Diosan arunakapat jan axsartʼas yatiyapxañäni

“Taqiniw qullan ajayumpi phuqtʼatäpxäna, Diosan arupsti jan axsarasarakiw parlapxäna.” (HECH. 4:31.)

1, 2. ¿Kunatsa sum yatiyañataki chʼamachasiñasa?

 JIWAÑAPATAKI kimsüru faltkipanxa akham sasaw Jesusax arkirinakapar säna: “Diosan reinopat aka suma yatiyäwisti aka uraqpachanwa yatiyatäni, ukhamat taqi markanakan yatipxañapataki, ukatsti akapachan tukusiñapaw jutani” sasa. Ukat jiwatat jaktxasin niya alaxpachar sarañampïxäna ukhax akham sarakïnwa: “Taqi akapachankir jaqinakar yatiyir sarapxam, nayar arkir tukuyapxam [...]. Yatichapxarakim taqi kuntix nayax jumanakar yatichapksma ukanaka phuqhaña” sasa. Ukatxa “sapürupuniw jumanakampïskta akapachan tukusiñapkama” sasaw sarakïna (Mat. 24:14; 26:1, 2; 28:19, 20).

² Kunjamtï nayrïr cristianonakax Diosan Apnaqäwipat yatiyapkänxa, ukhamarakiw Jehová Diosan Qhanañchirinakapax jaqinakar yatiyir jichhax sarapxi ukat Jesusan arkiripar tukuyapxi. Ukhamatwa jaqinakar qhispiyasiñ yanaptʼapxi. Ukhamasti, Diosan Apnaqäwipat yatiyañax niyakixay wali wakiskirïchixa, sum phuqañataki chʼamachasiñasawa. Ukampis jan axsaras yatiyir sarañxa kunjamsa qullan ajayux yanaptʼistu uka tuqitwa aka yatichäwin uñjaskañäni. Ukat jutïr pä yatichäwinsti, kunjamsa qullan ajayux sum yatichañatakisa, jan qhiparas yatiyir sarañatakis yanaptʼistu, uka tuqinakatwa uñjarakiñäni.

Jan axsarirïñasawa

3. ¿Yatiyir sarañatakix kunanakas chʼamtayistaspa?

³ Jiwasatakix Diosan Apnaqäwipat yatiyir sarañax wali askiwa. Ukampis uk phuqañax chʼamakïspawa. Kunjamtï yatktanxa, mä qhawqhanikiw istʼañ munapxi. Niya taqiniw Noé  tatan urunakapan jakir jan wali jaqinakjamäpxi. Ukat kunjamtï Jesusax siskänxa, uka jaqinakax janiw “amuyasipkänti kunürutix uma juiciox purinisin taqiniru apasxäna ukürkama” (Mat. 24:38, 39). Jichhürunakanxa ukhamarakiw yaqhipax sawkasipxistu ukat jiskʼachapxistu (2 Ped. 3:3). Awisax marka apnaqirinakasa, yatiqir jan ukax irnaqir masinakasa ukat pachpa familiaranakas janiw Diosan arunakapat yatiyir sarañas munapkiti. Maysa tuqitsti, inas jumax axsarirïsta, ukat “janiw istʼañ munapkitaniti” sasin axsarayassta. Chiqas Diosan arunakapat ‘qhana arunakampi’, ‘jan axsaras parlañax’ chʼamäspawa (2 Cor. 7:4; Hech. 14:3). Ukhamax jan axsartʼas yatiyir sarañatakixa, ¿kun lurañas wakisispa?

4. 1) ¿“Jan axsaraña” sasin jaqukipatäki uka griego arux kamsañs muni? 2) ¿Kunjamatsa Pablox Tesalónica markan jan axsartʼas yatiyäna?

⁴ “Jan axsaraña” sasin jaqukipatäki uka griego aruxa, “chiq parlaña”, “qhana arunakampi parlaña” ukat “taqi chuyma arsuña” sañ muni. Ukat “jan pächasisa qamasani arunakampi” parlaña sañ munarakispa. Ukampis janiw yaqhanakar chuym ustʼayir thanqha arunakampi parlañ sañ munkiti (Col. 4:6). Chiqas jan axsarirïñasawa, ukampis taqinimpi sumankañasarakiwa (Rom. 12:18). Diosan Apnaqäwipat yatiyir sarkasax janiw jan axsarirïtas laykux yaqhanakar chuym ustʼayañ munktanti, jan ukasti suma arunakampi yatiyañasawa. Mä arunxa, jan axsaras yatiyir sarkasax chʼamäkipansa suma jaqïñataki chʼamachasiñasarakiwa. Ukatakix janiw jiwaspachar atinisiñasäkiti. Apóstol Pablompit ukat jupamp chik sarir jilatanakat amtapxañäni. Filipos markan yatiykasax ‘jiskʼachataw’ uñjasipxäna, ¿ukhamax kunjamatsa Tesalónica markar jan axsartʼas yatiyir sarapxpachäna? Pablox akham sasaw uka markankir jilat kullakanakar säna: “Diosaw nanakaru yanapapxitu jupan qhispiyasiñ arunakap taqi iyawsañampi jumanakar yatiyañataki” sasa (1 Tesalonicenses 2:2). Ukhamasti Jehová Diosaw jan axsaras yatiyañxa jupanakar yanaptʼatayna. Jïsa, Diosaw pächasiñsa axsarañsa chuymasat chhaqtayaspa.

5. ¿Kunjamsa Jehová Diosax Pedrompir Juanampir ukat mayni jilat kullakanakampir yanaptʼäna?

⁵ Kunapachatï Pedrompi Juanampix marka “apnaqirinakapampi, jilïrinakapampi ley yatichirinakampi” tantachasipkäna ukhaxa, akham sapxänwa: “¿Walikïspati Diosan nayraqatapanxa, Diosat sipan jumanakar nayraqat istʼañaxa? Nanakax janipuniw amuktʼapkiristti kuntï uñjapkta istʼapkarakta ukanakat arsuñxa” sasa. Janiw uka jan walinak chhaqtayañapxa Diosar mayipkänti, jan ukasti akham sasaw jilat kullakanakampi mayisipxäna: “Tatay, uñtamay jupanakan axsarayañanakapa. Arkirinakamarusti chʼamamay churapxita, juman arunakam jan axsaras parlapxañaxataki” sasa (Hech. 4:5, 19, 20, 29). ¿Jehová Diosax mayisitanakapar istʼänti? (Hechos 4:31 liytʼasiñapawa.) Jïsa, jan axsarapxañapatakiw qullan ajayumpi yanaptʼäna. Jiwasarux ukhamarakiw yanaptʼistaspa. Ukampis ¿qullan ajay katuqañatakix kun lurañas wakisispa ukat kunjamsa yatiyir sarañ yanaptʼistaspa?

Jan axsarirïñatakix kunas yanaptʼistaspa

6, 7. ¿Kunjamatsa qullan ajay katuqsna? Uñachtʼäwinakampi uk qhanañchtʼma.

⁶ ¿Kunjamatsa qullan ajay katuqsna? Diosar mayisisaw katuqsna. Jesusax akham sänwa: “Jumanakatix qhurükasin wawanakamarux sumanak churirïpxstaxa, ¡qawqha jukʼamps alaxpachankir Awkimax qullan ajayxa churanixa mayipki ukanakaruxa!” sasa (Luc. 11:13). Ukhamax “qullan ajayumpi yanaptʼapxita” sasin Jehová Diosar sapa kuti mayisiñasawa. Inas jiwasatakix thakinakansa, qhatunakansa jan ukax yaqha chiqanakan yatiyañas axsarañjamächi, ukhamasti “qullan ajayumpi yanaptʼita” sasin Diosar mayisiñasapuniwa, ukaw jan axsaras yatiyañ yanaptʼistani (1 Tes. 5:17).

⁷ Rosa sat mä kullakax ukham mayisitayna. * Mä uruxa, yatichir masipaw yatiqañ utan periódico liyiskäna, ukat kunjamsa yaqha escuelanxa  wawanakar tʼaqhisiyapxi uka tuqitwa liyiskäna. Uka yatichirix akham sasaw muspharat säna: “¡Kunaruk purkañäni!” sasa. Uk istʼasax Diosan arunakapat Rosax yatiyäna. ¿Kunas jan axsartʼas yatiyañ yanaptʼäna? Jupax akham siwa: “Diosaruw qullan ajayup mayista” sasa. Rosax wali sum qhanañchtʼatayna ukat qhipat jukʼamp parlañatakiw amtapxäna. Jichhaxa, Nueva York markan jakasir Milenkat parltʼañäni, jupax phisqa maranikïskiwa. Akham siwa: “Escuelar sarañatakix mamajampix Diosat maytʼasipxapuntwa” sasa. ¿Kunsa Diosar mayipxpacha? Milenkan jan axsarañapataki ukat Bibliat yatiyañapatakiw mayisipxi. Ukat mamapax akham sarakiwa: “Ukhamatwa Milenkax uruyasiñ tuqinakatsa fiestanakar sarañ tuqitsa mayninakar sum qhanañchi, ukat janiw ukanakar sarkiristti sasaw jan axsartʼas saraki” sasa. Ukhamasti, ¡jan axsarañataki Diosar qullan ajayup mayisiñax wali askiwa!

8. ¿Kunsa Jeremiasat yatiqsna?

⁸ Kunjamsa Diosax Jeremiasar jan axsarañapataki yanaptʼäna uka tuqit jichhax parltʼarakiñäni. Kunapachatï markanakan profetapjam uttʼayatäkäna ukhaxa akham sasaw jupax säna: “¡Ay, Tata! ¡Nayax wawäsktwa, janiw parlañsa yatkti!” sasa (Jer. 1:4-6). Qhipatxa kunjamsa Jehová Diosax jaqinakar taripani uka tuqinakatwa jan qarjasa ukat jan axsartʼasa taqi chuym yatiyäna, ukatwa markataki jan walinak amtiri sasin sutichapxäna (Jer. 38:4). Suxta tunk phisqani maranakatsa jilaw profetjam taqi chuym irnaqawayäna. Israel markanxa jan axsartʼir profetat uñtʼatänwa. Ukatwa niya suxta patak maranak qhipatxa Jeremiasaw jaktanpacha sasin Jesusar uñjasax parlapxäna (Mat. 16:13, 14). Ukampis ¿kunas jan axsarañapatakix Jeremiasar yanaptʼpachäna? Jupax akham siwa: “[Diosan arunakapax] chuymaxanxa ninjamaw nakhantitu, chʼakhanakamppacha jawqʼjarakitu [...,] janiw imtʼañjamäkiti” sasa (Jer. 20:9). Ukhamasti, Diosan wali chʼamani arunakapaw jan axsaras parlañ yanaptʼäna.

9. ¿Kunjamatsa Diosan arunakapax Jeremiasarjam yanaptʼistaspa?

⁹ Hebreos 4:12 qillqatanxa Pablox akham siwa: “Diosan arupasti jakaskiwa, jachʼa chʼamanirakiwa. Purapar arini espadat sipansa jukʼampi ariraki, ukasti almampir ajayumpirux jukʼamp manqhakamaw puri, lupʼïwinaksa, chuyman amtäwinakapsa qhanstayarakiwa” sasa. Diosan arunakapax kunjamtï Jeremiasar yanaptʼkänxa ukhamarakiw jiwasar yanaptʼistu. Bibliax jaqinakan qillqatäkchisa, janiw jupanakan amuyunakapak qillqapkänti; jan ukasti Diosaw jupanakar amuytʼayäna. Kunjamtï 2 Pedro 1:21 qillqatan siskixa: “Profetanakasti janipuniw kunsa munañanakapatxa parlapkänti, jan ukasti jupanakax Diosar katuyata jaqinakäpxänwa, Dios tuqitarakwa parlapxänxa, qullan ajayun amuytʼayata”. Ukhamax Bibliat taqi chuym yatxatasaxa, qullan ajayun amuytʼayat arunakampiw amuyusar phuqantaytanxa (1 Corintios 2:10 liytʼasiñapawa). Ukat  uka arunakax chuymasanxa ‘ninjamaw nakhi’, mä arunxa, parlañatakiw chʼamañchistu.

10, 11. 1) ¿Jan axsartʼas yatiyañatakix kunjamsa Bibliat yatxatañasa? 2) Bibliat sapaki sum yatxatañatakix kun lurañsa amtta uk qhanañchtʼma.

¹⁰ Bibliat sapa mayni yatxatkasax Diosan arunakap chuymar katuqañasawa ukat ukarjam sarnaqañasarakiwa, ukhamatwa Diosan Arupax yanaptʼistani. Uk amuytʼañatakix kuna unañchäwsa Ezequiel profetax uñjäna uka tuqit parltʼañäni. Jan istʼasir mä markar tukjañataki kamachinakani mä rollo manqʼantam sasaw Jehová Diosax uka unañchäwin profetar satayna. Ezequielax manqʼantkaspas ukhamaw uka arunak wali sum amuytʼañapäna. Ukhamatwa jupatakix Diosan arunakap yatiyañax wali askïspäna, miskʼïkaspas ukhama (Ezequiel 2:8–3:4, 7-9 liytʼasiñapawa).

¹¹ Kunjamtï Ezequielax jikxataskänxa, ukhamarakiw aka urunakan jikxatastanxa. Jaqinakax janiw Diosan arunakapat yatiñsa ni istʼañsa munapkiti. Ukampis jan qarjtañatakixa kuntï Qullan Qillqatanakax yatichki ukanak jan jaytasa sum yatxatañasawa. Salmonak qillqirjamarakiw jikxatasiñ muntanxa, jupax akham sänwa: “Tatay, arsutaxax jumar kusisiykirïpan, chuymaxan lupʼitapax nayraqatamkam purinpan, jumaw imantasiñ qarqaxätaxa, qhispiyirixätasa” sasa (Sal. 19:14). Ukhamasti, kuntï Biblian liyktan ukanakat lupʼiñataki tiempo apstʼasiñasawa, ukhamatwa yatichäwinakapxa chuymar katuqañäni. Jïsa, sapa mayniw Diosan Arupat sum yatxatañataki chʼamachasiñasa. *

12. ¿Kunatsa qullan ajayumpi yanaptʼayasiñatakix tantachäwinakar sarañasa?

¹² Maysa tuqitxa, “thaqañasaw maynit maynikama kunjäman yanaptʼasiñasataki munasiñanïñasataki, ukhamarak suma luräwinak uñachtʼayasa. [Ukat] tantachasïwinakasar [sarañasapuniwa]”, ukhamatwa Jehová Diosan qullan ajayup katuqaraksna (Heb. 10:24, 25). Tantachäwinakar sarasin sum istʼañasawa ukat ukarjam sarnaqañasarakiwa. Ukhamatwa Jehová Diosan qullan ajayupax tama tuqi yanaptʼistani (Apocalipsis 3:6 liytʼasiñapawa).

Jan axsarirïñax kunatsa wali aski

13. ¿Kunatsa qullan ajayuw nayra cristianonakar yanaptʼäna sasin sistanxa?

¹³ Qullan ajayuw Diosan munañap sum phuqañatakix yanaptʼistu. Nayra cristianonakax ukhamaw qullan ajayun yanaptʼatax Diosan Apnaqäwipat ‘taqi chiqan’ wali muspharkañ yatiyapxäna (Col. 1:23). Ukat amtañäni, uka cristianonakatxa mä qhawqhanikiw wali yatxattʼatäpxäna. Ukhamasti qullan ajayukipuniw Diosan arunakapat yatiyapxañapatakix taqinir yanaptʼpachäna, janiw jupanakakix uk phuqapkaspänti (Hech. 4:13).

14. ¿Suma yatichirïñatakix kunjam sarnaqañasasa?

 ¹⁴ Qullan ajayun munañaparjam sarnaqañasarakiwa, ukhamatwa Diosan arunakapat jan axsartʼas yatiyir sarañatakix yanaptʼistani. Ukatxa Diosan qullan ajayup mayisiñäsawa, Arupatxa sapa maynis wali sum yatxatañasawa, tantachäwinakarus sarañasapuniwa ukat kuntï yatxatktan ukanakatxa lupʼiñasarakiwa, ukhamatwa ‘taqi chuym’ luqtañäni (Rom. 12:11). Bibliax suma yatichir mä jaqit akham siwa: “Apolos sutini mä judiowa Efesoru purini, Alejandriankiri, suma [yatichir] chacha” sasa. Ukampis ¿kunas suma yatichirïñapatakix yanaptʼäna? Diosan Arupax akham siwa: “Ajayunsti aqkiri chuymani, Tatitxata parlaskisa ukanaksti chiqaparurakiw parläna yaticharakïna” sasa (Hech. 18:24, 25, MT). Ukat jiwasatix ‘aqkir ajayumpi’ yanaptʼayasiñänixa, ukhamarakiw utat uta sarkasasa, jan ukax yaqha chiqanakansa jan axsartʼas yatiyañäni (Rom. 12:11, MT).

15. ¿Jan pächasis yatiyir sarasax kuna askinaksa jikxattanxa?

¹⁵ Jan pächasis yatiyir sarasax wali askinakwa jikxatsna. Nayraqatxa, Diosan arunakapat yatiyañax kunatsa wali aski ukwa sum amuyañäni. Ukatsti, yaqhanakar sum yatichasax jukʼamp kusisitaw jikxatasiñäni. Ukxarusti, kunatsa jankʼaki yatiyir sarañasa uk amuyasax taqi chuymarakiw yatiyir sarañäni.

16. Pä chuymaki yatiyir sarxstan ukhaxa, ¿kun lurañas wakisispa?

¹⁶ Ukampis ¿nayrjamati yatiyir sarañatakix wal chʼamachasisktanxa? Jan ukhamäxchi ukaxa, ¿kun lurañas wakisispa? Nayraqatxa, jiwaspach sum amuytʼasiñasawa, uka tuqit Pablox akham sistuwa: “Jumanakpacharak yantʼasipxam, iyawsañanakamanxa suma chʼamanïpxtati janicha uk yatiñataki” sasa (2 Cor. 13:5). Ukhamasti sapa maynis akham jisktʼasiñäni: “¿Nayrjamat qullan ajayun munañapar sarnaqasktxa? ¿Diosarux qullan ajayup mayisktti? ¿Diosan munañap phuqañatakix Jupar atinisitajti mayisitanakajax uñachtʼayaski? ¿Diosan arunakapat yatiyañax wali askïskit nayatakixa, ukat Jupar yuspärtti? ¿Bibliat sum yatiqañatakix chʼamachasisktti? ¿Diosan yatichäwinakap liytʼasas ukat istʼasas lupʼiñatakix tiempo apstʼasisktti? ¿Tantanchäwinakan arstʼañatakis jankʼakïtti?” sasa. Kuna tuqinakansa aynachtʼasktan ukat kun lurañas wakisispa ukanak amuytʼasiñatakiw ukham jisktʼasiñax yanaptʼistu.

Jan axsarañatakix qullan ajayumpi yanaptʼayasipxañäni

17, 18. 1) ¿Kunjamsa Diosan markapax jilxattawayi? 2) ¿Kunjamatsa “qhana arumpi” Diosan arunakapat yatiyaskaksna?

¹⁷ Jiwatat jaktxasaxa, akham sasaw Jesusax arkirinakapar säna: “Qullan ajayuw jumanakxar jutani, ukatxa chʼam katuqapxäta. Jumanakasti nayat qhanañchapxitäta Jerusalén markana, Judeana, Samariana, taqi aka uraqpachana” sasa (Hech. 1:8). Ukat jichhakamax walpun Diosan markapax jilxattawayi. Jehová Diosan Qhanañchirinakapax paqallq millonatsa jiläxapxiwa, ukat pä pataka kimsa tunka jila markanakanwa Diosan Apnaqäwipat yatiyasipkaraki. Sapa maraw niya waranq phisqa patakani millón horanaka Diosan arunakapat yatiyapxi. ¡Jiwasatakix uka luräwir yanaptʼañax wali askiwa! Janipuniw mayampis ukham yatiyasxaniti.

¹⁸ Kunjamtï nayra cristianonakax qullan ajayun yanaptʼatax Diosan arunakapat yatiyapkänxa, ukhamarakiw jichhax Uraqpachan yatiyasiski. Ukat jiwasatix qullan ajayumpi yanaptʼayasiñänixa, “qhana arumpi” yatiyiriw sararakiñäni (2 Cor. 7:4). Ukhamasti, qullan ajayun munañaparjam sarnaqaskakiñäni ukat Diosan Apnaqäwipat yatiyaskakiñäni.

[Qhanañchäwinaka]

¿Kunsa yatiqawayta?

• ¿Diosan arunakapat yatiyir sarañxa kunanakas chʼamtayistaspa?

• ¿Nayra cristianonakax kunjamatsa jan axsaras yatiyapxäna?

• ¿Kunas jan axsarirïñ yanaptʼistaspa?

• ¿Jan axsartʼas yatiyasax kuna askinaksa jikxattanxa?

[Jisktʼanaka]

[7 janan fotopa]

¿Wawanakasan jan axsarapxañapatakix kunjamsa yanaptʼsna?

[8 janan fotopa]

Mä qhawqha arunakampi Diosat mayisiñax jan axsartʼas yatiyañatakiw yanaptʼistani