“Qullan ajayumpi Corderon esposapampisti siwa: ‘Jutam’”
“Qullan ajayumpi Corderon esposapampisti siwa: ‘Jutam’”
“Qullan Ajayumpi Corderon esposapampisti siwa: “Jutam”. [...] Umat pharjayaski, ukat um munkaraki ukax jutpan, jakañ umat inak umtʼarakpan.” (APO. 22:17.)
1, 2. ¿Jiwasatakix kunas nayrankañapa, ukat kunatsa?
¿JIWASATAKIX kunas nayrankañapa? Diosar luqtañaw nayrankañapa sasaw Jesusax säna. Ukatwa arkirinakapar akham amtayäna: “Nayraqatax Diosan reinopa munapxam” sasa, ukham lurapxaspäna ukhaxa, kunatix munaski ukanakxa Diosaw jupanakar churaspäna (Mat. 6:25-33). Ukat Diosan Apnaqäwipax jila alani mä perlar uñtataw sasaw sarakïna. Mä alakipax uka perla alañatakiw “taqi kunatix jupan utjkis” ukanak aljanti, sasaw amuytʼayäna (Mat. 13:45, 46). Ukhamasti, jiwasatakix Diosan Apnaqäwipat yatiyañampi ukat jaqinakar Jesusan arkiripar tukuyañampiw nayrankañapa.
2 Nayrïr pä yatichäwinakanxa, kunjamsa qullan ajayux jan axsaras yatiyir sarañsa ukat Diosan Arupampi sum yatichañsa yanaptʼistu ukanak yatiqawaytanxa. Aka yatichäwinsti, kunjamsa qullan ajayux jan jaytasa yatiyir sarañatakix yanaptʼistu ukwa yatiqarakiñäni.
Taqinitakiwa
3. ¿Kuna kasta umat umtʼañataki jawsatätansa?
3 Taqi jaqinakatakiw mä invitacionax utji (Apocalipsis 22:17 liytʼasiñapawa). Qullan ajayux akham sistuwa: “¡Jutam!” sasa. Umat pharjatanakax mä suma umat umtʼapxam sasaw saraki. Ukampis janiw chiqpach umat parlkiti. Jesusax Samaria markankir mä warmimpi yaqha kasta umat parlkäna uka kasta umat parlaski. Akham sasaw Jesusax uka warmir mä phuju jakʼan säna: “Naya churkta uka umat umkani ukaxa, janiw mayampis pharjayaskxaniti. Kawkïr umtix nayax churkta ukaxa jupa pachpanwa jalsuni wiñay jakañ churañataki” sasa (Juan 4:14). Ukhamasti, wiñay jakaña churir mä suma umat umtʼañataki jawsatätanwa.
4. ¿Kunas jakañ churir umaxa, ukat kunatsa wali wakiskirixa?
4 ¿Kunats uka uma umtʼañax wakisi? Adanax warmipar istʼasaw Diosar kutkatasiwayi, sasaw Bibliax qhanañchi (Gén. 2:16, 17; 3:1-6). Ukatwa uka chacha warmix Edén huertat jaqsut uñjasipxäna. “Capasakiw jakañ quqan achupatsa manqʼantaspa, ukhamat wiñay jakañataki” sasaw Diosax säna (Gén. 3:22). Ukat niyakixay Adanan wawapästanxa, taqiniw jiwañar katuyatätanxa (Rom. 5:12). Ukampis kunjamatsa istʼasir jaqinakax juchampit jiwañampit qhispipxaspa ukat mä suma uraqin wiñay jakañ katuqapxaspa, ukanakwa Diosax amtäna. Uka amtanakapan phuqasiñapatakixa Criston luqtasïwipax wali wakiskiripuniwa, taqi ukanakaw jakañ churiri umaxa (Mat. 20:28; Juan 3:16; 1 Juan 4:9, 10).
5. “Jutam” ukat “jakañ umat inak” umtʼam sasaxa, ¿khitis sistu, ukat kunatsa ukham sista?
5 “Jutam” ukat “jakañ umat inak” umtʼam sasaxa, ¿khitis sistu? Jaqinakar wiñay jakañ churañatakiw Jehová Diosax amtanakapxa Cristo tuqi phuqawayi. Kunapachatï Jesusax Waranq Maranak apnaqkani ukhaw jaqinakax uka amtanakapatxa wali askinak phuqatpach katuqapxani. Uka amtanakapax ‘mä suma qʼuma jawirar uñtatawa. Uka umasti suma chʼuwa vidrior uñtatarakiwa’ sasaw Bibliax qhanañchi. ¿Kawkits uka jawirax juti? “Diosampina Corderompina tronopatarakwa mistu[ni]” (Apo. 22:1). Ukhamasti, Jehová Diosatwa jakañ churir umax juti (Sal. 36:9). Ukatxa, Cristo tuqiw uka umxa churistu (Juan 1:29). Uka jawir tuqiw Jehová Diosax kuna jan walinakas Adanan juchapat utjawayi ukanak askichani. Ukhamasti, jakañ churir Jehová Diosaw “jutam” sistuxa.
6. ¿Kunapachatsa jakañ churir umax jalaski?
6 Kunapachatï Jesusax Waranq Maranak apnaqxani ukhaw ‘jakañ churiri suma qʼuma jawirax’ jukʼamp jilxattani. Coderox 1914 maran Apnaqirjam uttʼasïna, mä arunxa ‘Tatitun urupax’ qalltkäna ukhatpachwa uka jawir umax jalaski (Apo. 1:10). Ukat jichhakamaxa, kunayman tuqitwa wiñay jakañ jikxatapxañapatakix jaqinakar yanaptʼasiwayi. Uka yanaptʼanakaxa Diosan Arupat apstʼat yatichäwinakawa, ukanakaw “umampi” sasixa (Efe. 5:26). Ukhamasti, jichhaw jaqinakax wiñay jakañ churir uma umtʼapxaspa, mä arunxa, Diosan Apnaqäwipat yatichäwinak istʼasin ukarjam sarnaqapxaspa. Ukampis ¿khitinak tuqis Diosax jaqinakar jawsi?
Corderon esposapasti “jutam” siwa
7. ¿Tatitun urupanxa”, ¿khitinakas “jutam” sapxi ukat khitinakarusa?
7 ¿Khitis Corderon esposapaxa? Alaxpachar sarañatak ajllit cristianonakawa. Jupanakaw tamjamaxa “jutam” sasinxa mä aruki nayraqat jawsasipki. Ukampis ¿khitinakarus jawsapxi? Chiqansa, janiw jupanakpachax jawsasipkaspati. Jan ukasti, khitinakatï “taqi chʼaman Diosan jachʼa” urupxarux aka Uraqin wiñay jakapkani ukanakaruw jawsapxi (Apocalipsis 16:14, 16 liytʼasiñapawa).
8. Alaxpachar saririnakax 1918 maratpachwa Jehová Dios tuqit jawsasipki sasaxa, ¿kunatsa sistanxa?
8 Alaxpachar sarir cristianonakaxa, 1918 maratpachwa “jutam” sasin jaqinakar jawsasipki. Uka maranwa taqinitak mä arstʼäwix utjäna, pʼiqiñchapaxa, “Jichhürunakan jakapki ukanakatxa, millón millón jaqinakax inas jan jiwapkchiniti” satänwa. Armagedón pasatatxa walja jaqinakaw aka Uraqin wiñayatak jakasipxani sasaw qhanañchäna. Ukat 1922 maransti, Estados Unidos (Cedar Point, Ohio) markanwa Bibliat Yatiqirinakax mä jachʼa tantachäwi apapxatayna, ukansti, Diosan Apnaqäwipata ukat Apnaqiripampita yatiyasiñapatakiw taqinir wal chʼamachasïna. Ukhamatwa alaxpachar saririnakat aka Uraqinkasipki ukanakarux jukʼamp yatiyir sarapxañapatakix yanaptʼasïna. Ukat mä qhawqha maratxa, Apocalipsis 22:17 jiskʼa tʼaqat qhanañchir mä wakichäwi aka pachpa revistan inglés arut apsupxäna, akham satänwa: “Munasiñampi jawsatäpxtawa” sasa. Ukanxa akham sasaw qhanañchasïna: “Ajllitanakat jiltʼirinakaxa, [Dios tuqitwa] ‘jutam’ sasin munasiñampi yatiyapxaraki. Khitinakatï chiqapar uñjatäñ munapki ukat chiqa yatichäwinak yatiqañ munapki ukanakar yatiyasiñapawa. Jichhaw yatiyasiñapa” sasa (The Watchtower, marzo 15, 1929). Ukatsti, jichhakamaw Corderon esposapax “jutam” sasin jawsaski.
“Istʼirïki ukasti sarakpan ‘jutam’ sasa”
9, 10. ¿“Walja jaqinaka” sasin uñtʼatäpki ukanakarux kunjamatsa “jutam” sasin jawsapxañapatakix chʼamachasiwayi?
9 Ajllitanakan jawsatäsaxa, ¿kunsa istʼasirinakax lurapxañapa? Jupanakax yaqhanakaruw “jutam” sapxañaparaki. Khä 1932 maranxa, akham sasaw aka pachpa revistanxa qhanañchasïna: “Alaxpachar saririnakax Diosan Apnaqäwipat yatiyañ munapki ukanakaruw chʼamañchapxañapa. Tatitut yatiyañatakix janiw taqinis alaxpachar sarirïñapäkapuniti. Jehová Diosan Qhanañchirinakapatakix uk yatiñax wali kusiskañapuniwa, jupanakaw jakañ churir umatxa yaqhanakar yatiyapxarakispa, ukhamatwa istʼasirinakax Armagedón pasasin wiñay jakañ katuqapxaspa” sasa (La Torre del Vigía, noviembre 1932, jana 174).
10 Ukat 1935 maranxa akham sasaw qhanañchasirakïna: “Alaxpachar sarir cristianonakamp chika ‘jutam’ sasin yatiyapki uka cristianonakaxa, Jonadab chachar uñtasitäpxiwa. Jupanakaxa, khititix Jehú chachar uñtasitäki ukan yanapirinakapamp chikaw sarnaqapxañapa, mä arunxa, khitinakatï alaxpachar sarapkani ukanakamp chikaw Diosan Apnaqäwipat jan ajllitäkasinsa yatiyapxañapa” sasa (La Torre del Vigía, enero 1935, jana 12). Ukat Apocalipsis 7:9-17 jiskʼa tʼaqanakan parlki uka ‘walja jaqinakax’ khitinakäpxisa ukax uka pachpa maranwa qhanañchasiwayaraki. Ukhamatwa Diosat taqi chuyma yatiyañatakix jukʼamp chʼamachasiwayapxi. Ukat aksaruxa waljaniw istʼasisax walja jaqinak sat tamarux mantawayapxi, jichhakamax niyaw paqallq millonats jiläxapxi. Jïsa, waljanipuniw Diosan arunakapat yatiqasinxa Diosar katuyasipxi ukat bautisasipxi, ukatxa Criston esposapamp chikaw jaqinakar akham sapxaraki: “Khititix umat pharjayaski, [...] ukax jutpan, jakañ umat inak umtʼarakpan” sasa.
Qullan ajayusti “jutam” siwa
11. ¿Qullañ ajayux kunjamsa Jesusarux Diosan arunakapat yatichañxa yanaptʼäna, ukat Jesusax arkirinakapar kamsänsa?
11 Diosan arunakapat yatiyañxa wali sumpun qullan ajayux Jesusar yanaptʼäna. Mä kutixa, Nazaret markanwa mä sinagogan yatichaskäna ukat Isaías profetan qillqatanakap janjasinwa akham sasin liytʼäna: “Tatitun Ajayupaw nayxanki, suma yatiyäwinak pobrenakar churañatakiw ajllisitu; llaktʼat chuymanakar qulliriw khitanitu, carcelankirinakar qhispita sarnaqañat yatiyiriraki, ukhamarak juykhunakarus uñatatayiri; tʼaqhisiyatanakarus qhispiyiriraki; Tatitun kusiskañ marap yatiyiri” sasa. Ukatxa jupa pachpat akham säna: “Jichhüruwa jumanak nayraqatan aka arunakax phuqhasxi” sasa (Luc. 4:17-21). Ukat alaxpachar niya sarañampïxasax akham sasaw arkirinakapar sarakïna: “Qullan ajayuw jumanakxar jutani, ukatxa chʼam katuqapxäta. Jumanakasti nayat qhanañchapxitäta [...] taqi aka uraqpachana” sasa (Hech. 1:8).
12. ¿Kunjamsa qullan ajayux aka urunakan jaqinakar jawsañ yanaptʼi?
12 ¿Kunjamsa qullan ajayux jaqinakar yatiyañxa aka urunakan yanaptʼaraki? Niyakixay qullan ajayux Diosat jutchixa, uka qullan ajayuw alaxpachar saririnakarux Diosan Arupat sum amuyañxa yanaptʼi. Ukhamaw Jehová Diosax ajllitanakarux chʼamañchi. Ukat khitinakatï aka Uraqin wiñay jakañ katuqapkani ukanakar jawsasin Arupat yatichapxañapatakiw yanaptʼaraki. Ukat khitinakatix “jutam” satax iyaw sasin cristiano tamar mantapki ukanakaxa, Diosan qullan ajayupampi yanaptʼataw yaqhanakar “jutam” sapxaraki. Ukat niyakixay ‘qullan ajayun sutipxaru’ bautisasipxchixa, uka ajayun munañaparjamaw sarnaqapxi (Mat. 28:19, MT). Maysa tuqitxa, qullan ajayun amuytʼayat Bibliampiw alaxpachar saririnakamp chikax yatiyapxi. Ukhamasti, qullan ajayus “jutam” sasin jaqinakar jawskaspa ukhamawa. Uka qullan ajayun yanaptʼataw sapa maynis sarnaqtanxa. Ukhamax ¿kunjam chuymampis jaqinakar yatiyañasäspa?
‘Jutam sasipkakiwa’
13. ¿“Jutam sasipkakiwa” siski uka arunakax kunsa amuytʼayistu?
13 “Qullan ajayumpi Corderon esposapampisti” janiw awisakix “jutam” sapkiti. Jan ukasti, sapa kutiw “jutam” sapxi, kunjamtï griego arunxa qhanañchaski ukhama. Ukatwa Traducción del Nuevo Mundo de las Santas Escrituras sat Biblianxa akham sas jaqukipasiwayi: ‘Jutam sasipkakiwa’ sasa. Kunjamsa ‘qullan ajayumpi Corderon esposapampix’ nayratpach jichhakamax “jutam” sasin yatiyasipkaki, ukwa uka arunakax uñachtʼayistu. Ukat kunjamtï uñjawayktanxa, khitinakatix ukar istʼapki ukanakaxa, “jutam” sasaw sapa kuti yatiyapxaraki. Walja jaqinakat uñtʼatäpki ukanakaxa, ‘uruy arumaw Diosan templopanxa yupaychapxi’ mä arunxa Diosar luqtasipki, sasaw Bibliax qhanañchi (Apo. 7:9, 15). ¿“Uruy aruma” sasinxa kamsañs munpacha? (Lucas 2:36, 37, Hechos 20:31 ukat 2 Tesalonicenses 3:8 liytʼasiñapawa.) Sapa kuti yatiyir sarañataki chʼamachasiña sañ muni, kunjamtï Ana sat mä profeta warmimpi ukat apóstol Pablompix chʼamachasipkäna ukhama.
14, 15. Diosar taqi chuyma jan jaytasa luqtañax wali wakiskirïtapxa, ¿kunjamsa Daniel profetax uñachtʼayäna?
14 Daniel profetax ukhamarakiw Diosarux sapa kuti luqtäna (Daniel 6:4-10, 16 liytʼasiñapawa). Kunanaktï Diosar luqtañatak lurirïkän ukanakatxa janipuniw armasirïkänti. Ukat “kimsa kutiw urunxa [Diosarux mayisirïna], kunjämatix lurirïkän ukhamarjama”. Leonanakan putuparuw jaquntapxäma satpachasa, Diosar mayisiñxa janiw ni mä phaxsikis jaytanukuñ munkänti. Ukham lurasaxa, jan jaytasa Diosar luqtañax kunja wakiskirisa, ukwa mitanakapar uñachtʼayäna (Mat. 5:16).
15 Leonanakan putuparu jaquntatäkäna uka qhipärmanthixa, Darío reyiw uñjiri saräna ukat akham sasaw artʼäna: “Daniel, jakkiri Diosan serviripa, ¿kawkïri Diosamarutix taqi chuymamampi sirvkta ukax qhispiytamti leonanakan lakapatxa?” sasa. Ukat Daniel profetax akham sanïnwa: “¡Juma, jachʼa reyix, wiñayataki jakam! Nayan Diosaxax angelapwa khitani, juparakiw leonanakan lakapsa jistʼanti jan nayaru kuna ñanqhsa luraskañapataki, Diosasti yatirakiwa nayanxa jan juchanïtaxa, ukhamaraki juma, jachʼa rey, tuqisa jan kuna juchsa lurataxa” sasa. Ukhamasti, ‘taqi chuyma’ jan jaytasa luqtatapatxa, Jehová Diosaw bendicïna (Dan. 6:19-22).
16. Daniel profetat yatiqasisaxa, ¿Diosat yatiyañ tuqit kunsa sapa maynix jisktʼasiñasa?
16 Jiwayämaw satpachasa, Daniel profetax Diosar luqtaskakïnwa. ¿Jiwasax jupjamti lurasktanxa? ¿Jehová Diosan Apnaqäwipat taqi chuyma yatiyaskakiñatakix kunanaksa lurasktanxa? Chiqansa, janipuniw mä phaxsis Diosat yatiyañxa jaytanukuñasäkiti. Ukhamasti, yatiyir sarirjamäkasaxa, ¿janit sapa semana Diosat yatiyañax wakiskaspa? Ukat wali usuntata jikxatasisax inas tunka phisqan minutonakak phaxsin yatiystan, ukxa irpir chuymaninakar yatiyaskakiñasawa. ¿Kunatsa? Qullan ajayumpiru ukat Corderon esposapampiruw yanaptʼañ muntanxa, ukat jaqinakarus “jutam” sañ munaraktanwa. Ukhamasti, kunas kunäpan, Diosan Apnaqäwipat yatiyaskakiñasawa.
17. ¿Kawkhanakansa Diosan Arupat yatiyasma?
17 Umat pharjatanakarux “jutam” ukat ‘jakañ umat inak umtʼam’ sasin jawsañaxa, ¡jiwasatakix wali askipuniwa! Janiw utat uta sarasakix phuqxtwa sasax sisktanti. Ukhamasti, alasir sarkasasa, kawk sarkasasa, irnaqäwinsa jan ukax yatiqañ utansa Diosan Arupat yatiyañatak chʼamachasiñasawa. Ukat marka apnaqirinakan jarkʼatpachasa yatiyaskakiñäniwa. Inas mä utan yatiyxasax jukʼamp khurjankir yaqha utar yatiyir sararaksna jan ukax yaqha chiqanakan wali amuytʼasis yatiyaraksna.
“Jutam” saskakiñäni
18, 19. ¿Kunjamatsa Diosan yanapiripäña wal munatas uñachtʼaytanxa?
18 Niya patak maranakaw qullan ajayusa ukat Corderon esposapasa jakañ churiri umat pharjatäpki ukanakarux “jutam” sasin jawsasipki. ¿Jupanakan jawsatax jumax istʼxtati? Ukhamächi ukhaxa, jaqinakar jawstʼañamatakiw chʼamachtʼanipxsma.
19 Kunapachkamay ukham jawsaskchiñäni ukxa janiw yatktanti. Ukampis ukham lurasaxa, Jehová Diosaruw yanapasktanxa (1 Cor. 3:6, 9). Jiwasatakix Diosan yanapiripäñax wali askipuniwa. Ukatwa, mä ‘suma sacrificio churañasaxa, lakanakasampi yupaychasa’, mä arunxa yatiyir sarañasapuniwa (Heb. 13:15). Ukhamasti, aka Uraqin wiñay jakañ suyirinakaxa Corderon esposapampi chika “jutam” sasipkakiñäni. Ukhamatwa jakañ churir umatxa yaqhanakax umtʼapxarakini.
¿Kunanaksa yatiqawaytanxa?
• ¿Khitinakarus “jutam” sasin jawsasi?
• ¿Kunatsa pachpa Jehová Diosaw jawsistu sasin sistanxa?
• ¿Kunjamsa qullan ajayux jaqinakar jawsañ yanaptʼi?
• ¿Kunatsa jan jaytasa yatiyir sarañataki chʼamachasiñasa?
[Jisktʼanaka]
[16 janan tablapa/fotonakapa]
(Sumpach amuytʼañatakix qillqatn mistki uk uñxatañamawa)
‘Jutam sasipkakiwa’
1914
5.100 yatiyirinakakïnwa
1918
Walja jaqinakaw Paraison jakapxani
1922
“Diosan Apnaqäwipat ukat Apnaqirit yatiyapxam, yatiyapxam, yatiyasipkakim”
1929
Alaxpachar saririnakat aka Uraqinkasipki ukanakax “jutam” sapxiwa
1932
“Jutam” sasax janiw alaxpachar saririnakarukix jawsaskiti
1934
Jonadab chachar uñtasitäpki uka cristianonakarux yatiyapxañapatakiw chʼamachasi
1935
Khitinakas “walja jaqinakax” ukaw qhansti
2009
7.313.173 yatiyirinakäxiwa