Chuymaninakar respetapxañäni

CALIFORNIA marka thiyanxa, Sapa Ciprés sat mä quqaw utji, yaqha quqanakat sipansa walpun fotonak apsupxi. Ukat 250 maranakat sipansa jila maraniw sasaw sapxaraki. Walja maranakani uka alirux wali sum uñjapxi, pitanakampi chinkatapxi, qalanakampi muytayapxi ukhamawa.

Uka quqax chuymankipstat cristian jilat kullakanakat amtayistu, jupanakax walja maranakaw Diosat taqi chuyma yatiyapxi. Qhip qhipa urunakanxa, “chuymani” jaqinakaw Diosan Arupat yatiyapxani sasaw Joel profetax säna (Joel 2:28-32; Hech. 2:16-21). ¿Uka arunakax phuqasiwayiti? Jïsa. Chuymankipstat jilat kullakanakax walja horanak Diosan arunakapat yatiyapxi (Mat. 24:14). Yaqhipax walja maranakaw arknaqata uñjasiwayapxi, ukat yaqha jan waltʼäwinakar kunaw saykatawayapxi. Uka Ciprés quqarux walja maranïtap laykuw pitanakampi chinkatasa qalanakamp muytayas kun wali sum uñjapxi. Ukhamasti, ¿janit chuymankipstat jilat kullakanakar walja maranak Diosar taqi chuyma luqtapxatapat respetompi wali suma uñjañasax wakiskaspa?

“Jilïri jaqinak nayraqatansti saytʼasisina jupanakarux mä suma axsartʼaña uñachtʼayarakim” sasaw Jehová Diosax markapar nayra tiempon säna (Lev. 19:32). Jichhürunakanxa, chuymankipstat jilat kullakanakax walja maranakaw Diosan munañaparjam sarnaqapxi (Miq. 6:8). Chiqas Jehová Diosar istʼasin mara mar sarnaqawayapxatap laykux janqʼu ñikʼutanakapax “mä suma coronjamawa” (Pro. 16:31).

 Apóstol Pablox akham sasaw Timoteo waynarux iwxtʼäna: “Chuymani awkinakarux jan tuqimti, ukampis suma iwxanak churam awkimäkaspas ukhama [...]. Chuymani taykanakarusti taykamarjam uñjam” sasa (1 Tim. 5:1, 2). Uka iwxar istʼasaxa, Timoteox chuymankipstat jaqinakar respetompi uñjatapwa uñachtʼayaspäna. Ukhamasti, chuymankipstat jilat kullakanakasarux respetompi parlañaswa Jehová Diosax muni.

Pablox akham sasaw saraki: “Jilapurjam taqi chuyma uñjasiñatxa nayrankapxam” sasa (Rom. 12:10, NM). Jïsa, irpir chuyman jilatanakaw chuymankipstatanakar respetompi sum uñjañatakix chʼamachasipxañapa. Ukampisa, taqiniw ukham lurañatakix chʼamachasiñasaraki.

Chuyman awk taykarus jan ukax achachilanakarus familiaranakaw sum uñjañatakix jukʼamp chʼamachasipxañapa. Sapa Ciprés sat quqan aliskakiñapatakixa, jaqinakax sum uñjapxi. Ukhamasti, ¿janit chuymankipstat awk taykasaru ukat achachilanakasar respetompi sum uñjañax jukʼamp wakiskaspa? ¿Kunjamatsa respetatas uñachtʼaysna? Kamsapxisa uk sum istʼañasawa, janiw taqi kuns munañasaruki lurañasäkiti (Pro. 23:22; 1 Tim. 5:4).

Jehová Diosaxa, chuymankipstat luqtirinakaparux wali sum uñji. Ukat janipuniw jupanakarux jaytanukkaniti (Sal. 71:18). Ukatwa taqi chuyma luqtasipkakiñapatakix Diosax chʼamañcharaki. Jiwasax ukham sum uñjañataki chʼamachasiñasarakiwa.

[7 janan fotonakapa]

Kunjamtï Sapa Ciprés sat quqar uñjapkixa, ukhamarakiw chuymaninakar wali respetompi sum uñjañasa

[Fotox khitin apsutasa]

American Spirit Images/age fotostock