¿Awkimarjamat Jehová Diosar uñjta?

MÄ URUXA, mayni arkiripaw Jesusarux akham säna: “Tata, oración lurañay yatichtʼapxita” sasa. Ukat Jesusax akham sänwa: “Orapkäta ukkhasti sapxam: ‘Alaxpachankir nanakan Awkixa, sutimax jachʼañchatäpan’” sasa (Luc. 11:1, 2). “Taqi chʼamani”, ‘Suma Yatichiri’, taqi kun ‘Luriri’, “Jiliri chuymani” ukat ‘Wiñay jachʼa Rey’ sasaw mayisipxäta sasaw Jesusax yatichaspäna (Gén. 49:25; Isa. 30:20; 40:28; Dan. 7:9; 1 Tim. 1:17). Ukampis ‘Awki’ sasaw säna. ¿Kunatsa ukham sispachäna? Kunjamtï mä wawax wali munasiñampi awkiparu jakʼachaskixa, inas alaxpachankir Awkisar ukham jakʼachasiñas munchïna.

Jichhürunxa, Diosar mä Awkisarjam uñjañaxa wali chʼamaw jaqinakatakixa. Asunta * sat mä kullakat parltʼañäni, jupax akham siwa: “Bautisatäxchiyätsa, Jehová Diosar jakʼachasiñasa ukat Awkijarjam mayisiñas walja maranakaw nayatakix chʼamäna” sasa. Ukatxa, qhipatwa kunatsa Diosat jayarstʼat sarnaqäna uk akham sas qhanañchi: “Awkijax janiw munasiñamp uñjirïkituti” sasa.

Aka qhipa jan wali urunakanxa, yaqhip awkinakax ‘janiw munasiñ’ wawanakapar uñachtʼayxapxiti (2 Tim. 3:1, 3). Ukatwa waljanix Asuntjam jikxatasipxaraki. Ukampisa, Jehová Diosax wali munasir Awkiwa, ukwa walja kuti uñjtanxa.

Kunatï munaski ukanakwa churistu

Jehová Diosar Awkisarjam munasiñatakixa, nayraqat sum uñtʼañasawa. ¿Kunjamatsa uñtʼsna? Jesusax akham sänwa: “Janiw khitis Yuqarux uñtʼkiti, jan ukasti Awkikiwa. Awkirusti janirakiw khitis uñtʼkiti, jan ukasti Yuqakiw Awkirux uñtʼi, ukhamarak khitirutix Yuqax uñtʼayañ munki ukanakampi” sasa (Mat. 11:27). Ukhamasti, kuntï Jesusax yatichkäna uka tuqit sum amuykiptʼasakiw kunjamas alaxpachankir Awkisax uk yatsna. ¿Kunanaksa Jesusax Diosat yatichäna?

“Jupïpanrakwa jakaskta” sasaw Jesusax säna (Juan 6:57). Jiwasax jupxamarakiw amuytanxa (Sal. 36:9; Hech. 17:28). Ukat Diosax munasiñapatwa jakañ churistu. Ukatwa Juparux munasiñasarakixa.

Diosax jaqinakar qhispiyañatakiw Yuqapar aka Uraqir khitanitayna, ukhamatwa Diosax wali munasirïtap uñachtʼayawayi. Ukatwa juchararäkasas Jupampix sum apasnaxa (Rom. 5:12; 1 Juan 4:9, 10). Alaxpachankir Jehová Diosax kuntï arski ukanak phuqapuniwa, ukatwa Jupar munasirinakasa ukat istʼirinakasa jutïrin “Diosan wawanaka[pjam] qhispiyat” jakasipxañäni (Rom. 8:21).

Ukatxa, Jehová Diosax ‘taqinitak inti jalsuyanisaw’ munasiñapxa uñachtʼayarakistu (Mat. 5:45). Jiwasax janiw inti jalsuniñapatakix Diosar mayisktanti. Ukampis ¡intin qhantʼanitapax wali askipuniwa! Maysa tuqitxa, alaxpachankir Awkisaxa khuyapayasiñapatwa kunatï munaski ukanak churistu, ukat janïr mayktan ukhaw kuntï maykañäni uksa yatxaraki. Ukatsti Diosan luratanakap uñjasaw munasirïtapxa amuyaraktanxa (Mat. 6:8, 26).

Awkisax khuyapayasiñampiw uñjistu

Jehová Diosax Isaías profeta tuqiw markaparux akham säna: “Jachʼa qullunakax yaqha chiqarusay sartasipkpan, qullunakas aynacharusay jutasipkpan, ukampis munasiñaxax jumatakix janipuniw tukuskaniti, ukhamaraki sumar mantäwi arustʼäwixax janiw tʼunjatäkaniti. Ukham siwa jumar khuyapayiri Tatituxa”  sasa (Isa. 54:10). Ukat Jesusar katuntapkäna uka arumaxa, Diosax khuyapayasiñampi jaqinakar uñjatapwa mayisïwipan Jesusax uñachtʼayäna. Ukat arkirinakapatakiw akham sas mayïna: “Jupanakax akapacharuw qhiparapxi, nayasti jutxtwa jumampïñataki. Qullan Awkixa, kawkïrinaktix churkista ukanakarux chʼamamampiy imam” sasa (Juan 17:11, 14). Jehová Diosax uka mayitarjamaw cristianonakarux sum uñji ukat jan walinakatsa jarkʼaqaraki.

Ukatwa Supayan yantʼanakapat amuyasiñasatakixa, Bibliat apstʼat qillqatanak ‘Amuyasiri Chiqapa Uywata’ tuqix horasaparu apayanistu (Mat. 24:45, MT). Uka yatichäwinakat jan qhiparas yatxatañänixa, kawkïr “armanaktix Diosax chur[kistu] ukanakampi” isthapisiñax janiw chʼamäkaniti. Mayïr armat Pablox akham sänwa: “Iyawsañanakamax mä escudjamäpan, Supayan aqkir flechanakapat jarkʼaqasiñataki” sasa (Efe. 6:11, 16). Ukhamasti, Diosat jithiqtayir jan walinakatwa iyawsäwisax mä escudor uñtasit jarkʼaqistu, ukat Awkisax jan walinakat jarkʼaqañatak chʼamanïtapwa uñjaraktanxa.

Ukat wali munasir Awkisaru jukʼamp uñtʼañatakixa, Jesusan sarnaqäwipat yatxatañasarakiwa. Amuytʼañäni, arkirinakaparux akham sasaw säna: “Wawanakax nayan ukar jutasipkpan sam” sasa (Marcos 10:13-16). Ukat kunapachatï wawanakax jupar jakʼachasipkäna ukhaxa, wali munasiñampi ichxartʼasaw bendicïna. ¡Kunja kusisitak uka wawanakax jikxatasipkäna! Jehová Diosax ukhamarakiw wali munasiñampi suyaskistu. ¿Kunjamatsa uk yattanxa? Jesusaw akham sas qhanañchistu: “Khititix nayar uñjkitu ukax Awkirux uñjarakiwa” sasa (Juan 14:9).

Ukatxa, Jehová Diosan munasiñapax jan tukuskiriwa. Ukatwa kunatï munaski ukanak churistu, Jupakiw jan walinakatxa jarkʼaqistaspa ukat Jupar jakʼachasiñaswa munaraki (Sant. 4:8). ¡Ukham suma Awkix janipuniw utjkaspati!

Walja bendicionanak katuqtanxa

Ukat jiwasatï wali munasir Awkisarjam Jehová Diosar taqi chuyma atinisiñänixa, walja bendicionanakwa katuqarakiñäni (Pro. 3:5, 6). Jesusax Awkipar taqi chuyma atinisisaw walja bendicionanak katuqäna. Ukatwa arkirinakaparux akham säna: “Janiw nayax sapäkti, ukatsipana nayampï[skiw], khitankitu uka Awki[jaxa]” sasa (Juan 8:16, MT). Awkijax nayamp chikäskiw sasaw atinisirïna. Amuytʼañäni, kunapachatï bautisaskäna ukhaxa, Diosan aka arunakapaw chuymachtʼäna: “Akawa munat Wawaxaxa, kawkïrirutix nayax ajllista ukaxa” (Mat. 3:15-17). Ukat Jesusax janïr jiwkasaxa akham sasaw jachʼat säna: “¡Awkiy, amparamaruw ajayuxxa katuyasxsma!” sasa (Luc. 23:46). Ukhamasti, jan walin jikxatasisasa Awkiparux atinisiskakïnwa, janipuniw akchʼas payachaskänti.

Jiwasaxa ukhamäñasarakiwa. Jehová Diosax jiwasampïskiwa, janiw kunatsa axsarayasiñasäkiti (Sal. 118:6). Asunta kullakat amtañäni, jupaxa jan walinakaru saykatañatakix chʼamaparukiw nayrax atinisirïna. Qhipatsti, kunjamsa Jesusax sarnaqäna, jaqinakarus yatichäna ukat Awkipampis wali sum apasïna uka tuqinakatwa yatxatatayna. Ukatsti akham sasaw kullakax arstʼi: “Chiqpach Awkinïña ukat Jupar atinisiñwa yatiqawaytxa. Ukatsti kusisiñsa sumankañsa jikxataraktwa. Ukhamatwa llakinakampix jan atipayastti” sasa.

Diosar awkisarjam uñjasaxa, ¿kuna bendicionanaksa katuqaraktanxa? Wawanakaxa awk taykaparuw munasipxi ukat janiw jupanakar colerayañ munapkiti. Jesusaxa alaxpachankir Awkiparuxa walpunwa munasirïna ukatwa akham säna: “Nayax jupar kusisiykirpun kuns lur[txa]” sasa (Juan 8:29). Jiwasaxa, ukhamarakiw Jehová Diosar munastanxa, ukatwa taqi kunsa wali amuyumpi lurtanxa, ukat jaqinakan uñjkatas Jupar ‘yupaychtanxa’ (Mat. 11:25; Juan 5:19).

 “Jumarux amparat wayxarsma”

Alaxpachankir Awkisaxa mä yanaptʼiri churistu, ukax qullan ajayuwa, ukat uka qullan ajayuw “taqi kunatix chiqäki uka yatichapxätam” sasaw Jesusax sarakïna (Juan 14:15-17; 16:12, 13). Ukhamasti, qullan ajayuxa Awkisar sum uñtʼañwa yanaptʼistani. Ukat “kunanakatix chʼamanïki ukanakar tukja[ñsa]” yanaptʼarakistaniwa, mä arunxa, chuymasan utjki uka jan wali amuyunak tukjañwa yanaptʼistani. Ukhamatwa taqi ‘amtanakassa Cristor katuyapxañäni’ (2 Cor. 10:4, 5). Ukhamasti, Diosarux jan pächasisa qullan ajay mayipxañäni. Jesusax akham sänwa: “Alaxpachankir Awkimax qullan ajayxa churani[wa] mayipki ukanakaruxa” sasa (Luc. 11:13). Ukat Diosampi sum apasiñatakisa qullan ajay mayipxarakiñäni.

Mä wawax awkipampi amparat sarnaqki ukhaxa janiw kunatsa axsarayaskiti. Jiwasatï Jehová Diosarux Awkisarjama uñjañäni ukhaxa, aka arunakaparux taqi chuymaw atinisiñäni, Jupax akham sistuwa: “Naya, juman Tatitu Diosamaw, jumarux amparat wayxarsma, irparaksma; nayaw saraksma: ‘Jan axsaramti, nayaw yanapaskäma’” sasa (Isa. 41:13). Ukhamasti, wiñay wiñayaw alaxpachankir Awkisampix ‘sarnaqassna’ (Miq. 6:8, NM). Jiwasatï munañap phuqaskakiñänixa, wali kusisita, jan kun axsarasa ukat Jupans wali munasitaw jakasiñäni.

[Qhanañchäwi]