¿Jehová Diosan jisktʼatax istʼasktati?

BIBLIANXA, chuymar purtʼkir walja jisktʼanakaw utji. Jehová Diosax jisktʼanakampiw wakiskir yatichäwinak yaticharaki. Amtañäni, kunapachatï Caín chachar jan wali luräwinakam jaytxañamawa sasin amuytʼayäna ukhaxa, walja tuqiw jisktʼäna (Gén. 4:6, 7). Ukat awisasti, maynin amuytʼasiñapatakiw jisktʼirïna. Kunapachatï “¿Khitirus khitäxa? ¿Khitis nayat arsur sarani?”, sasin jisktʼkäna ukhaxa, akham sasaw Isaías profetax jankʼak arsüna: “Akankasktwa nayax, nayar khitasita” sasa (Isa. 6:8).

Jachʼa Yatichir Jesusaxa ukhamarakiw jisktʼirïna. Jïsa, jupan jisktʼanakapaxa, pä pataka kimsaqallq tunka jilaw Mateo, Marcos, Lucas ukat Juan libronakan utji. Uka jisktʼanakampiw Diosar luqtañ tuqit jaqinakar amuytʼayäna ukat chuymanakaparuw purïna. Ukat awisasti, jupar jiskʼachañ munirinakar amuktʼayañatakiw jisktʼirïna (Mat. 22:41-46; Juan 14:9, 10). Ukat apóstol Pabloxa ukham jisktʼanakampiw sum yatichirïna. Jupax Griego Arut Qullan Qillqatanakatxa tunka pusini cartanakwa qillqatayna (Rom. 10:13-15). Sañäni, Roma markankïr jilat kullakanakar qillqkäna uka cartanxa walja jisktʼanakapaw jikxatasi. Ukhamatwa “kunja sumas Diosan yatiñ kankañapaxa, munañapasa, amuytʼapasa” ukanakxa sum qhanañchäna (Rom. 11:33).

Jesusaxa ukham jisktʼanakampiw kunsa jaqinakax chuymanakapan amuyapxi ukanak yatxatirïna. Ukatsti maynin amuyasiñapatakiw yanaptʼäna, ukwa jupan sarnaqäwipat parlki uka pusi qillqatan jikxatsnaxa. Jesusax akham sasaw mä kutixa arkirinakapar säna: “Amuyasipxam fariseonakan levadurapampita, Herodesan levadurapampitsa” sasa (Mar. 8:15; Mat. 16:12). Uka arunakampixa, jan wali amtanakapsa kʼari yatichäwinakapsa jani jupanakat yatiqasipxamti sasaw Jesusax saskäna. Ukampisa, arkirinakapax janiw uk amuyapkänti jan ukasti kunatsa tʼantʼa jan apanktan sasaw jupanakkam jiskhisipxäna. Jupanakan amuytʼasipxañapatakix akham sasaw Jesusax jisktʼäna: “¿Kunatsa jumanakax: ‘Janiw tʼantʼax utjkiti’ sas parlasipkta? ¿Janïrat amuytʼasipkta? ¿Ukham qala chuymanïpxapuntati? ¿Janit uñjapkta, janirakit istʼapkaraktaxa? [...] ¿Jichhakamat jan amuytʼasipkta?” sasa. Ukham jisktʼatax kunsa uka arunakampix sañ munäna ukwa amuyapxañapäna (Mar. 8:16-21).

“Aka jisktʼanakaru” istʼita

Taqi kun Lurirjamax kunja jachʼasa ukwa Jehová Diosax Job chachar jisktʼanakamp amuytʼayäna (Job 38-41 jaljanaka). ¿Taqi uka jisktʼanakapar qhanañchañax wakisipunïnti? Janjamakiwa. Amuytʼañäni, “¿kawkinkäyätas jumaxa kunapachatix nayax aka uraqi uttʼaykäyät ukapachaxa?” sasin Job tatar Diosax jisktʼkäna ukhaxa chuymapan lupʼiñapatakïnwa. Uka jisktʼar qhanañchañatakix janiw arupas utjkänti, ukat akham sasakiw säna: “¿Kunaraki naya pisi chʼaman jaqisti arsusirista? Nayax amuktʼxakïwa” sasa (Job 38:4; 40:4). Chiqansa ukham jisktʼataxa pantjasitapwa Job tatax amuyasïna. Ukampix janiw llampʼu chuymanïñak Diosax yatichkänti jan ukasti kunatï chiqäki uk amuyañwa yanaptʼäna.

Job tatax ‘chiqa, aski jaqïkchïnsa’, jan amuytʼasisaw parlatayna. Ukatwa Eliú chachax “ukham jan juchanïtapa, ukhamaraki Diosaru juchañchatap istʼasinxa” chiqañchäna (Job 1:8; 32:2; 33:8-12). Ukampis Jehová Diosax jisktʼanakampiw sum amuyasiñ yanaptʼawayäna. Diosax akham sänwa: “¿Khitïtas  jumax nayan apnaqataxat pächasiñatakixa, ukhamaraki pachpa arunakamampi jan yatitamsa uñachtʼayañatakixa? Jichhax jan axsarirïtam uñachtʼayita, ukatsti aka jisktʼanakaru arusxatarakita” sasa (Job 38:1-3). Jïsa, ukham jisktʼanakampiw Job chachax amuyänxa, Diosax wali yatiñanïtapa ukat chʼamanïtapa, ukanakaxa luratanakapanwa uñjasi. Ukhamatwa Jehová Diosan taripäwipar ukat luratanakapar atinisiñsa yatiqarakïna. Chiqansa, ¡pachpa Jehová Diosaw jupar jisktʼäna! ¡Ukax wali muspharkañapuniwa!

¿Jiwasax Jehová Diosamp jisktʼayasisktanti?

Biblian utjki uka jisktʼanakaxa, ¿jiwasatak askirakïpachati? Jïsa, wali askiwa. Ukhamasti, uka jisktʼanakat lupʼiñasawa. Uka jisktʼanakax chuymar purtʼkiriwa. Chiqansa, “Diosan arupasti [...] jachʼa chʼamanirakiwa [...] lupʼïwinaksa, chuyman amtäwinakapsa qhanstayarakiwa” (Heb. 4:12). Jehová Diosas jisktʼkistaspa ukham amuyañänixa, wali askinakwa jikxatañäni (Rom. 15:4). Ukhamasti, aka mä qhawqha jisktʼanakat amuytʼañäni.

“Jumax aka mundpachana jachʼa juesätawa, ¿janiti chiqaparu uñjkäta?” (Gén. 18:25.) Kunapachatï Sodoma ukat Gomorra markanak tukjañ Diosax amtatayna ukhaw Abrahamax Jehová Diosar ukham jisktʼatayna. Kamisarak juchararampi ukat suma jaqimpi mä kikpak jiwarayxanisti sasaw säna. Uka arunakampix Diosan chiqa kankañapar atinisitapwa Abrahamax uñachtʼayäna.

Khitinakas Armagedonan qhispipxani ukat khitinakas uka qhipat jaktanipxani ukanak yatiñatakiw jaqinakax kunayman parlapxi. Ukampis uka tuqinakat wal llakisiñat sipansa, Abraham chachjamaw Diosar taqi chuym atinistanxa. Alaxpachankir Awkisaxa khuyapayasiri, munasiri ukat chiqapar uñjiriwa sasaw Abrahamax atinisirïna, jiwasax jupjam atinisiñwa muntanxa. Ukhamatwa llakisiñatsa, pächasiñatsa ukat mayninakampi jiskhisiñatsa qhispiñäni, ukanakax ina chʼusaruw tiempsa chʼamsa aptʼasiyistaspa.

“Wali llakisitapatsti, ¿khitis jumanakatxa jakañapxa mä horampisa yaptʼasispa?” (Mat. 6:27.) Ukhamwa Jesusax jaqinakarus ukat arkirinakaparus jisktʼäna. Jehová Diosaw mä awkjamax uñjaskistu sañ munäna, ukampixa Diosar atinisiñax wali askïtapwa uñachtʼayaskäna. Jiwasatakixa, aka qhipa urunakan jakañax chʼamakiwa. Sapa mayniw llakinïtanxa, ukampis janiw sinti aynachtʼañasäkiti. Llakisisax janiw mä horampis jakañasar yaptʼksnati, ni sumankañs jikxatkañäniti.

Kuna llakinakan uñjasisas Jesusan arunakapat amtañasawa. Ukhamatwa llakimp jan aynachtʼkañäniti,  sinti llakisisax usuntañar kunaw pursna. Amtañäni, Diosaw jamachʼinakarux manqʼañ churi ukat panqaranakarus sum isthapiyi sasaw Jesusax säna. Ukat kuntï jumanakax munapkta uk Jupaw sum yati sasaw sarakïna (Mat. 6:26-34).

“¿Mä jaqisti isipar nina apnaqaspati jan nakhantayasisaxa?” (Pro. 6:27.) Proverbios qillqatan jikxataski uka nayrïri llätunka jaljanakanxa mä awkis wawapar iwxtʼkaspa ukham arunakaw jikxatasi, ukat maynix wachuqa juchan sarnaqasax kunarus purispa uka tuqits amtayarakiwa (Pro. 6:29). Sañäni, jiwasatï chuymasan jan walinak munaskatas amuyasiñäni ukhaxa, uka jisktʼat amuytʼasisax jankʼakiw uka jan walinak armañasa. Chiqansa, kunanakatï Dios nayraqatan jan walïki taqi ukanakat amuyasiñwa uka jisktʼax yanaptʼistu. Ukat amtapxapuniñäni: “Kuntix jaqix yapuchki ukrakwa apthapini” sasaw Bibliax sixa (Gál. 6:7).

“¿Khitïtas jumax maynin serviripar jiskʼachañatakixa?” (Rom. 14:4.) Roma markankir cristianonakar apaykäna uka cartanxa, kuna jan walinakansa jilat kullakanakax uka urunakan jikxatasipxäna uka tuqitwa apóstol Pablox qhanañchäna. Jupanak taypinxa, yaqhipax yaqha markat jutirinakarux jiskʼachapxirïnwa ukat kʼumipxirïnwa. Ukhamasti uka jisktʼampixa maynit maynikamax sum apasipxam ukat maynin jan wal luratax Jehová Diosar jaytapxam sañwa munaskäna.

Jichhürunxa ukhamarakiwa. Jehová Diosan Qhanañchirinakapax janïr Diosar luqtkasax kunayman sarnaqayätanxa. Ukampis Jupïpanwa jilat kullakanakampix wali munasiñampi uñjastanxa. ¿Kunjamsa sapa maynis ukhaman sarnaqañatakix yanaptʼsna? Sañäni, inas maynix suma chuymampi kuns lurchispa, ukampis jiwasax jankʼak juchañchañ yatstan ukhaxa, Pablon arunakapat amuytʼasiñax wali askïniwa.

¿Kuna jisktʼanakas Jehová Diosar jakʼachistaspa?

Biblian liytʼawayktan uka jisktʼanakax chuymar purtʼkiriwa. Ukat ukarjamaw maynix kunjamäskisa uk amuyasispa. Biblia liykasinxa, kuna tuqitsa parli uk sum amuytʼañasawa, ukhamatwa ukarjam sarnaqañax jan chʼamäkaniti. Ukhamaxa yaqha jisktʼanak uñstani ukhaxa ukham lupʼiñasawa (14 janankki uka recuadro uñxattʼäta).

Ukhamasti Biblian jikxataski uka jisktʼanak chuymar katuqapxañäni, ukhamatwa Jehová Diosan chiqa thakipan wali amuyumpi ukat taqi chuym sarnaqañäni. Diosan jisktʼatax akham sasaw Job tatax säna: “Jichhakamasti nayax jumatxa mayninakan parlatap tuqikwa uñtʼayäsmaxa, ukampis jichhax naya kipkaw jumarux uñkatsma” sasa (Job 42:5). Jïsa, Jehová Diosar uñjkaspas ukhamwa Job chachax amuyasïna. Ukat walja maranak qhipatxa akham sasarakiw Santiagox qillqäna: “Diosar jakʼachasipxam, jupasti jumanakarux jakʼachasirakiniwa” sasa (Sant. 4:8). Ukhamasti, jiwasatï Diosan Arup sum apnaqañäni ukat ukan jikxataski uka jisktʼanak amuyañäni ukhaxa, jukʼampiw Diosar jakʼachasiñäni, urut urutjamas alaxpachankir Awkisar “uñjksna” ukhamäniwa.

[14 janan recuadropa]

¿Kunsa Jehová Diosax amuyi uk yatiñatakix kunjamsa aka jisktʼanakax yanaptʼistaspa?

▪ “¿Tatitusti kusisirakispati jupar waranqa ovejanaka, jan ukax tunka waranqa aceite jawiranaka churirista ukaxa?” (Miq. 6:7.)

▪ “Nayranak utjayiristi, ¿janit uñjkanisti?” (Sal. 94:9.)

▪ “Jayra jaqi, ¿kunapachkamas ikiskäta?” (Pro. 6:9.)

▪ “¿Walikïskiti jumatakixa ukham wali colerasitamaxa?” (Jon. 4:4.)

▪ “¿Kuna askirak jaqitakisti aka uraqpacha jupankxaspa, ukat almap chhaqayasispa ukasti?” (Mat. 16:26.)

▪ “¿Khitiraki Criston munasiñapat apaqistaspasti?” (Rom. 8:35.)

▪ “¿Kuncha Diosax jan churktamxa?” (1 Cor. 4:7.)

▪ “¿Kunjämaraki qhanasti chʼamakampïspasti?” (2 Cor. 6:14.)

[15 janan fotopa]

Jehová Diosan jisktʼanakapatxa, ¿kunsa Job chachax yatiqäna?