¿Chiqa cristianjamat sarnaqasktanxa?
¿Chiqa cristianjamat sarnaqasktanxa?
“Taqi suma quqaxa suma achunakwa achu, jan suma quqanakasti uka kikpa jan wali achunakarakwa achuraki.” (MAT. 7:17)
1, 2. Aka qhipa urunakanxa, ¿kunjamatsa chiqpach cristianonakar uñtʼasi?
KHITINAKAS chiqpach cristianüpxi ukax luräwinakapana ukat yatichäwinakapan uñjasini sasaw Jesusax säna (Mat. 7:15-17, 20). Kuntï maynix chuymapan amuyki ukarjamaw kuns luri ukat parlaraki (Mat. 15:18, 19). Jïsa, Dios tuqit chiq yatxatirixa “suma achunakwa [churi]” ukat kʼari yatichäwinak yatiqiristi “jan wali achunakarakwa [churi]”.
2 Aka qhipa urunakanxa, qhanaw ukax uñjasi (Daniel 12:3, 10 liytʼasiñapawa). Kʼari cristianonakax Diosar yupaychiris tukupkchixa, janiw taqi kun Lurir chiqpach Diosar uñtʼapkiti. Ukampis khitinakatï Diosar sum uñtʼapki ukanakaxa ‘ajayuna, ukhamarak chiqa kankañampin yupaychapxi’, ukat Cristot yatiqasiñatakiw chʼamachasipxaraki (Juan 4:24; 2 Tim. 3:1-5). Ukampis ¿sapa maynix kuna kasta cristianütansa? Kunjamatsa Jesusan chiqa arkiripätas uñachtʼaysna ukwa aka yatichäwin phisqa tuqit yatxatañäni. Yatxatkasax akham jisktʼasiñasawa: “¿Diosan munañaparjamat sarnaqasktxa ukat kuntï Bibliax yatichki ukpunti yatichtxa? ¿Sarnaqataj uñjasax mayninakax Diosar jakʼachasipxaspati?” sasa.
Diosan Aruparjam sarnaqañäni
3. ¿Khitinakarus Jehová Diosax munasi, ukat cristianjamax kunjam sarnaqañasasa?
3 Jesusax akham sänwa: “Janiw khitinakatix: ‘Tatay, Tatay’ siskitus ukanakax taqini alaxpach markarux mantkaniti, jan ukasti khitinakatix Awkixan munañapa lurki ukanakakiw mantani” sasa (Mat. 7:21). Ukhamäskapuniwa, Jehová Diosax janiw chiqa cristianütwa sirinakarukix munaskiti; jan ukasti, khitinakatï chiqa cristianjam sarnaqapki ukanakaruw munasi. Jesusan chiqa arkirinakapax Diosan Aruparjamapuniw taqi kunan sarnaqapxi. Kusistʼañanakansa, irnaqäwinsa, jaqichasiñ tuqitsa ukat amigonaka jan ukax fiestanak tuqitsa ukat qullqi tuqitsa Diosan Aruparjamapuniw sarnaqapxi. Ukampis cristianütwa sasin aliqaki parlapki ukanakaxa, jan walinakampi phuqantat akapachan luräwinakaparjamaw sarnaqapxi ukat amuyapxaraki (Sal. 92:7).
4, 5. ¿Malaquías 3:18 qillqatax kunjamsa yanaptʼistu?
4 Malaquías profetax akham säna: “Ukapachaw jumanakax amuyasipxäta kunatix askïki, ukhamaraki kunatix jan askïki uksa, ukhamaraki khititix Diosaru yupaychki, jan yupaychki ukanaksa” sasa (Mal. 3:18). Uka arunakarjamax taqinis akham jisktʼasiñasawa: “¿Sum sarnaqañatakit chʼamachastxa, jan ukax akapachankir jaqinakjamätcha? ¿Irnaqir jan ukax yatiqir masinakamp sum apasiñat nayatakix nayranki? ¿Jan walinak utjipanxa janiw walïkit sistti, ukat qhanañchañjamäki ukhax Bibliampit qhanañchtxa?” sasa (1 Pedro 3:16 liytʼasiñapawa). Chiqas janiw wali wal tuktʼat sarnaqañ munktanti, janirakiw Diosar jan yupaychir jaqinakjamäñsa munktanti.
5 Ukat jumatix uka tuqinakan yanap munatam amuyassta ukhax Jehová Diosar mayisiñamawa ukat Bibliat yatiqañsa tantachäwinakar sarañsa janirakiw armasiñamäkiti, ukhamatwa chʼamañchtʼasïta. Biblian yatichäwinakap sum amuyasakiw ‘suma achunak’ uñachtʼayasma ukat ‘lakampi yupaychasma’, mä arunxa Diosan sutip yatiyasma (Heb. 13:15).
Diosan Apnaqäwipat yatiyapxanäni
6, 7. ¿Chiqa cristianonakax kuna tuqinakansa kʼari cristianonakat mayjäpxaraki?
6 “Wakisirakiw nayanxa Diosan reinopat yaqha markanakaru yatiyir sarañaxaxa, ukataki khitanitarakïtwa” sasaw Jesusax säna (Luc. 4:43). ¿Kunatsa Diosan Apnaqäwipatpun yatiyäna? Jupaw uka Apnaqäwin apnaqañapäna ukat jupamp chika alaxpachar sarañataki ajllitanakamp yanaptʼayasisaw Supayampir juchampirux tukjañapäna, ukhamatwa tʼaqhisiñax tukusiñapäna (Rom. 5:12; Apo. 20:10). Ukatwa, akapachan tukusiñapkam Diosan Apnaqäwipat yatiyir sarapxam sasin arkirinakapar säna (Mat. 24:14). Ukampis kʼari cristianonakax janiw uk phuqapkiti ni phuqapkaspasa. ¿Kunatsa? Uk kimsa tuqit amuytʼañäni. Nayraqatxa, kuntï jan amuyapki ukanakxa janiw yatiyapkaspati. Ukatxa janirakiw altʼat chuymanïpkiti, jan yäqasirinakan jiskʼachatas axsarxapxakispawa (Mat. 24:9; 1 Ped. 2:23). Ukxarusti janirakiw Jehová Diosan qullan ajayup katuqapkiti (Juan 14:16, 17).
7 Maysa tuqitxa, kunas Diosan Apnaqäwipaxa ukat kuns lurani ukanakxa, Jesusan chiqa arkirinakapax sum yatipxi. Ukatwa, uka Apnaqäwit yatiyañatakix wal chʼamachasipxi, ukat qullan ajayun yanaptʼataw Uraqpachan yatiyasipki (Zac. 4:6). Ukampis ¿kunjamsa sapa maynis luqtasktanxa? ¿Diosan Arupat yatiyirix sarapuntanti? ¿Sum yatiyañatakis walja tiempo yatiyir sarañatakis tiempo apstʼasisktanti? Ukat niyakixay Diosan Arupax ‘jakkiri ukat jachʼa chʼamanïchixa’, ¿kunjamtï Pablox Qullan Qillqatat yatichkäna ukham yatichañatakit chʼamachasiraktanxa? (Heb. 4:12; Hech. 17:2, 3.)
8, 9. 1) Yatiyir sarkasax Bibliat liytʼarapiñax wali askiwa, ¿kuna experiencianakas uk uñachtʼayi? 2) ¿Kunjamatsa jaqinakatakix Bibliat liytʼarapsna?
8 Mä jilatax utat uta sarkasaw católico mä jaqitaki Daniel 2:44 qillqat liytʼarapitayna, ukat Diosan Apnaqäwipax kunjamsa sumankañsa apanini ukat jan walinaksa tukjani, uka tuqinakatwa sum qhanañchtʼäna. Uk istʼasaxa, “walikpun Bibliat liytʼarapistaxa, janiw Bibliax ukham siw sasakix siskistati” sasaw uka jaqix säna. Ukat yaqha jilatax warmipamp yatiykasaw Ortodoxa Griega iglesiankir mä warmitakix Bibliat liytʼarapirakïna. Uka warmix kunayman tuqit jupanakar jisktʼatayna, uka jilat kullakax mayni jilatjamarakiw Bibliampi qhanañchapxäna. Qhipatxa akham sasaw uka warmix säna: “¿Kunatsa jumanakar istʼapxsma uk yatiptati? Bibliatwa liytʼarapipxistaxa, ukatwa istʼapxayäsma” sasa.
9 Chiqansa Bibliat apstʼat qillqatanakamp yatiyañas jaytañas wali askiwa. Ukampis Bibliat yatiyiriw sartanxa. ¿Jumax yatiyir sarkasax Bibliatpunti jaqinakatak liytʼarapirïta? Jan ukhamäkchixa, ¿uk lurañatak chʼamachasismati? Kunas Diosan Apnaqäwipaxa ukat uka apnaqäwix kunjamsa jan walinak chhaqtayani, inas uka tuqit parlir jiskʼa tʼaqanak Biblian thaqtawaychisma, ukat liytʼarapchisma.
Diosan sutip apañax wali askipuniwa
10, 11. ¿Jesusax kunjams Diosan sutip uñjäna ukat kʼari cristianonakax kunjams uñjapxaraki?
10 Jehová Diosax akham siwa: “Jumanakäpxtaw nayan qhanañchirinakaxaxa [...]. Nayat nayrax janiw khiti diosas utjkänti, akat qhiparus janipuniw utjkaniti” sasa (Isa. 43:10). ¿Khitis Jehová Diosan Qhanañchirinakapat nayranki? Jesusawa. Jupatakix Awkipan sutip apañasa yatiyañasa wali askipunïnwa (Salmo 148:13 ukat Mateo 6:9 liytʼasiñapawa). Ukatwa Biblianxa “Diosan chiqa testigopa” sataxa (Apo. 1:5).
11 Ukampis Diosanktwa ukat Jesusan arkiripätwa sasin aliqaki parlirinakax niya taqiniw Diosan sutip jiskʼachapxi, ukat Biblianakapatsa apsxapxiwa. Jichhakiw Católica Iglesia pʼiqtʼir obisponakarux mä qillqatax akham sasin apayasitayna: “Diosan sutipax hebreo arun YHWH pusi letranakampi qillqätaki ukaxa, tantachäwinakan janiw apnaqasxaniti ni arsusxanisa” sasa. ¡Ukax janipuniw akchʼas walïkiti!
12. ¿Kuns cristianonakax 1931 maran lurapxäna?
12 Ukampis jiwasatakix Diosan sutip apañax wali askipuniwa. Kunjamtï Jesusatakisa ukat “iyawsañani” nayra jaqinakatakisa Diosan sutip apañax wali askïkänxa, ukhamarakiw jiwasatakixa (Heb. 12:1). Ukatwa 1931 maranxa, “Jehová Diosan Qhanañchirinakapa” satäxtanxa (Isaías 43:10-12 liytʼasiñapawa). Ukhamatwa Diosan sutip apiri “mä marka” tukuwaytanxa (Hech. 15:14, 17).
13. ¿Diosan qullan sutip apasax kun lurañasasa?
13 Niyakixay cristianonakax Diosan qullan sutip apstanxa, ¿kun lurañas wakisispa? Nayraqatxa, Diosan sutip taqi chuyma yatiyañasawa. Pablox akham sänwa: “‘Taqi khititix [Jehová] Tatitun sutipa artʼaski ukax qhispiyatäniwa.’ Ukampisa, ¿kunjämrak juparusti artʼasipxanisti jan jupar iyawsapkchi ukasti? ¿Kunjämrak juparusti iyawsapxanisti jan jupat parlkir istʼki ukasti? ¿Kunjämaraki istʼapxanisti jan khitis jupat yatiyiri utjkchi ukasti? ¿Kunjämraki yatiyapxanisti jupanakax jan khitatäkasinsti?” sasa (Rom. 10:13-15). Ukatsti, Diosat jan walinak yatichapki ukanakxa, jan khitir chuym ustʼayas qhanañchañasawa. Sañäni: infiernow utji sasaw yatichapxi, ukampix Jehová Diosax Supayjam jan sinttʼasiri Diosäkaspas uk amuyayañ munapxi, ukhamasti uka jan wali yatichäwinak chiqañchañasawa (Jer. 7:31; 1 Juan 4:8; Marcos 9:17-27 uñxattʼarakismawa).
14. ¿Diosan sutip yatisax kunjamsa yaqhipax jikxatasipxi?
14 ¿Jumatakix Diosan qullan sutip apañax wali askiti, ukat yatiyaraktati? Jehová Diosan Qhanañchirinakapaw Diosan sutip yatipxi sasaw Francia markan mä warmir sapxatayna. Ukat mä kullakampi jikisisax akham jisktʼatayna: “¿Biblianxa kawkinsa Diosan sutipax uñsti?” sasa. Kullakax Salmo 83:18 jiskʼa tʼaqwa Traducción del Nuevo Mundo de las Santas Escrituras Bibliat liytʼayäna. Diosan sutip uñjasax walpun kusisïna, ukatwa Bibliat yatiqañ qalltawayäna, jichhax yaqha markan wali sum luqtaski. Australia markanxa, ukhamarakiw Católica iglesiankir mä warmix Diosan sutip Bibliat yatiqasax kusisiñat jachaqtʼasïna. Ukhamatwa Diosan markapar mantäna, jichhax walja maranakaw precursorjam luqtaski. Ukat Jamaica markanxa, jichhakiw jilatanakax mä warmir pachpa Bibliapan Diosan Jehová sutip uñachtʼayapxatayna, uk uñjasax kusisiñatwa uka warmix jachaqtʼasïna. Jiwasatakix Diosan sutip apañax wali askipuniwa, ukat Jesusjamaw taqi chiqan yatiyaraktanxa.
“Jan akapachar munirïpxamti”
15, 16. 1) ¿Cristianonakax akapachat kamstansa? 2) ¿Kunsa sapa maynis jisktʼasiñasäspa?
15 Biblianxa akham sistuwa: “Jan akapachar munirïpxamti, janirak akapachan yänakapsa. Kawkïritix akapachar munaski ukanxa, janïraw Dios Awkitak munasiñapax utjkiti” sasa (1 Juan 2:15). Akapachasa ñanqha amtanakapasa Jehová Dios contra ukat qullan ajayup conträpxiwa. Ukat chiqa cristianonakax janiw aliqakix akapachat jithiqtapkiti, jan ukasti jan wali luräwinakaparux wal uñisipxi. “Akapachampi sumankañax Diosampi jan walinkañätapxa” cristianonakax sum yatipxi, kunjamtï Santiagox siskäna ukhama (Sant. 4:4).
16 Akürunakanxa, Santiagon arunakaparjam sarnaqañax chʼamawa, kunayman yantʼanakan uñjastanxa (2 Tim. 4:10). Ukatwa Jesusax arkirinakapataki Awkipar akham sas mayisïna: “Janiw mayksmati akapachat apsuñamataki, jan ukasti maysmawa Supayat imañamataki. Kunjämtï nayax jan akapachankirïktxa, ukhamarakiw jupanakax jan akapachankirïpkiti” sasa (Juan 17:15, 16). Ukhamarus sapa mayniw akham jisktʼasiñasa: “¿Jan akapachankirïñatakix chʼamachasisktti? ¿Akapachan uñstayat fiestanakatsa costumbrenakatsa nayax kunjamsa amuyta ukanak sumti amigonakajax yatipxi?” sasa (2 Cor. 6:17; 1 Ped. 4:3, 4).
17. ¿Kun uñjasas suma chuyman jaqinakax Jehová Diosat yatxatañ munapxaspa?
17 Diosan Aruparjam sarnaqatasax janis kuna askïkaspa ukham jaqinakax uñchʼukipxistu. Ukampis Bibliarjam iyawsäwinïtassa, ukarjam sarnaqatassa suma chuyman jaqinakax uñjapxarakiwa, ukatwa Amuyasiri Chiqapa Uywatan yatichäwinakapat yatxatañ munapxi. Ukampix “¡jumanakamp saraña munapxta, nanakasti istʼapxtwa Diosax jumanakampïtapa!” sapxiwa (Zac. 8:23).
Chiqpach munasiñ uñachtʼayapxañäni
18. ¿Kuna kasta munasiñsa Diosarus jaqi masisarus uñachtʼayañasa?
18 Jesusax akham sänwa: “Diosamaruw munäta taqi chuymamampi, taqi almamampi, taqi amuyumampiraki”, ukat “jaqi masimarusti juma kipkarjam munarakim” sasa (Mat. 22:37, 39). Uka kasta munasiñax griego arunxa agápe satawa, mayninakan askip thaqhaña, chiqa kamachinakarjam sum sarnaqaña sañ muni. Ukatxa taqi chuyma munasiñar wiytiriwa (1 Ped. 1:22). Uka munasiñaxa maynitakik taqi kun munirïñat sipansa, suma luräwinakampi ukat arunakampiw uñachtʼayasi (1 Corintios 13:4-7 liytʼasiñapawa).
19, 20. ¿Kuna experiencianakas chiqpach munasiñax wali askïtap uñachtʼayi?
19 Akapachanxa costumbrenakampi ukat politiconakampiw jaqinakax tʼaqa tʼaqa sarnaqasipki, ukat yaqha kasta jañchin jaqinakar uñisiñas utjarakiwa, janiw mayachtʼat sarnaqapkaspati. Ukampis chiqa cristianonakax Diosan qullan ajayupat jutki uka munasiñampiw ukanakar atipapxi (Juan 13:34, 35 liytʼasiñapawa; Gál. 5:22). Uka munasiña uñjasax llampʼu chuyman jaqinakax walpun chuym chʼallxtayasipxi. Uk amuytʼañatakix mä judío waynat parltʼañäni, kunapachatï mä tantachäwir saräna ukhaxa, judío ukat árabe jaqinakar jilapurjam Jehová Diosar yupaychaskir uñjasax walpun muspharäna. Ukatwa Bibliat yatiqañ qalltxäna, ukat tantachäwinakarus jan qhiparas sarxäna. ¿Jilat kullakanakasarux uka kasta munasiñti uñachtʼayaraktanxa? Yaqha markatäskpasa, yaqha kasta jañchinïskpasa ukat utjirinïpasa janisa, ¿tantachäwinakar jutapki ukhaxa wali sumti katuqtanxa?
20 Chiqa cristianonakax taqinir munasiñampi uñjañatakiw chʼamachastanxa. Salvador markanxa, Católica iglesiankir 87 maran mä warmix mä kullakampiw Bibliat yatiqaskäna, ukampis janiw iglesiap jaytañ munkänti. Mä urux walpun usuntäna ukatwa hospitalar apapxäna. Ukat utapankxäna ukhaxa, jilat kullakanakax mä phaxsiw telefonot jawsapxäna ukat manqʼsa aparapipxäna. Ukampis iglesiapatxa janiw maynis jupat amtasipkänti, ukatwa taqi santonakap tukjäna, iglesiaprus janiw jutxäti sasaw yatiyäna ukat wasitatwa Bibliat yatiqañ qalltäna. ¡Jïsa chiqpach munasiñax taqi kunat sipansa wali askipuniwa!
21. ¿Jutïrin jan ayñachtʼañatakix kun lurañasasa?
21 Mä qhawqha tiempotxa Jesusax kʼari cristianonakaruw tukjani ukat akham saniwa: “Janipuniw jumanakarux uñtʼapksmati, nayat jithiqtapxit jan wali luririnaka” sasa (Mat. 7:23). Jiwasax janiw jupanakjamäñ munktanti, jan ukasti taqi kunanwa Awkisaru ukat Jesucristor jachʼañchañ muntanxa. Ukat Jesucriston aka arunakapat amtasipuntanwa: “Khititix istʼkitu ukat kuntix siskta uk lurarakixa, ukax mä suma amuyun jaqimpi sasiwa, utapsa mä qarqa pataru luraskaspa ukhama” (Mat. 7:24). Ukhamasti, sarnaqatasampi Jesucriston chiqa arkiripätas uñachtʼayañänixa, Diosax munasiñampiw uñjistani ukat jutïrinxa janiw aynachtʼkañäniti, qarqa patan suma saytʼat mä utjamäñäniwa.
¿Amtastati?
• ¿Chiqa cristianonakax kuna tuqinakansa kʼari cristianonakat mayjäpxi?
• Kuna “achunaksa” chiqa cristianonakax uñachtʼayapxi uk mä qhawqha qhanañchtʼam.
• ¿Kunanakan chʼamachasiñas wakisi?
[Jisktʼanaka]
[13 janan fotopa]
¿Yatiyir sarkasax Bibliatpunti liytʼarapta?
[15 janan fotopa]
¿Akapachan uñstayat fiestanak jan amtatamxa mayninakax yatipxiti?