Aka revista liytʼirinakan jisktʼäwinakapa

¿Kunapachas mä cristianox mayampi bautisasispa?

Inas awisax mä cristianon mayampi bautisasiñapax wakischispa. ¿Kunatsa ukham sistanxa? Sañäni, inas maynix tamat jaqsuyasiñatakjam mä jachʼa jucha jamasat lurkasina bautisasiwaychi. ¿Ukham sarnaqkasin Jehová Diosar jakäwip katuyasiñapax wakisïnti? Janiwa. Nayraqatxa uka juchanakapwa apanukuñapäna, ukatwa Diosar katuyasiskañapänxa, ukhamatwa Diosax katuqaspänxa. Ukampis ukham jan walinak lurkasin bautisasiwaychi ukhaxa, askïspaw mayampi bautisasiñ amtañapaxa.

Jichhax yaqha tuqit amuytʼarakiñäni: mä jilatas jan ukax mä kullakas bautisatäxasina tamat jaqsuyasiñatakjam mä juch luraspa, ukampis “bautisaskayäta ukhaxa janiw kuntï lurkayäta ukanak sum amuykayätti, ukhamax mayampi bautisasiñajaw wakisi” saspa ukhaxa, ¿mayampi bautisasiñapat wakisispa? Kunapachatï irpir chuymaninakax uka juchap uñjapkani ukhaxa, janiw “bautisasitapax waliti janicha” sasinxa parlapxañapäkiti, janirakiw juchanirus “jumax ukat tuqit kamstasa” sasin jiskhipxañapäkiti. Kunapachatï bautisaskäna ukhaxa, uka tuqit sum qhanañchkir mä arstʼäwi istʼawayi. Ukat kunapachatï Diosar katuyasitapatsa ukat bautisasiñ munatapatsa jisktʼasiwayi ukhaxa, “jïsa” sasaw säna. Ukhamaw bautisasiñ isimpi uchtʼasisax uman bautisasiwayi. Ukhamasti, janiw siskaspati: “Janiw sum amuykayätti” sasa. Irpir chuymaninakax tamankir jilatarjamaw jan ukax kullakarjamaw uñjapxañapa.

Ukampis maynix bautisasitapat pächasispa ukhaxa, irpir chuymaninakaw yanaptʼapxañapa. Bautisasiñ tuqit parlir yatichäwinakwa Yatiyañataki (La Atalaya) sat revistan uñxattʼapxañapa. Inas yaqhipax mayampi bautisasiñ munapxapunchispa, “Bibliat jan sum yatisaw bautisasiwayta” sasa, ukax sapa maynitäxiwa.

Mä cristianox mä utanaki yaqhanakampi jakañ amtaspa ukhaxa, ¿kuna tuqinakat amuytʼasiñapasa?

Taqiniw mä utan sum jakasiñ muntanxa. Ukampis yaqhipatakix uta jikxatañax wali chʼamawa; utanïñatakix janiw qullqis ni chʼamas utjkiti, ukatxa kunayman jan walinakanwa uñjasipxi. Ukatwa walja familiaranakampi mä utanaki qamañ amtapxi. Yaqhip markanakanxa walja familianakaw mä sapa utanaki jakapxi. Chiqansa, ukhaman jakasax kun lurtʼasiñas axsarañjamäspawa.

Ukat janirakiw Jehová Diosan markapax uka tuqinakatxa kamachinak apskaspati. Ukampis ukhaman jikxatasisax kunanakat amuyasiñas wakisispa, uka tuqinakatwa Diosan yatichäwinakaparjam cristianonakar amuytʼayañ munapxi, ukhamata Diosan kamachinakap jan pʼakintapxañapataki. Ukhamax ¿Diosan kawkïr yatichäwinakapas uka tuqit wal amuyasiñ yanaptʼistaspa?

 Nayraqatxa, yaqhanakampi mä utan jakasax kuna jan walinakarus puripxaspa ukanakat maynix amuyasiñapa. ¿Kunjam sarnaqir jaqinakampis jakani? ¿Jehová Diosan luqtirinakapati? ¿Diosan kamachinakaparjamat sarnaqapxi? Uka tuqinakat amuytʼasiñapawa. Ukat apóstol Pablon aka arunakap janipun armañäniti, akham sänwa: “Jan sallqjayasipxamti. Kunjämtix säwix siski: ‘Jan wali jaqinakampi sarnaqañax suma luräwinaka chhaqhayañawa’” sasa (1 Cor. 15:33).

Maysa tuqitxa, wachuq juchan sarnaqañax janipuniw akchʼas walïkiti sasaw Diosan Arupax saraki (Heb. 13:4). Jan jaqichatäkasin paninix chacha warmjam mä utanaki sarnaqapxaspa ukhaxa, janiw walïkaspati, Diosatakix wali jachʼa juchawa. Ukat cristianjamax janiw ukham jan walinak lurir taypin jakañ munktanti.

Ukampis “jithiqtapxam wachuqa jucha lurañatxa” sasaw Bibliax Diosampi katuqayasiñ munirinakarux saraki (1 Cor. 6:18). Ukhamasti, mayninakampi mä utan jakañ amtasax uka jan walit amuyasiñasawa, uka juchar pursna ukhax janipuniw walïkaspati. Sañäni, mä utan walja cristianonakax jakapxafspa ukhaxa, ¿janit uka juchar wiytir jan walinakax utjkaspa? Mä akatjamat mä jilatampi mä kullakampik utan qhiparapxaspa ukhaxa, ¿kunas kamachaspa? Ukatxa janirakiw casarasiñataki uñtʼasisipki ukanakax mä utanaki jakapxañapäkiti. Yatiñan jaqjamax taqi ukanakat amuyasiñasawa.

Ukat divorciatanakas janirakiw mä utanakxa jakapxañapäkiti. Kunjamtï nayrax sarnaqapxirïkäna, ukham sarnaqañaruw kuttapxaspa, ukax Diosatakix juchäxiwa (Pro. 22:3).

Maysa tuqitxa, uta jakʼankirinakax kamsapxanisa uka tuqit amuytʼasiñasarakiwa. Inas mä cristianotakix yaqhanakampi mä utan jakañax walikïskchispa, ukampis ¿uta jakʼan qamirinakax uk uñjasax kamsapxanisa? ¿Janit jan wal parlapkani? Yaqhanakar parlayañax janiw walïkaspati, janiw Jehová Diosan sutipat jan wal parlayañ munktanti. Ukatwa Pablox akham säna: “Jan khitirus lanktayapxamti, ni judiorusa, jan judiorusa, ni Diosan [tamapankirinakarusa]. Nayax taqitakis askïñwa munta. Janiw nayan walïñaxakti jan ukasti mayninakan askïñapwa muntxa, ukhamata jupanakax qhispiyatäpxañapataki” sasa (1 Cor. 10:32, 33)

Awisax yaqhanakampi mä utan jakañ tuqitxa, Diosan kamachinakaparjam mä amtar puriñax chʼamäspawa. Ukampis ‘kunatix Diosatakix askïki ukwa’ nayraqat muntanxa. Janiw kuna jan walis utasanxa lurasiñapäkiti (Efe. 5:5, 10). Ukatxa Diosat mayisiñasarakiwa, ukat ukarjam sum sarnaqañataki chʼamachasiñäni ukhaxa, wali askïniwa, janiw Dios Awkisat jan wal parlaykañäniti.