¡Walikpun aka suma thakir juttaxa!

“Jiwañansa jakañansa Tatitutakïtanwa.” (ROM. 14:8.)

1. ¿Suma thaki tuqitxa kunsa Jesusax yatichäna?

 MÄ SUMA thakinjam sarnaqassna ukwa Jehová Diosax muni. Jaqinakax kunayman thakinakansa sarnaqapkchixa, Diosan kamachinakaparjam sarnaqañata ukat Jesusat yatiqasa sarnaqañat sipansa janipuniw yaqha suma thakix utjkaspati. Kunjamsa Diosar yupaychañasa ukxa Jesusaw yatichistu; ajayuna ukat chiqakankañampina Diosar yupaychapxäta ukat jaqinakar yatichiriw sarapxäta sasaw arkirinakapar satayna (Mat. 28:19, 20; Juan 4:24). Jiwasatix ukarjam phuqañänixa, suma nayrampiw Jehová Diosax uñtanistani ukat bendicirakistaniwa.

2. 1) Jesusax jiwxäna uka qhipatxa, ¿kunas kamachäna? 2) ¿Kunatsa ‘Tatitun thakipankapxiw’ sasin nayra cristianonakarux sasïna?

² “Khitinakatix wiñay jakañatak wakichatä[pki]” ukanakaxa Diosan yatichäwinakap katuqasaw bautisasipxi. Ukhawa jupanakarux “walikpun aka suma thakir juttaxa” sasin taqi chuym sistanxa (Hech. 13:48). Jesusax jiwxäna uka qhipatxa, yaqha markanakat kunaw Diosan arunakap katuqapxäna ukat bautisasipxäna, ukhamatwa Diosar taqi chuym iyawsatanakapxa uñachtʼayapxäna (Hech. 2:41). Ukatwa ‘Tatitun thakipankapxiw’ sasin jaqinakax jupanakat sapxäna (Hech. 19:23). Uka arunakax jupanakatakjamänwa, Jesucristor iyawsasina ukat jupat yatiqasisaw sarnaqapxäna, mä suma thakins sarnaqapkaspa ukhamänwa (1 Ped. 2:21).

3. 1) ¿Kunatsa bautisasiwaytanxa? 2) ¿Ukat qahwqhanis pasir tunka maranakanxa bautisasiwayapxi?

³ Jichhürunakanxa, ukhamarakiw Diosan arunakapat wal yatichasiski, niyaw 230 jila markanakan yatichasxi. Aka qhipa tunka maranakanxa 2.700.000 ukkhaniw Diosar katuyasisin bautisasiwayapxi, mä arunxa 5.000 jaqinakas sapa semanan bautisasipkaspa ukhamawa. Ukampis ¿kunatsa bautisasipxi? Jehová Diosaruw wal munasipxi ukat Jupar luqtañwa munapxi. Diosan munañaparjamaw sarnaqapxaraki. Bautisasiñ urux wali askipuniwa, kunattix uka urutwa Jehová Diosampi sum apasiñ qalltawaytanxa. Ukat bautisasisax Jupar atinisitaswa uñachtʼayaraktanxa, kunjamtï nayra luqtirinakapar yanaptʼkänxa ukhamarakiw thakipan sum sarnaqañ yanaptʼitani sasa (Isa. 30:21).

 ¿Kunatsa bautisasiñax wakisi?

4, 5. ¿Bautisatanakax kuna bendicionanaksa katuqapxi?

⁴ Inas jumax Diosar sum uñtʼxsta ukat kamachinakaparjam sarnaqxsta ukat janïr bautisatäkasas tamamp chik yatiyir sarxaraksta. Walik ukham lurasktaxa. Ukampis ¿jakäwim Diosar katuyasisin bautisasiñti amtaskta? Kunjamtï Bibliat yatiqawayktaxa, sapa maynis Jehová Diosar nayraqat luqtañasawa; janiw munañanakasaksa ni yänakaksa thaqhañasäkiti (Salmo 148:11-13 ukat Lucas 12:15 liytʼasiñapawa). Ukat bautisasisax walja bendicionanakwa Diosat katuqätaxa. ¿Kuna bendicionanaksa katuqäta?

⁵ Bautisasiñax wali askiwa. Diosan munañap lurasaxa wali kusisitaw jikxatasïta (Rom. 12:1, 2). Qullan ajayuw cristianjam sum sarnaqañsa, sumankañsa ukat Diosar jukʼamp atinisiñsa yanaptʼätamxa (Gál. 5:22, 23). Ukat Diosax mayisitanakamsa istʼarakiniwa; Biblian kamachinakaparjam sarnaqañataki chʼamachasitamax janiw inamayäkaniti, Jupax bendicïtamwa. Ukatxa, yatiyir sarasas wali kusisitaw jikxatasïta, wiñay jakañ katuqañsa janirakiw pächasxätati. Ukatsti bautisasisaxa Jehová Diosan Qhanañchiripäñ munatamwa uñachtʼayarakïta (Isa. 43:10-12).

6. ¿Bautisasisax kunsa uñachtʼaytanxa?

⁶ Uman bautisasisaw Diosar katuyasitassa ukat Jupankatassa uñachtʼaytanxa. Apóstol Pablox akham sänwa: “Janiw khitis jiwas kipkataki jakktanti, ni jiwas kipkatakis jiwktanti. Jakapktansa, Tatitutakiw jakapxtanxa; jiwxañän ukkhatsti Tatitutakirakiw jiwxañäni. Ukhamasti jiwañansa jakañansa Tatitutakïtanwa” sasa (Rom. 14:7, 8). Ukatxa Diosax janiw thakipan munkir jan munkir sarnaqaykistuti, ukax sapa maynitäxiwa, ukhamatwa munasiñapxa uñachtʼayarakistu. Ukhamasti, kunapachatï Diosan thakipan sarnaqañ amtktan ukhaxa, Jupar munasitaswa uñachtʼaytanxa ukat wal kusisiyaraktanxa (Pro. 27:11). Maysa tuqitxa, bautisasisax janiw Diosar katuyasitasak uñachtʼayktanti, jan ukasti Apnaqirisarjam uñjataswa uñachtʼaytanxa. Ukhamatwa jachʼakankañap tuqit saytʼastanxa (Hech. 5:29, 32). Ukatsti, Jupaw jiwas tuqit saytʼasiraki (Salmo 118:6 liytʼasiñapawa). Ukampis bautisasisaxa, jichhürunakansa jutïrinsa jukʼamp bendicionanakwa katuqañäni.

Jilat kullakanakampi Diosar luqtaña

7-9. 1) ¿Jupar arkañ laykux taqi kun jaytapkäna uka arkirinakaparux kun katuqapxäta sänsa Jesusaxa? 2) ¿Kuntï Jesusax Marcos 10:29, 30 qillqatan siskäna ukax kunjamsa jichhürunakan phuqasiski?

⁷ Mä kutixa, akham sasaw Pedrox Jesusar säna: “Tata, nanakax taqi kunanakatix utjapkitän ukanakxa apanukunipxtwa, ukatsti jumaruw arkapxsma. ¿Kunarak nanakatakisti utjani?” sasa (Mat. 19:27). Pedrompi ukat mayni  arkirinakampix Diosan Apnaqäwipat jaqinakar yatiyañ laykuw taqi kunsa jaytanukupxatayna, ukampis kunsa jutïrin katuqapxani ukwa Pedrox yatiñ munäna (Mat. 4:18-22). ¿Jesusax kamsänsa?

⁸ Kunjamtï Marcos libron siskixa, akham sasaw säna: “Khititix naya layku, Diosan arunakap laykuraki utap jaytanukuxa jan ukax jilapsa, kullakapsa, awksa, tayksa, wawanakapsa, uraqinakapsa, uka jaqix patak ukkhampi akapachan katuqxani utanaka, jilanaka, kullakanaka, tayka, wawanaka, uraqinaksa. Ukanak katuqkasasa uñisitaw sarnaqapxani. Ukampis khä pachanxa wiñay jakañ katuqarakini” sasa (Mar. 10:29, 30). Kunjamtï Jesusax siskänxa, nayra cristianonakax jupanakkamaw yanaptʼasipxirïna. Lidiasa, Aquilasa, Priscilasa ukat Gayosa, ‘jilat kullakjama ukat taykjamaw’ mayninakar yanaptʼapxäna (Hech. 16:14, 15; 18:2-4; 3 Juan 1, 5-8).

⁹ Jesusan uka arunakapax jichhürunakan wali sum phuqasiraki. Walja jilat kullakanakaw Betel utanakansa, misionerotsa ukat yaqha markanakar khitatas irnaqtʼapxi, Diosan Apnaqäwipat yaqha chiqanakan yatiyasiñapatakixa, taqi chuymaw “uraqinakapsa”, mä arunxa, yänakapsa apanukupxi. Yaqha jilat kullakanakas ukhamarakiw lurapxi, Jehová Diosar luqtañ laykux utanakapsa jaytanukupxiwa, ukatxa “wali kusisitaw jikxatasipxta, Jehová Diosaw nänakarux uñjasipkitu” sasaw wali sum arstʼapxi (Hech. 20:35). Chiqansa, bautisat taqi jilat kullakanakaw mä wawakix ‘Diosan reinop nayraqat munapxaspa, ukat kunatix chiqäki Jupan nayraqatapanxa ukanaksa’ wali kusisit thaqhapxaspa (Mat. 6:33).

Diosaw jan walinakat ‘imantistu’

10, 11. ¿Khitinakarusa, ukat kunjamsa Jehová Diosax imanti?

¹⁰ Diosar katuyasisin bautisasisax yaqha bendición katuqaraktanxa. Kunjamtï Salmo 91:1 qillqatan siskixa, Diosaw Jupat jithiqtayir jan walinakatxa ‘imantistu’. Ukat khitinakatix Jupar taqi chuyma iyawsapki ukat luqtapki ukanakarukiw imanti. Ukhamasti, Diosar taqi  chuym atinisiñasawa ukat kuntï Jupar katuyaskasisin arsuwayktan ukarjam phuqañasarakiwa, ukampixa, “Jumätaw imantasiñaxaxa, jarkʼaqasiñaxasa, Diosaxay, Jumaruw taqpach chuymamp alkatsma” sisksnas ukhamawa (Sal. 91:2). Chiqansa, Jehová Diosaw imantirisaxa (Sal. 91:9). Janiw khitis jan walinakat Jupjam imantkistaspati.

¹¹ Ukat Jehová Diosamp sum apasiñax mä bendicionarakiwa, ukatwa jan walinakat ‘imantarakistu’. Diosar katuyasis bautisastan ukhatwa Jupamp sum apasiñ qallttanxa. Ukat jukʼamp jakʼachasiñatakixa, Bibliat sum yatxatañasawa, taqi chuym mayisiñasawa ukat munañaparjam sarnaqañasarakiwa (Sant. 4:8). Ukatxa Jesusat yatiqasiñasarakiwa, Awkipampix wali sum apasipxi, janiw khitis Diosampix ukham apaskiti, taqi chuymapuniw Awkipar atinisi (Juan 8:29). Ukhamasti amtapuniñäni, Diosar luqtañatakix kuntï arsuwayktan ukanak phuqañxa pachpa Jehová Diosaw yanaptʼistaspa, chiqas wal yanaptʼañ munistu (Ecl. 5:4). Jehová Diosax wal munasistu ukat Jupar taqi chuym luqtaskaksna ukwa munaraki, ukatwa jan walinakat imantistu.

Diosan markapankañax wali askiwa

12, 13. 1) ¿Diosan markapanxa kunjamas jikxatastanxa? 2) ¿Machaqanakarux kunjamsa yanaptʼsna?

¹² Diosar katuyasis bautisasisaxa, wali munasir Diosan markaparuw manttanxa. Uka markanxa jilat kullakanakampis alaxpachankir Awkisampis wali sum apastanxa (Sal. 29:11; Isa. 54:13). Ukham yaqha markax janipuniw utjkaspati. Ukat kunapachatï yaqha markanakat jutasin mä jachʼa tantachäwin tantachasipxi ukhaxa, yaqha aru parlirïsipchisa, yaqha kasta jañchinïsipkchisa, jilat kullakanakax taqiniw mä wawak tantachasipxi, janiw yaqhachasipkiti, jan ukasti wali munasiñampiw uñjasipxi.

¹³ Akapachankir jaqinakax janiw ukham sarnaqapkaspati (Isaías 65:13, 14 liytʼasiñapawa). Ukat Diosan arunakapat yatiyasaw “Diosan markapar mantanipxam” sasin jaqinakarux jawsaraktanxa, ukat khitinakatix jichhak mantasinipki ukanakarux jukʼamp yatiyir sarapxañapatakiw yanaptʼaraktanxa, ukanak lurañax wali askiw jiwasatakixa. Ukat kunapachatï mä irpir chuymanix jupanakar yanaptʼam sistani ukhaxa, kunjamtï Aquilampi ukat Priscilampix Apolos sat jilatar ‘Diosan thakipxatxa jukʼamp suma amuytʼayapkänxa’, ukham yanaptʼañasarakiwa (Hech. 18:24-26).

Jesusat yatiqasiskakiñäni

14, 15. ¿Kunatsa Jesusat yatiqasiskakiñasaxa?

¹⁴ Bautisasxasas Jesusat yatiqasiskakiñasawa. ¿Kunatsa? Jesusax janïr aka Uraqir jutkasaxa, waranq waranqa maranakaw Awkipamp chikax alaxpachan irnaqäna (Pro. 8:22, 30, NM). Jupatakix Diosar luqtañat sipansa ukat Qullan Qillqatanakat jaqinakar yatiyañat sipansa janiw jukʼamp suma thakix utjkänti (Juan 18:37). Ukat Awkipar jan istʼasa munañapak thaqhasin jan amuytʼasiri jaqjam sarnaqasapäna ukax janipuniw walïkaspänti, jupax uk sum amuyasïna. Ukatxa Awkipar luqtasax kunjamas wali tʼaqhisiyata ukat jiwayat kun uñjasiñapäna uksa yatisirakïnwa (Mat. 20:18, 19; Heb. 4:15). Ukhamasti Diosat jan jithiqtañatakix Jesusat yatiqasiñasawa.

¹⁵ Jesusax bautisaskäna uka qhipatxa, Diosan thakipat apaqañatakiw Supayax jupar kunaymanit yantʼäna, ukampis inakiw yantʼäna (Mat. 4:1-11). Ukhamaxa, kunsay Supayax luraskpan, chʼamachtʼasiñäni ukhax janiw Diosat jithiqtaykistaniti. Chiqansa khitinakatï bautisasiñ amtasipki ukat jichhaki bautisasipki ukanakaruw jil yantʼañ yati (1 Ped. 5:8). Inas familiaranakasax Jehová Diosan thakinakapat jan sum yatisax “kunarus ukar saräta” sasin yanaptʼañ munasin jarkʼapxchistaspa. Ukampis ukham yantʼanakan uñjasisaw jupanakar respetañsa ukat cristianjam sum sarnaqañsa yatiqtanxa, ukat jisktʼataxa Diosan arunakapatwa qhanañcharaksna (1 Ped. 3:15). Ukhamatwa, istʼapkistu ukanakar yanaptʼaraksna (1 Tim. 4:16).

 Janipun uka suma thakit saraqañäniti

16, 17. 1) ¿Deuteronomio 30:19, 20 qillqatarjamaxa kuna kimsa mayitanaksa phuqañasa? 2) ¿Uka kimsa mayitanak phuqañ tuqitxa, Jesusasa, Juanasa ukat Pablosa kamsapxarakïnsa?

¹⁶ Israelitanakax wasar pampan sarnaqapkäna ukhaxa, akham sasaw Moisesax jakañar apiri thaki ajlliñ tuqitxa jupanakar säna: “Jichhüruw nayax uchta alaxpachampiru akapachampiru jumanakat testigoñapataki; jumanakaru jakañampita jiwañampita ajllisiñamatak churapxsma; ukhamaraki bendicionampita, maldicionampita ajllisipxañamataki. Ukampis jakaña ajllisipxam, jumanakampi, wawanakamampi jakapxañamataki. Tatitu Diosamarusti munapxam, istʼapxarakim, suma iyawsañampi arkapxarakim” sasa (Deu. 30:19, 20). Israelitanakax Diosat jithiqtapkchïnsa, kuntï Moisesax siskäna uka kimsa mayitanakax pachpakïskiwa. Ukat 1.500 mara qhipatxa Jesusas yaqhanakas mayamp uka tuqit parlapxarakïnwa.

¹⁷ Ukhamasti, nayraqatxa ‘Diosar munasiñasawa’, kamachinakap phuqasaw uk uñachtʼaytanxa (Mat. 22:37). Ukatsti, ‘istʼañasarakiwa’, ukxa Bibliat yatxatasa ukat ukarjam sarnaqasaw uñachtʼaytanxa (1 Juan 5:3). Ukatwa taqpach tantachäwinakar sarañax wali wakiskirixa, ukanwa Diosan Arupat jukʼamp qhañanchasi (Heb. 10:23-25). Ukxarusti, ‘iyawsañampi arkapxañasarakiwa’, Diosat taqi chuyma katxarusiñasawa. Kunas kunäpan, Diosar iyawsapxapuniñäni ukat Yuqapat yatiqasis sarnaqañäni (2 Cor. 4:16-18).

18. 1) Khä 1914 maranxa, ¿aka pachpa revistan kamsänsa chiqa yatichäwi tuqitxa? 2) ¿Diosan qhanapan sarnaqasax kunjamsa jikxatastanxa?

¹⁸ ¡Kuntï Bibliax yatichki ukarjam sarnaqañax wali askiwa! Khä 1914 maranxa, akham sasaw aka revistax inglés arun satayna: “¿Walja bendicionanak katuqasax janit Diosan markapanxa wali kusisit jikxatasktanxa? ¿Diosax janixay jaytanukkistutixa? Ukampis khititix aka thakit sipansa jukʼamp suma thaki jikxatchi ukaxa saraskaspawa. Ukat jukʼamp suma thaki utjchi ukax yatiyapxita. Nänakaxa, Biblian yatichki uka thakit sipansa janipuniw jukʼamp suma thakxa jikxatapkti. [...] Jehová Diosar sum uñtʼasax kunja kusisitas jikxatasipxta ukax janiw arunakampikix sañjamäkiti, ukat walja bendicionanak katuqasasa walpun kusisipxaraktxa. Diosax wali munasirïtapa, wali chʼamanïtapa, taqi kun chiqapar uñjirïtapa ukat wali yatiñanïtapa yatisaxa chuymas chuymaw jikxatasipxta. Janiw ukat jukʼamp thaqhañax utjxiti. Jehová Diosax kunjam Diosasa ukanakwa jukʼamp sum yatxatañ munapxta” sasa (The Watch Tower, diciembre 15, 1914, jana 377 ukat 378). Kunatï chiqäki uk yatiqasax walpun Diosarux yuspärtanxa. Ukat Jehová ‘Tatitun qhanapan sarnaqasax’ jukʼamp kusisitaw akapachan jikxatastanxa (Isa. 2:5; Sal. 43:3; Pro. 4:18).

19. ¿Biblian mayitanakap phuqxapxi ukanakax kunatsa bautisasiñ jan jukʼamp suyapxañapäki?

¹⁹ Jumatï Jehová ‘Tatitun qhanapan sarnaqañ’ munsta ukat janïra bautisatäksta ukhaxa, jan jukʼamp suyamti. Bautisasiñatakix kunanak phuqañas wakisi ukanak phuqañataki chʼamachasiñamawa, ukhamatakwa Jehová Diosarusa ukat Jesusarus jiwas layku taqi kun lurawayapki ukanakat yuspäratamxa uñachtʼayäta. Ukhamasti, ¡pachpa jakäwis Diosar katuyasiñaw wakisi! Uk lurasaw Diosan munañaparjam sarnaqañ munatamsa ukat Yuqapar arkañ munatamsa uñachtʼayarakïta (2 Cor. 5:14, 15). Jïsa, janipuniw ukham yaqha suma thakix utjkaspati.

¿Kamsasmasa?

• ¿Bautisasisax kuns maynix uñachtʼayi?

• ¿Diosar katuyasisin bautisasipki ukanakax kuna bendicionanaksa katuqapxi?

• ¿Kunatsa Jesusat yatxatañax wali wakiskirixa?

• ¿Suma thakit jan saranukuñatakix kunas yanaptʼistani?

[Jisktʼanaka]

[25 janan fotopa]

Bautisasisax suma thaki ajllitas uñachtʼaytanxa

[26 janan fotopa]

¿Jehová Diosamp ‘imantata’ markankxtati?