañatakix mä llavex munaskixa, ukhamarakiw jan waltʼäwi askichañatakix altʼat chuymanïñax munasi (Santiago 4:10 liytʼasiñapawa). Chiqpachansa, altʼat chuymanïñaw Biblian yatichäwinakaparjam sarnaqañ yanaptʼistu, ukhamat mayninakamp sumankthapiñasataki. Ukwa jichhax Bibliat apstʼat mä sarnaqäwit yatxatasax uñjañäni.

¹⁷ Jacobux jilïr yuqall wawar waktʼkäna uk katuqxäna ukhaxa, Esaú jilapax wal colerasisin jiwayañ munäna, ukatwa Jacobux yaqha tuqir tʼijtxäna. Pä tunka mara pasatatwa jikisxapxäna, ukampis janïr jikiskasax Jacobux “wal axsaräna, wali mayjtʼatarakiw suytʼäna”, kunattix jilapamp jiwayatäñwa axsaräna. Ukatxa Jacobux “pʼiqipampi uraqir puriñkamaw paqallqu kuti altʼasïna, jilapan jakʼapankxäna ukkhakam”. Esaú jilapax janiw ukham lurañap suykänti. Ukham luratapatxa, ¿kunas pasäna? “Esaú jilapax jikxatiriw jaläna, qhumantasinsti jampʼattʼarakïnwa. Panpachaniw jachapxarakïna.” Esaú chachan chuymapan uñisiñax utjaskchïnsa, Jacobun altʼat chuymanïtapaw jupar llampʼuchjäna, ukhamatwa kuna jan waltʼäwirus jan puripkänti (Gén. 27:41; 32:3-8; 33:3, 4).

18, 19. 1) Mä jilatampi jan ukax mä kullakampi jan waltʼayasiñ utjchi ukhaxa, ¿kunatsa jupampix nayraqat parltʼañasax wakisi ukat Biblian iwxanakaparjam askichañasa? 2) Maynitï jan waltʼäw jan askichañ munkaspa ukhaxa, ¿kunatsa uk askichañatakix chʼamachasiskakiñasa?

¹⁸ Jan waltʼayasiñanak askichañatakix Biblianwa walja iwxtʼäwinakax utji (Mat. 5:23, 24; 18:15-17; Efe. 4:26, 27). * Ukampis uka iwxanakarjam sarnaqañatak jan altʼat chuymanïksna ukhaxa, maynimp sumankthapiñax wali chʼamäspawa. Maynin altʼat chuymanïñap suyaskañäni ukhaxa, jan waltʼäwinakxa janiw askichkañäniti, jiwasax altʼat chuymampi uk askichañatakix chʼamachasiraksnawa.

¹⁹ Jan waltʼäwinak askichañatak inamay chʼamachasitas amuyasiñäni ukhaxa, ukanak askichañatakix chʼamachasiskakiñasawa. Inas chuyma ustʼayirin jan wali luratapat arrepentisiñapatakix tiempox munaschini. Joseyan jilanakapat amtañäni, jilapar jan wal lurapxatapat  arrepentisipxañapatakix walja tiempow pasäna. Ukat faraonax Joseyar jachʼa jilïrit uttʼayxäna uka qhipatxa, Joseyax jilanakapar katuqtʼasinxa achiktʼasitanakapar istʼänwa ukat jan wali luratanakapsa pampacharakïnwa. Qhipatsti jupanakax mä jachʼa markaruw tukupxäna, ukhamat Jehová Diosan sutip apañxa mä aski churäwjam katuqapxarakïna (Gén. 50:15-21). Amtapxapuniñäni, jilat kullakanakasamp sum apasiñänixa, kusisita ukat mayachtʼataw taman sarnaqañäni (Colosenses 3:12-14).

“Chiqpach munasiñasax luräwinakasan[wa]” uñjasiñapa

20, 21. Jesusax apostolanakapan kayunakap jariqasaxa, ¿kunsa yatichawayistu?

²⁰ Janïr jiwkasax 12 apostolanakapan kayunakap jariqañ tukuyasax akham sasaw Jesusax jupanakar säna: “Nayax mä uñachtʼäwi churapxsma, kunjämtï nayax lurktxa ukham jumanakax lurapxañamatakiraki” sasa (Juan 13:15). Jesusax janiw phuqañ laykukisa ni jupanakar suma chuymampi uñjatap laykukis ukham lurkänti. Janïr uka luräwit parlkasaxa, apóstol Juanax akham sasaw qillqäna: “[Jesusax] aka uraqinkki uka jupankirinakarux munasipunïnwa. Uka jachʼa munasiñapsti qhipakamarakiw uñachtʼayäna” sasa (Juan 13:1). Arkirinakapar munasitap laykuw kayunakap jariqtʼäna, uywtanakakiw uk luräpxirïna. Jichhasti jupanakarurakiw luräwinakampi munasiñ uñachtʼayasipxañapax waktʼäna. Chiqansa, chiqpach munasiñaw jilat kullakanakar yanaptʼañatakix wiytistu.

²¹ Kunatsa Jesusax arkirinakapan kayup jariqäna ukxa apóstol Pedrox wali sum amuyäna, kunattix juparus jariqarakïnwa. Ukatwa akham sas qillqäna: ‘Jichhax jumanakaxa, qullan ajayu tuqi Tatitun arunakap istʼasinxa, almanakamxa qʼumachasxapxtawa jilatanakaru chiqpachan munañataki. Ukhamax maynit maynikamaw munasipxañama taqi chuyma, ukhamarak taqi chʼamampi’ sasa (1 Ped. 1:22). Jesusax arkirinakapan kayunakap jariqkän ukhaxa, apóstol Juanax ukankarakïnwa, ukatwa cristianonakarux akham sas amtayäna: “Wawanakaxa, jiwasan munasiñasax janiw lakakïñapäkiti; jan ukasti chiqpach munasiñasax luräwinakasana uñjasiñapawa” sasa (1 Juan 3:18). Ukhamasti, luräwinakasampi jilat kullakanakar munasitas uñachtʼayapxañäni.

[Qhanañchäwi]

¿Amttati?

• ¿Kunjamatsa taqi jilat kullakanakar jukʼamp munassna?

• Jilat kullakanakamp jukʼamp parltʼañatakixa, ¿kun lurañas wakisispa?

• ¿Kunjamsa altʼat chuymanïñax maynimp sumankthapiñatakix yanaptʼistu?

• ¿Kunasa jilat kullakanakar sum uñjanatakix wiytistani?

[Jisktʼanaka]

[21 janan fotopa]

Jilat kullakanakarux munasiñampi katuqtʼapxañäni

[23 janan fotopa]

Mayninakar istʼañatakix tiempo apstʼasiñamapuniwa