¿Jumax amttati?

¿Aka qhipa phaxsinakan mistkäna Yatiyañataki sat revista liytʼtati? Ukhamächi ukhaxa, aka jisktʼanakar qhanañchtʼma:

• ¿Kunatsa milagronak lurañax tukusxi?

Kunjamtï mä awkix wawapar jiltataparjam suma jaqïñapatak yatichkixa, ukhamarakiw tamax sum uttʼayatäñapatakixa Jehová Diosax yatichäna. Ukhamax Diosan arunakap parltʼañatak chʼam katuqapkäna, milagronak lurañataki ukat jan uñtʼat arunak parlañataki churäwi katuqapkäna ukanakax ‘tukusxaniwa’, sasaw Pablox arsuwayäna (1 Corintios 13:8, MT) (7-9, 28, 29 jananaka).

• Pedrox uma patan sarnaqkasin chhaqhantäna ukhax Jesusaw yanaptʼäna, ¿kunsa jiwasax ukat yatiqsna? (Mat. 14:28-31.)

Jilat kullakanakasan iyawsäwip aynachtʼatjam amuyañäni ukhaxa, yanaptʼañasawa ukat chʼamañchtʼarakiñasawa (9/15, 8 jana).

• ¿Kunsa Jehová Diosax jiwasar qhispiyañataki lurawayi?

Abrahamax yuqapar sacrificion luqtañatak wakichkäna ukhax wali llakitaw jikxatasïna. Ukhamarakiw Jehová Diosax Yuqapar tʼaqhisiyapxäna, jiskʼachapxäna ukat jan wali jaqirjam jiwayapxäna ukhax wal llakisïna (9/15, 28-29 jananaka).

• ¿Kuntï Rahab tawaqux lurkatayna ukanakat kunsa yatiqsna?

Jehová Diosax markap laykux kuns luräna, uka sarnaqäwinakarux sum jupax istʼ äna. Ukat yanaptʼañjamäna ukhax Diosan luqtirinakaparux yanaptʼarakïnwa. Ukat Israel markamp chikaw Jehová Diosar luqtxäna (10-12, 12 ukat 13 jananaka).

• ¿Alaxpachan wiñay jakañaw utjani sänti Jesusaxa?

Jïsa, akham sasaw chiqa chuymani arkirinakaparux säna: “Awkixan utapanxa walja utjäwinakaw jakañatak utji [...;] mä utjäwi jumanakatak wakichiriw sarä” sasa (Juan 14:2). Ukampis mä qhawqhanikiw alaxpachar sarapxañapäna. Ukatwa, Jesusax Lucas 12:32 qillqatarjamax “jiskʼa tama” sasin jupanakar säna (10-12, 18 jana).

• ¿Kunjamatsa uñisirinakasan pʼiqiparux nina sankʼanakampi qutuchxattanxa?

Kunapachatï askinak lurtan ukhaxa, nina sankʼampis uñisirinakar sumaptayksna, jan wali amtanakapsa umatatayksna ukhamawa. Ukhamatwa yaqhipax Diosar jakʼachasiñsa jan ukax Bibliat yatxatañsa munapxaspa (10/15, 8 jana).

• ¿Proverbios 24:27 jiskʼa tʼaqan “utama lurasismaxa” siski uka arunakat kunsa yatiqsna?

Jaqichasiñ munir mä chachaxa, kunanak lurañapatï wakiskani ukanakamp phuqañatakix wakichtʼatäñapawa. Ukatxa mä familiar sum uñjañatakisa ukat pʼiqtʼañatakis wakichatäñaparakiwa (10/15, 12 jana).

• ¿Jehová Diosampi Jesusampix kunjamsa jaqinakar uñjapxistu?

Jehová Diosax taqi kunxaru munañani jachʼa Diosäkchisa, suma chuymampi ukat respetompipuniw jaqinakar uñji. Amuytʼañataki, Abrahamampi Moisesamp parlkasaxa hebreo arut mä aru aytäna uka arux ‘mirä amp suma’, sasaw jaqukipasiraki (Gén. 13:14 ukat Éxo. 4:6, NM). Jehová Diosax jaqinakar istʼarakiwa (Gén. 18:23-32). Jesusax ukhamarakiw luräna, mayninakar yanaptʼañatakix jankʼakïnwa, sutinakapat kun aytirïna (11/15, 25 jana).

• ¿Kunjam chuyman jaqinakarus Jehová Diosax munasi?

Jupar luqtirinakax llampʼu chuymanïpxañapa, sumankañ munirïpxañapwa Jehová Diosax muni. Mariampi Aaronampixa, “Moisés [sullkap] contraw parlapxäna” (Núm. 12:1). Moisés contra parlasaxa Jehová Dios contraw parlasipkäna (10-12, 20 jana).