Supayan sallqa arunakapat amuyasiñäni

ASIRIA marka apnaqir Senaquerib reyin Rabsaqué sat khitatapaxa, akham sasaw Jerusalenankirinakar säna: “Jan sallqjasipxamti. Diosamax janiw yanapapkätamti. Aynachtʼxapxtawa, mistunipxam, jan ukax jiwapxätawa” sasa. Senaquerib reyin soldadonakapax Judá markar qʼal tukjapxatayna, ukat uka khitatan arunakapaxa, Jerusalenankirinakar sustjkañ arunakampi chʼam thayarayasin aynachtʼayañ munarakïna (2 Rey. 18:28-35).

Asiria markankirinakax wali qhurunakata ukat jaqi jiwayirit uñtʼatäpxänwa. Ukat jupanak contra saytʼir markanakar axsarayañatakixa, katuntat jaqinakarux kunjamxa tʼaqhisiyapxi ukwa uñachtʼayapxirïna. Sarnaqäwinakat yatxattʼir Philip Taylor sat chachax uka tuqit akham siwa: “Atipapkän uka markanakax jan mayampi saytʼasipxañapataki ukat uka jakʼankir markanakar axsarayañatakixa, wali qhurut uñtʼayasipxäna, ukat katuntat jaqinakarux kunja jan walinak lurasas tʼaqhisyapxi ukanakwa qhanstayapxirïna, ukhamatwa axsarjayasax aynachtʼayapxirïna” sasa. Jïsa, uka sipitax wali chʼamaniwa, ukat kunjamtï Taylor chachax siskixa, “amuyuruw axsarañ mantayi”.

Jichhürunxa, ukhamarakiw chiqpach cristianonakax nuwastanxa, ukampis “janiw jaqinak tuqiti nuwasktan[ti], jan ukasti alaxpachanakankiri ñanqha ajayunak tuqiwa”, mä arunxa, Dios contra saytʼasipki uka saxranak contraw nuwastanxa (Efe. 6:12). Uka saxranakan piqtʼiripasti Supayawa, jupax ukhamarakiw arunakapampix axsarjayañ munistu.

Muniristxa, taqiniw Dios contra saytʼasipxaspa sasaw Supayax arsuraki. Ukat Job chachax jakkäna uka tiemponxa, akham sasaw Jehová Diosar säna: “Mä jaqixa jakañapa qhispiyasiña laykuxa kunsa lurakispawa” sasa. Mä arunxa, jaqix jan walinakan uñjasiyatax Diosat jithiqtawayxsnas ukham sañ munäna (Job 2:4). Ukampis ¿uka arunakapax chiqati? ¿Maynix qhispiñ laykux Diosan kamachinakap pʼakintakispati? Chiqas Supayaw ukhamäñap muni. Arunakampiw axsarayañ munistu, mä cáncer usjamaw uka axsarayir arunakax amuyusar jan amuykay mantistaspa. Ukhamasti, axsarayañatakix kunanaksa Supayax luri uk uñjañäni, ukat jukʼampis kunjamsa ukanakar saykatsna ukwa yatiqañäni.

Jaqix “laqʼa patxaru utachata ñiqʼi utäkaspa ukhamarakiwa”

Supayax Job chachan Elifaz sat “amigop” tuqiwa jaqinakar jiskʼachäna, jan waltʼäwinakar saykatañatakix janipuniw chʼamanïpkiti sasaw amuyayäna. Elifaz chʼachax akham sänwa: “Laqʼa patxaru utachata ñiqʼi utäkaspa [jan ukax cuerpükaspas] ukhamarakiwa, ukanakasti thuthar uñtat pallalljatäspawa. Jaqix alwax sartasiskiwa, jaypʼurusti tʼunjatarakiwa, wiñayatakiw jiwawayxi, janirakiw khitis jupan jiwatapatxa llakkiti” sasa (Job 4:19, 20).

Biblianxa, pʼakisir “mä ñiqʼi phukhu[mpi]” sasistuwa (2 Cor. 4:7). Chiqas Adanan juchapatwa jiwasax juchanirakïtanxa, ukatwa pʼakisir phukjamätanxa (Rom. 5:12). Sapakix janiw khitis Supayan yantʼanakaparux saykatksnati. Ukampis Diosaw chiqpach cristianonakarux yanaptʼistu. Juchararäkstansa Jupax wali askit uñjistu (Isa. 43:4). Ukat qullan ajayu mayktan ukhasa, churarakistuwa (Luc. 11:13). Ukat Diosan ‘jachʼa chʼamapampiw’ Supayan yantʼanakaparux saykataraktanxa (2 Cor. 4:7; Isa. 12:2). Ukhamasti, ‘Supayatak  wal saytʼasiñäni iyawsañanakasanxa’, Diosaw jukʼamp chʼamachtʼarakistani (1 Ped. 5:8-10). ¡Supayarux janiw kunatsa axsarañasäkiti!

Jaqix “qʼañu umar uñtatawa”

“Janiw mayni aski jaqis utjkiti, jan juchani jaqisa janiw utjkarakiti. Pachpa angelanakas Diosatakix jan askïkchi ukaxa, janirak pachpa alaxpachasa qʼumäkarakchi ukapachaxa, ¡jaqix ukanakat sipansa jukʼampi ñusantatawa, jiskʼachkañarakiwa, ukatsti jan umaña qʼañu umar uñtatawa!” sasaw Elifaz chachax säna (Job 15:14-16). Ukampixa, Jehová Diosax janiw mayni jaqirus askit uñjkiti sasaw Job chachar saskäna. Ukat jan wali amuyunakas utjkistu ukanakatxa jukʼamp jan wal amuyañaswa munaraki. Ukat kuna jan walinaktï nayrax lurkayätan ukanakax janipunis askichañjamäkaspa ukat jiwaspacha juchañchasisin aynachtʼasksna ukwa Supayax muni. Jehová Diosax jan phuqkay wali chʼamanaksa maykistaspa, janis sinttʼasirïkaspa ukat janis yanaptʼasirïkaspa ukham amuyañaswa munaraki.

Chiqas “taqini jucha lurapxatap laykusti Diosampix janiw katuqatäpkiti”, ni kamachinakapsa sum phuqkaraksnati (Rom. 3:23; 7:21-23). Ukampis Diosatakix janipunis kunatakis askïksna uk janiw sañ munkiti. Jan ukasti, Awkisax “laqʼätas yati[wa]” ukat janipuniw jan phuqañanakjamxa maykistaniti, janirakiw juchachasitasatxa “wiñay tuqinuqkis[taniti]” (Sal. 103:8, 9, 14). Ukat khitis juchararätas layku aynachtʼayañ munkistu uksa yatirakiwa. Ukaxa “Nayrapacha uka jachʼa kata[riwa], ukasti Supaya, Satanás satarakiwa” (Apo. 12:9, 10).

Diosaxa, khitinakatï juchachasipki ukanakar “perdonañatakix jankʼakiwa”, ukampis perdonayasiñatakix juchanakap apanukupxañapawa, jan mayampi juchachasiñatakiw taqi chuym chʼamachasipxañapa ukat altʼat chuymampiw Diosar jakʼachasipxañapa (Isa. 55:7; Sal. 51:17). Jehová Diosax akham siwa: “Juchanakamax wila colorar uñtatäkchinisa, nayax khunjam janqʼuw tukuyäxa” sasa (Isa. 1:18). Uka suma arunakax Awkisan munañap phuqañatakiw chʼamañchistu.

Juchararätas laykuxa, janiw Diosarux sapak jakʼachasksnati. Adanampi Evampix Diosar jan istʼasin juchachasisaw wiñay jakañ aptʼawayapxi, wawanakapjamax ukatwa tʼaqhisiraktanxa (Rom. 6:23). Ukampis Jehová Diosax munasiñapatwa Yuqapar aka Uraqir khitani, ukhamat khitinakatï Jesucriston luqtasïwipar iyawsapki ukanakar qhispiyañataki (Mat. 20:28; Juan 3:16). ¡Diosax wali ‘khuyaptʼayasiripuniwa’! (Tito 2:11.) Jïsa, ¡Juchanakasax pampachatäspawa! Ukhamasti, ¿kamisaraki Supayan kʼari arunakaparux chiqaw sañänisti?

“Jichhasti janchiparu llamktʼam”

Wali usuntayatax Diosatakiw Job chachax colerani sasaw Supayax säna. Ukatwa Diosar akham säna: “Jichhasti janchiparu llamktʼam, ukatsti ukapachaw uñjäta kunjämtix juman ajanumaru ñanqha arunakampi maldecïtam ukxa” sasa (Job 2:5). Jichhürunakanxa, ukhamarakiw  wali usuntatätas laykuxa, janis kunatakïxsna ukham amuyañas muni.

Ukampis Jehová Diosax janipuniw jan nayrjam luqtatasatxa jaytkistaniti. Amuytʼañäni, mä suma amigomar lunthatanakax nuwjawayapxaspa, ukat ¿janiw nayrjamäjiti sasinti jaytxasma? ¡Janiwa! Jan ukasti, munasiskakismawa, ukat jumar yanaptʼañ layku ukham nuwjayasispa ukhax jukʼampwa munasismaxa. Ukhamasti, ¿Jehová Diosax janit jukʼamp munaskistani? Biblianxa akham siwa: “Diosax janiw jan chiqäkiti jumanakan luräwimata armasiñatakixa, sutiparu munapxatama uñachtʼayapxatamatsa” sasa (Heb. 6:10, MT).

Biblianxa, “mä pobre ijma” warmit parli, jupax walja maranakaw Diosar luqtpachäna. Ukat templonkir mä arkar “pä jiskʼa cobret lurat qullqi uchir” Jesusax uñjäna, ukat ¿uka warmisa qullqi churatapasa janiw kunatakïkisa sispachänti? ¡Janipuniw ukham siskaspati! Antisasa, Diosar yupaychañataki chʼamachasitapatxa jachʼaruw aptäna (Luc. 21:1-4).

Jiwasatï Diosar taqi chuyma luqtañänixa, usutäkasasa, chuymankipstatäkasasa, jan ukax juchararätas layku yaqha ukham jan walinakan uñjasisasa, Jehová Diosampix sum apasiskaksnawa. Jupax janipuniw kunäkipansa jan nayrjam luqtatasatxa jaytanukkistaniti (Sal. 71:9, 17, 18).

“Qhispiyasiñampisti mä cascompjam pʼiqir uskusipxam”

¿Kunjamatsa Supayan jan wali arunakapat amuyassna? Pablon aka iwxtʼapar istʼañasawa: “Jichhax jilatanaka, chʼamañchasipxam Tatitumpi, ukhamarak jachʼa chʼamapampisa. Jarkʼaqasipxam taqi armanaktix Diosax churapktam ukanakampi, Supayan kʼari arunakaparu atipjañataki”. Ukatxa, “qhispiyasiñampisti mä cascompjam pʼiqir uskusipxam” sasaw amtayarakistu (Efe. 6:10, 11, 17). Ukhamasti, Supayan sallqa arunakapat amuyasiñatakix uka “casco” uchasiñasapuniwa. “Qhispiyasiñataki suytʼañax mä cascjamawa pʼiqisaru imantañapaxa”, kunjamtï mä soldadox cascompi pʼiqi jarkʼaqaskixa ukhama. Mä arunxa, kuntï Diosax jutïrin lurkani ukar atinisiñasawa, ukhamatwa Supayan kʼari arunakapax pʼiqisar jan matkaniti (1 Tes. 5:8). Jutïrin kunja sumas jakasiñäni ukaxa janiw pʼiqisat chhaqtañapäkiti, ukatakix Bibliat yatxatañasapuniwa.

¿Supayan jan wali yantʼanakapar saykatañatakix kunas Job chachar yanaptʼarakïna? Jiwatanakax jaktanipxaniw sasaw taqi chuyma iyawsäna. Ukatwa jiwirjamäkasas Diosat janipuni jithiqtkänti. Ukat akham sasaw säna: “Jumatix jawsitasmaxa, nayax jaysarakirismawa; munasiñampiw uñtanitasmaxa, jumaxay nayaru uskuschistaxa uka layku” sasa (Job 14:15). Ukhamasti, Diosax taqi chuyma luqtirinakaparux wal munasitapwa Job chachax yatïna, ukatwa “Diosar luqtatax layku jiwkäsa jaktayitaniw” sasin atinisïna.

Taqiniw Job chachjam Jehová Diosar atinisiñasaraki. Kuna jan walinakantï Supayasa saxranakapasa uñjasiyapkistu taqi ukanakxa Diosaw askichaskani. Ukat apóstol Pablon aka arunakapat janipun armasiñäniti, jupax akham sänwa: “Diosaruw katuyasipxañamaxa, jupasti janiw jumanakarux jachʼa jan atipkaya yantʼanakxa churapkätamti. Kunapachatï yantʼax jutkani ukkhaxa, Diosax kunjamatsa uka yantʼar atipjañxa yanapapxarakïtamwa, ukhamatwa atipjapxäta” sasa (1 Cor. 10:13).

[20 janan fotopa]

Jehová Diosaxa, taqi chuyma luqtatasatxa wal munasistu

[21 janan fotopa]

Qhispiyasiñataki suytʼañax mä cascjamawa pʼiqisar imantañapa ukat uchasiñasapuniwa