Qullan ajayur jan llakisiyapxamti
Qullan ajayur jan llakisiyapxamti
“Diosan Qullan Ajayuparux jan llakisiyapxamti, [...] uka Ajayump sellatäpxtawa.” (EFE. 4:30.)
1. ¿Kuna askis waranq waranqa jaqinakatakix aka urunakan utji, ukat kun lurañas wakisi?
AKA jan wali urunakanxa, waranq waranqa jaqinakaw Jehová Diosarux Yuqap tuqix jakʼachasipxi, ukax wali askipuniwa (Juan 6:44). ¿Diosar jakʼachasiñatakix kun lurañas wakisi? Jakäwis Jupar katuyasiñasawa ukat ukarjam phuqañasarakiwa. Ukatxa, qullan ajayun sutipar bautisatjamax uka qullan ajayurjam sarnaqañasawa (Mat. 28:19, MT).
2. ¿Kuna tuqinakatsa jichhax amuytʼañäni?
2 Qullan ajayurjam yapuchasaxa, machaqatsa isthapisksna ukhamawa (Gál. 6:8; Efe. 4:17-24). Ukampis “Diosan Qullan Ajayuparux jan llakisiyapxamti” sasaw apóstol Pablox amtayistu (Efesios 4:25-32 liytʼasiñapawa). ¿Uka arunakampix kamsañsa munpachäna? ¿Kunjamatsa Diosan mä luqtiripax qullan ajayur llakisiyaspa? ¿Qullan ajayur jan llakisiyañatakix kunjam sarnaqañasasa? Uka tuqinakat Pablon arunakaparjam amuytʼañäni.
¿Kamsañsa Pablox munäna?
3. ¿Efesios 4:30 jiskʼa tʼaqat kunsa qhanañchtʼasma?
3 Nayraqatxa Efesios 4:30 jiskʼa tʼaqat amuytʼañäni, akham siwa: “Diosan Qullan Ajayuparux jan llakisiyapxamti, Diosankirinakax uka Ajayump sellatäpxtawa [...] kunürutix jupax phuqhat qhispiyasiñ churapkätam ukürkama” sasa. ¿Kunatsa Pablox jilat kullakanakar ukham sispachäna? Diosat jan jayarstʼapxañapatakiw ukham säna. Qhispiyasiñ urutaki “ajayump sellatäpxtawa” sasaw säna. Uka qullan ajayux mä chimpükaspas ukhamänwa. Aka urunakanxa pachpa qullan ajayurakiw alaxpachar saririnakax kunsa katuqapxani uk uñachtʼayi (2 Cor. 1:22). Ukat qullan ajayumpi chimputjamaxa Diosankapxiwa, 144.000 ukhanïpxiwa. Ukatxa alaxpachan jakapxani (Apo. 7:2-4).
4. ¿Kunatsa qullan ajayurux jan llakisiyañasäki?
4 Mä cristianox jan wal sarnaqasin qullan ajayur llakisiyaspa ukhaxa, janiw Diosan qullan ajayup katuqxaspati. Davitat amtañäni, Betsabé sat mä warmimpi juchar purisax akham sasaw Diosat perdón mayisïna: “Jan apanukusistati, janirak qullan ajayums irpaqasistati” sasa (Sal. 51:11). Maynix ukhamaw qullan ajayur llakisiyasax jan walir purispa. Ukat ajllit cristianonakax alaxpachan “jakañ corona” katuqañatakixa ‘jiwañkamaw’ Diosar chiqa chuymampi luqtapxañapa (Apo. 2:10; 1 Cor. 15:53). Ukat aka Uraqin jakañ suyirinakasa, qullan ajayun yanaptʼatarakiw Diosar chiqa chuymampi luqtapxaspa ukat Jesucriston luqtasitapar iyawsasin wiñay jakañ katuqapxarakispa (Juan 3:36; Rom. 5:8; 6:23). Ukhamax janiw khitis qullan ajayur llakisiyañ munktanti.
¿Kunas qullan ajayur llakisiyaspa?
5, 6. ¿Kunjamatsa mä cristianox qullan ajayur llakisiyaspa?
5 Qullan ajayur jan llakisiyañatakixa, uka ajayurjam ‘sarnaqañasawa’ ukat ukarjam ‘jakañasarakiwa’. Ukhamatwa cristianonakax jañchin munañanakaparus jan wali amtanakarus atipañäni (Gál. 5:16, 25, 26). Ukampis Diosan Aruparjamax kunatï jan walïki ukanak lurasin maysar saranuksna ukhaxa, qullan ajayuruw llakisiysna. Awisax jan amuyasisakiw ukar pursna.
6 Ukat qullan ajayurjam jan sarnaqasaxa, pachpa Jehová Diosaruw llakisiyaraksna. Ukhamax ¿uka jan walir jan puriñatakix kunanakat amuyasiñasasa? Uk amuytʼañatakix Efesios 4:25-32 jiskʼa tʼaqanakat yatxatañäni.
Jan llakisiyañatakix kunjam sarnaqañasasa
7, 8. ¿Kunatsa chiqpun parlañasa?
7 Chiqpun parlapxañäni. Efesios 4:25 jiskʼa tʼaqanxa Pablox akham siwa: “Kʼarinakxa jan parlkxapxamti; sapa maynis jaqi masinakamarux kunatix chiqäki ukak parlapxam, taqinis mä sapa cuerpon luriripakïtanwa” sasa. Niyakixay “taqinis mä sapa cuerpon[kstanxa]”, jilat kullakanakar pantjasiyañ amtampi jan walinak parlañasa, lurañas janipuniw walïkiti, ukax kʼarimp sasiwa. Ukar yatinuqtasax janiw Diosampi sum apasxsnati (Proverbios 3:32 liytʼasiñapawa).
8 Jan wali amtampi kun parlasas jan ukax kun lurasasa, jiwaskamaw jachjayassna. Jan ukhamäñatakix Daniel profetat yatiqasiñasawa, jupax taqininsa atiniskañaw chiqapar sarnaqäna (Dan. 6:4). Ukat Pablon arunakap amtapxapuniñäni, alaxpachar sarañataki ajllit cristianonakarux ‘mä cuerpokïpxtawa’ sasaw säna. Ukhamax janiw yaqha yaqha sarnaqañax wakiskiti, Jesucriston chiqa chuyman jilanakapax wali mayachtʼatäpxañapawa (Efe. 4:11, 12). Ukat aka Uraqin wiñay jakañ suyktan ukanakaxa, Diosan markapan mayachtʼat sarnaqañasarakiwa, ukatakix kunatï chiqäki ukpun parlañasawa.
9. ¿Efesios 4:26, 27 qillqatar istʼañax kunatsa wali wakiskirixa?
9 Supayar saykatañäni ukat sipitanakapat amuyasiñäni (Sant. 4:7). Qullan ajayuw Supayar saykatañatakix yanaptʼistaspa. Uk amuytʼañatakix colerasiñ tuqit parltʼañäni. Pablox akham sänwa: “Colerasisinxa jan juch lurapxamti, uka colerasiñanakamax jan jornalpachäpati. Janirak Supayarus jakʼachayasipxamti” sasa (Efe. 4:26, 27). Ukhamax colerampi atipayasiñax janiw walïkiti. Inas awisax colerañat colersna, ukampis chuymasan Jehová Diosar maytʼasiñasawa. Ukhamatwa coler apaqtayasisin ‘amuktsna’, ukatxa janiw qullan ajayur llakisiykañäniti (Pro. 17:27). Ukampis colerat qhiparasax Supayampiw jakʼachayassna, mä arunxa, sipitapar jaltʼasaw juchar pursna (Sal. 37:8, 9). Kunjamtï Jesusax siskänxa, khitimpi jan waltʼayasisas mäkiw askichañasa (Mat. 5:23, 24; 18:15-17).
10, 11. ¿Lunthatasiñax kunatsa jan walïki, ukat kunatsa taqi kunansa chiqa chuymanïñasa?
10 Lunthatasiñax janiw walïkiti, taqi kunansa chiqa chuymanïñasawa. Pablox akham sänwa: “Lunthatasirïkän ukaxa jan jukʼamp lunthataskxpanti, jan ukasti irnaqañaru uskuspan, sum irnaqasinwa pobrenakar yanaptʼañatakis utjarakini” sasa (Efe. 4:28). Mä cristianox lunthatasispa ukhaxa, Diosan ‘qullan sutipwa pʼinqachaspa’, jan ukax qʼañuchaspa (Pro. 30:7-9). Pisinkkasin lunthatasiñas janipuniw walïkiti. Khitinakatix Diosarus ukat jaqi masiparus munasipki ukanakax sum uk yatipxi (Mar. 12:28-31).
11 Lunthatasiñat sipansa kun lurañas wakisispa ukwa Pablox iwxtʼarakistu. Qullan ajayur jan llakisiyañatakixa, familiar yanaptʼañatakis jan ukax yaqhanakar kun waxtʼañatakis irnaqañasawa, ukhamatwa “pobrenakar yanaptʼañatakis utja[ni]” (1 Tim. 5:8). Janiw khitis Judas Iscarioter uñtat sarnaqañ munktanti. Jesusampi ukat arkirinakapampix pisinkirinakar yanaptʼañataki qullq imasipkäna ukwa jamasat apsurïtayna (Juan 12:4-6). Uka jan wali jaqix janiw qullan ajayurjam sarnaqkänti. Ukampis qullan ajayurjam sarnaqirinakax Pablor uñtatarakiw “taqi kunans sum sarnaqañ [muntanxa]” (Heb. 13:18). Ukham sarnaqasax janiw Diosan qullan ajayupar llakisiykañäniti.
¿Kunanakampit amuyasiñasäspasa?
12, 13. 1) Efesios 4:29 jiskʼa tʼaqarjamax kunjam arunakatsa amuyasiñasa? 2) ¿Arunakasax kunjamäñapasa?
12 Arunakasax sumäñapawa. Pablox akham sänwa: “Jan wali arunakx jan parlapxamti, jan ukasti suma arunakamp parlapxam, ukhamata istʼirinakamax jiltañana yanaptʼatäñapataki, ukhamarak bendecitäñapataki” sasa (Efe. 4:29). Kunanak parlañas jan walïkaspa, ukat kunjam parlañas wakisispa ukanakwa Pablox amtayistu. Yaqhanakar yanaptʼañatakix suma arunakampi parlañasawa, ukatakix Diosan qullan ajayupampi yanaptʼayasiñasawa. ‘Jan wali arunakax’ janipuniw lakasat mistuñapäkiti. ‘Jan wali arunaka’ sasin jaqukipatäki uka griego arux thujsantata jan ukax ñusantata sañ muni. Kunjamtï ñusantat achunak malltʼasas ukat thujsantat chawlla jan ukax aycha muktʼasas wal axtastanxa, ukhamarakiw jan wali arunakat axtasiñasa. Jan wali arunakax janipuniw Jehová Diosatakix akchʼas walïkiti.
13 Arunakasax “sumäñapapuniwa”, jayuñchtʼatäkaspas ukhamäñapawa (Col. 3:8-10; 4:6). Parlatas istʼasax Diosar yupaychirïtaswa jaqinakax amuyapxañapa. Ukat yaqhanakar ‘jiltañana yanaptʼañatakis’ “suma arunakamp” parlañasarakiwa. Salmonak qillqirit yatiqasiñasawa, jupax akham sänwa: “Tatay, arsutaxax jumar kusisiykirïpan, chuymaxan lupʼitapax nayraqatamkam purinpan, jumaw imantasiñ qarqaxätaxa, qhispiyirixätasa” sasa (Sal. 19:14).
14. ¿Efesios 4:30, 31 jiskʼa tʼaqarjamax kunanakatsa amuyasiñasa?
14 Jiskʼa chuymäñasa, thithiñas, sutichjasiñasa, ukham yaqha jan walinakas janipuniw walïkiti. Qullan ajayur jan llakisiyapxamti sasinxa akham sasaw Pablox sarakïna: “Chuyma usuchjasiñxatxa jithiqtapxam, taqi thithiñanakatsa, colerat chuymampi jachʼat artʼasiñanakatsa, jan wali arunakampi tuqisiñanakatsa, taqi jan wali luräwinakatsa” sasa (Efe. 4:30, 31). Niyakixay taqinis pantjasirïstanxa, ukhamax kunas chuymasan utji uk amuyasiñasawa, ukat kunsa wali amuyumpi lurañasarakiwa. Sañäni, wali ‘thithit’ sarnaqasksna jan ukax “colerat chuymampi” jan walinak parlasksna, yaqhanakan juchapaki uñchʼukisksna, uñisisksna ukat janirak perdonañs munksnati ukhaxa, qullan ajayuruw llakisiysna. Ukhamax ¿qullan ajay contra jan juchachasiñatakix kun lurañas wakisispa? Diosan Arupar istʼasin sarnaqañasawa. Jan ukhamäkaspa ukhax qhipat amtasiñaw utjaspa.
15. ¿Maynix chuym usuchtʼistaspa ukhax kun lurañasasa?
15 Khuyapayasiri, perdonasiri ukham suma jaqïpxañäni. Pablox akham siwa: “Sumankapxam, maynit maynikama khuyaptʼayasirïpxam, perdonasirïpxarakim maynit maynikama, kunjämtix Diosax jumanakaru perdonapxtam Cristo tuqi ukhama” sasa (Efe. 4:32). Maynin chuym ustʼayatax kunjamtï Diosax perdonkistu, ukham perdonañasarakiwa (Luc. 11:4). Sañäni, mä jilatas jan ukax kullakas jumat jan wal parlaspa ukhaxa, ¿kamachasmasa? Inas askichañatakix jupampi parlir sarchisma, ukat “pantjastwa” sasin perdón mayisispa ukhaxa, janiw aliqaki perdonañamäkiti. Jan ukasti, kuntï Levítico 19:18 jiskʼa tʼaqax siski ukarjam phuqañamawa, akham siwa: “Jaqi masimarusti janipuni kuna luratasa phuqsusirakimti, janiraki jupa tuqisa colerasiñamxa chuymamaru imxäsimti. Jaqi masimarusti juma kipkarjama munarakim. Nayätwa juman Tatitumaxa” sasa.
Amuyasipxapuniñäni
16. Qullan ajayur jan llakisiyañatakix kunanakat amuyasiñas wakisispa uk qhanañchtʼam.
16 Awisax sapaki jikxatasktan ukhaw jan walinakampi yantʼata uñjastanxa. Mä jilatas jan ukax mä kullakas jan wali musicanak sapa kuti ischʼukkaspa ukham amuytʼañäni. Ukat mä akatjamatwa kuntï Diosan Arupas ukat Amuyasiri Chiqapa Uywatas uka tuqit yatichki ukanak amtasi (Mat. 24:45). Ukatxa “janiw walïkiti” sasaw chuymapan amuytʼasi. Jehová Diosar maytʼasi ukat Efesios 4:30 jiskʼa tʼaqat amtasiraki. Ukat qullan ajayur jan llakisiyañatakix janiw kuna jan walsa lurañ munkiti, “janiw mayampis ischʼukxäti” sasaw uka musicanak apanuku. Ukham amtatapatxa walpun Jehová Diosax jupar yanaptʼani. Jïsa, qullan ajayur jan llakisiyañatakix sapa mayniw jan walinakat amuyasiñasa.
17. Jan amuyasksna ukat Diosat mayisiñs armasxaraksna ukhaxa, ¿kunarus purtʼassna?
17 Jan amuyasksna ukat Diosat mayisiñs armasiraksna ukhaxa, jan walinakar purisaw qullan ajayur llakisiysna. Ukat niyakixay uka ajayux Diosat jutchixa, ukhamax pachpa Jehová Diosarus llakisiyksna ukhamäspawa. Chiqansa, janiw khitis ukar purtʼasiñ munktanti (Efe. 4:30). Khä urunakanxa, judionakan ley yatichirinakapax Jesusar uñisiñat jan wal parlapxäna. Supayan chʼamapampiw milagronak luri sasaw ñanqha amtampi sapxäna (Marcos 3:22-30 liytʼasiñapawa). Uk sasinxa “Qullan Ajayu contra[w] ñanqha arunaka” parlapxäna. Uka juchax “janipuniw perdonatäkaniti” sasaw Bibliax qhanañchi. ¡Janiw khitis ukar purtʼasiñ munktanti!
18. ¿Jan perdonkañ juchanïtanti janicha ukxa kunjamatsa yatissna?
18 Ukham jan perdonkañ jachʼa juchar jan puriñatakixa, Pablon arunakapat amtasiñasawa: “Diosan Qullan Ajayuparux jan llakisiyapxamti” sasaw säna. Ukampis jumatix niya mä jachʼa juchar purxsta ukhaxa, ¿kun lurañamas wakisispa? Irpir chuymaninakampi yanaptʼayasiñamawa, ukat Diosar perdón mayisiñamarakiwa. Jumatix arrepintisitam ukhamat uñachtʼaysta ukhaxa, janiw qullan ajayu contrax juch lurktati. Ukatsti Diosaw qullan ajayupar jan llakisiyañamatakix yanaptʼätamxa.
19, 20. 1) ¿Kunanakatsa amuyasiñasa? 2) ¿Kunatakis sapa maynis chʼamachasiñasa?
19 Ukatxa, pachpa qullan ajayumpiw Jehová Diosax markapar yanaptʼaraki, ukatwa munasiñasa, sumankañasa ukat kusisiñas jiwas taypin utji (Sal. 133:1-3). Ukhamax uka qullan ajayur llakisiyañax janiw wakiskiti. Ukampis jilat kullakanakat jan ukax tama irpirinakat parlassna ukhax llakisiysnawa (Hech. 20:28, NM). Ukatxa, janirakiw tama taypinxa tʼaqa tʼaqa sarnaqañasäkiti. Jan ukasti, mayachtʼat sarnaqasiñasawa ukat respetos utjañaparakiwa. Pablox akham sasaw amtayistu: “Jilatanaka, Jesucristo Tatitusan sutipxaruw achiktʼapxsma, maya amtañanikïpxam, jan jumanak taypin yaqhachasiñax utjkpanti. Jan ukasti, mä wawak sarnaqasipxam; mä sapa amtañani, mä chuymanikiraki” sasa (1 Cor. 1:10).
20 Ukatxa, Jehová Diosakiw qullan ajayupar jan llakisiyañatakix yanaptʼistaspa. Ukhamax “pachpa qullan ajayumampi yanaptʼita” sasin mayisiñasawa. Maysa tuqitxa, sapa maynirakiw ‘ajayun munañaparjam yapuchañasataki’ chʼamachasiñasa, mä arunxa, qullan ajayurjam sarnaqañasawa. Ukhamatwa, qullan ajayur jan llakisiyasax jichhasa ukat jutïrinsa wiñayatak sum sarnaqasiñäni.
¿Qhanañchtʼasmati?
• Qullan ajayur jan llakisiyapxamti sasinxa, ¿kamsañs Pablox munäna?
• ¿Kunjamatsa mä cristianox qullan ajayur llakisiyaspa?
• ¿Qullan ajayur jan llakisiyañatakix kunjamsa sarnaqañasa?
[Jisktʼanaka]
[30 janan fotopa]
Maynimpi jan waltʼayasisax jankʼaki askichapxañäni
[31 janan fotopa]
¿Arunakamax kunjamasa?