Jan walinakan uñjasisax Jehová Diosar atinisiñ yatiqapxta

ADA DELLO STRITTO SAT KULLAKAN ARSUTAPARJAMA

Joel satätwa, 36 maranïtwa. Jichhürutaki ajllitäki uka jiskʼa tʼaqa qillqaqañxa jichhakiw pä horat tukuyaskta. Inas ¿kunatsa walja tiempon tukuypacha sapxsta? Mamitajaw uk yatiyapxätamxa.

KHA 1968 maranwa chacha warmpacha Jehová Diosan Qhanañchirinakapjam bautisasiwayapxta, jupax Luigi satawa. Kimsa wawanïpxtwa: jilïrix David satawa, taypinkiristi Marc satarakiwa, ukat sullkïrix Joel satawa. Uka sullkïr wawajax 1973 maranwa mä hospitalan Binche (Bélgica) markan yuriwayi, uka markax Bruselas markat niya 60 kilometronak aynachar sarañankiwa. Uka sullka wawajax janiw jilanakapjam kʼumar yuriwaykiti. Wali jiskʼakïnwa, janiw pä kilonïkänsa, ukatwa mä jukʼa jiltañapatakix pachpa hospitalan qhipari.

Ukampis wawajax ukhamakïskänwa, walja semananakaw hospitalankxäna. Ukatwa wawanak qullir mä pediatran ukar apañ amtapxta. Ukat Joelitur sum uñakipasax akham sasaw uka qullirix sapxitu: “Janiw sint llakisipxätati, aka wawax janiw jilanakapjamäkaniti” sasa. Uk istʼasax janiw kamsañjamäkänsa. Wawajax usutäpachawa sasaw llakthapista. Ukat yaqha chiqar irpasinxa akham sasaw uka qullirix Luigir saraki: “Yuqitamax trisomía 21 uka usuniwa” sasa, uka usux síndrome de Down sasin uñtʼatarakiwa.

“Kamachakiñänisa” sasaw wal llakisipxirïta. Ukat “chiqapunit ukhamäpacha” sasaw yaqha doctoran ukar apapxta. Uka qullirix niya mä horapuniw Joelitur jan kamsas uñakipi. Ukanxa, “kunapachkamas suyañäni” sasaw wali jayäkaspas ukham amuyapxta. Ukat tukuyasinxa akham sasaw doctorax sapxitu: “Aka wawax wali uñjañäniwa” sasa. Ukatsti, akham sasaw sumataki sapxarakitu: “Ukampis wali kusisitäniwa, wali munasir awk taykaniwa” sasa. Uk istʼasinxa wal chuym chʼallxtayasta, wali sinttʼasisaw wawajar ichtasin qhumxarusta. Ukhamaw utar kuttʼawayapxta. Ukäñkamax niyaw pä phaxsinïxäna.

Tantachäwinakas yatiyir mistuñas wal chʼamachapxitu

Llakinakax janiw ukaruki tukuskänti. Qhipatxa, “chuymapaw jan walïkiti ukat chʼakhanakapas janirakiw sumäkiti” sasaw qullirinakax sapxi. Chuymapaw wal jilatayna ukat pulmonar llupjirjamänwa,  kuna usus juparukiw katuskäna. Pusi phaxsinïkäna ukhax walpun pulmonat usuntäna, ukatwa hospitalar wasitat apapxarakta, ukanxa janiw khitimpis jakʼayapkänti. “Wawax ukham tʼaqhisistï” sasaw wal llakisipxirïta. Wal ichxartʼasiñ munirïta, ukampis pä phaxsi chikataniw janix jupar jakʼayapkituti. “Kamachakiñänisa” sasaw jayataki uñchʼukipxirïta, chacha warmikiw qhumxartʼasisin Jehová Diosar mayisipxirïta.

Ukham llakinakan uñjasisas tantachäwinakar pusinpach sarasipkakiyätwa, Davitax niyaw suxta maranïxäna, ukat Marcosti kimsa maranirakïnwa. Tantachasiñ Utanxa, janiw jilat kullakanakax jaytjasipxirïkiti, walpun Jehová Diosax jupanak tuqix yanaptʼawayapxitu. Juparuw taqi llakinak katuyapxta, ukhamatwa chuymanakajan samarañ jikxatapxirïta (Sal. 55:22). Ukat kunjamsa tantachäwinakax yanaptʼapxitu ukxa, Joelitur uñjapkäna uka enfermeranakas amuyapxänwa.

Ukatsti, “yatiyir sarañataki chʼam churita” sasaw Jehová Diosar mayisirakirïta. Utan jachtʼasisa qhiparañat sipansa, Diosan arunakapat yatiyañ wal munirïta, kunjamsa Diosax taqi usunak chhaqtayani ukat uk yatiñax kunjamsa yanaptʼitu ukanakwa yatiyañ wal munirïta. Yatiyir mistusax Jehová Diosas mayitajarjam yanaptʼkitaspa ukham amuyasirïta.

¡Wali muspharkañapuniwa!

Ukat mä uruxa, “wawam apasxapxasmaw sasaw hospitalan sapxitu”. Uk satax wali kusisitaw Joelitus ichtʼasita utar kuttʼxapxta. Ukampis qhipürux mayampiw Joelitux usuntawayxi ukat jankʼakiw hospitalar wali sustjat kuttʼayapxta. Ukanxa, doctoranakax akham sapxituwa: “Joelitux tukusikipuniniwa, janiw suxta phaxsit paskaniti” sasa. Pä phaxsitxa walpun usuntawayi, janiw waliptirjamäkänti, chiqäy tukusxchini sañjamänwa. Hospitalanxa anqar irpsusin akham sasaw mä qullirix sapxitu: “Kamachkaraksna, inamayaw kunsa lurasksna. Jan sinti llakisipxamti” sasa. Ukatxa akham sapxarakituwa: “Jehová Diosakipuniw akham llakinakan yanaptʼapxiristamxa” sasa.

Chuymas kawkstʼata, wali qaritaraki ukhamaw wawajar uñjir wasitat mantawayta, janipuniw Joelitujar jaytjañ munkayätti. Tamankir kullakanakampiw hospitalan qhiparapxta. Chachajax Davitampir Marcompir uñjiriw sararaki. Ukat mä semänatxa, janiw wawajax waltʼxänti, chuymapaw saytʼawayxi. Enfermeranakax wal jaktayañataki chʼamachasipxäna, ukampis janiw jaktkänti. Ukat mä qhawqha minutonakatxa akham sasaw maynix sumat situ: “Tukusxiwa” sasa. Uk istʼasax walpun wawatjam jachta. Jehová Diosat maytʼasï sasaw uka utat mistunta, ukampis chuym qʼal chhaqtayasta, janiw kamsañjamäkänsa. Ukat mä tunka phisqani minutonakatxa akham sasaw mä enfermerax situ: “¡Wawamax jakaskiwa!” sasa. Ukat akham sasaw amparat irptawayitu: “Joelitur uñjanim, sarañäni” sasa. Mantta ukhaxa, wawajax samaqiskataynawa. Doctoranakas enfermeranakas uk yatisinxa jankʼakiw chhukhunipxatayna, ukat Joelitur uñjasax wal muspharapxäna.

Pusi maraniw chillqti

Joelitux jiskʼäskäna ukhaxa, akham sasaw doctorapax sapxirïtu: “Wali munasiñampiw Joelitur uñjapxäta” sasa. Chiqas  wali munasiñampiw wawar uñjañ munapxayäta, ukat ukarjamaw taqi kunan yanaptʼawayapxta, kunjamtï Jehová Diosax nänakar uñjapkitu ukhama. Joelitux yurkäna ukhat aksarux wali munasiñampipuniw Jehová Diosax yanaptʼawayapxitu.

Joelitux paqallq maranïkän ukhakamaxa, sapa kutis hospitalarukiw apasipkirïta, octubre phaxsit marzo phaxsikamax usuntapuniriwa. Ukatxa janirakiw Davitampit Marcompit armasipxirïkti, jupanakatakis tiempo apstʼasipxarakirïtwa. Ukat jupanakas wal sullkaparux yanaptʼawayapxaraki. Mä uruxa wali kusiskañaw pasi. Joelitux janiw sarnaqañ yatkaniti sasaw doctoranakax sapxäna, ukampis pusi maranïkäna ukhaxa, akham sasaw Marcox jupar säna: “¡Jutam! Mamitax kusisiniwa” sasa. Ukat ¡wawax mayak chillqti! Walpun uk uñjasax kusisipxta. Taqi chuymaw Jehová Diosar yuspärapxta. Ukat awisax janis Joelitun nayrar sartatapax qhanäkchïnxa, wal chʼamachapxirïta ukat chuymachapxirïta.

Diosan yatichäwinakapaw wal yanaptʼawayi

Joelitux tantachäwinakar sarirjamäna ukhaxa apapxapunirïtwa. Ukat jan usu katuñapatakixa, wawa nuknaqañ mä jiskʼa autitot apapxirïta, uka autitux plasticonakampi jarkʼaqatänwa. Wali kusisitaw ukhampachas tantachäwinakan jikxatasiri.

Maysa tuqitxa, jilat kullakanakax wali munasiñampiw yanaptʼapxarakitu, sapa maynis taqi kunanwa chʼamaparjam yanaptʼapxitu. Mä jilatax walja kutiw Isaías 59:1 jiskʼa tʼaqan qillqatäki uka arunak amtayapxirïtu, ukanxa akham siwa: “Tatitun chʼamapax janiw tukuskiti, jan qhispiyañatakjamaxa, janirakiw jupax uqaras tukkarakiti, jan istʼirjamaxa” sasa. Uka arunak istʼañax wali askïnwa, Jehová Diosar jukʼamp atinisiñwa yanaptʼawayapxitu.

Ukatsti, Jehová Diosar luqtañapatakiw Joelitur jiskʼatpach wal chʼamachapxarakta. Dios tuqit jupar arxayañxa janipuniw armasipxirïkti. Awkiparjam uñjaspa ukat Jupar wal munasispa ukwa munapxirïta. Ukatxa, “aka wawar thakimarjam irpañ yanaptʼapxita” sasaw Jehová Diosar wal achikasipxirïta.

Ukatxa niya qʼaxu waynitüxäna ukhaxa, Diosan arunakapat wal parlañ muniri, uk uñjasax nänakax wal kusisipxirïta. Ukat 14 maranïkasin mä operacionat mistusax akham sasaw jisktʼitu: “¿Mamita, Vivir para siempre satäki uka libro doctorar churiristti?” sasa. Uk istʼasax walpun kusista. Ukat qhipa maran mayampi operayasi ukhaxa, janiw waliptkaniti sañjamänwa. Ukampis operayasiñatakixa, doctoranakar mä carta churi; uka cartxa nänakaw qillqañ yanaptʼawayapxta. Janiw wila uchayasiñ munkti sasaw ukan qhanañchäna. Uk uñjasaxa akham sasaw doctorax jisktʼi: “¿Ukax jumataki walikiti?” sasa. Ukatxa, “Jïsa, walikiwa” sasaw qhan arsu. Uk istʼasinxa, “walikpun Dios Awkipar ukham atinisixa ukat Jupatakjam sarnaqañ munixa” sasaw chuymanakajan wal kusisipxta. Ukat uka hospitalan irnaqirinakax wal yanaptʼapxarakitu.

 Diosaruw luqti

Joelitux 17 maranïkasaw Diosar katuyasitapxa bautisasisin uñachtʼayawayi. ¡Janipuniw uka ur armkäti! Wali sumaw Diosan markapan nayrar sartawayi. Ukat jichhakamas wali aqkir chuymampiw Diosar luqtaski, munasiñapax janiw thayarkiti. Khitir jikxatasas akham sapuniwa: “¡Nayax Diosan arunakapar wal munasta!” sasa.

Ukat liyiñsa qillqañsa yatiqawayarakiwa. Chiqansa, jupatakix wali chʼamänwa, ukat mä aru jikikiptayasax wal kusisiri. Ukatxa Diosan Arupat sapüru yatxatañataki siski uka qillqatatwa sapa alwa liyiñ qalltawayi. Ukat liyiñ tukuyasax Bibliat apstʼatäki uka arunakwa mä jiskʼa cuadernor qillqaqaraki. Jichhakamax walja jiskʼa cuadernonak tukuyxi.

Tantachäwinakax utjki ukhaxa jankʼakiw sarañ muni. Jilat kullakanakar katuqtʼañatakiw janïräkipan puriñataki wal jariyasi. Ukat tantachäwinakanxa arstʼapuniwa; demostracionanakax waktʼi ukaxa wal kusisi. Ukatxa, microfononak apnaqañsa ukat yaqhanak lurañsa wali yanaptʼi. Ukat sarirjamäsax Diosan arunakapat yatiyirix sapa semänaw nänakamp chik sari. Pasïr 2007 maranxa mä aski yatiyäwiw taman istʼasiwayi, Joelitux irpir chuymaninakan yanapiripjam uttʼayatawa sasaw yatiyasiwayi. Uk istʼasax kusisiñat wal jachaqtʼasta. ¡Walpun Jehová Diosar uka bendicionat yuspärta!

Jehová Diosaw yanaptʼapxitu

Ukat 1999 maranxa yaqha jan walin uñjasipxarakta. Mä jan amuyun jaqiw autojar chocantatayna. Chachajax sinti usuchjatänwa. Walja kutiw jikhanit operapxi, ukat mä kayu apaqapxapuniwa. May kutimpiw Jehová Diosar “yanaptʼapxita” sasin wal achikasipxta. Ukarjamaw Jupax chʼam churapxitu (Fili. 4:13, NM). Luigix janiw jichhax irnaqirjamäxiti. Ukhamasti, Joelitur uñjañatakix tiemponïxiwa. Ukat nayatakis Diosar jukʼamp luqtañatakix tiempox utjxarakiwa. Ukhamax jan aynachtʼañatakix wal chʼamachasipxta. Jichhax taman wali sum yanaptʼaski, irpir chuymaninakat sarayirjamaw irnaqtʼaskaki. Ukat familiansa ukhamarakiw yanaptʼasipkitu.

Ukham llakinakanxa mä familiakiw maynit maynikam yanaptʼasipxta. Amuytʼasiñsa ukat kunatix wakiski ukarjam sarnaqañsa yatiqapxaraktwa. Ukat llakimpi atipayasirjamäsax Jehová Diosaruw jakʼachasipxta, ukat kunjamsa jikxatasipxta uk yatiyapxta. Ukampis llakinakax janiw ukaruki tukuskiti, Davitampi Marcompix jilsxasinxa utatwa sarxapxi ukat jukʼat jukʼatwa Jehová Diosat jayarstʼawayapxi. Mä urux kuttʼanxapxakispa sasaw suyapxta (Luc. 15:17-24).

Uka llakinakar saykatañatakix walpun Jehová Diosax yanaptʼawayapxitu, ukat Jupar atinisiñsa yatiqawayapxaraktwa. Ukat kuntï Isaías 41:13 jiskʼa tʼaqax siski uka arunakax wali askiw nänakatakixa, ukanxa akham siwa: “Naya, juman Tatitu Diosamaw, jumarux amparat wayxarsma, irparaksma; nayaw saraksma: ‘Jan axsaramti, nayaw yanapaskäma’” sasa. Chiqansa Jupaw mä munasir awkjamax amparat irpasipkitu. Jan walinakan uñjasisax jukʼampiw alaxpachankir munat Jehová Dios Awkisar atinisipxtxa.

[17 janan fotonakapa]

Joel ukat Ada mamitapampi

[18 janan fotopa]

Ada, Joel ukat Luigi

[19 janan fotopa]

Jilat kullakanakaruw Tantachasiñ Utan katuqtʼaski