Jehová Diosax qullan ajay tuqiw amtanakap phuqi

“Lakaxat mistkis uka arunakaxa, [...] kuntix nayax siskta ukwa phuqharaki.” (ISA. 55:11.)

1. ¿Uka pä jaqix kuna amtanïpxisa ukat kuna tuqitsa jil llakisipxi?

 PANI jaqinakaw jayar sarañataki wakichasipxi. Kawkir puriñsa panpachaniw sum yatipxi. Ukat kawkïr thakinjam sarañas askïspa ukxa maynïrix sum amuytʼasi, “uka chiqpunwa saräxa” sasaw amti. Ukampis maynïrixa mayj amuytʼasiraki, “jan walinakax thakin utjani ukhaxa, yaqha chiqanak muytʼawayäxa” sasaw wakichasiraki. ¿Kunsa uka pani jaqinakat yatiqtanxa? Maynixa, kunjamsa sarani, mä arunxa, kunjamsa amtap phuqani uka tuqitwa jil llakisi. Ukat maynïristi, kawkirus sarañapa, mä arunxa, kuna amtapsa phuqañapa uka tuqitwa jil llakisiraki.

2, 3. 1) ¿Kunsa Diosax qalltan munäna, ukat Adanampi Evampix juchar puripxäna ukhax kunsa amtawayi? 2) ¿Kunatsa Diosan amtanakapat yatxatasin ukarjam sarnaqañax wakisi?

² Jichhax Jehová Diosat parltʼañäni, Jupatakixa amtanakap phuqañaw nayranki, ukatakix kunanakas wakisi ukanakwa luri (Efe. 3:11). Qalltanxa, mä suma uraqi wakichatayna, jan juchan jaqinakax ukan wali sum wiñayataki jakasipxañapwa munäna (Gén. 1:28). Ukampis Adanampi Evampix juchar puripxäna ukhaxa, Diosax janiw amtanakapat armaskänti. Jan ukasti, kunjamatsa jaqinakax aka Uraqin wiñay jakasipxaspa ukanakwa amuytʼäna (Génesis 3:15 liytʼasiñapawa). Nayraqatxa, mä Wawaw utjani sasaw säna. Alaxpachankir familiapatwa uka Wawax jutañapäna; jupaw kutkatasiri, jan waltʼayiri Supayarux tukjañapäna ukat jan walinaksa askichañaparakïna (Heb. 2:14; 1 Juan 3:8).

³ Jehová Diosan uka amtapaxa phuqasipuniniwa, janiw khitis ni kunas jarkʼkaspati (Isa. 46:9-11). ¿Kunatsa ukham sistanxa? Jupax taqi kunwa qullan ajayu tuqix luraspa,  janiw alaxpachansa ni akapachansa qullan ajayur atipir chʼamax utjkiti. ‘Kuntï siski ukax phuqasipuniwa’ (Isa. 55:10, 11). Ukat niyakixay Diosan amtanakapa phuqasiñap suystanxa, kunjamsa uka amtanakapax phuqasiski uk sum yatxatañasawa, ukat ukarjam sarnaqañasarakiwa. Ukatsti, kunjamsa qullan ajay tuqix amtanakapxa nayra tiempox phuqäna, jichha tiempos phuqaski ukat jutïrinsa phuqani ukanak yatxatañasarakiwa, ukhamatwa Jehová Diosar jukʼampi atinisiñäni.

Kunjamsa Diosax qullan ajay tuqix amtanakap phuqäna

4. ¿Kunjamsa Jehová Diosax amtanakap jukʼat jukʼat qhanstayäna?

⁴ Bibliax qillqaskäna uka tiemponakanxa, jukʼat jukʼatwa Jehová Diosax amtanakap qhanstayäna. Qalltanxa, mä Wawaw utjani sasakiw säna, janiw khitis uka Wawatxa jukʼamp yatkänti, ‘imantatäkaspas’ ukhamänwa (Rom. 11:25). Pä waranqa maranak qhipatwa Abrahamarux uka Wawan jutañapatxa parlaskäna, ukhamatwa mä jukʼa qhanstayäna (Génesis 12:7; 22:15-18 liytʼasiñapawa). Markanakax wawanakam “tuqi” bendicitäniwa sasaw Jehová Diosax säna, ukhamasti Abrahaman familiapat jutiri mä jaqitwa parlaskäna. Supayax wali sum ukanak istʼpachänxa, ukatwa Abrahaman wawanakapar tukjañ munäna, janiw Jehová Diosan amtanakapxa phuqasiyañ munkänti. Ukampis Supayax inakiw chʼamachasïna, kunattix qullan ajayuw jarkʼxäsïna. ¿Kunjamsa jarkʼxäspachäna?

5, 6. ¿Jutaniw sat Wawan nayra awkinakaparux kunjamsa Jehová Diosax qullan ajayupampix jarkʼaqäna?

⁵ Jutaniw sat Wawan nayra awkinakaparux qullan ajayupampiw Jehová Diosax jarkʼaqäna. Ukatwa Abramar (Abraham) akham säna: “Nayätwa jumar arxatirimaxa” sasa (Gén. 15:1). Uk sasinxa janiw aliqak parlkänti. Kunas 1919 nayrïr pacha maranxa pasäna uka tuqit amuytʼañäni. Kunapachatix Abrahamax chacha warmpacha Gerar markar jakasir sarapxäna ukhaxa, uka marka apnaqir Abimélec sat jaqiw Sararux warmipäñapataki irpasiñ munäna, Sarax janis chachanïkaspa ukham amuyäna. ¿Ukax Supayan sipitapänti? ¿Abrahamampi Sarampix jan wawanïpxañapatakit uka sipit wakichpachäna? Bibliax janiw uka tuqit kamskisa. Ukampis Diosax janiw ukhamaki uñchʼukkänti, chachapar kuttʼayxam sasaw uka apnaqirir mä samkan säna (Gén. 20:1-18).

⁶ Ukampis walja kutiw Jehová Diosax Abrahamarus ukat familiaparus jan walinakat qhispiyäna (Gén. 12:14-20; 14:13-20; 26:26-29). Ukatwa salmonak qillqirix akham sispachäna: “Diosax janiw khitin tʼaqhisiyañaps munkänti, jupanak laykuw reyinakarus mutuyäna. Jupax sänwa: ‘Ajllitanakaxarux jan llamktʼapxamti, profetanakaxarux jan ñanqha lurapxamti’ sasa” (Sal. 105:14, 15).

7. ¿Kunjamatsa Jehová Diosax Israel markar jarkʼaqäna?

⁷ Jutaniw sat Wawax Israel markanwa uñstañapäna, ukhamasti qullan ajayupampiw Jehová Diosax uka markar jan walinakat qhispiyarakïna. Nayraqatxa Moisés tuqiw Leyinakap churatayna, ukhamata yupaychañ tuqinsa, sarnaqañ tuqinsa ukat jañchi tuqinsa qʼumäpxañapataki (Éxo. 31:18; 2 Cor. 3:3). Ukat Suma Uraqin mä qhawqha maranak qamxapxäna ukhaxa, marka qhispiyirinakwa uttʼayarakïna. Jupanakxaruw Jehová Diosax qullan ajayu apayanïna, israelitanakar qhispiyañataki (Jue. 3:9, 10). Ukat Jesusan yuriñapkamawa, mä arunxa, Abrahaman wawanakap tuqit jutir Wawan yuriñapkamaw Jerusalén marksa, Belén marksa, templopsa ukat yaqha chiqanaksa qullan ajayupampix jarkʼaqäna, ukhamata Mesiasat parlir profecianakax sum phuqasiñapataki.

8. ¿Kunatsa qullan ajayuw Jesusxankäna sasax sissna?

 ⁸ Jesusax aka Uraqinkkäna ukhaxa, qullan ajayuw jupxankarakïna. Nayraqatxa, Judá markan jakasir María sat mä vírgen tawaqun purakaparuw Diosax qullan ajayup tuqix mä wawa uchatayna. Uka warmix jiwasjam juchararäkchïnsa, jan juchani mä wawa ususitayna, ukax wali muspharkañapunïnwa. Uka wawax janiw Adanan juchapar katuyatäkänti (Luc. 1:26-31, 34, 35). Ukatxa uka yuqall wawar jiskʼatpach jiwañ munapxäna ukhaxa, pachpa qullan ajayurakiw uñisirinakapat qhispiyäna (Mat 2:7, 8, 12, 13). Ukat Jesusax niya 30 maranïxäna ukhaxa, David lanti apnaqañapatakiw Diosax jupar qullan ajay tuqix ajllïna, ukatxa uka Apnaqäwit jaqinakar yatiyañaparakïnwa (Luc. 1:32, 33; 4:16-21). Aka Uraqin irnaqkasax qullan ajayun chʼamapampiw Jesusax usutanaksa kʼumaraptayäna, milagro lurasaw jaqinakarus manqʼañ churäna ukat jiwatanaksa jaktayäna. Ukhamasti, jupax apnaqxistani ukhaxa, kunanaksa jiwas laykux lurani uk amuysnawa.

9, 10. 1) ¿Kunatsa Jesusan nayra arkirinakaparux qullan ajayuw yanaptʼäna sasax sistanxa? 2) ¿Uka tiemponxa Jehová Diosan kuna amtapas qhanstäna?

⁹ Ukat 33 maran Pentecostés urut aksaruxa, uka qullan ajayumpirakiw Jehová Diosax Abrahaman wawanakap taypin jakhutäpki uka cristianonakar ajlliñ qalltawayi, jupanakaw alaxpachar sarañataki ajllitäpxi (Rom. 8:15-17; Gál. 3:29). Qullan ajayux qhanaw jupanakxan uñjasïna, ukatwa Diosan arunakapat yatiyirix taqi chuym sarapxäna ukat milagronaksa lurapxäna (Hech. 1:8; 2:1-4; 1 Cor. 12:7-11). Ukhamatwa kunsa Jehová Diosax amtxäna ukax uñachtʼayasïna. Janiw nayrjamax Jerusalén templon yupaychayasiñ munxänti; jan ukasti, alaxpachar sarañataki ajllit cristian tamaruw uka lantix uttʼayäna. Uka tuqiw amtanakapxa phuqañapäna.

¹⁰ Kunjamtï uñjawayktanxa, Bibliax qillqaskäna uka tiemponxa, qullan ajay tuqiw Jehová Diosax luqtirinakapar jan walinakat jarkʼaqäna, milagronaksa lurayäna ukat alaxpachar sarir cristianonakarus ajllirakïna. Ukhamatwa amtapxa jukʼat jukʼata phuqañ qalltawayi. Ukampis ¿jichha tiempot kamsaraksnasa? ¿Kunjamsa qullan ajayupampix amtanakap phuqaski? Niyakixay uka qullan ajayurjam sarnaqañ munstanxa, uka tuqit yatxatañax wali askiwa. Ukhamasti, kunjamsa Jehová Diosax amtanakapxa aka urunakan phuqaski uk jichhax pusi tuqit amuytʼañäni.

Kunjamsa Diosax qullan ajay tuqix amtanakap phuqaski

11. 1) ¿Kunatsa Diosan qullan ajayupaw cristianonakar qʼuma sarnaqañ yanaptʼi sistanxa? 2) ¿Cristianonakax kunjamatsa qullan ajayurjam sarnaqañ munapxatap uñachtʼayapxi?

¹¹ Nayraqatxa, qullan ajay tuqiw Diosax chiqa cristianonakar sum sarnaqañxa yanaptʼi. Ukat khitinakatix Jupan amtanakaparjam sarnaqañ munapki ukanakax qʼumäpxañapawa (1 Corintios 6:9-11 liytʼasiñapawa). Yaqhipaxa Diosan markapar janïr mantkasaxa wachuq juchanakan sarnaqapxäna ukat yaqhipasti chacha pura jan ukax warmi pura sarnaqiri ukham jan wali jaqïpxänwa. Uka jan walinakakiw chuymanakapan utjaskäna (Sant. 1:14, 15). Ukampis jichhax Diosampi sum uñjatäñatakixa uka jan walinak armawayapxiwa, “jichhax qʼumachatäxa[pxiwa]”. ¿Uka jan walinakar atipañatakix kunas jupanakar yanaptʼi? Kunjamtï Bibliax siskixa, ‘Diosan qullan ajayupaw’ yanaptʼi (1 Cor. 6:11). Ukat qʼuma sarnaqañataki chʼamachasisaxa, qullan ajayurjam sarnaqañ munapxatapwa uñachtʼayapxi.

12. 1) Ezequielax uñjkäna uka unañchäwirjamaxa, ¿kunjamsa Jehová Diosax markapar apnaqi? 2) ¿Kunjamatsa qullan ajayurjam sarnaqatas uñachtʼaytanxa?

¹² Ukatxa, qullan ajayupampiw Diosax markapar kunjamtï munki ukarjam apnaqaraki. Alaxpachankir markapax mä carror uñtataw sasaw Ezequielax mä unañchäwin  uñjasax qhanañchi. Diosan munañap phuqañatakix janiw alaxpachan inaktʼkiti, ukat janirakiw khitis saytʼaykaspati. Ukampis ¿kunas uka carrorux jan inaktʼas sarnaqayi? Diosan qullan ajayupawa sarnaqayi (Eze. 1:20, 21). Ukat aka Uraqinkir markapsa uka qullan ajay tuqirakiw Diosax apnaqi. Ukhamasti, kunapachatï uka markan yatichäwinakap taqi chuym istʼktan ukhaxa, uka carromp chikas sarksna ukat qullan ajayurjamas sarnaqksna ukhamawa (Heb. 13:17).

13, 14. 1) ¿“Jichha pacha jaqinaka” sasinxa khitinakatsa Jesusax parlaskäna? 2) Diosan qullan ajayupax kuna yatichäwinaksa qhanstayaski uk may qhanañchtʼam (“¿Aka qhipa maranakan qhanstawayki uka yatichäwinak yattati?” siski uk recuadro uñxattʼäta).

¹³ Ukatsti, uka qullan ajayuw Biblian yatichäwinakapxa qhanstayaraki (Pro. 4:18). Chiqas qullan ajayun yanaptʼataw Amuyasiri Chiqapa Uywatax aka revista tuqix Diosan Arupan utji uka yatichäwinakxa jukʼat jukʼata qhanstayi (Mat. 24:45). Jesusan arunakapat amuytʼañäni, akham sasaw säna: “Taqi akanakasti pasaniwa janïr jichha pacha jaqinakax jiwarkipana” sasa (Mateo 24:32-34 liytʼasiñapawa). ¿Jichha pacha jaqinaka sasinxa khitinakatsa parlaski? Uka tuqitxa “Cristox Apnaqäwipankxasin jiwasampïxiwa, ¿ukax kamsañs muni?” siski uka yatichäwinwa qhanañchasi. Jesusax janiw jan wali jaqinakat parlkänti; jan ukasti arkirinakapat parlaskäna, jupanakaw mä qhawqha tiempotxa qullan ajayu katuqapxañapäna. * Ukat kunapachatï uka profeciax khä urunakansa jichha tiemponsa phuqasiñapäkäna ukhaw alaxpachar sarir cristianonakax “akapachan tukusiñapax jakʼankata[psa], punkunkata[psa]” uñjapxañapäna. Ukat ukax kamsañs muni uksa jupanakarakiw amuyapxañapäna.

¹⁴ Jichha pacha jaqinaka sasinxa, mä tiempon jakasir jaqinakatwa Jesusax parlaskäna. Kunjamtï yatktanxa, jupanakkam uñtʼasisin mä tiempon jakawayapki uka jaqinakax janiw mä mitäpkapuniti, ukatxa tukusirikiwa (Éxo. 1:6). Jiwasatakixa, “jichha pacha jaqinaka” siski ukaxa, ¿kamsañsa muni? Amuytʼañäni, Jesusax Apnaqäwipan jiwasampïñxa 1914 maranwa qalltawayäna, ukhamax uka tiempon jakir ajllit cristianonakax jachʼa tʼaqhisïwi urunak uñjir ajllit cristianonakampix uñtʼasipxañapänwa. Ukhamasti, 1914 maranwa alaxpachar  sarañataki ajllitäpki uka cristianonakax mä tiempon jakir jaqinakjamax qalltawayapxi, ukatxa tukusirakiniwa. ¿Kunsa taqi ukanakax uñachtʼayistu? Jachʼa tʼaqhisïwi urunakax wali jakʼankxatapwa uñachtʼayistu. Ukhamax wal amuyasiñasawa ukat jankʼakïñasarakiwa (Mar. 13:37). Ukhamatwa Diosan yatichäwinakap sum yatxatatassa ukat qullan ajayurjam sarnaqatassa uñachtʼayañäni.

15. ¿Kunatsa qullan ajayuw yatiyir sarañxa yanaptʼistu sasin sistanxa?

¹⁵ Ukxarusti, jaqinakar yatiyañatakiw qullan ajayux yanaptʼarakistu (Hech. 1:8). Jan yanaptʼkistaspa ukhaxa, ¿Diosan arunakapax Uraqpachan yatiyasispati? Janiw chʼamasampikix yatiyir sarksnati. Inas axsarayasisax akham sirïsta: “Nayax kawkit utat uta yatiyirix sariristxa” sasa. Ukampis jichhax taqi chuymaw jan axsartʼas yatiyasktaxa. * Ukat yaqhipax jarkʼatpachas jan ukax arknaqatas yatiyir sarasipkakiwa. Chiqasa, Diosan qullan ajayupaw uka jan walinakar atipañsa ukat jiwasatakix wali chʼamäki ukanak lurañsa yanaptʼistu (Miq. 3:8; Mat. 17:20). Jïsa, Diosar luqtañataki chʼamachasitasaxa qullan ajayurjam sarnaqataswa uñachtʼayi.

Kunjamsa Diosax qullan ajay tuqix amtanakap phuqani

16. ¿Kunatsa jachʼa tʼaqhisïwi urunakanxa Jehová Diosaw markapar qhispiyani sasax sistanxa?

¹⁶ Jutïrinxa, qullan ajayup tuqirakiw Jehová Diosax amtanakap phuqani. Nayraqatxa, ukampiw luqtirinakapar jan walinakat imxatani. Amtañäni, nayrax ukhamaw markaparus jan ukax sapa mayni luqtirinakaparus qullan ajay tuqix qhispiyäna. Jachʼa tʼaqhisïwi urunakanxa ukhamarakiw markapar qhispiyani. Ukatxa, kunjamsa jarkʼaqistani uka tuqitxa janiw llakisiñasäkiti. Jupar taqi chuym atinisiñänixa, kunjamatsa ukat kawkinsa qhispiyaskistaniwa. Ukat qullan ajayupas jiwasxankaskaniwa (2 Cró. 16:9; Sal. 139:7-12).

17. ¿Armagedón qhipatxa kunanaksa Jehová Diosax qullan ajay tuqix lurani?

¹⁷ ¿Armagedón qhipatxa kunanaksa Jehová Diosax qullan ajay tuqix lurani? Kunatix wakiskani ukanakwa lurani, ukat machaq Qullan Qillqatanakas uka qullan ajayu tuqiw lurasini (Apo. 20:12). ¿Kuna tuqitsa uka machaq libron parlasini? Amuyataxa, Jesusax apnaqkani uka waranq maranakanxa kuna kamachinakas utjani, ukanakaw ukan qillqatäni. Uka machaq Qillqatanakax kuna tuqitsa parlani ukxa walpun yatxatañ muntanxa ukat kuna bendicionanakas Paraison utjani ukanaksa wal suyaraktanxa. Kunja sumakis jakasiñäni ukxa janiw sumpach amuyksnati. Uka tiemponwa Uraqitakisa jaqinakatakisa Diosan amtanakapax qullan ajayup tuqix phuqasini.

18. ¿Kun lurañsa taqi chuym amtañasa?

¹⁸ Kunjamtï uñjawayktanxa, qullan ajayup tuqiw Jehová Diosax amtanakap phuqi. Janiw khitis ni kunas uka qullan ajayurux atipkaspati. Ukhamasti, Diosan amtanakapax phuqasipuniniwa. Ukat niyakixay amtanakapax jiwasampitakïchixa, “taqi kunansa qullan ajayumampi yanaptʼita” sasin Diosar mayisiñasawa (Luc. 11:13). Ukhamatwa Diosan amtapax jiwasatak phuqasini, wiñay wiñayaw mä suma Uraqin jakasiñäni.

[Qhanañchäwinaka]

¿Kunsa yatiqawayta?

• ¿Bibliax qillqaskäna uka tiemponakanxa kunjamsa Diosax qullan ajay tuqix amtanakap phuqäna?

• ¿Kunjamsa Diosax qullan ajay tuqix amtanakap jichhax phuqaski?

• ¿Kunjamsa Diosax qullan ajay tuqix amtanakap jutïrin phuqani?

[Jisktʼanaka]

[10 janan recuadropa]

¿Aka qhipa maranakan qhanstawayki uka yatichäwinak yattati?

Jehová Diosax yatichäwinakap qhanstayaskakiwa markapatakixa. ¿Aka qhipa maranakanxa kuna yatichäwinakas Yatiyañataki sat revistan qhanstawayi?

▪ ¿Levadura tuqit parlki uka uñachtʼäwixa kunsa cristianonakan jiltäwipat yatichistu? (Mat. 13:33; julio 15, 2008, 20 janat 21 janakama.)

▪ ¿Jehová Diosax kunapachas alaxpachar sarir cristianonakar ajlliñ tukuyxani? (Mayo 1, 2007, 30 janat 31 janakama.)

▪ ¿Diosar ‘ajayumpi yupaychaña’ siski ukax kamsañs muni? (Juan 4:24; julio 15, 2002, 15 jana.)

▪ ¿Walja jaqinaka satäpki ukanakax kawkinsa Diosar luqtapxi? (Apo. 7:15; mayo 15, 2002, 30 janat 31 janakama.)

▪ ¿Kunapachas uwijanakax cabranak taypit ajllitäni? (Mat. 25:31-33; octubre 15, 1995, 18 janat 28 janakama.)