Kunäkipansa Diosamp sum apasiskakiñäni

AWISAX kuntï jan suyktan ukanakaw pasistaspa, ukhamanakan jikxatasisax maynin jakäwipax mayjtʼaspawa, ¿jumax ukhaman uñjasirïtati? Chiqas taqiniw ukhamanakan uñjastanxa. Ukampisa, ¿kunanakas nayrar sarantañataki yanaptʼistaspa? Uk yatxatañatakix Biblian utjki uka sarnaqäwinakatxa mä qhawqha uñjañäni.

Qalltañatakix Davitat parltʼañäni, jupax kunaymaninakanwa uñjasïna. Uwij awatir wawaskäna ukhaw Diosax apnaqirïñapataki Samuel profeta tuqi ajllïna. Ukat waynuchuskäna ukhaw Filistea markankir Goliat sat jachʼa jaqimpi nuwasir saräna (1 Sam. 17:26-32, 42). Qhipatxa, Saúl reyiw kawkintï apnaqäna ukar Davitarux jawsayäna ukat ejercitonakapan mä pʼiqtʼirjamaw uttʼayäna. Janiw ukham sarnaqañ suykpachänti, ukampis janiw ukakïkänti.

Qhipatxa Saúl reyix wal jupar uñisxäna (1 Sam. 18:8, 9; 19:9, 10). Jan jiwañ laykuxa, walja maranakaw jaya chiqanakan imanaqasis sarnaqäna. Ukat Israel mark apnaqxäna ukhaxa, jakäwipax mayjtʼaskakïnwa, kunattix Betsabé warmimpiw wachuq juchar purtʼasïna ukat uka juchap imtʼañatakixa uka warmin chachaparuw jiwayayatayna. Ukham luratapatxa walja jan walinakanwa pachpa familiapan uñjasïna. ¡Absalón wawapas jupa contraw saytʼäna! (2 Sam. 12:10-12; 15:1-14.) Ukampis Davitax uka juchanakapatxa taqi chuymaw arrepentisïna, ukatwa Diosax juchanakap pampachäna, ukat wasitatwa Diosamp sum apasxäna.

Jichhürunakanxa ukhamarakiw jakäwisax mä akatjamat mayjtʼaspa, inas usuntañasa, qullqit pistʼañasa, ukat familian jan waltʼäyasiñanakas utjchispa, jan ukax jiwaspachaw jan walinak lurasax kunarus puriraksna. Ukampis ¿kunjamatsa nayrar sarantaskaksna?

Altʼat chuymanïñax askiwa

Khititix chiqpach altʼat chuymanïki ukaxa, istʼasirirakiwa. Ukham altʼat chuymanïñaxa jiwaspach amuytʼasiñ yanaptʼistu ukat janirakiw jaqi masisarus jiskʼachktanti. Ukat kuntï mayninakax sum lurañ yatipki, kunjam chuymanïpxisa uks amuyaraktanwa, uk yatiñaw jupanakar munasiñ chuymampi uñjañ yanaptʼistu. Ukat kunatsa jan waltʼäwinakas utji ukat  kunjamsa ukanakar saykatsna, ukanak amuyañwa altʼat chuymanïñax yanaptʼarakistu.

Uka tuqitxa Saúl reyin Jonatán yuqapatwa yatiqassna. Jupax ukhamarakiw jan walin uñjasïna. Kunapachatï Samuel profetax Saular janiw apnaqxätati sasax siskäna ukhaxa, janiw Jonatán yuqamaw apnaqani sasax siskänti (1 Sam. 15:28; 16:1, 12, 13). Davitaw apnaqirïñapataki ajllitäxäna, ukhamax Jonatanax janiw apnaqañapäxänti, ¿kunatsa? Awkipan juchapatwa ukhaman uñjasïna (1 Sam. 20:30, 31). ¿Kamachpachänsa? ¿Davidjamäñ munasati chuym wal ustʼayaspachäna? Janiwa. Davitat jilïrïkchïnsa taqi chuymaw taqi kunan yanaptʼäna (1 Sam. 23:16-18). Ukat ukham altʼat chuymanïsaxa, khitis Diosan bendicionap katuqäna uk amuyarakïnwa, ‘janiw jupa kipkatxa lupʼkänti kuntix lupʼiñäki ukat jukʼampxa’ (Rom. 12:3). Chiqasa kuntï Diosax jupat suykänxa uk amuytʼänwa ukat Diosan munañaparjamaw sarnaqäna.

Kunas mayjtʼawayxi ukhax llakistanwa, Jonatanax ukhamaw uñjasïna, jupax Diosar kusisiykir sarnaqañ munäna, ukampis Davitampi ukat Saúl awkipampi sum apasiñax chʼamäpachänwa, kunattix Davitax wali munat amigopänwa, juparuw Diosax reyïñapataki ajllïna, maysa tuqitsti Saúl reyix awkiparakïnwa, Diosan jan wali uñjatäkchïnsa mark apnaqirïskakïnwa. Jichhürunakanxa ukhamarakiw jan waltʼäwinakax llakthapiyistaspa, awisax axsarayistasp kunawa. Ukampis Diosat jan jithiqtañatakisa nayrar sartaskakiñatakisa kunjamtï Diosax jan waltʼäwinak uñjki ukham uñjañataki chʼamachasiñasawa.

Janiw taqi kuns amtasarjam lurksnati

Maysa tuqitxa janiw altʼat chuymanïñasakïkiti, kuntï jan lurirjamäktan ukxa amuyasiñasarakiwa, mä arunxa, janiw taqi kunsa munañasaruk lurksnati. Uka tuqit sum amuytʼañatakix Davitat parltʼaskakiñäni.

Davitax apnaqirïñataki Diosan ajllitäkchïnsa, janiw ratuk apnaqañ qalltkänti, walja maranakaw suyänxa, Davitax ukhaman uñjasisax wal llaktʼaspachäna. Ukampis janiw aynachtʼkänti. Diosaw taqi kun uñjaski, jupaw askichaskani sasaw amuyäna, ukat kunanak lurañatï jupar waktʼäna uk sum yatirakïna. Saúl reyix jiwayañsa munkchïnxa, Davitax janiw kuna jan walsa lurañ amtkänti, janirakiw jupamp chik sarnaqiri Abisai sobrinopampix jiwayayañ munkänti (1 Sam. 26:6-9).

Awisaxa inas tama taypinxa jiwasatakix kuna jan walis utjchispa, ukatxa kunatsa jan sum apnaqaski sasin amuyaraksna. Ukhaman uñjasisax ak amtañasawa, janiw taqi kunsa munañasarjam lurksnati, ukham amuyañäni ukhaxa, Jesucristoruw tama pʼiqtʼirjam uñjañäni ukat khitinakarutï jupax tama uñjapxañapataki uttʼayi ukanakarus sumarakiw uñjañäni. Ukat Jehová Diosaruw atinisiñäni, Jupaw horasaparu Yuqap tuqix taqi kuns askichaskani, uka amuyumpi suyañax chʼamäkchisa, ukham amuyasaw Jupampix sum apasiskakiñäni (Pro. 11:2).

 Sumankañ jikxatañatakix llampʼu chuymanïñasawa

Ukat khititix llampʼu chuymanïki ukaxa janiw kunatsa ratuk colerkiti, chuymsa usuyaskiti ukat janirakiw ukhamat ukham kuttʼaykiti. Ukampis ukham chuymanïñax chʼamawa, ukatwa Bibliax akham iwxtʼistu: “Uraqin llampʼu chuyman jaqinaka, [...] llampʼu chuymampirak sarnaqapxam” sasa (Sof. 2:3). Llampʼu chuyman jaqixa, altʼat chuymani, ukat khuyapayasiri ukham suma jaqiwa. Ukat kuntï jan lurirjamäki uksa amuyasirakiwa, ukham jaqinakar yatichañax janiw chʼamäkiti.

Jan walin uñjasiñäni ukhaxa, ¿kunjamsa llampʼu chuymanïñax yanaptʼistaspa? Chʼamäkchisa, ukhaman uñjasisaw Jehová Diosampix yatichayasiñäni. Chiqansa Moisesax jan walinakan uñjasisaw jukʼamp llampʼu chuymanïñ yatiqäna.

Moisesax 40 maranïxasax Diosar luqtir wali suma jaqïxänwa. Diosan markaparu taqi kunan yanaptʼañatakiw jupax chʼamachasïna (Heb. 11:24-26). Ukampis janïr Israel markaru Egiptot apskasaxa, llampʼu chuymanïñwa Jehová Diosax yatichäna. Egipto marka jaytxasaxa, Madián uraqiruw sarxäna, ukanxa pusi tunk maranakaw uwij awatiskäna. Ukampis ukham jakañaxa, jukʼamp suma jaqïñatakiw yanaptʼäna (Núm. 12:3). Jupatakix Diosar luqtañaw taqi kunat sipansa wali wakisirïnxa.

Mä kutixa, jan istʼasir Israel marka lantixa, juman wawanakamatwa mä jachʼa marka uttʼayä, sasaw Diosax Moisesar säna (Núm. 14:11-20). Ukampis jupax israelitanakatwa arxatasïna, janiw jupatakik taqi kuns munkänti. Moisesax Diosar jachʼañchañ munäna ukat israelit masinakapatwa llakisirakïna. Jïsa, Israel markaru pʼiqtʼañapatakisa ukat uka jaqinakaru Diosar jakʼachañatakisa, wali llampʼu chuyman jaqiw munasïna. María kullakapampi Aarón jilapampix Moisés contraw saytʼasipxäna, ukampis Bibliax akham sasaw qhanañchi: “Moisesax [...] llampʼu chuymani jaqïnwa akapachanxa” sasa (Núm. 12:1-3, 9-15). Ukhamax llampʼu chuymampiw Moisesax uka jan walir atipäna. Jan llampʼu chuymanïsapäna ukhaxa, ¿kunarus purtʼasispäna?

Ukat yaqha uruxa, walja jaqinakaw qullan ajayu katuqapxatayna ukat profetanakjamaw parlañ qalltxapxäna. Uk istʼasax Moisesan Josué yanapiripaxa, janiw jupanakax wal lurapkiti sasaw säna. Ukampis Moisesax janiw naya lantiw saytʼasipxani sasax llakiskänti, jan ukasti kunjamtï Diosax uñjkixa ukham uñjañatakiw chʼamachasïna (Núm. 11:26-29). Taqi kuntï Diosax amtäna ukxa Moisesax taqi chuymaw istʼäna, ukampis jan llampʼu chuymanïkaspäna ukhaxa, ¿istʼasirïspänti?

 Kuntï Diosax luram siskänxa ukxa Moisesax taqi chuymaw phuqäna, ukatakix llampʼu chuymanïñapänwa. Qhipatxa Jehová Diosax Horeb qullur makatam sataynawa, ukanxa israelitanak nayraqatanwa Diosax mä ángel tuqix Moisesampi parlatayna, ukat Moisés tuqiw mä arustʼäwiru Israel markapampi mantäna. Ukampis taqi uka jachʼa luräwinakxa llampʼu chuymampiw sum phuqäna. Moisesax Diosamp sum apasiñpun munäna.

¿Jiwasat kamsaraksnasa? Diosar jukʼamp sum luqtañatakix llampʼu chuymanïñax wali wakisiriwa. Ukat khitinakatï tama taypin kuna luräwi katuqapxi ukanakaxa, llampʼu chuymanïpxañaparakiwa. Ukat kunapachatï jan waltʼäwinak utjani, jan ukax jakäwisan kuna mayjtʼäwis utjani ukhaxa, llampʼu chuymanïñaw jan jachʼa jachʼa tukuñatakix yanaptʼistani. Ukhamax kunjamtï akhakam uñjawayktanxa, kunjamsa uka jan walinakaru uñjañäni uk sum amuyañax wali wakisiriwa. Jan waltʼäwinakaxa jukʼamp suma jaqïñatakiw yanaptʼistaspa, ukat ukhamanakan jikxatasisaw chiqpach llampʼu chuymanïtas uñachtʼaysna.

Chiqpachansa kuntï amtktan ukanakaxa awisax janiw phuqaskiti, jakäwisax mayjtʼapuniwa, ukat kunats ukhamäpacha ukanakxa janiw amuykaraktanti. Ukhamanakan llakita jan kuns lurirjama uñjasisaxa, Diosar luqtañax chʼamäxaspawa. Ukampis altʼat chuymanïña ukat llampʼu chuymanïñaw uka jan walinakar saykatañ yanaptʼistaspa, ukat kuntï jan lurirjamäktan ukanakat amuyasiñas yanaptʼarakistaspawa. Ukham suma amuyumpi saykatañäni ukhaxa, Jehová Diosampix sum apasiskakiñäniwa.

[4 janan qhanañchäwipa]

Kunjam jaqïtansa uk sum uñjasiñwa altʼat chuymanïñax yanaptʼistu

[5 janan qhanañchäwipa]

Cristianjam jiltañatakix llampʼu chuymanïñaw yanaptʼistani

[5 janan fotopa]

Jan walinakan uñjasisaw Moisesax jukʼamp suma jaqïñxa yatiqäna