Diosan arunakapat sum yatichapxañäni

“Diosan arupsti katxarupxarakim mä espadar uñtata kuntix Qullan Ajayux churapktam uka.” (EFE. 6:17.)

1, 2. Niyakixay Diosan Apnaqäwipat yatiyirinakax wal munaschixa, ¿kun lurañasasa?

 DIOSAN arunakapat yatxatañ munasaw jaqinakax Jesusar arkapxäna, uk uñjasasti akham sasaw arkirinakapar jupax säna: “Chiqpachansa, cosecha apthapiñax waljawa, ukampis irnaqirinakax jukʼanikirakiwa. Mayipxamaya yapunirux jukʼamp irnaqirinaka khitaniñapataki” sasa. Ukat janiw ukak siskänti, ‘tunka payani discipulonakaparuw jawsayäna’ ukat “cosecha apthapinipxam” sasaw khitäna, mä arunxa jaqinakar yatichiriw sarapxañapäna (Mat. 9:35-38; 10:1, 5). Ukat mä qhawqha tiempotxa, “paqallq tunkampwa [Jesusax] ajllïna, ukanakarusti [...] panin panini” khitarakïna, jaqinakar yatiyanipxañapataki (Luc. 10:1, 2).

² Jichhürunakanxa ukhamarakiw Diosan Apnaqäwipat yatiyirinakax wal munasi. 2009 maranxa, Jesusan jiwäwip amtañatakix 18.168.323 ukkhaniw Uraqpachan tantachasiwayapxi. Tunka millón jilaniw uka tantachäwitakix Jehová Diosan Qhanañchirinakapar yaptʼasiwayi. Ukhamasti walipuniw lurañanakax utji (Juan 4:34, 35). Ukatwa, “jukʼamp irnaqirinaka” khitanim sasin Diosar mayiñasa. Ukampis ¿kunjamatsa taqi chuyma mayitas uñachtʼaysna? Jaqinakar sum yatiyañataki ukat sum yatichañataki chʼamachasiñasawa (Mat. 28:19, 20; Mar. 13:10).

3. Jaqinakar sum yatiyañatakix kunjamsa qullan ajayux yanaptʼistu uk qhanañchtʼma.

³ Kunjamtï nayrïr yatichäwin uñjawayktanxa, qullan ajayuw Diosan arunakapat ‘jan axsartʼas parlañ’ yanaptʼistu (Hech. 4:31). Uka pachpa qullan ajayurakiw sum yatiyañataki yanaptʼistu. ¿Kunatsa ukham sistanxa? Jehová Diosax Biblia churistu. Uka wali chʼamani Qullan Arup sum apnaqañataki chʼamachasiñasawa (2 Tim. 3:16). Niyakixay qullan ajayump amuytʼayatächixa, Bibliat yatiyir sarktan ukhaxa, uka qullan ajayuw yanaptʼistu. Ukhamasti, kunjamatsa suma yatichirïsna uka tuqit janïr parlkasaxa, Diosan Arupax kunja chʼamanis uka tuqit amuytʼañäni.

‘Diosan arunakapax jachʼa chʼamaniwa’

4. ¿Diosan arunakapax kunjamsa jaqinakar yanaptʼi?

⁴ Diosan arunakapax wali chʼamaniwa (Heb. 4:12). Jaqinakan lurat wali ari espadanakat sipansa jukʼamp ariwa. Chʼakha parpar purtʼkiriwa. Bibliax yatichki uka arunakaxa, jaqin chuymapar purtʼañatakisa amuyunakapar purtʼañatakisa wali chʼamaniwa, ukat kunas jaqin chuymapan utji ukanaksa qhanstayarakiwa. Jan wali sarnaqäwinak apanukusin suma jaqir tukuñsa yanaptʼarakiwa (Colosenses 3:10 liytʼasiñapawa). ¡Diosan Arupax wali chʼamanipuniwa!

5. ¿Kuna tuqinakansa Bibliax yanaptʼistu, ukat kuna askinaksa jikxattanxa?

⁵ Maysa tuqitxa, Bibliax wali suma yatichäwinakaniwa, aka jan wali pachan sum sarnaqañatakiw yanaptʼistu, suma libropuniwa. Sarnaqäwisanxa mä qhanäkaspas ukhamawa, thakisatakis ukhamarakiwa. Mä arunxa, aka urunakan sum sarnaqañsa ukat jutïritak kun amtañsa wali sum yanaptʼistu (Sal. 119:105). Jan waltʼäwinakansa yanaptʼarakistuwa: khitimpis sarnaqañäni, kawkinsa irnaqañäni, kunjamsa isisiñäni, kunanakampis kusistʼañäni  uka tuqinakatsa suma amtanakar puriñatakiw amuytʼayistu (Sal. 37:25; Pro. 13:20; Juan 15:14; 1 Tim. 2:9). Biblian yatichäwinakapax mayninakamp sum apasiñsa yanaptʼarakistuwa (Mat. 7:12; Fili. 2:3, 4). Ukat jan wal sarnaqasax kuna jan walinakarus jutïrin pursna ukanakat amuyasiñasatakis iwxarakistuwa, thakisar qhantʼankaspas ukhamawa (1 Tim. 6:9). Ukxarusti Diosax kunsa jutïrin lurani ukanaksa yatiyarakistuwa, ukatwa Diosan munañaparjam sarnaqañatakix wal chʼamachastanxa (Mat. 6:33; 1 Juan 2:17, 18). Chiqansa, kunapachatï Biblian iwxanakaparjam sarnaqtan ukhaxa chuymas chuymaw jikxatastanxa.

6. ¿Supayamp jan atipayasiñatakix kunjamsa Bibliax yanaptʼistu?

⁶ Diosan arunakapaxa, “mä espadar” uñtasitaw sasaw Pablox säna. Qullan ajayun amuytʼayat uka espadaxa, Supayampi jan atipayasiñatakiw yanaptʼistu (Efesios 6:12, 17 liytʼasiñapawa). Ukampirakiw Supayan amparapat yaqhanakar qhispiysna. Uka espädasti jaqinakar jiwayañat sipansa qhispiyiwa. Ukhamax ¿janit sum apnaqañatak chʼamachasiñax wakiskaspa?

Diosan arunakap sum apnaqañäni

7. ¿Kunatsa Diosan arunakap sum apnaqañasa?

⁷ Mä chʼaxwäwinxa kunampis jarkʼaqasini ukat kunampis nuwasini ukanakxa mä soldadox yatiñapawa ukat ukanak apnaqañxa wal yatsuñaparakiwa. Niyakixay Diosan arunakapax “mä espadar” uñtasitächixa, sum uñtʼañasawa, ukat kunjam apnaqañsa yatiñasarakiwa. Pablox akham sistuwa: “Kunäkipansa, mä suma irnaqirjama Diosan nayraqataparu uñstam, jan kunatsa pʼinqasiñani, chiqaparu Tatitun arunakap parlasinaraki” sasa (2 Tim. 2:15).

8, 9. ¿Mä jiskʼa tʼaqat sum amuytʼañatakix kunas yanaptʼistani? Uka tuqit mä uñachtʼäwimpi qhanañchtʼma.

⁸ ¿Yatiykasax kunjamatsa ‘Tatitun arunakapat chiqapar parlsna’? Bibliat sum yatichañ munasaxa, jiwasaw nayraqat sum yatiqañasa. Ukatakixa, mä jiskʼa tʼaqax kuna tuqitsa parli uk sum amuytʼañasawa. Ukat kuna tuqitsa nayrïr jiskʼa tʼaqanakasa ukat ukxankki uka jiskʼa tʼaqanakas parlaski ukarjam sum yatxatasin amuytʼañasarakiwa, ukhamatwa yaqhanakar sum yatichsna.

⁹ Mä jiskʼa tʼaqat sum yatxatañatakix janiw mä chiqaki liytʼañasäkiti, jan ukasti jachʼpach liytʼañasawa. Ukatakix Gálatas 5:13 jiskʼa tʼaqat amuytʼañäni, Pablox akham sänwa: “Jumanakax jilatanaka, qhispiyat sarnaqasiñaru jawsatäpxtawa, ukampis jan uka libre sarnaqasiñ tumpanix janchin munañaparjam sarnaqapxamti, jan ukasti maynit maynikama yanaptʼasipxañamawa munasipxatanakam layku” sasa. ¿Kuna tuqit libre sarnaqañatsa Pablox parlaskäna? ¿Kunjamsa cristianonakax juchampit jiwañampita ukat kʼari yupaychäwit qhispipxäna ukanakatti parlaskäna? Janiwa. Jan ukasti, kunjamsa Jesusax arkirinakapar ‘leyin maldicionapat qhispiyäna’ uka tuqitwa parlaskäna. ¿Kunjamatsa uk yattanxa? Nayrïri jiskʼa tʼaqanaka ukat ukxankki uka jiskʼa tʼaqanaka liytʼasaw uk amuytanxa (Gál. 3:13, 19-24;  4:1-5). Khitinakatï uka leyin maldicionapat qhispiñarux wali askit uñjapkäna ukanakaxa, maynit maynikam nuwasiñat sipansa, munasiñampiw uñjasipxañapäna (Gál. 5:15).

10. Biblian mä jiskʼa tʼaqapat sum yatxatañatakixa, ¿kuna tuqinakat amuyañas wakisispa, ukat kunas ukatakix yanaptʼistaspa?

¹⁰ Biblian mä jiskʼa tʼaqapat sum yatxatañatakixa, khitis qillqatayna, kuna tiemponsa, kuna amtampisa ukat kunjamanakan jikxatasisas qillqatayna ukanak amuytʼañasawa. Ukat kunjamsa uka tiempon sarnaqapxäna, kunanaksa lurapxäna ukat kuna yupaychäwinakas utjäna ukanak yatxatañasarakiwa. *

11. ¿Kunjamsa Biblian yatichäwinakap qhanañchañasa?

¹¹ Diosan ‘arunakapat chiqapar parlañatakixa’, Biblian yatichäwinakap qhanañchtʼañasawa, ukat suma arunakampi amuytʼayañasarakiwa. Kunjamtï Jesusax Supayan yantʼatäkasax Qullan Qillqatanakampi saytʼaskänxa, ukhamarakiw jiwasax Diosan arunakapampi kʼari yatichäwinak chiqañchtanxa. Ukampis janiw jaqinakar axsarayañsa ni jiskʼachañsa munktanti, janirakiw jiwasjam amuyapxañapatakix munkir jan munkir Bibliat yatichktanti (Deu. 6:16; 8:3; 10:20; Mat. 4:4, 7, 10). Apóstol Pedrox akham siwa: “[Cristor] jachʼachapxam chuymanakamanxa. Ukatsti wakichtʼatäpxarakim khitinakatix jumanakaru suytʼañanakamxat jisktʼapkätam ukanakar sañatakixa ukampis sapxam suma chuymampi” sasa, jiwasax uka arunakaruw istʼtanxa (1 Ped. 3:15).

12, 13. ¿Diosan Arupax kunanaksa tukji? Uk mä uñachtʼäwimpi qhanañchtʼma.

¹² Diosan Arupat yaqhanakar sum yatichasaxa, ¿kunsa jikxattanxa? (2 Corintios 10:4, 5 liytʼasiñapawa.) Nayraqatxa, “kunanakatix chʼamanïki” ukanakaruw tukjtanxa, mä arunxa, kʼari yatichäwinaksa, jan wali luräwinaksa ukat jucharar jaqinakan jan wali amuytʼanakapsa Biblian yatichäwinakapampiw tukjtanxa. “Dios contra jan wali parlanak” tukjañatakix wali askipuniwa. Ukhamasti, Bibliampi jaqinakar yanaptʼañasawa, ukhamatwa kuntï Diosax yatichki ukarjam amuyapxani.

¹³ Uk amuytʼañatakix India markan jakasir 93 marani mä awichitat parltʼañäni. Yaqha markan jakasir mä yuqapaw carta tuqi Bibliat yatichatayna. Jehová Diosatsa ukat amtanakapatsa sum yatiqäna. Ukampis jiwatatxa almax yaqha cuerporuw sarxi sasaw uka awichar wawatpach yatichapxatayna. Kunapachatï yuqapax jiwatanak tuqit parlir mä carta apayäna ukhaxa akham sasaw colertʼasïna: “Kamis ukhamänixa, janiw Bibliax ukham yatichkpachati. Taqi yupaychäwinakarakis jan jiwir almanïtanwa sapxixä. Maynix jiwxi ukhaxa, almapax yaqha cuerporuw sarxi, ukat 8.400.000 ukha kutiw cuerpot cuerpo saraspa sasaw  chuymajan amuyta. Nayatakix ukaw chiqaxa. ¿Ukham yatichasax taqi yupaychäwinakaw pantjasipxi sañti munista?” sasa. Ukampis Diosan arunakapax uka amuy tukjänwa. Walja jiskʼa tʼaqanakat yatxattʼasax akham sasaw mä qhawqha semänat qillqatayna: “Jiwatanakax kunjamas jikxatasipxi uk jichhakiw amuyasta. Yatkakisma, jiwir familiaranakasax jaktanxapxaniw sasaw wal kusista. Jankʼak Diosan Apnaqäwipax jutaspa” sasa.

Chuymar purtʼkir yatichapxañäni

14. ¿Kunjamatsa Diosan arunakapampixa jaqinakar amuytʼaysna?

¹⁴ Yatiyir sarkasax janiw Bibliat aliqakix liytʼarapiñasäkiti; jan ukasti, kunjamtï Pablox jaqinakar amuytʼaykänxa, ukham amuytʼayañasarakiwa (Hechos 19:8, 9 ukat 28:23 liytʼasiñapawa). “Amuytʼayaña” sas jaqukipatäki uka griego aruxa, mä jaqin “chuymapar purtʼaña” ukat “iyawsayaña” sañ muni. Ukhamax ¿kunjamatsa maynirux Diosan arunakapat sum amuytʼaysna? Kuntï yatichktan ukanakax chuymapar purtʼañapawa, ukat ukar iyawsañapatakixa, taqi chuyma parltʼañasawa. ¿Kunjamatsa uk lursna?

15. ¿Kunjamatsa Bibliar respetapxañapatak yanaptʼsna?

¹⁵ Bibliar wali respetompi uñjapxañapatak yanaptʼañasawa. Mä jiskʼa tʼaqa janïr liytʼkasaxa, kuna tuqitsa parlasktan ukarjamaw yanaptʼsna. Jehová Diosax kamsis uk yatiñax kunatsa wali aski uk amuytʼayañasawa. Ukat kuna tuqit jisktʼasinsa, arunakap istʼasax akham sissnawa: “Diosax kamspachas uk uñjañäni” jan ukax “uka tuqit kunsa Diosax yatichpacha uk yatxatañäni” sasa. Ukham sasinxa, Bibliax Diosan amuytʼayataw sasktanwa, ukhamatwa jaqinakax Diosan arunakaparux wali askit uñjapxani. Ukham lurasaxa, khitinakatï Diosar iwaysapki ukat janirak Bibliap sum uñtʼapkiti ukanakarux jukʼampwa yanaptʼañäni (Sal. 19:7-10).

16. ¿Kunjamsa mä jiskʼa tʼaqat qhanañchsna?

¹⁶ Janiw aliqakix Bibliat liytʼañasäkiti; qhanañchtʼañasawa. Pablot yatiqasiñasawa, jupax janiw aliqakix jaqinakatak Bibliat liyirïkänti, jan ukasti, qhanañchtʼirïnwa (Hech. 17:3). Chiqansa, mä jiskʼa tʼaqax kunayman tuqit parlaspa, ukhamasti kuna tuqit yatichkasasa, kawkïr arunakas sum amuytʼayañ yanaptʼistaspa ukanak qhanstayañasawa. Ukatakix inas wakischispa pachpa arunak arsuña, jan ukax ukarjam jisktʼaña, ukhamatwa istʼirix jupa pachpa amuytʼasini. Ukxarusti, uka jiskʼa tʼaqax kamsañsa muni ukxa jiwasaw qhanañchañasa, ukat uka yatichäwix kunjamsa jupar yanaptʼi uksa amuytʼayañasarakiwa.

17. ¿Kunjamatsa jaqinakan chuymapar Bibliampi purtʼsna?

¹⁷ Janiw lakaki yatichañasäkiti, jan ukasti Bibliampi chuymar purtʼañasawa. ‘Qillqatanakarjam qhanañchasaw’ Pablox jaqinakar sum amuytʼasiyäna ukat chuymar purtʼäna (Hech. 17:2-4). Jiwasax jaqinakan chuymapar purtʼañataki chʼamachasiñasarakiwa. Yanaptʼañ amtampi kuns amuyumpi jisktʼañäni ukhaxa, kunanakatï chuymapan utjki ukanakwa yatiñäni (Pro. 20:5). Chuym ustʼayir arunakampi chiqaki kuns sasin axsarayañat sipansa, amuytʼasiñapatakiw Bibliarjam qhana arunakampi yatichtʼañasa, janiw chʼama arunakampi pächasiyañ munktanti. Ukat paya jan ukax kimsa jiskʼa tʼaqanak aliqaki liytʼañat sipansa, mä jiskʼa tʼaqat sum qhanañchañaw wakisispa. Ukatsti, ‘sum amuytʼayañatakixa’ sum yatxatañasarakiwa (Pro. 16:23). Jïsa, yaqha tuqinakampit yatxattʼasaw jaqinakan chuymapar purtʼaraksna. 93 maran awichitat  amtañäni, ¿kunjamatsa alma tuqit parlir Biblian chiqa yatichäwinakapar iyawspachäna? Kunatsa jaqinakax jan jiwir ajayunïtanwa jan ukax almanïtanwa sasin amuyapxi uka tuqitwa amuytʼayapxatayna. Ukhamasti, kunjamatsa uka kʼari yatichäwix uñstawayi, ukat kunatsa walja yupaychäwinakax ukar iyawsapxi, uk sum amuytʼasakiw Biblian chiqa yatichäwinakapar iyawsäna. *

Sum yatichaskakiñäni

18, 19. ¿Diosan arunakap sum yatichañatakix kunatsa chʼamachasiñasa?

¹⁸ Kunjamtï Bibliax siskixa, akapachax “jan walit jukʼamp jan waliruw” saraski, “niyaw tukusiski” (2 Tim. 3:13; 1 Cor. 7:31). Ukatwa “kunanakatix chʼamanïki” ukanakar tukjañatakix Diosan arunakap mä espadäkaspas ukham sum apnaqañasaxa.

¹⁹ Jiwasatakixa, Biblia mä espadar uñtat apnaqañax wali askipuniwa, kunattix Diosan arunakapampiw jaqinakan chuymaparux purtʼtanxa ukat ukanakampirakiw kʼari yatichäwinaksa tukjtanxa. Inas mä kʼari yatichäwi tukjañax jiwasatak wali chʼamächispa, ukampis janiw kuna yaqha yatichäwis Diosan arunakapat sipansa jukʼamp chʼamanix utjkaspati. Ukhamasti, Diosan Apnaqäwipat yatiykasaxa, kuntï Bibliax yatichki ukanakampi jaqinakar sum yatichañataki chʼamachasipxañäni.

[Qhanañchäwinaka]

¿Kunsa yatiqawaytanxa?

• ¿Diosan Arupax kunja chʼamanisa?

• ¿Diosan ‘arunakap chiqaparu parlañatakix’ kunas yanaptʼistani?

• ¿“Chʼamanïki” ukanakarux kunjamsa Diosan arunakapax tukji?

• ¿Diosat yatiyir sarasax kunjamatsa jaqinakar amuytʼaysna?

[Jisktʼanaka]

[12 janan recuadropa/fotopa]

Kunjamatsa Diosan Arupampix jaqinakar amuytʼaysna

▪ Bibliar respetompi uñjapxañapatak yanaptʼañamawa

▪ Liytʼasax qhanañchtʼañamawa

▪ Chuymar purtʼañamawa

[11 janan fotopa]

Diosan arunakapxa, mä espadar uñtat sum apnaqañataki chʼamachasiñasawa