Uqar jilat kullakanakarux munasiñamp uñjapxañäni

JEHOVÁ DIOSAN markapanxa walja jilat kullakanakaw utji. Yupaychañ tuqitxa, Diosat jan jithiqtir mä jachʼa familiat jutirïtanwa, chiqansa Samuel, David, Sansón, Rahab, Moisés, Abrahán, Sara, Noé ukat Abel jupanakat jutirïtanwa. Uka jachʼa familia taypinxa walja uqar jilat kullakanakaw utjaraki. Amuytʼañataki, Mongolia markanxa, Jehová Diosan nayrïr Qhanañchirinakapax jaqichasit uqar chacha warmïnwa. Ukat uqar jilat kullakanakax Rusia markan Diosat jan jithiqtas luqtapxatapatwa, Tribunal Europeo de Derechos Humanos ukan atipjawaytanxa.

Jichhürunakanxa, ‘Amuyasiri Chiqapa Uywataxa’ uqaranakatakix Bibliat apstʼat yanaptʼanakwa lurawayi ukatxa tamanak uttʼayi jachʼa tantachäwinaksa wakicharaki (Mat. 24:45, MT). Taqi ukanakaw uqaranakarux walpun yanaptʼawayi. * Uqaranakataki janïr uka yanaptʼanak utjkän ukhaxa, Jehová Diosan chiqa yatichäwinakap yatiqañasa yupaychäwin nayrar sartañasa, ¿jupanakatakix kunjamakïkäna? sasin janit jisktʼasirïkta. Kawkhantï qamaskta uka chiqan qamasir uqʼaranakar yanaptʼañatakixa, ¿kunanaks lurasma?

Yanaptʼanakax janïr utjkäna ukha

Kunjamsa Jehová Diosarux uñtʼawayapxta sasin walja maranak Diosar luqtiri uqar jilat kullakanakar jisktʼasma ukhaxa, ¿kamsapxiristamsa? Diosax mä sutinïtap yatisax kunjamsa jikxatasipxäna, uk yatiñakiw nayra jakäwip jaytañataki ukat uqaranakataki janïr videonakax utjkäna uka maranakan Diosar walja maranak luqtaskakiñatakis yanaptʼäna, ukanakwa yatiyapxiristam. Ukat uqaranakataki jan jaqukipaskäna ni tantachäwinakas utjkäna ukhaxa, kunjamakis jikxatasipxäna ukanak inas yatiyapxarakiristam. Ukat tantachäwinakan yatiqapxañapatakix mayniw jupanakamp quntʼasis mä papelar qillqtʼarapirïna, ukhamat kuntï yatichaski uk amuyapxañapataki. Uqaranakataki jaqukipirix janïr utjkäna ukhaw mä jilatax paqallq mara, Biblian chiqa yatichäwinakap ukham yatiqawayatayna.

Chuymankipstat uqar jilat kullakanakaxa, jan uqaräpki ukanakaru Diosan arunakap yatiyañax kunja chʼamänsa ukxa sum amtasipxi. Mä amparanxa jaqinakan liytʼapxañapataki jukʼa arunakampik papelar qillqtʼat aptʼasita, ukatsti maysa amparanxa Yatiyañataki ukat ¡Despertad! sat revistanak aptʼataw yatiyapxirïna. Ukat yaqha uqararu Bibliat yatichañax wali chʼamänwa, kunattix Bibliat apstʼat qillqatanakakiw utjäna, uka qillqatatxa janiw yatichiris ni yatiqiris sum amuyapkänti. Ukhamarusa, inas jupanakax ak amtapxarakchi, kunapachatï yaqhanakar jan sum amuytʼayañjamän ukhaxa, wali llakitaw jikxatasipxäna, ukhaman uñjasisax Diosan chiqa yatichäwinakapat yatiyaskakiñax wali chʼamänwa. Ukat kunatsa Jehová Diosar taqi chuymampi munasiñax ukxa wali sum yatipxi, ukhamarus mä yatichäwit jan sum amuytʼasax kunjamakis jikxatasipxi uksa sum yatipxaraki.

Ukham jan walinakan uñjasisasa uqar jilat kullakanakax janipuniw Jehová Diosat jithiqtapkiti (Job 2:3). Jehová Diosaruw taqi chuyma suytʼapxaraki (Sal. 37:7). Jupaw uqar jilat kullakanakarux bendiciski ukat kuntï katuqañ munapkäna ukat sipans jukʼampwa katuqasipki.

Kunjamsa mä uqar jilatax familiapar taqi chuyma yanaptʼañatakix chʼamachasïna uka tuqit  parltʼañäni. Uqaranakatak videox janïr utjkan ukhasa, jupax familiapar Bibliat yatichapunirïnwa. Yuqapax akham sasaw amti: “Tatajatakix familian yatichañax wali chʼamänwa, kunattix Bibliat apstʼat qillqatanakakiw nänakar yatichañatakix utjäna. Ukat uka qillqatatxa janiw sum amuykänti. Ukat nänakas jukʼamp chʼam tukuyapxirïta. Jan sum qhanañchtʼapkitäna ukhaxa, jankʼakiw pantjastaw janiw ukhamäkiti sasin sapxirïta. Ukhamäkipansa, Bibliat yatichapxapunirïtanwa, inglés aru jan sum amuyatapa jan walin uñjaskchïnsa, Jehová Diosar jukʼamp sum uñtʼapxañajaw jupatakix jukʼamp askïnxa” sasa.

Brooklyn (Nueva York) markan jakasiri, paqallq tunka jila marani Richard sat jilatat parltʼarakiñäni. Jupax juykhuraki uqararakiwa, ukampis tantachäwinakat jan faltasirit uñtʼatawa. Tantachäwir sarañatakixa, sapakiw uraq manqhnäm sarir trenar makatawayi ukat kawkhar saraqañapäkitix uk amuyañatakix qhawqha chiqansa trenax saytʼi uk jakhusaw amuytʼasiraki. Mä kutix juyphi pachanx walpunwa khununtäna, ukatwa tantachäwix jan apasxänti. Tamankir jilat kullakanakarux taqpachaniruw yatiyasïna, ukampis Richard jilatax janiw uk yatkänti. Ukat jilat kullakanakax jan yatitap amuyasaxa, thaqhiriw mistupxäna ukat Tantachasiñ Uta punkunwa wali pacienciampi punku llawirasiñap suyaskir jikxatapxäna. Kunatsa akham thayan utat mistsunta sas jisktʼapxäna ukhaxa, akham sänwa: “Jehová Diosar munasitaj laykuw mistsuntxa” sasa.

¿Kunsa jumax lurasma?

Kawkhantï jakaskta uka chiqan uqaranakax utjchi ukhaxa, ¿janit amparamp parlañ yatiqañatak chʼamachaskasma? Uqaranakax pacienciampi ukat munasiñampiw maynirux amparamp parlañ yatichañ yatipxi. Jumax yatiyir sarkasina jan ukax mä akatjamat mä uqaramp jikisisma ukhaxa, ¿kuns lurasma? Jupampi parltʼañxa kunjamats yantʼañamapuniwa. Ukatakix ajan unxtayas amparamp parltʼañ yantʼasma, qillqtʼarapisma jan ukax dibujonakampi, fotonakampi, jan ukax taqi ukanakampiw kuntï sañ munkta uk yatiyasma. Bibliat jan yatiqañ munkchi ukhasa, uqara jan ukax amparamp parlañ yatki Jehová Diosan mä Qhanañchiriparuw uka uqarar jikxatatam yatiyañama. ¿Kunats ukham yatiyañama? Kunattix pachpa arupat yatiyktan ukhaxa, jupanakatakix wali askiwa.

Inas jumax amparamp parlañ yatiqasksta ukat amparamp parlapki uka tantachäwir saraskaraksta. ¿Kunjamatsa uka arxa wali sum yatsusma? Inas jan uqaräpki uka jilat kullakanakampi parltʼañjamäskchi, ukampis ¿janit amparampik parltʼañatak chʼamachaskasma? Ukhamatwa uqaranakjam parltʼañsa amuyañsa yatiqarakïta. Ukat inas awisax parltʼañak munxchisma. Ukampisa, kunjamtï yaqha aru sum yatiqañatakix wal chʼamachasiñäkixa, ukhamarakiw amparamp sum parlañ yatiqañatakix chʼamachasiñama.

Kunapachatï amparamp parlañatak wal chʼamachastan ukhaxa, uqar jilat kullakanakasar munatas ukat respetatassa uñachtʼaytanxa. Amuytʼañäni, irnaqir masinakapan jan ukax  escuelan yatiqir masinakapan parlatap jan sum amuyasax aynachtʼataw sapür jikxatasipxi. Mä uqar jilatax akham siwa: “Sapüruw jaqinakax nä ukhan parltʼasipxi. Sapa kutiw yaqhachata, sapaki ukham jikxatasta ukat colertʼasiraktwa. Kunjamtï awisax jikxataskt uk arsuñajatakix janiw arus utjkituti” sasa. Ukatwa, tantachäwinakasax kusiskaña ukat chʼamañchtʼkirïñapa, ukanwa uqar jilat kullakanakax Biblian suma yatichäwinakap yatiqapxi ukat mayni jilat kullanakampis munasiñampi parltʼasipxaraki (Juan 13:34, 35).

Yaqhip tamanakanxa uqar jilat kullakanakax utjarakiwa ukanakat janiw armasiñasäkiti. Chiqansa, kuntï yatichasiski ukxa uqaranakatakix jaqukipañaw wakisi. Ukhamax tantachäwinakan sum amuyapxañapatakix nayrïr asientonakaruw quntʼasipxi, ukhamat taman arstʼirirusa ukat amparamp parlir jaqukipirirusa sum uñjapxani. Tamankir mayni jilat kullakanakax jan kunakwa ukar yatinuqtapxi ukax walja chiqanakanwa uñjasi, kunattix janiw kunans jupanakarux pantjaykiti. Jachʼa Tantachäwinakanxa uka kipkarakiw lurasi. Amparamp parlañ aruru jaqukipir jilat kullakanakax kuntï yatichaski ukxa qhana amuytʼkaña ukat kunjamtï mä uqarax amparamp parltʼaskaspa ukham jaqukipañatakiw wal chʼamachasipxi, ukaw wali askipunixa.

Tamamanxa inas amparamp parliri mä grupotaki jan ukax mä qhawqhanitaki arstʼäwinakax jaqukipaschi. Uka uqar jilat kullakanakat llakitam uñachtʼayañatakixa, ¿kuns lurasma? Utamaruw jawstʼasma ukat mä qhawqha señanak yatiqasma ukaxa wali askïspawa. Uqaranakampix janiw parltʼañjamäkit sasax janiw amuyañamäkiti. Jupanakamp parltʼañatakix chʼamachasismawa, ukat jupanakar munasiñ uñachtʼayäta ukhax wali kusisitaw jikxatasïta (1 Juan 4:8). Uqar jilat kullakanakatxa wali askinakwa yatiqsna. Jupanakax parltʼasiri, wali amuytʼasiri ukat kʼuchi chuymanïpxiwa. Uqar awk taykan mä jilatax akham siwa: “Uqaranak taypinwa jilsuwaytxa kuntï nayax jan churirjamäktxa ukwa jupanakax churapxitu. Walpunwa uqar jilat kullakanakat yatiqassna” sasa.

Uqaräpas janis uqaräpan Jehová Diosax taqi chuym luqtirinakaruw munasi. Uqar jilat kullakanakasan iyawsäwipasa ukat Diosat jan jithiqtapxatapasa Jehová Diosan markapatakix wali askipuniwa. Ukatwa, jupanakarux ¡wal munasiñasa!

[Qhanañchäwi]

[31 janan fotopa]

Amparamp parlasatï uqaranakar yatiyañänixa, Diosan Apnaqäwipat wal yatiqañ munapxaspa

[32 janan fotonakapa]

Tantachäwinakaw uqar jilat kullakanakarux chʼamañchtʼi