Mä usut familiar uñjasax jan aynachtʼañäniti

MARGARITAMPIT Estebanampit parltʼañäni. * Kullakarux jikhanin mä tumor jikxatapxatayna, ukat qhipatsti cáncer usunïtaw sasaw doctoranakax yatiyapxäna. Jilatax akham siwa: “Nayraqatxa uka tumorwa apsupxi ukatsti radioterapia ukat quimioterapia lurapxi. Ukanakamp qullasisax qʼalpun aynachtʼawayi, janiw unxtirjamäkänsa” sasa.

Warmipar ukham usut uñjasax kunja llakitak Esteban jilatax jikxataskäna. Jumax inas ukham jan qullkañ mä usut familianïsta, jan ukax chuymankipstat familiamas utjarakchi (Ecl. 12:1-7). Ukhamächi ukhaxa, uka familiar sum uñjañatakix juma pachpas sum uñjasiñamarakiwa. Jan ukhamäkaspa ukhaxa inas llakimp aynachtʼasax usuntchisma ukat janiw usutarus sum uñjxasmati. Ukatwa janipun Jehová Diosat jithiqtañamäkiti. Ukhamasti, ¿kunjamsa usut jan ukax chuymankipstat mä familiasar uñjkasax Diosat jan jithiqtksna? ¿Kunjamsa jilat kullakanakax yanaptʼapxaspa?

¿Jan aynachtʼañatakix kunas yanaptʼistaspa?

Mä usut familiasar sum uñjañatakixa chʼamasarjam amuytʼasirïñasawa, ukhamatwa Jehová Diosat jan jithiqtkañäniti ukat janirakiw aynachtʼkañänisa, ukat tiempsa jalanuqtʼasiñasarakiwa. Proverbios 11:2 jiskʼa tʼaqax akham qhanañchi: “Yatiñ kankañasti llampʼu chuymaninakamp chikawa” sasa, mä arunxa, llampʼu chuyman jaqix chʼamaparjamaw kuns luri. Ukhamasti, jan aynachtʼañatakixa, kunarus tiempox saraski ukat kunanaksa taman lurasktan ukanakat amuytʼasiñasawa.

 Esteban jilataxa, ukarjamaw sum amuytʼasirakïna. Jupax jurnälpachaw irnaqäna, ukatxa taman irpir chuymaninakat sarayiri ukat yatiyañ tuqit irpir chuymanjamaw Irlanda markan luqtäna. Ukatsti, uka chiqanxa Comité de Enlace con los Hospitales ukanwa yanaptʼäna. Jilatax akham siwa: “Margaritajax janipuniw ‘nayat armasxistaw’ sasax sirïkänti. Nayatakix taqi luräwinakamp phuqañax wali chʼamänwa. Ukat Diosat yanap maytʼasisax irpir chuymaninakat sarayirïñwa jaytañ amttxa. Ukhamatwa Margaritajar jukʼamp sum uñjañajatakix tiempox utjxitäna. Ukat irpir chuymanjam luqtaskakchiyätsa janiw nayrjam lurañanïxayätti” sasa.

Margaritax janiw nayrjam sinti usutäxiti. Jupan yanaptʼataw Esteban jilatax taman nayra luräwinakapan mayampi irnaqxi. Ukat akham siwa: “Margaritax usuntat jikxatasïna ukhaxa panpachaniw amuytʼasiñ yatiqawayapxtxa. Jehová Diosax walpun yanaptʼawayapxitu, ukat warmijax usutpachas amukiw aguantasiri ukaw yanaptʼawayarakitu” sasa.

Jichhax tamanak tumptʼir mä jilatat amuytʼarakiñäni, jupax Jorge satawa ukat warmipasti Maria satarakiwa, jupanakaxa  awkipstat awk taykapar uñjañatakiw amtanakap jan phuqhapkänti. Kullakax akham siwa: “Yaqha markan misionerot luqtañwa munapxayäta. Ukampis jupax sapa wawakiwa, ukhamasti, jupaw chuymankipstat awk taykapar yanaptʼañapäna. Jupanakar uñjañatakiw Irlanda markan qhiparapxta. Ukhamatwa tataparux hospitalankkän ukhax jiwañapkam uñjawayapxta. Jichhax sapüruw mamapar telefonot jawsapxta, ukhamatwa kunans jankʼak yanaptʼapxta. Ukat kawkir tamarutï sarki uka jilat kullakanakas wal jupar yanaptʼapxaraki, ukhamatwa Diosar sum luqtasipkta” sasa.

¿Mayninakax kunjamsa yanaptʼapxaspa?

Chuymankipstat jilat kullakanakarux kunjamsa mayninakax yanaptʼapxaspa uka tuqit parlkasaxa, akham sasaw Pablox säna: “Maynitix jupankirinakatxa jan llakiskchixa, ukhamarak pachpa familiapar yanaptʼañatsa jan llakiskchi ukïrixa, iyawsäwxa jan uñtʼiriwa tuku, mä jan iyawsirits jukʼampiwa” sasa. Ukhamasti, khititï chuymankipstat awk taykapar jan ukax achachilanakapar yanaptʼi ukhaxa, Jehová Diosax wal kusisi (1 Tim. 5:4, 8). Ukat tamankir jilat kullakanakax yanaptʼapxarakispawa, chiqansa yanaptʼapxañapawa.

Ramirompit Juliampit parltʼarakiñäni, jupanakax chuymanïxapxiwa, Suecia markanwa qamasipxi. Jilatax akham siwa: “Juliax janiw usuntirïkiti. Ukampisa cáncer usunïtap yatisaxa, wal sustjasipxta. Janiw nayrjamäxänti, sapüruw qullayirix hospitalar apirïta. Ukampis uka qullanakax jan chʼamanwa antutäna. Ukat qʼumaraptañapkamax janiw utat mistkänti, nayax jupar uñjiriw qhipararakta” sasa. Ukampis ¿kunjamsa jilat kullakanakax yanaptʼapxpachäna?

Irpir chuymaninakax kuntï taman yatiqasiski ukwa telefonot istʼayapxäna. Ukat jilat kullakanakax tumtʼiriw sarapxäna, jawsapxäna, cartanaka ukat yaqha ukham qillqatanakwa apayapxäna. Jorgex akham siwa: “Jehová Diosas jilat kullakanakas walpun yanaptʼawayapxitu. Ukatwa Diosatsa jan jithiqtawayapkaraktti. Jichhax wali kusiskañawa, Juliax kʼumaraptxiwa, wasitatwa Tantachasiñ Utar sarxapxtxa” sasa. Chiqansa, khititix usutanakarus chuymaninakarus sum uñjki ukax wali askiwa, Bibliax jupanakat akham siwa: “Mä amigox taqi horasan munasiripuniwa; llakisiñansti mä jiljamaw chuymachasi” sasa (Pro. 17:17).

Jehová Diosax chʼamachasitamat wal kusisi

Mä usut familiar uñjañax chʼamäspawa, ukampis janiw inamayäkiti. “Jan kunan jaqimpiru, pisi chʼaman jaqimpir uñjirix kusisiñan jaqiwa”, mä arunxa, yanaptʼasir jaqix kusisiñaniwa sasaw Davitax säna (Sal. 41:1).

¿Mä usut familiar uñjirix chiqapuniti kusisiñ jikxataspa? Jïsa, Proverbios 19:17 jiskʼa tʼaqax akham siwa: “Mä pobre jaqir maytʼirix Tatituruw maytʼaski, ukatsti Tatit pachpawa uka manxa phuqxa[rakini]” sasa. Alaxpachankir Dios Awkisaxa, jan jithiqtas Jupar luqtapki ukat usuntapxi ukanakat llakisiwa ukat jupanakar yanaptʼirinakarus bendicirakiwa. Salmonak qillqir Davitax akham sasaw qʼuchüna: “Diosaw ikiñan usuntatarus chʼama churarakini, ukhamarak usupatsa kʼumaraptayarakini” sasa (Sal. 41:3, Aymar Biblia). Ukat usutar uñjiritï jan walin jikxatasispa ukhaxa Jehová Dios pachpaw jupar uñjaskarakini.

Amtapxapuniñäni, Jehová Diosax usut mä familiarasar uñjatasat wal kusisi. Jiwasatï ukham uñjañataki chʼamachasiskakïñäni ukhaxa janiw inamayäkiti, Bibliax akham sistuwa: “Uka casta sacrificiow Diosarux kusisiyi” sasa (Heb. 13:16).

[Qhanañchäwi]

[18 janan fotopa]

Jan aynachtʼañatak chʼamachasim ukat “yanaptʼäm” satax iyaw sarakim