Jilatanaka, qullan ajayurjam sarnaqasin nayrar sartapxam

“Maynitix [...] Ajayun munañapar yapuchchixa, [...] wiñay jakañ achwa [apthapini].” (GÁL. 6:8.)

1, 2. ¿Mateo 9:37, 38 qillqatax kunjamsa phuqasiski, ukat kunas tamanakan munasiraki?

 “COSECHA apthapiñax waljawa, ukampis irnaqirinakax jukʼanikirakiwa. Mayipxamaya yapunirux jukʼamp irnaqirinaka khitaniñapataki” sasaw Jesusax säna (Mat. 9:37, 38). Jichhaw uka arunakax phuqasiski, janiw mayampis ukax uñjasxaniti. Jehová Diosaw markapan jiltañapatakix uka mayitarjam wal yanaptʼaski. Pasïr 2008 maran septiembre phaxsit 2009 agosto phaxsikamaxa 2.031 ukkha tamanakaw uttʼasiwayi, jichhakamax 105.298 ukkha tamanakaw utjxi. Sapürus niya 757 machaqanakas bautisasipkaspa ukhamawa.

² Niyakixay Diosan markapax wal jiltaskchixa, tamanak uñjiri ukat yatichir jilatanakaw wal munasiraki (Efe. 4:11). Chiqasa, khitinakas jilat kullakanakar sum uñjapxaspa ukxa Jehová Diosaw ajlliski, kunjamtï nayra tiemponakan wakichtʼat chachanakar ajllkäna ukhama. Aka qhipa urunakanxa, “paqallqu jilïrinaka” ukat “kimsaqallqu [...] aytat jaqinakam[piw]” Diosan markapar uñjapxani sasaw Miqueas 5:5 qillqatax qhanañchi. Wakichtʼat jilatanakaw Diosan markapar uñjapxañapäna.

3. ¿“Ajayun munañapar yapu[chaña]” siski uka arunakax kamsañs muni?

³ Jilata, jumatix bautisatäxstaxa, ¿kunas tama taypin jukʼampi irnaqañatakix yanaptʼiristamxa? Nayraqatxa, ‘ajayun munañapar yapuchañamawa’. Taqi kunansa qullan ajayurjam sarnaqañamawa (Gál. 6:8). Ukatxa, janiw “janchin munañaparjam yapu[chañamäkiti]”. Juma pachpataki sapa kutis llakiskasma ukat kusistʼañ tuqiruki saraskasma ukhaxa, Jehová Diosar taqi chuym luqtañax chʼamäxaspawa. Chiqas taqi cristianonakaw qullan ajayurjam sarnaqañatakix chʼamachasiñasa, ukampis jilatanakaw jukʼampi chʼamachasipxañapa, ukhamatwa tama irpañatakix mayitanak phuqapxani. Ukat niyakixay irpir chuymaninakas ukat yanapirinakapas wal munaschixa, aka yatichäwixa jilatanakataki wakichtʼatawa. Ukhamasti, munat jilata, Diosat maytʼasisin aka yatichäwirjam amuytʼasiñamawa.

Jukʼamp luqtañataki chʼamachasim

4, 5. 1) ¿Bautisat jilatanakax kunatakis tama taypin chʼamachasipxañapa? 2) ¿Jukʼamp irnaqañ munatapxa kunjamsa maynix uñachtʼayi?

⁴ Khititix irpir chuymanjam luqtañ munki ukax wal chʼamachasiñapawa; janiw khitis mä akatjamat irpir chuymaniptkaspati (1 Tim. 3:1). Jilat kullakanakar yanaptʼañatakis jankʼakïñaparakiwa (Isaías 32:1, 2 liytʼasiñapawa). Ukatxa, janiw jachʼañchayasiñataki irpir chuymanïñ munañapäkiti, jan ukasti, mayninakar yanaptʼañatakïñapawa.

⁵ Khititix irpir chuymanjam jan ukax yanapiripjam luqtañ munki ukaxa, Biblian mayitanakaparjam phuqañapawa (1 Tim. 3:1-10, 12, 13; Tito 1:5-9). Jilata, amuytʼasiñatakix akham jisktʼasiñamawa: “¿Diosan arunakapat yatiyirix sapa kutit sarasktxa, ukat mayninakarus ukham sarapxañapatakix yanaptʼasktti? ¿Jilat kullakanakat amtasisktti, ukat chʼamañchtʼasktti? ¿Diosan Arupat sum  yatxatatajax qhanäskiti? ¿Tantachäwinakan jukʼamp sum arstʼañatakix chʼamachasisktti? ¿Taman kun luram satas taqi chuymat phuqtxa?” sasa (2 Tim. 4:5).

6. ¿Irpir chuymanïñatakisa jan ukax yanapirïñatakisa kunas wakisi?

⁶ ¿Tama taypin jukʼampi luqtañatakix kunas mä jilatar yanaptʼaspa? Diosan qullan ajayupaw yanaptʼaspa (Efe. 3:16). Ukatxa janiw khitis aytatäñ laykukix irpir chuymanïñsa jan ukax yanapirïñsa thaqhañapäkiti. Jan ukasti, khititix Diosamp sum apaski ukakiw uka aski churäwi taman katuqaspa. Ukampis ¿Diosampi sum apasiñatakix kun lurañas wakisispa? “Ajayun munañaparjam sarnaqa[ñapawa]” ukat uka qullan ajayun luräwiparjam phuqañaparakiwa (Gál. 5:16, 22, 23). Jïsa, jumatix ukarjam sarnaqäta ukat iwxanaksa katuqasirakïta ukhaxa, ‘nayraqataru sartatamax’ qhanäniwa (1 Tim. 4:15).

Janiw askisaki thaqhañasäkiti, yanaptʼasirïñasawa

7. ¿Mä irpir chuymanix kunjamsa jilat kullakanakar yanaptʼañapa?

⁷ Khitinakatix irpir chuymanjam luqtasipki ukanakaxa chiqapuniw jilat kullakanakat llakisipxi, ukat yanaptʼañatakis jankʼakïpxarakiwa. Apóstol Pablot amtañäni, irpir chuymanjam luqtasaxa, akham sasaw Corintonkir jilat kullakanakar satayna: “Carta qillqanipkäyäsma ukkhaxa, wali mayjtʼata, llaktʼata, ukhamarak jachtʼasisa, ukhamaw jikxatasïyäta; ukampis janiw llakisipxañamataki apayanipksmati, jan ukasti kunja jachʼäkitix munasiñaxax jumanakataki uk yatipxañamatakiw apayanipxsma” sasa (2 Cor. 2:4). Ukhamaw Pablox irpir chuymanjam phuqañatakix wal chʼamachasïna.

8, 9. ¿Nayrax khitinakas Diosan luqtirinakapar chiqpachapuni yanaptʼañataki chʼamachasipxäna?

⁸ Khitinakas Diosan luqtirinakapar yanaptʼañataki chiqpachapuni chʼamachasipxi ukax qhanaw amuyasi. Noé tatat amtañäni, janiw familiapar akham siskänti: “Arka  tukuyxapxäta ukhaw jawsapxitäta” sasa. Ukatxa, Moisesas janirakiw israelitanakar akham siskänti: “Egiptot mistunxapxam, Wila Quta jakʼan suyapxäma” sasa. Ukat Josué tatax janiw “Jericó markan pirqanakap allthaptxani ukhaw jawsapxitäta” sasax siskänti. Isaías profetatsa amtañäni, jupax janirakiw yaqha profetar uñtasaxa, “ukaxay, jupar khitam” sasax siskänti (Isa. 6:8).

⁹ Pachpa Jesusat amtañäni, jupax qullan ajayurjamapuniw sarnaqäna, ukat iyaw sasaw jaqinakar qhispiyañatakix jutatayna (Juan 3:16). ¿Janit jiwasax jupat yatiqasisax mayninakar yanaptʼañ jan ukax luqtañ laykux wal chʼamachasiñasäkaspa? Uka tuqitxa, walja tiempo irnaqtʼir mä irpir chuymanix akham siwa: “Kuntï Jesusax Pedror siskäna uka arunakxa amtapuntwa, akham sasaw säna: ‘Uwijitanakaj awatirapita’ sasa. Nayatakix jilat kullakanakar tumptʼir sarañax wali askipuniwa. Suma arunakampi chʼamachtʼatas jan ukax yanaptʼatas kunjamas jikxatasipxi uk sum amuyta” sasa (Juan 21:16).

10. Jilat kullakanakar luqtañ tuqitxa, ¿kunas mä jilatarux Jesusat yatiqasiñ yanaptʼaspa?

¹⁰ “Nayaw samarayapxäma” sasaw Jesusax munasiñampi säna, ukhamasti bautisat jilatanakax jupat yatiqasiñataki chʼamachasipxañapawa (Mat. 11:28). Khititix irpir chuymanïñ munki ukaxa, Diosar taqi chuym atinisiñapawa ukat jilat kullakanakarus munasiñaparakiwa, ukatxa janiw wali chʼamäkaspas ukham amuyañapäkiti. Ukampis ¿maynix taman luqtañ axsarayasispa ukhax kunas yanaptʼaspa?

Yanaptʼasir chuymanïñamawa

11. ¿Kunas taman jukʼamp luqtañatakix yanaptʼistani?

¹¹ “Janiw sum phuqkiristti” sasin axsarayassta ukhaxa, Jehová Diosat qullan ajayu mayisiñamawa (Luc. 11:13). Chiqansa, pachpa Jehová Diosaw taman jukʼampi luqtañ munañamatakix qullan ajayupampi yanaptʼätamxa ukat Juparakiw lurañanakampi phuqañatakis chʼam churätamxa (2 Cor. 4:7; Fili. 2:13). Ukham luqtañatakix qullan ajayu mayiñamapuniwa (Salmo 25:4, 5 liytʼasiñapawa).

12. ¿Tamar sum uñjañatakix kunjamatsa mä jilatax yatiñkankañ jikxataspa?

¹² Yaqhip jilatanakax tama taypin lurañanak uñjasax axsartayasipxiwa, “wali chʼamäspawa” sasaw sapxi, janis yatiñanïpkaspa ukham amuyasipxi. Ukhamächi ukhaxa, Bibliat jukʼamp yatxatapxañapawa, ukat Bibliat apstʼat qillqatanakatsa sum yatxatapxañaparakiwa. Ukat akham jisktʼasiñaparakiwa: “¿Sapürut Diosan Arupat yatxatasktxa? ¿Diosat yatiñkankañ mayisisktti?” sasa. Santiago 1:5 qillqatax akham siwa: “Jumanakat maynintix jan yatiñ kankañapax utjkchi ukapachax, Diosat maypan, Diosasti juparux churaniwa. Jupasti jilarkirwa churi, khitirus jan kuns sasaw churaraki” sasa. ¿Jumax Diosan uka arunakapar atinistati? Salomonat amtañäni, mayisitaparjamaw Diosax “yatiñ kankaña [ukat] chʼikhi kankaña” churäna. Ukhamatwa taripañatakis kunatix walïki ukat jan walïki ukanaksa sum amuytʼäna (1 Rey. 3:7-14). Chiqasa, janiw jichhax Salomonar uñtatax mä akatjamat yatiñkankañ katuqktanti. Ukampis tamap uñjañataki ajllki ukanakarux Jehová Diosaw sum phuqapxañapatakix yatiñkankañ churi (Pro. 2:6).

13, 14. 1) ¿Pablox kunjamsa Criston munasiñaparjam sarnaqäna? 2) ¿Criston munasiñapax kunatakis jariyistu?

¹³ Ukatsti, yanaptʼasir chuymanïñatakixa, kunsa Jehová Diosampi Yuqapampix jiwas laykux lurapxi ukanakat amuytʼasiñasarakiwa. 2 Corintios 5:14, 15 (liytʼasiñapawa) qillqatat amuytʼañäni. ¿Kunjamsa ‘Criston munasiñapax jariyistu’? Kuntï Jesusax Diosan munañap phuqasin jiwas laykux lurawayki ukanak yatisax wal yuspärtanxa, ukat jupatakjam sarnaqañatakiw chʼamachasiraktanxa. Pablox ukhamaw Criston munasiñaparjam  sarnaqäna, janiw jupakix nayrankañ munkänti; jan ukasti, taqi chuymaw Diosar luqtäna. Ukat jilat kullakanakarus yaqha jaqinakarus wal yanaptʼarakïna.

¹⁴ Cristox taqinirus wal munasistu. Ukhamax jupar wal yuspärañasawa. Ukat “janchin munañaparjam yapu[chasksna]”, munañasaruk sarnaqasksna jan ukax jiwasatakik taqi kuns munasksna ukhax janiw walïkaspati. Kuntï Diosax maykistu ukanak phuqañataki chʼamachasiñasawa, ukaw jiwasatakix taqi kunat sipansa nayrankañapa, ukat jilat kullakanakarus altʼat chuymampi ‘yanaptʼañasarakiwa’ (Gálatas 5:13 liytʼasiñapawa). Jïsa, jiwasatï jilat kullakanakar altʼat chuymampi uñjañäni ukhaxa, wali respetompiw jupanakar yanaptʼañäni; janiw khitirus jiskʼachkañäniti, ni khititsa jan wal parlkarakiñäniti, chiqas Supayakiw ukanak lurañ yati (Apo. 12:10).

Familiax yanaptʼañaparakiwa

15, 16. ¿Mä jilatan irpir chuymanïñapatakis jan ukax yanapiripäñatakis kunjamsa familiapax yanaptʼaspa?

¹⁵ Kunapachatï familiani mä jilatar irpir chuymanïñapataki jan ukax yanapirïñapataki ajlliñ munapxi ukhaxa, warmipasa ukat wawanakapas kunjamäsipkisa ukanakwa amuytʼapxaraki. Kunjamsa familiapax Diosar luqtaski ukat kunjam jaqit uñtʼatäpxisa ukarjamaw ajllitäniti janicha ukxa amtapxi. Ukhamax irpir chuymanjam jan ukax yanapirjam taman luqtañapatakix taqiniw familian yanaptʼapxañapa (1 Timoteo 3:4, 5, 12 liytʼasiñapawa).

¹⁶ Familian sapa maynis chʼamachasipxi ukhaxa, Jehová Diosax wal kusisi (Efe. 3:14, 15, MT). Ukat mä jilatax taman lurañanakap sum phuqkasax janirakiw familiapat armasiñapäkiti, jan ukasti “sum apnaqañapawa”. Mä irpir chuymanisa jan ukax yanapiripasa sapa semanaw Familiana Diosar Yupaychañataki Aruma satäki uka tantachäwi apañapa, janiw khititsa armasiñapäkiti. Ukat Diosan arunakapat yatiyirix warmipampis wawanakapampis sarañaparakiwa. Maysa tuqitxa, kuntï awkix siski ukarjamaw familianxa taqinis phuqapxañaparaki.

¿Mayampi luqtañ munasmati?

17, 18. ¿Irpir chuymanjam jan ukax yanapirjam jan luqtxi uka jilatarux kunas yanaptʼaspa, ukat kunjam chuymanïñapasa?

¹⁷ Jilata, inas jumax irpir chuymanjam jan ukax yanapirjam nayrax luqtchiyäta. Ukampis Jehová Diosar munasiñamax janiw tukuskpachati, ukat Jupas wal munasiraktamxa (1 Ped. 5:6, 7). Inas chiqañchayasiraksta, ukhamächi ukhaxa, kunanakansa pantjasta uk amuyasisin nayrar sartañataki chʼamachasiñamawa, ukat Jehová Diosampi yanaptʼayasiñamarakiwa. Janiw chuym usuyasisin aynachtʼañamäkiti. Wal amuytʼasisin, kusisit chuymampi luqtañataki chʼamachasiñamawa. Irpir chuyman mä jilatax akham sasaw amtasi: “Walja maranakaw irpir chuymanjam luqtawayta, ukat tantachäwinakar sarañatakisa, Biblia liyiñatakisa ukat yatiyir sarañatakis wal chʼamachasiyäta” sasa. Ukampis qhipatxa janiw irpir chuymanïxänti. ¿Jan aynachtʼañatakix kunas yanaptʼäna? Jupax akham saskakiwa: “Kunjamtï irpir chuymanïkasax wal chʼamachasiyätxa, uka pachpak chʼamachasiskayäta.  Ukat maya jan ukax pä marat mayampi irpir chuymanjam luqtxä sasaw sayäta, ukampis paqallq maranakaw suyawayta. Ukhamatwa paciencianïñsa yatiqawayarakta. Ukatsti, jan aynachtʼañatakisa, nayrar sartañatakisa walpun jilat kullakanakax yanaptʼawayapxitu” sasa.

¹⁸ Jumatï uka jilatjam jikxatassta ukhaxa, janiw aynachtʼañamäkiti. Kunjamsa Jehová Diosax familiamar yanaptʼaski ukat luqtaskakiñamatakis yanaptʼasktam ukanakat amuytʼasiñamawa. Ukatxa, Diosar jukʼamp jakʼachasiñwa familiamar yanaptʼañama. Usut jilat kullakanakar jan ukax llakitanakar tumptʼiris sarañamarakiwa. Ukatsti, Diosan arunakapat yatiyir sarañxa janipuniw jaytañamäkiti, ukhamatwa qhanañchiripjamax Jehová Diosar jachʼañchäta (Sal. 145:1, 2; Isa. 43:10-12). *

Yaqha tuqit amuytʼasiñamarakiwa

19, 20. 1) ¿Bautisat jilatanakax kuna tuqitsa amuytʼasipxañapa? 2) ¿Kuna tuqitsa jutïr yatichäwin yatxataskañäni?

¹⁹ Taman sarayir jilatanakax walpun jichhürunakan munasi. Ukhamasti, bautisat jilatanakax sapa maynis amuytʼasisin akham jisktʼasipxañapawa: “¿Irpir chuymanïñatakisa, jan ukax yanapiripjam luqtañatakis kun lurañajas wakisispa?” sasa. Uka tuqit sum amuytʼasiñatakixa, Diosan qullan ajayupa mayisipxañapawa.

²⁰ Kunapachatix mä jilatax taman yanaptʼañataki wal chʼamachasi ukhaxa, wali askiw jilat kullakanakatakixa. Ukat jan kun suyasin jaqi masisar taqi chuym yanaptʼtan ukhax wal kusistanxa, ukhamatwa qullan ajayun munañaparjam yapuchatas uñachtʼaytanxa. Ukampis uka qullan ajayur jan llakisiyañatakix wal amuyasiñasawa. Uka tuqitwa jutïr yatichäwin yatxataskañäni.

[Qhanañchäwinaka]

¿Kamsasmasa?

• ¿Miqueas 5:5 jisktʼa tʼaqax kuna tuqitsa qhanañchi?

• ¿Kunjamatsa mayninakar yanaptʼañ munatas uñachtʼaysna?

• ¿Kunjamatsa yanaptʼasir chuymanïsna?

• ¿Mä jilatan irpir chuymanïñapatakis jan ukax yanapirïñapatakis kunjamsa familiapax yanaptʼaspa?

[Jisktʼanaka]

[25 janan fotopa]

¿Kunjamatsa maynix jukʼampi luqtañ munatapxa uñachtʼayaspa?