“Wawanakarus Diosat yatiqañax waktʼarakiwa”

KHÄ 2008 diciembre phaxsin 9 urunxa, mä tantachäwiw Academia Sueca de Derechos del Niño siski ukan yanaptʼatax apasitayna. Uka tantachäwinxa, kunatsa wawanakarus Diosat yatiqañax waktʼaraki uka tuqit parlapxatayna. Suecia marka Iglesiatsa, yaqha yupaychäwinakatsa ukat movimiento humanista siski ukatsa ukar sarapxarakitaynawa.

Yupaychäwi pʼiqtʼiri, mayni arstʼirixa akham sänwa: “Wawanakatakix Biblian utjki uka sarnaqäwinakax wali wakisiriwa, ukax janiw arunakampi qhanañchañjamäkiti” sasa. Ukampis ¿kunjamsa wawanakax Biblian utjki uka sarnaqäwinakat yatiqapxaspa?

Uka arstʼirix akham saskakïnwa: “Uka sarnaqäwinakax wawanakan amuytʼasipxañapatakix wali askiwa” sasa. Ukatxa “Adanampi Evampi, Cainampi Abelampi, Davitampi Goliatampi ukat Jesús wawampi, impuesto apthapir Zaqueompi, herencia tukuntir waynampi ukat suma chuyman samaritänumpit” aytasïna. Uka sarnaqäwinakatxa kunsa wawanakax “kutkatasiñ tuqitsa, juchanak pampachañ tuqitsa, sumthapiñatsa, uñisiñatsa, munasiñatsa, jan walinak lurañ tuqitsa, jilat kullakanakamp sum apasiñ tuqitsa ukat mayninakar askinak churañ tuqitsa” yatiqapxaspa ukwa qhanañcharakïna. Ukatxa, “uka sarnaqäwinakat yatiqasisaw sapür sarnaqapxaspa” sasaw tukuyäna.

Chiqansa, Biblia liyiñax wali askiwa. Ukampis ¿wawanakax jan khiti yanapirinix Diosan arunakapat sum amuytʼapxaspati?

Diosan arunakap yatiqañatakix jilïrinakas yanapiritakïtanwa sasaw Bibliax qhanañchi. Etiopía markan irnaqir mä jaqit parli, janiw jupa sapakix chiqa yatichäwinakxa amuytʼirjamäkänti. Isaiasan qillqatanakap inakiw liyiskäna, kuna tuqitsa parli ukxa janiw amuykänti. Ukatwa Felipempix yanaptʼayasitayna (Hech. 8:26-40). Jiwasax ukhamarakiw awisax uñjastanxa, Diosan arunakap amuyañax chʼamakiwa. Ukat wawanakatakix jukʼamp chʼamäspawa.

Ukatxa, “pisi amuytʼamp lurañasti, waynanakan amuyupawa” sasaw Bibliax saraki (Pro. 22:15). Ukhamasti, awk taykanakaw wawanakaparux sum sarnaqañsa, Dios tuqitsa yatichapxañapa. Ukatakix Bibliampi ukat tantachäwinakampiw yanapasipxaspa. Chiqansa, wawanakarux Diosat yatiqañax waktʼarakiwa. Jiskʼäsipki ukkhatpachwa awk taykanakax Diosan Arupampi sum yatichapxañapa. Ukhamatwa jachʼäxapxani ukhaxa, “amuytʼasiñx ya[tipxani]. Kunatix walïki, jan walïkaraki uk uñtʼañsa yatxapxaraki[ni]wa” (Heb. 5:14).