Diosat amtasipxañapatakiw wayn tawaqunakar yanaptʼi

“WAYNÄKASINA jumar irnuqir Diosamat amtasim” sasaw wali yatiñan Salomón chachax nayra tiempon qillqatayna (Ecl. 12:1). Ukat 2008 maran mayo phaxsit 2009 maran enero phaxsikam apasiri “Qullan ajayumpi irpayasipxañäni” sat kimsa uru jachʼa tantachäwinakanwa Kunsa wayn tawaqunakax yatiñ munapxi sat payïr libro apsusiwayaraki.

Mä jana uñkatasinxa wayn tawaqunakataki mä cartaw utji, ukax Uraqpachan Jilïr Irpirinakan mä cartapawa, mä chiqax akham siwa: “Aka libromp yanaptʼayasisax akapachankir kunayman jan waltʼäwinakaru, yantʼanakaru saykatapxasma ukwa Jehová Diosat mayirapipxsma, ukhamat Diosan munañaparjam kunsa amtapxañamataki” sasa.

Chiqasa, wawanakax ‘Tatitur iyawsapxaspa’ ukwa cristian awk taykanakax munapxi (Efe. 6:4). Ukampis jilaratäxapxi ukhaxa, walja wayn tawaqunakaw kun lurañsa pächasipxi “pantjaskächa” sasa, janiw sum amuytʼasipkiti. Ukhamax ¿kunjamsa jumax wawanakamar yanaptʼasma? Kunsa wayn tawaqunakax yatiñ munapxi siski uka payïr librompiw wali sum yanaptʼasma, uk jichhax uñjañäni.

▪ Mä libronïñamawa ukat sum uñtʼañamarakiwa. Janiw aliqakix uñakipañamäkiti; jan ukasti, kuna tuqinakatsa parli ukanak sum amuyañamawa. Uka libroxa wayn tawaqunakan ‘amuytʼasiñ yatiqapxañapataki’ suma wakichtʼatawa; janiw aliqakix “ak luram, uk luram” siskiti (Heb. 5:14). Ukatxa chuymanakapan utjki uka yatichäwinak sum uñjapxañapatakis jan ukax arxatapxañapatakis yanaptʼarakiwa. Sañäni, 15 yatichäwin pʼiqiñchapax akham siwa: “Jan waliruw wiytapxitu, ¿kamachiristsa?” sasa, “janiw munkti” sañat sipansa kun lurañas wakisispa ukwa Bibliarjamax uka yatichäwix sum amuytʼayi. Ukhamatwa wayn tawaqunakax masinakan kun lurayañ munatas ‘arusiñxa yatipxarakini’ (Col. 4:6).

▪ Qillqtʼasiñatak utjki uka chiqanakax wali askiwa. Uka chiqanakax wayn tawaqunakan amuyunakap qillqtʼasipxañapatakiwa. Ukampis  jumax awkjamas jan ukax taykjamas qillqtʼasirakismawa. * Uk amuytʼañatakix 16 janan utjki uka pä jisktʼat parltʼañäni, wayn tawaqunakax kunapachas maynimpi uñtʼasiñ qalltapxaspa uka tuqit jisktʼaski. Jumax wawamjam waynäkayäta jan ukax tawaqükayäta ukhaxa, kunjamsa uka tuqit amuyirïta ukanakwa uka chiqar qillqtʼasisma. Ukat akham amuytʼarakisma: “¿Tiempompix mayjti uka tuqit amuyxtxa? ¿Kunanaksa ukhat jichhakamax yatiqawayta, ukat kunjamsa ukanakampix wawajar yanaptʼirista?” sasa.

▪ Janiw wawaman librop uñaraqañamäkiti. Kawkintix qillqtʼasiñataki utjki uka chiqanakaxa, wawanakax kunsa amuyapxi uk yatiñatakiwa; jupanakaw ukarjamax kunsa amuytʼasipxaspa jan ukax qillqtʼasipxaspa. Ukampis kuntï 3 janan siski ukxa awk taykanakax amtapxañapapuniwa, akham siwa: “Wawanakamax kunatï chuymapan utjki uk aka libror qillqtʼasipxañapatakixa, ‘janiw uñxatapkäti’ sasaw amtapxañama. Ukhamarjamatï phuqapxätaxa, kuns qillqasipxi ukxa awistʼapxarakiristamwa” sasa. Awk taykjamax janiw kunatï libron qillqatäki ukak yatiñ munktanti, jan ukasti kunas chuymapan utji ukanak yatiñ muntanxa.

Familian Bibliat yatiqañatakix askiwa

Familiana Diosar Yupaychañataki Aruman yatxatañatakix uka suma librox wali khusawa. Ukat niyakixay tʼaqanakax jan jisktʼanïchixa, ¿kunjamsa wawanakamar yanaptʼasma? Jumaw ukxa sum amuytʼxañama.

Yaqhip familianxa, 132, 133 jananakan “Jan walir wiytatax kamachasmasa” siski uka chiqampiw wal yanaptʼasipxi, ukarjamaw kun lurañsa wawanakar yatichapxi. Nayrïr jisktʼampixa, kuna jan walinsa wawanakax sapa kuti uñjasipxi ukwa yatxatapxi, ukat payïr jisktʼampisti kawkinsa uka jan walin uñjasipxi ukwa yatxatapxaraki. Ukatxa uka yantʼampi atipayasisas jan ukax saykatasas kunas utjaspa ukwa taqpachani amuykipapxi. Ukhamatwa “yantʼäwinaka” siski uka chiqar kimsa tuqit amuytʼasin phuqantapxi. Jumax ukhamarakiw wawamar chuymaparjam sum amuytʼasiñapatakix yanaptʼasma. Ukhamatwa janix pächaskaniti (Sal. 119:46).

Awk taykampi parltʼasiñatakiw wawanakar chʼamañchi

Uka librox awk taykampi parltʼasiñatakiw wawanakar chʼamañcharaki. Sañäni, “Chacha warmi ikthapiñatxa, ¿kamsasas awkijampis taykajampis parliristxa? (63, 64 jananaka) ukat “Awk taykamamp parlañamawa” (189 jana) siski uka recuadronakaxa, kunjamsa wayn tawaqunakax awk taykampix jan axsaras parlapxaspa uka tuqitwa parli. Uka  tuqitxa, 13 marani mä tawaqitax akham siwa: “Uka librot yatxattʼasaw awk taykajampi parlañatakix chʼamachasta, kuntï amuykta ukat lurkta ukanakwa jupanakar yatiyta” sasa.

Ukatxa, awk taykanakampi yaqha tuqinakat parltʼasiñatakiw aka librox wayn tawaqunakar chʼamañchi. Sapa yatichäwi tukuyaruw “Jumasti, ¿kamsasmasa?” siski uka recuadrox utji, ukax janiw yatiqatanak amtañatakïkiti; jan ukasti familiampi parltʼasiñatakiwa. Ukat sapa yatichäwi niya tukuyaruw “¡Akanak lurä!” siski uka recuadrox utjaraki, ukax kunsa yatiqatarjamax lurapxani uk qillqtʼasipxañapatakiwa. Ukanxa mä jisktʼapax akham siwa: “Awkijarus jan ukax taykajarusa, ¿kuns aka tuqit jiskʼañ muntxa?” sasa. Ukhamatwa wayn tawaqunakax awk taykapar jisktʼasipxaspa.

¡Chuymar purtʼapxam!

Awk taykjamax wali sum yuqitamarus jan ukax phuchitamarus yanaptʼañ munpachätaxa. Wayn tawaqunakax kunsa yatiñ munapxi siski uka payïr librox ukataki wakichanitawa. Ukhamasti, kunjamsa mä cristianox phuchitapar uka librompi yanaptʼatayna ukat sum parltʼasipxatayna, uk uñjañäni.

Akham siwa: “Walja chiqanakwa Rebecampix kayukisa, bicicletatsa jan ukax autotsa sarapxta. Uka chiqanakar sarasax wali sum chuym qhanartʼayasipxta. Ukhamatwa wawajampix parltʼasipxarakta” sasa.

“Nayraqatxa, Uraqpachan Jilïr Irpirinakan cartapampi ukat ‘Munat Awk taykanaka’ siski uka chiqampwa uñxattʼapxta. Wawajax jan kun axsaras amtanakaparjam libropar qillqtʼasispa ukwa nayax munayäta, kunjamtï 3 janan siskixa ukhama. Janiw uñaraqkitanicha sasin axsarañapxa munkti” sasaw saraki.

Ukatxa akham sarakiwa: “‘¿Kawkitsa qalltañ munta?’ sasaw jisktʼta. Jupax ‘¿Anattʼañatak videonakax walikïskpachati?’ siski uka tuqit qalltañäni situwa. Janiw nayax uka tuqit yatiñ munaspa siskayätti, ukampis qhipatak amuytxa. Masinakapaw mulljaskañ mä anatañ videot wal parlapxiritayna, wali axtkaña ukat jan walinak parlir anatañ videompiw wal anatañ munapxirïtayna. ¡Janipuniw kawkinsa uk uñjirïkti! Ukat ‘¡Akanak lurä!’ (251 jana) siski uka recuadror puripxta, ukhaw taqi ukanak sum qhanañchitu. Ukatxa sum amuytatasi, masinakan ‘anatañäni’ satax kamachanis ukxa wali sum amuytʼasi” sasa.

Ukatsti, “kuntï libropar qillqki ukanakxa, wali sum yatiyitu. Bibliat yatiqkasax wali sum purapat parltʼasipxta: mayn mayniw liytʼapxta, ukat jupax taqi kunat parlañ muni. Recuadronaksa fotonaksa janiw ukhamak pasañ munkiti. Nayax waynäkayäta ukhax kunanakas utjäna ukanak sista; jupasti kunanakas jichhax utji ukanak sarakitu. ¡Jupax nayampi parltʼasiñ wal muni!” sasaw saraki.

Uka librox apsusiwaykäna ukhaxa, wawanakar yanaptʼañatakix wali kusisitaw katuqasiwayapxpachätaxa. Ukhamasti, jichhaw wawanakamar ukampix sum yanaptʼasma. Chiqansa, uka librompi familianakax yanaptʼasipxaspa ukwa Uraqpachan Jilïr Irpirinakax taqi chuym munapxi. Aka librox taqinitaki askïkchisa, qullan “ajayun munañaparjam” sarnaqapxañapatakix wayn tawaqunakar wali sum yanaptʼaspa (Gál. 5:16).

[Qhanañchäwi]

[30 janan recuadropa]

Yaqhip wayn tawaqunakax kamsapxisa

“Aka librox wali amuyumpi ukat lapisas aptʼasita ukham liytʼañatakiwa. Maynitakjam lurat sum librowa. Jakañar apir thakinkañajatakix wali sum amuytʼayitu.” (Nicola)

“Yuqallanakamp sarnaqam sasaw masinakajax wal arxayapxitu, ukat awisax iyaw sañjamawa. Ukampis nayrïr jaljanwa uka librox sum amuytʼayitu. Masinakajax kunsay parlasipkpan, janïraw nayax ukataki wakichatäkti.” (Katrina)

“‘¿Bautisasiñti amtaskta?’ siski uka recuadrow nayarux wal yanaptʼitu. Ukhamatwa bautisasiñ tuqitsa, Bibliat yatiqañ tuqitsa ukat Diosar mayisiñ tuqitsa wal amuytʼastxa.” (Ashley)

“Nayax wawatpach Diosan arunakapxa yatta, awk taykajax cristianüpxiwa. Ukampis aka librox naya pachpa amuytʼasisin suma amtanakar puriñwa yanaptʼitu. Ukat jichhax jan axsartʼasaw tatajampis mamajampis kuntï amuykta ukanak parltʼastxa.” (Zamira)

[31 janan fotopa]

Awk taykjamax aka libro sum uñtʼapxañamawa

[32 janan fotopa]

¿Wawaman chuymap yattati?