¿Jumax amttati?

¿Aka qhipa phaxsinakan mistkäna Yatiyañataki sat revista liytʼtati? Ukhamächi ukhaxa, aka jisktʼanakar qhanañchtʼma:

• ¿Kunatsa Mesiasax jiwañapäna?

Nayraqatxa, kunjamsa jan juchani mä jaqix ‘Dios chuyma’ sarnaqaspa ukwa uñachtʼayañapäna. Ukatxa, Adanax aptʼawaykistu uka juchat jaqinakar ‘qhispiyañatakiw’ jakäwip luqtasiwayañaparakïna. Ukhamasti wiñay jakañ jikxatañatakix Jesusar iyawsañasawa (12/15, 22 janat 23 janakama).

• ¿Jan jiwir almanïtanti?

Salmo 146:4 qillqatax akham siwa: “Jiwxapxi ukapachaxa, laqʼaruw tukxapxi, ukürpachaw amtanakapax tukusxi” sasa. Cuerpon jiwataparux janiw jakxtanti. Jakäwisax velan ninapjamawa. Kunapachatix nina jiwayktan ukhaxa janiw kawkirus sarkiti jan ukasti ina chʼusarukiw tukusxi (1/1, 4 jana).

• ¿Kunjamatsa wawanakampi sum parltʼassna?

Kunanakas chuymanakapan utji uk yatiñataki jisktʼasin sum istʼañasawa, ukat inas awisax mayjanakaki parlxapxchispa, ukampis istʼañasawa. Manqʼasiñ horasanakaw yaqhip familianakax sum parltʼasiñ yatipxi (1/15, 18 jana).

• ¿Infierno sasin jaqukipatäki uka Seol arux kamsañs muni?

Hebreo arut jutki uka Seol aruxa, jiwatanak imaña mä jachʼa sepulturäkaspas ukham sañ muni, ukatxa, yaqhip Biblianakanxa uka arux “infierno” sasin jaqukipatarakiwa (1/1, 5 jana).

• ¿Kunapachas mä cristianox mayampi bautisasispa?

Inas awisax mä cristianon mayampi bautisasiñapax wakischispa. Maynix tamat jaqsuyasiñatakjam mä jachʼa jucha jamasat lurkasina bautisasiwaychi ukhaxa, askïspaw mayampi bautisasiñ amtañapaxa (2/15, 22 jana).

• ¿Suma jaqinakax taqpachanit alaxpachar sarapxani?

Mateo 5:5 qillqatax akham sänwa: “Kusisiñanïpxiw llampʼu chuymaninakaxa, jupanakarakiw Diosan arsutaparjama uraqi katuqapxani” sasa. Suma jaqinakax janiw taqpachani alaxpachar sarapkaniti sasaw Jesusax säna (Juan 3:13) (1/1, 6 jana).

• ¿Jesusax trigompit jan wali qurampit parlkäna uka uñachtʼäwinxa, ¿kunapachas suma jatha satañax qalltasïna?

Jaqin Yuqapaxa, mä arunxa Jesusax 33 maran Pentecostés urut suma jatha satañ qalltawayi. Ukhawa arkirinakapxar qullan ajayu apayanïna, ukhamata “Diosan ajllit wawanakapar” tukupxañapataki. (3/15, 19 janat 20 janakama).

• ¿Kunjamsa trigompi saski uka cristianonakarux Jehová Diosan trigo imañaparu apthapisiwayi? (Mat. 13:30.)

Kunapachatix ‘akapachan tukusiñ urunakapax’, mä arunxa, qhipa urunakax qalltäna uka qhipatwa jakasipkäna ukanakax Diosan suma uñjata cristian tamar katuqatäpxäna, ukanwa Jehová Diosampi suma uñjata luqtapxäna; ukat jiwatäxapxäna ukanakasti alaxpachan katuqatäxapxänwa (3/15, 21 janat 22 janakama).

• ¿Khitinakas Bibliankki uka libronakax Diosan amuytʼayataw sasin amtapxpachäna?

Janiw iglesia jan ukax yupaychäwinak pʼiqtʼirinakax uk amtapkänti. Jan ukasti, chiqa cristianonakaw Diosan qullan ajayupan yanaptʼatax kawkïr Qillqatanakas Diosan amuytʼayata ukxa amuyapxäna. Uka nayra patak maranakanxa, kawkïri qillqatanakas chiqäki ukat jan chiqäkaraki ukanak ‘qhanañchañatakiw’ cristianonakax qullan ajayu katuqapxäna (1 Corintios 12:4, 10) (4/1, 28 jana).